ၵေႃႁူမ်ႈသၢင်ႈၵူၼ်းၼုမ်ႇတႆး တေသၢၼ်မိုဝ်း ၶိုၼ်ႈလွႆတေးမိူင်း ၸေႈလၢၼ်ႉ



ဝၼ်းတီႈ 25 April 2015 ၼႆႉ ၵေႃႁူမ်ႈသၢင်ႈ ၵူၼ်းၼုမ်ႇတႆး ဢွၼ်ႁူဝ်ၵူၼ်းၼုမ်ႇ မိူင်းတႆးပတ်းပိူၼ်ႉသေ ၶိုၼ်ႈပၵ်းတုင်းၸိူဝ်ႉၸၢတ်ႈ ၼိူဝ်လွႆတေးမိူင်း ၸေႈလၢၼ်ႉ ၸႄႈဝဵင်းမူႇၸႄႈ ၸိုင်ႈတႆးပွတ်းႁွင်ႇ။


မိူဝ်ႈၶိုၼ်ႈလွႆလဵင်း ဝၼ်းၸိူဝ်ႉၸၢတ်ႈၸိုင်ႈတႆး ဝၼ်းတီႈ 07/02/2014 ၵႃႈပူၼ်ႉမႃး
ဝၼ်းတီႈ 24/4/2015 ၵေႃႁူမ်ႈသၢင်ႈၵူၼ်းၼုမ်ႇတႆး ဢွၼ်ႁူဝ်ထူဝ်းၼႃႈ သူၼ်းတုမ်ၵူၼ်းၼုမ်ႇ လၢႆလၢႆဝဵင်း ႁူပ်ႉၵၼ်တီႈၸေႈလၢၼ်ႉ၊ ဝၼ်းတီႈ 25 ၵၢင်ၼႂ် တေၶိုၼ်ႈလွႆ တေးမိူင်း။ ယိူင်းဢၢၼ်းလဵပ်ႈႁဵၼ်း သိင်ႇဝႅတ်ႉလွမ်ႉ၊ ပႃႇမႆႇထိူၼ်ႇၶိူဝ်း၊ႁႂ်ႈၸိူဝ်းသႅၼ်းႁုၼ်ႈမႂ်ႇ မိုတ်ႈၵိုဝ်းၵၼ် မေႃၸွႆႈထႅမ်ၵၼ်၊ ႁႂ်ႈႁူႉႁၼ်ၵႃႈၶၼ် မေႃၵႅတ်ႇၵင်ႈၶူဝ်းႁႄႈ ၶူဝ်းတိုၼ်း ဢၼ်ၵိုၵ်းမိူင်းတႆး။
မိူဝ်ႈၶိုၼ်ႈလွႆသၢမ်သိပ်း
ၽူႈတႅမ်ႈလိၵ်ႈ ၶူးႁိူၼ်းၵႃယၢင်း လၢတ်ႈဝႃႈ- “ ၵၢၼ်ၶိုၼ်ႈလွႆၼႆႉ တွၼ်ႈတႃႇပၢႆးယူႇလီတႄႉၶႅမ်ႉယူႇ။ ပေႃးႁူမ်ႈၵၼ် ၽွမ်ႉၵၼ် ၼႄလႆႈဢဵၼ်ႁႅင်းၼႆ ၸႂ်လီၸႂ်ဢုၼ်ႇယူႇ။ ယိူင်းဢၢၼ်းလႄႈ တၢင်းၵၢၼ်ၼႆႉ ပေႃးယိူင်းတႃႇဢွမ်ႇလွမ်ႈၽွမ်ႉၵၼ်ၵူၺ်း သမ်ႉဢမ်ႇမီးလွင်ႈၶိုပ်ႈၼႃႈ တႃႇတေႁဵတ်းၵၢၼ်ၵႂႃႇမိူဝ်းၼႃႈၼႆ တေဢမ်ႇပေႃးထိုင်တီႈ။ တီႈဢေႇသုတ်း ၵၢၼ်ၸိူဝ်ႉၸၢတ်ႈဢၼ်ဝႃႈၼႆႉ ပဵၼ်ၵၢၼ်ပၢႆးမိူင်း၊ ၼင်ႇႁိုဝ်ၵူၼ်းမိူင်းၵူႈၵေႃႉ ၵူၼ်းၼုမ်ႇၵူႈၵေႃႉ ပေႃးတေၶဝ်ႈၸႂ်/ပွင်ႇၸႂ်ၼိူဝ် ၵၢၼ်မိူင်း၊ ပၼ်ႁႅင်းလႆႈ ၼိူဝ်ၵူၼ်းႁဵတ်းၵၢၼ်မိူင်း၊ တၢမ်တူဝ်ၸဝ်ႈၵဝ်ႇ ႁႂ်ႈပေႃးႁဵတ်းၵၢၼ်မိူင်းၵႂႃႇလႆႈၼၼ်ႉ ၵူၼ်းၼုမ်ႇႁဝ်းၵူႈၵေႃႉ ထုၵ်ႇလီၶတ်းၸႂ်ၵႂႃႇ ၸဵမ်မိူဝ်ႈလဵၵ်ႉမိူဝ်ႈၼုမ်ႇၼႆႉယူႇ” - ဝႃႈၼႆ။

