ပၢင်ပွႆးၶူၼ်ႉၶႆႈတႅမ်ႈတွပ်ႇလိၵ်ႈ ပရိယတ်ႉတိသတ်ႉထမ်မ ပႃႇလၵႅၼ်ႇၸဝ်ႈ ၶွပ်ႈတဵမ် 50 ပီ ပီၵွၼ်းၶမ်း၊ ႁဵတ်းပႃး ႁွင်ႈၼႄပိုၼ်း မေႃၵႂၢမ်းၸၢႆးမူး (မေႃသွၼ်ႁူၺ်ႈၸွႆး) ။

ပၢင်ပွႆး ပီၵွၼ်းၶမ်း ဝဵင်းမိူင်းပၼ်ႇ

ႁွင်ႈၼႄပိုၼ်းၶူးမေႃၵႂၢမ်းၸၢႆးမူး ၼႆႉၼႄဝႆႉၾၢင်ႁၢင်ႈၸၢႆးမူး ၸဵမ်မိူဝ်ႈပၢၼ်တႄႇႁၢပ်ႇၵၢၼ်ၸိူဝ်ႉၸၢတ်ႈ ႁဵတ်းမေႃသွၼ်လိၵ်ႈတႆး၊ ႁွင်ႉၵႂၢမ်းလုၵ်ႉၽိုၼ်ႉၸဵမ်ၸိူဝ်းၼႆႉ။ လိူဝ်ၼၼ်ႉယင်းမီးပႃးႁွင်ႈၼႄပိုၼ်း ၵဵဝ်ႇလူၺ်ႈသိူၵ်ႈ ပိုၼ်းမိူင်းပၼ်ႇ ႁၢင်ႈပိုၼ်းၸဝ်ႈၾႃႉမိူင်းပၼ်ႇ ၊ ၶူးမေႃ လိၵ်ႈတႆးၸဝ်ႈၵေႃးလီႇ ၊ ဢိၵ်ႇၸၢႆးၽူႈၵတ်ႉၶႅၼ်ႇၵိုၵ်း ပိုၼ်းမိူင်းပၼ်ႇလၢႆၸဝ်ႈလၢႆတူၼ် ။ ဢွင်ႈတီႈ တိူၵ်ႈသွၼ်လိၵ်ႈပရိယတ်ႉတိ မူၺ်ႇတေႃႇ ၊ ပွၵ်ႉတူၵ်း ၊ ဝဵင်းမိူင်းပၼ်ႇ ၊ ၸိုင်ႈတႆးပွတ်းၸၢၼ်း။

ပၢင်ပွႆး ပီၵွၼ်းၶမ်း ဝဵင်းမိူင်းပၼ်ႇ

ၸၢႆးမူး (မေႃသွၼ်ႁူၺ်ႈၸွႆး) ပဵၼ်ၵူၼ်းၸႃႇတိမိူင်းပၼ်ႇ၊ ပဵၼ်လုၵ်ႈလုင်းၸၢႆး (လူႉယဝ်ႉ) လႄႈ ပႃႈဢူင်းၺုၼ်ႉ (မိူဝ်ႈလဵဝ်ဢႃယု 83 ပီ ယူႇမိူင်းပၼ်ႇ)၊ ၸၢႆးမူးၵိူတ်ႇမိူဝ်ႈ 15/01/1960 ၊တႄႇၼႃႈႁိူၼ်းႁူမ်ႈ ၵၼ်တင်းၼၢင်းပႅင်း (လူႉမိူဝ်ႈ 20/10/2014) မီးလုၵ်ႈလၢင်းႁူမ်ႈၵၼ် 3 ၵေႃႉ 1. ၼၢင်းၸၢမ်ၶမ်း၊ 2.ၸၢႆးၸိူင်းမႂ်ႇ၊ 3.ၼၢင်းသႅင် ဢိုၼ်းမိူင်း။ ၶူးမူးၼႆႉယဝ်ႉႁူင်းႁဵၼ်းၸၼ်ႉသုင်ႁူင်းမုၼ်းလႅင်း ၸႄႈၵႅင်း ။တင်ႈတႄႇပီ 1979-1994 ၸၢႆးမူး ၸွႆႈႁၢပ်ႇၵၢၼ်ၸိူဝ်ႉၸၢတ်ႈ ပဵၼ်မေႃသွၼ်၊ တႅမ်ႈလိၵ်ႈ၊ တႅမ်ႈၵႂၢမ်း၊ ႁွင်ႉၵႂၢမ်းပူၵ်း တိုၼ်ႇၸႂ်ႁၵ်ႉၸၢတ်ႈ၊ ႁၢပ်ႇ ၵၢၼ်လုၵ်ႉၽိုၼ်ႉပၢၼ်သိုၵ်း SURA, TRA, MTA ၊ ပဵၼ်ၽူႈႁူမ်ႈ ၵေႃႇတင်ႈၸုမ်း ၸိူင်းလႅဝ်း Freedom’s Way band ႁူမ်ႈၵၼ်တင်း သၶႁ လႄႈၸၢႆးၶုၼ်သိူဝ် မိူဝ်ႈပီ 1984 ။

