လုမ်းလွႆလႅမ် ဢမ်ႇႁပ်ႉၶၻီး လွင်ႈသိုၵ်းမၢၼ်ႈ ၶိုင်ၵၼ်ႉၸၼ်ဢွၼ်ႇယိင်း



လုမ်းၾၢႆႇၽွင်းငမ်း ၸႄႈဝဵင်းလွႆလႅမ် ဢမ်ႇႁပ်ႉ ယိုၼ်ႈလိူင်ႈ ၶၻီး (ဢမု) လွင်ႈသိုၵ်းမၢၼ်ႈ တပ်ႉၶမယ 513 ၶိုင်ၵၼ်ႉၸၼ် ဢွၼ်ႇယိင်းသႅၼ်းႁုၼ်ႈ ဝၢၼ်ႈၵုင်းၵွၼ်း ၼႂ်းဢိူင်ႇတွင်ၼဝ်ႈ၊ ၽွင်းယူႇႁိူၼ်းၵေႃႉလဵဝ်။


ဢွၼ်ႇယိင်း ၵေႃႉထုၵ်ႇသိုၵ်းမၢၼ်ႈၶိုင်ၵၼ်ႉၸၼ်
ဝၼ်းတီႈ 22/04/2015 (မိူဝ်ႈဝႃးၼႆႉ) ပေႃႈမႄႈဢွၼ်ႇယိင်း တင်းၵူၼ်းဝၢၼ်ႈၵူၼ်းသူၼ် ၽွမ်ႉၵၼ်ၵႂႃႇယိုၼ်ႈလိူင်ႈ ၶၻီး လွင်ႈသိုၵ်းမၢၼ်ႈတပ်ႉၶမယ 513 ၶိုင်ၵၼ်ႉၸၼ် ဢွၼ်ႇယိင်းသႅၼ်းႁုၼ်ႈ တီႈဝၢၼ်ႈၵုင်းၵွၼ်း ဢိူင်ႇတွင်ၼဝ်ႈ ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း၊ တီႈလုမ်းၾၢႆႇၽွင်းငမ်း ၸႄႈဝဵင်းလွႆလႅမ်။ ၵူၺ်းၵႃႈ လုမ်းၾၢႆႇၽွင်းငမ်းလွႆလႅမ် ဢမ်ႇႁပ်ႉၶၻီးၼႆႉ။

ဝၢၼ်ႈၵုင်းၵွၼ်း ဢၼ်ဢွၼ်ႇယိင်း ထုၵ်ႇသိုၵ်းမၢၼ်ႈၶိုင်ၵၼ်ႉၸၼ်ၼႆႉ ယူႇၼႂ်းဢိူင်ႇတွင်ၼဝ်ႈ ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း၊ ယၢၼ်ၾၢႆႇၸၢၼ်းဝဵင်းလွႆလႅမ် မွၵ်ႈ 3 လၵ်း။ ၸိုဝ်ႈပေႃႈမႄႈဢွၼ်ႇယိင်း ၶုၼ်ႇၼႆႇ- ၼၢင်းၶမ်း (ၸိုဝ်ႈပွမ်)၊ ဢွၼ်ႇယိင်းၼၢင်းပီး (ၸိုဝ်ႈပွမ်)၊ ၸၢဝ်းၶိူဝ်းပဢူဝ်း။

ၵဵဝ်ႇၵပ်းလွင်ႈၼႆႉ ဢွၼ်ၼႃႈၼႆႉ မီးတပ်ႉသိုၵ်းမၢၼ်ႈ တပ်ႉၶမယ 513 ဢဵၼ်ႁႅင်း 50 ၵေႃႉပၢႆ ၵႂႃႇတူင်ႉၼိုင်ပွတ်းတွင်ၼဝ်ႈ၊ ၽူႈဢွၼ်ႁူဝ်ငႃးသိုၵ်း ပဵၼ်ၸဝ်ႈႁၢၼ် ဢွင်ႇမိၼ်ႇတူႇ တင်း ၶုၼ်သိုၵ်းလူင် ၵျေႃႇမိၼ်ႉၼၢႆႇ။ ၼႂ်းၼၼ်ႉ မီးသိုၵ်းမၢၼ်ႈၵေႃႉၼိုင်ႈ  (မွၵ်ႈၸၼ်ႉႁူဝ်ႁၢၼ် ႁူဝ်သိုၵ်း) ၸိုဝ်ႈ သြႃႇမိၼ်ႉတဵင်း ဢၼ်ပဵၼ်ၵေႃႉ ၶိုင်ၵၼ်ႉၸၼ်ၼၢင်းယိင်းဢွၼ်ႇ။