မိူဝ်ႈႁူမ်ႈၵၼ်ပႆတၢင်းၶိုၼ်ႈလွႆသၢမ်သိပ်း Photo: Sai Zin Min Aye Facebook
ၵဵဝ်ႇၵပ်းလွင်ႈပၢင်ၶိုၼ်ႈလွႆၼႆႉသေ ၸၢႆးပႃႉ ၽူႈၶဝ်ႈၵေႃပွင်ပဵၼ် ပၢင်ၵူၼ်းၼုမ်ႇ ၶိုၼ်ႈလွႆတေးမိူင်း ၼၼ်ႉလၢတ်ႈဝႃႈ - “ယွၼ်ႉလွင်ႈ ပၼ်ႁႃ ၶွမ်ႊပၼီႊ မႃးယႃႉသၽႃႇဝသေ ၶုတ်းမၢၵ်ႇႁိၼ်ၶၢဝ် သီႊလီႊၵုၼ်ႇၵေႃႈ လွင်ႈၼိုင်ႈ၊ လွႆတေးမိူင်းၼႆႉ ပဵၼ်တီႈၵိုၵ်းပိုၼ်းႁဝ်း၊ ၵူၼ်းၼုမ်ႇၼႂ်းပိုၼ်ႉတီႈတုၵ်းယွၼ်းမႃး ႁႂ်ႈၵႂႃႇလဵပ်ႈႁဵၼ်း ၼႆ လႄႈ လႆႈသူၼ်းတုမ်ၵူၼ်း ၼုမ်ႇတႆးႁဝ်းၵူႈတီႈတီႈမႃး။ ႁႂ်ႈမေႃၵွင်ႉသၢၼ်မိုဝ်းၵၼ်ၵႅတ်ႇၵင်ႈၶူဝ်းႁႄႈၶူဝ်းတိုၼ်း ဢၼ်ၵိုၵ်း မိူင်းပေႃႈမိူင်းမႄႈႁဝ်းမႃး” - ဝႃႈၼႆ။

ၶပ်ႉမၢႆ ပၢင်ၶိုၼ်ႈလွႆတေးမိူင်းၸႄႈလၢၼ်ႉၼႆႉ ဝၼ်းတီႈ 24 ၶွၼ်ႈတုမ်ၵၼ်၊ ဝၼ်းတီႈ 25 ၶိုၼ်ႈလွႆ၊ ဝၼ်းတီႈ 26 ၸတ်းႁဵတ်းပၢင်တၢၼ်ႈၶႆႈၼႂ်းဝဵင်းၸႄႈလၢၼ်ႉ။

ၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network ၼႆႉ ယၢမ်ႈဢွၼ်ၵူၼ်းၼုမ်ႇတႆး ၵူႈတီႈတီႈ ၶိုၼ်ႈလွႆလဵင်းမိူင်းယႆ ဢၼ်သုင်သေပိူၼ်ႈ ၼႂ်းမိူင်းတႆး၊ ဝၢႆးၼၼ်ႉ သိုပ်ႇၶိုၼ်ႈလွႆသၢမ်သိပ်း ၵူတ်ႉၶၢႆ၊ လွႆၸၢင်ႉမိူင်းၵိုင်၊ လွႆၸၢင်ႉမိူင်းၶိူဝ်း ၵမ်းၼႆႉသမ်ႉ တေႁူမ်ႈၵၼ်ၶိုၼ်ႈ လွႆတေးမိူင်းၸေႈလၢၼ်ႉ။






 
© 2012 All Rights Reserved | Asean Celebrity | Fonts @ AtFonts | Free Templates