ဝၼ်းတီႈ 04-05/04/2015 တေမႃးၼႆႉ မုၵ်ႉၸုမ်းၵူၼ်းၼုမ်ႇတႆး (3) ၸုမ်းလႄႈ UNOCHA  ႁူမ်ႈၵၼ်သေ တေၸတ်းပၢင် ပၼ်ပိုၼ်ႉႁူႉပၢႆးႁၼ် ၵဵဝ်ႇၵပ်းၵၢၼ်မိူင်း တီႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ။

ၵူၼ်းၼုမ်ႇတႆး 3 ၸုမ်း မိူၼ်ၼင်ႇ - ၵေႃႁူမ်ႈသၢင်ႈၵူၼ်းၼုမ်ႇတႆး (TYN)၊ ဢွင်ႈႁဵၼ်းတႃႇၵႅမ်တူဝ်ႁုၼ်ႈယႂ်ႇ “ၶမ်းၵူႇ” KKCSD ၊ ၸုမ်းၵႃႈၸိူင်းတႆးသီတႃ (SETA) ၶဝ်သၢမ်ၸုမ်း ႁူမ်ႈၵၼ်ၶိုင်သၢင်ႈ။ ၾၢႆႇၵမ်ႉၸွႆႈသမ်ႉ United Nations Office for the Co–ordi nation of Humanitarian Affairs (UNOCHA) ၊  ငဝ်ႈငုၼ်း ၻီႊမွၵ်ႊၶရေႊသီႊ ၸိူဝ်ႉၶိူဝ်းတႆး SNLD တင်း ၵူၼ်းၼုမ်ႇတႆး တၢင်ႉယၢၼ်း ။


ၸၢႆးပ တၢင်ႉယၢၼ်း လၢတ်ႈထႅင်ႈဝႃႈ- “ၶူးသွၼ်ၸၢႆးသႅင်မိူင်း ၶမ်းၵူႇ တေမႃးပၼ်ပိုၼ်ႉႁူႉၵၢၼ်မိူင်းလႄႈ ငဝ်းလၢႆးဝၢၼ်ႈမိူင်းယၢမ်းလဵဝ်ၼႆဢေႃႈ၊ ၸၢႆးသႅင်မိူင်း မူႇၸႄႈ သမ်ႉ တေမႃးပၼ်တၢင်းႁူႉ ၵဵဝ်ႇၵပ်းၵၢၼ်ပႂ်ႉပႃး ၽႅၼ်ႇလိၼ်ၸိုင်ႈတႆးသေ ၸုမ်းၶူးဝၼ်း လႅင်းၶဝ်သမ်ႉ တေမႃးၵႃႈၸိူင်း ၼႄၾၢင်ႁၢင်ႈ ပၼ်တၢင်းႁူႉ ၼႆဢေႃႈ” - ဝႃႈၼႆ။


ပၢင်ပၼ်ပိုၼ်ႉႁူႉၵဵဝ်ႇလွင်ႈၵၢၼ်မိူင်း ၸိူင်ႉၼင်ႇၼႆၼၼ်ႉ မိူဝ်ႈလိူၼ်ပူၼ်ႉၼၼ်ႉၵေႃႈ ငဝ်ႈငုၼ်းၻီႊမွၵ်ႊၶရေႊသီႊ ၸိူဝ်ႉၶိူဝ်းတႆး ဝဵင်းတၢင်ႉယၢၼ်း တင်း ၽူႈၵွၼ်းႁူင်းႁဵၼ်းၶမ်းၵူႇ(KKCSD) ၸၢႆးသႅင်မိူင်း ယၢမ်ႈႁူမ်ႈၵၼ် ၸတ်းပၢင်သွၼ် ၶၢဝ်းပွတ်းတီႈ ဝဵင်းတၢင်ႉယၢၼ်းၵႂႃႇၵမ်းၼိုင်ႈ။


ၸိုင်ႈတႆးပွတ်းၸၢၼ်း တၢင်းဝဵင်းၼမ်ႉၸၢင်ၵေႃႈ ၵူၼ်းၼုမ်ႇၸိူဝ်းဢၼ်တူင်ႉၼိုင် ၼႂ်းၵေႃႁူမ်ႈသၢင်ႈ ၸဝ်ႈႁႆႈ ၸဝ်ႈၼႃးတႆး (SFN) တိုၵ်ႉၸတ်းႁဵတ်းပၢင်ပၼ် ပိုၼ်ႉႁူႉ ပေႃႈမႄႈၵူၼ်းမိူင်း ၸဝ်ႈႁႆႈ ၸဝ်ႈၼႃး ၵဵဝ်ႇၵပ်း သုၼ်ႇလႆႈသုၼ်ပဵၼ်ၸဝ်ႈႁႆႈၸဝ်ႈၼႃးလႄႈ တၢင်းႁူႉတၢင်းႁၼ် ၵဵဝ်ႇၵပ်းလွင်ႈႁၵ်ႉသႃၵၢၼ်ၽုၵ်ႇသွမ်ႈ။