လွင်ႈၼႆႉ ၵိူတ်ႇၶိုၼ်ႈပူၼ်ႉမႃးမိူဝ်ႈ ဝၼ်းတီႈ 17/04/2015 (ၶၢဝ်းၽွင်းသၢင်းၵျၢၼ်ႇ/ သွၼ်းၼမ်ႉ)။ ဝၼ်းၼၼ်ႉ ၶၢဝ်းယၢမ်းႁူဝ်ၶမ်ႈ မွၵ်ႈ 6 မူင်း၊ သြႃႇမိၼ်ႉတဵင်းၼႆႉ ၶိုၼ်ႈၵႂႃႇၼိူဝ်ႁိူၼ်း ဢၼ်မီးၼၢင်းယိင်းဢွၼ်ႇသႅၼ်းႁုၼ်ႈ ဢႃယု 14 ၶူပ်ႇ တီႈဝၢၼ်ႈၵုင်းၵွၼ်းသေ ၶိုင်ဢၢင်ႈၵၼ်ႉၸၼ်။ ၽွင်းၼၼ်ႉ ပေႃႈမႄႈၼၢင်းယိင်းဢွၼ်ႇသမ်ႉ ၵႂႃႇၵၢၼ်ပွၵ်ႈမႃးသေ လႆႈငိၼ်းသဵင်လုၵ်ႈယိင်းၶႃ ႁွင်ႉသႅၼ်ႇ၊  ၶႃသွင်ၵေႃႉၽူဝ်မေးၵေႃႈလႅၼ်ႈၶိုၼ်ႈ ႁိူၼ်းမိူဝ်းၵႂႃႇ၊ ၵႂႃႇၺႃးမႅၼ်ႈၽွင်း သြႃႇမိၼ်ႉတဵင်း တိုၵ်ႉသိၵ်ႇသိူဝ်ႈၶူဝ်းလုၵ်ႈယိင်းၶႃသေ ၶိုင်ၵၼ်ႉၸၼ်။ ၵူၺ်းၵႃႈ ဢမ်ႇတၼ်းထိုင်တီႈလႆႈၵၼ်ႉၸၼ် လူလၢႆ- ၼႆယဝ်ႉ။

ၵူၼ်းဝၢၼ်ႈၵေႃႈဢွၼ်ၵၼ်မႃးတီႉၺွပ်းမၼ်း (သြႃႇမိၼ်ႉတဵင်း)။ ၽူႈၵွၼ်းငႃးသိုၵ်းၶဝ် ၸဝ်ႈႁၢၼ်ဢွင်ႇမိၼ်ႇတူႇ ၵေႃႈလၢတ်ႈဝႃႈ- လွင်ႈၵူၼ်းသိုၵ်းႁဝ်းပူၼ်ႉပႅၼ်ၼႆႉ ႁဝ်းတေပၼ်တူတ်ႈတၢမ်ႇ ပေႃႉႁႅမ် ႁႂ်ႈသူၵူၼ်းဝၢၼ်ႈ ပေႃးႁၢၼ်ႉၸႂ်။ ၵူၼ်းဝၢၼ်ႈတႄႉဝႃႈ ဢၼ်ပေႃႉႁႅမ်သေ ပၼ်မၼ်းယဝ်ႉၵႂႃႇလွၵ်ႇလွၵ်ႇလၢႆလၢႆတႄႉ ႁဝ်းဢမ်ႇၶႂ်ႈႁႂ်ႈမၼ်းပဵၼ်။ ႁဝ်းၶႂ်ႈႁႂ်ႈမၼ်းၺႃးတူတ်ႈတၢမ်ႇ ဢၼ်ၵိုင်ႇငၢမ်ႇမၼ်း၊ ပေႃးသူတေပေႃႉႁႅမ်မၼ်းၵေႃႈ ပေႃႉႁႅမ်ႁႂ်ႈမၼ်းတၢႆပၢၵ်ႇၼႃႈႁဝ်းလႄႈ- ၵူၼ်းဝၢၼ်ႈဢွၼ်ၵၼ်တုၵ်းယွၼ်း ၼင်ႇၼႆ။

