ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး (Shan Farmer Network) လႆႈၸတ်းႁဵတ်းပၢင်ၵုမ် လႅၵ်ႈလၢႆႈတၢင်းႁူႉ ၵဵဝ်ႇၵပ်းလူၺ်ႈလွင်ႈ လိၼ်သူၼ်ႁႆႈၼႃးလႄႈ သၽႃဝ သိင်ႇဝႅတ်ႉလွမ်ႉ တီႈဝဵင်းၼမ်ႉၸၢင်။

ပၢင်ၵုမ်လႅၵ်ႈလၢႆႈတၢင်းႁူႉ လွင်ႈလိၼ်သူၼ်ႁႆႈၼႃးလႄႈ သၽႃဝ သိင်ႇဝႅတ်ႉလွမ်ႉ တီႈဝဵင်းၼမ်ႉၸၢင်

ပၢင်ၵုမ် လႅၵ်ႈလၢႆႈတၢင်းႁူႉၵၼ်ၼၼ်ႉ ၸတ်းႁဵတ်းတီႈ ဝၢၼ်ႈၼွင် ဝတ်ႉလွႆငိုၼ်း တႃႇၶၢဝ်းတၢင်းသွင်ဝၼ်း တင်ႈတႄႇဝၼ်းတီႈ 29/3/2015 ထိုင် 30/3/2015 ဝဵင်းၼမ်ႉၸၢင်ၸိုင်ႈတႆးပွတ်းၸၢၼ်း။

တီႈပၢင်ၵုမ်ၼၼ်ႉ ၽူႈဢွၼ်ႁူဝ်တူင်ႉၼိုင် ၶဝ်သပ်းလႅင်းၵႂႃႇ ၵဵဝ်ႇၵပ်းလူၺ်ႈလွင်ႈ ဝၢင်းၽႅၼ် ၸႂ်ႉတိုဝ်း ၶူဝ်းႁႄႈ ၶူဝ်းတိုၼ်း သၽႃႇဝ သိင်ႇဝႅတ်ႉလွမ်ႉ ၼႂ်းမိူင်းတႆး။  ယွၼ်ႉၶွမ်ႊပၼီႊ လူင်ၶဝ် ၶဝ်ႈမႃး ၸတ်းႁူင်းၵၢၼ်၊ ၶုတ်းဢဝ်ၶူဝ်းႁႄႈ ၶူဝ်းတိုၼ်း ၵူၼ်းမိူင်းၸိုင်ႈတႆး ၸိူဝ်းပဵၼ်ၸဝ်ႈႁႆႈၸဝ်ႈၼႃး ၺႃးၸၢၵ်ႇလုသုမ်း ယွၼ်ႉမၼ်းၵႃႈႁိုဝ် ၵူၼ်းမိူင်းလႆႈတုမ်ႉတိူဝ်ႉၵႃႈႁိုဝ် ၸိူဝ်းၼႆႉ လႆႈသပ်းလႅင်လႅၵ်ႈလၢႆႈ တၢင်းႁူႉ တၢင်းႁၼ်ၵၼ်ၵႂႃႇၼႂ်းပၢင်သွၼ်။

လိူဝ်ၼၼ်ႉ လၢတ်ႈၼႄ ငဝ်းလၢႆးငမ်းယဵၼ်ဝၼ်းမိူဝ်ႈၼႆႉ။ ၸိုင်ႈတႆး ပဵၼ်သင်ယူႇ ယၢမ်းလဵဝ်။ ၵဵဝ်ႇၵပ်းသုၼ်ႇလႆႈ ၸဝ်ႈႁႆႈၸဝ်ႈၼႃးသေ လၵ်းမိူင်း 2008 သမ်ႉ ၶဵၼ်ႇတႅမ်ႈဝႆႉ ၸိူင်ႉႁိုဝ်၊ ၵူၼ်းမိူင်းၸၢင်ႈၺႃးၸၢၵ်ႇတုမ်ႉယွၼ်ၸိူင်ႉႁိုဝ်၊ ပႃးၸဵမ်လွင်ႈ ပိူင်ပဵၼ်ၸဝ်ႈႁႆႈၸဝ်ႈၼႃးလႄႈပၼ်ႁႃၸဝ်ႈႁႆႈၸဝ်ႈၼႃး။ လွင်ႈလႆႈၺႃးယိုတ်းတီႈလိၼ် ၽုၵ်ႇသွမ်ႈ တူင်ႈႁႆႈ တူင်ႈၼႃး။ သုၼ်ႇလႆႈသုၼ်ႇပဵၼ်ၸဝ်ႈၵဝ်ႇ သမ်ႉမီးသင်လၢႆလၢႆ ။ ၸၢင်ႈမီးတိုဝ်ႉတၢင်း တုၵ်းယွၼ်း ၵႅတ်ႇၵင်ႈ ၸိူင်ႉႁိုဝ်၊ မိူဝ်းၼႃႈ တေႁူမ်ႈသၢင်ႈတူင်ႉၼိုင်ၵႂႃႇၸွမ်းၵၼ်လႆႈ ၸိူင်ႉႁိုဝ်ၸဵမ်ၸိူဝ်းၼႆႉ။

ၶၢဝ်းတၢင်းပၢင်သွၼ်သွင်ဝၼ်း ၼႆႉ တူဝ်တႅၼ်း ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး သွင်ၵေႃႉ ဢွၼ်ႁူဝ်သေ ၸဝ်ႈႁႆႈၸဝ်ႈၼႃး ထုင်ႉဝဵင်းၼမ်ႉၸၢင် - ၸၢဝ်းယၢင်းလၢႆး ဝၢၼ်ႈလွႆပဝ်းလႄႈ ၵူၼ်းၼုမ်ႇႁိမ်းႁွမ်းမႃးၶဝ်ႈႁူမ်ႈလဵပ်ႈႁဵၼ်း 25 ၵေႃႉ ။