ႁွင်ႈၼႄပိုၼ်းမေႃၵႂၢမ်းၸၢႆးမူး (မေႃသွၼ်ႁူၺ်ႈၸွႆး)

တီႈၼႂ်းပၢင်ပွႆးဝၼ်းတီႈ 23 – 29 လိူၼ် April ၼႆႉမီးပၢင်တြႃးလႄႈပၢင်မူၼ်ႈသိူဝ်းလဝ်ႇမူၼ်ႈတၢင်းၵႃႈၾိင်ႈ ထုင်းႁွင်ႉၵႂၢမ်းပၢၼ်ၵဝ်ႇပၢၼ်မႂ်ႇၵူႈၶမ်ႈၶိုၼ်း။ဝၼ်းတီႈ 26 – 29 ၼႆႉတေမီးပၢင်းမူၼ်ႈသိူဝ်း ၸုမ်းၸိူင်းလႅဝ်း ၊ ၸုမ်း Noname ၊ ၸုမ်းလုၵ်ႈႁၵ်ႉၼၢင်းယေႈသႅင်ၵေႃႇ ၊ ၸုမ်းသၢႆလႅင်းမႂ်ႇ မူၼ်ႈၸႂ်ပၼ်။ ပၢၼ်ၵဝ်ႇၸုမ်းၸၢတ်ႈသႅင်းတႆး “မွၵ်ႇၵွၼ်တႆး” မူၼ်ႈၸႂ်ပၼ်ၶဵင်ႇပၢင်မူၼ်ႈသိူဝ်းၼႆႉတေမီးၶဵင်ႇၽႂ်ႇမၼ်းတင်း သဵင်ႈမီး ယူႇ3 ၶဵင်ႇ- 1 ၶဵင်ႇတၢင်းၵႃႈၾင်ႈထုင်း ၊ 2 ၶဵင်ႇႁွင်ႉၵႂၢမ်း ၊ 3 ၶဵင်ႇၸၢတ်ႈသႅင်းပၢၼ်ၵဝ်ႇ။

လိူဝ်ၼၼ်ႉမီးပႃးဝႂ်ၸၢမ်းသုၼ်ႇမိူၼ်ၼင်ႇ ၵႃး Vigo ၽၵ်းတူၶိုင်ႈ၊ ရူတ်ႉၶိူင်ႈ မီးဝႂ်ၶွၼ်ႇလႆႊသိၼ်ႊၵႃးပႃးၸွမ်း ၊ ထူဝ်ႈ ၊ ထီးဝီး ၊ တူႈယဵၼ် ၸဵမ်ၸိူဝ်းၼၼ်ႉဝႂ်ၽူႈၵႂၢမ်ႇလီတႄႉၼိုင်ႈဝႂ်လႂ် 5000 ပျႃး။

ၸၢႆးတႃႉၵေႃႉၶဝ်ႈပႃးၼႂ်းၸုမ်းၵေႃပွင်ၵၢၼ်ၶပ်းၶိုင်ပၢင်ပွႆးလၢတ်ႈဝႃႈ -“တႃႇတေႁဵတ်းပဵၼ်ပၢင်ပွႆးမႃးၼႆႉပီႈၼွင်ႉ ၵူၼ်းမိူင်းပၼ်ႇႁူမ်ႈၵၼ်သေႁၢင်ႈႁႅၼ်းပဵၼ်ၶၢဝ်းတၢင်း 4 ပီပၢႆၼႂ်း ပၢင်ပွႆးၼႆႉယိူင်းဢၢၼ်း ႁႂ်ႈပီႈၼွင်ႉၵူၼ်းမိူင်း ပၼ်ႇၸိူဝ်းဢၼ်ၵႂႃႇယူႇတီႈၵႆ ဢိၵ်ႇပႃးႁႂ်ႈပီႈၼွင်ႉၵူႈတီႈပတ်းပိုၼ်ႉ မႃးႁူပ်ႉထူပ်းမီးလွင်ႈမိုတ်ႈၵိုဝ်းၸမ်ၸႂ်ၵၼ်” ။

ၶပ်ႉမၢႆပၢင်ပွႆးပီၵွၼ်းၶမ်း ဝၼ်းတီႈ 23 – 27 ၊ 04 ၊ 2015 သင်ၶၸဝ်ႈတႅမ်ႈတွပ်ႇၶူၼ်ႉၶႆႈလိၵ်ႈ ဝၼ်းတီႈ 28 ၊ 04 ၊ 2015 ပွတ်းၼႂ်တေပၢင်းပီႇတၵၢတ်ႈလဵပ်ႈဝဵင်း ဝၢႆးဝၼ်းတွၼ်ႈ တေမီးပၢင်ယွင်ႈၵုင်ႇယေႃးမုၼ်ၸဝ်ႈဢၼ် ႁပ်ႉလႆႈၸုမ်ႈၶူး။

ဝၼ်းတီႈ 29 /04/2015 ၵၢင်ၼႂ် ပၢင်ယေႃးမုၼ်ၸဝ်ႈတူၼ်ၶူးလူင်ၶဝ်ၸဝ်ႈ ၸိူဝ်းၵတ်ႉၶႅၼ်ႇလိၵ်ႈ ။