ယွၼ်ႉပိူဝ်ႈဢွၼ်ႇယိင်းဢွၼ်ႇ ဢႃယု 14 ၶူပ်ႇ ဝၢၼ်ႈၵုင်းၵွၼ်းၼႆႉ  ထုၵ်ႇသိုၵ်းမၢၼ်ႈမႃးၶိုင်ၵၼ်ႉၸၼ် လူလၢႆသေ မိူဝ်ႈဝႃး (22/04/2015) ၵူၼ်းဝၢၼ်ႈၵူၼ်းသူၼ်လႄႈ ပေႃႈမႄႈ လုၵ်ႉတီႈဝၢၼ်ႈပႆတၢင်းမႃး တီႈလွႆလႅမ်သေ မႃးယိုၼ်ႈလိူင်ႈတီႈ လုမ်းၾၢႆႇၽွင်းငမ်း တီႈဝဵင်းလွႆလႅမ်။

လွင်ႈတၢင်းဢၼ်လႆႈထိူင်းထိူဝ်ႉ ၸိူင်ႉၵၢတ်ႈ၊ ပိူင်ပဵၼ်မၼ်းၵိူတ်ႇၶိုၼ်ႈၸဵမ်မိူဝ်ႈ ၶၢဝ်းၽွင်းသွၼ်းၼမ်ႉ သမ်ႉတိုၵ်ႉၸင်ႇႁႃလႆႈမႃးတၢင်ႇလုမ်း (ဝၼ်းတီႈ 22 မိူဝ်ႈဝႃး)ၵူၺ်းၼႆႉ ၵွပ်ႈဝႃႈၵူၼ်းဝၢၼ်ႈၼႆႉ ၾၢႆႇၼိုင်ႈၵေႃႈၵူဝ်၊ ၾၢႆႇၼိုင်ႈၵေႃႈ ဢမ်ႇပေႃးႁူႉလွင်ႈမၼ်း။ ၵူၺ်းၵႃႈ ၵွပ်ႈဝႃႈ ပေႃးဢမ်ႇၵႂႃႇယိုၼ်ႈလိူင်ႈၵေႃႈ ဢမ်ႇပဵၼ်ၼႆသေ ၵူၼ်းဝၢၼ်ႈၸင်ႇလႆႈၽွမ်ႉၵၼ် ၶိုၼ်ႈမႃးတီႈလွႆလႅမ်သေ မႃးယိုၼ်ႈလိူင်ႈ မိူဝ်ႈဝႃးၼႆႉ- ၼႆယဝ်ႉ။

ၵူၺ်းၵႃႈ ၽူႈဢၼ်ယူႇတီႈလုမ်းလွႆလႅမ်ၵေႃႉၼိုင်ႈ လၢတ်ႈတီႈၵူၼ်းဝၢၼ်ႈဝႃႈ- ဢမ်ႇမီးၵူၼ်းလူင်၊ ၵူၼ်းလူင်ဢမ်ႇယူႇ။ လွင်ႈၶၻီး (ဢမု) ဢၼ်မႃးယိုၼ်ႈၼႆႉ ႁဝ်းဢမ်ႇၸၢင်ႈႁပ်ႉဝႆႉ- ဝႃႈၼႆ။

ၵပ်းၵၢႆႇလွင်ႈၼႆႉ ၵူၼ်းၸႂ်ၸမ်ၾၢႆႇလုမ်းၽွင်းငမ်း တီႈလွႆလႅမ်ၵေႃႉၼိုင်ႈ လၢတ်ႈဝႃႈ- လွင်ႈၶၻီးၼႆႉ မၼ်းၵဵဝ်ႇၵပ်းသိုၵ်း။ ပေႃးဝႃႈႁဵတ်းလိူင်ႈတေႃႇသိုၵ်းၼႆႉ ပၼ်ႁႃမၼ်းၸၢင်ႈထူင်ႇထဵဝ်ႈ ယိုတ်ႈယၢဝ်း၊ ၵွပ်ႈၵူဝ်ပဵၼ်ပၼ်ႁႃၵၼ်တင်းသိုၵ်းလႄႈ ၶဝ်ဢမ်ႇၶႂ်ႈႁပ်ႉၶၻီးၼႆႉၵေႃႈ ၸၢင်ႈပဵၼ်လႆႈ- ဝႃႈၼႆ။




 
© 2012 All Rights Reserved | Asean Celebrity | Fonts @ AtFonts | Free Templates