တပ်ႉသိုၵ်းလူင်ပွင်ၸိုင်ႈမၢၼ်ႈ ၸႂ်ႉႁႅင်းသိုၵ်းတၢင်းလိၼ် ႁူမ်ႈတင်းတၢင်းၵၢင်ႁၢဝ် လေႃႇတိုၵ်းတပ်ႉသိုၵ်း ၸၢဝ်းၶိူဝ်း ၵူဝ်းၵၢင်ႉ၊ ယိုတ်းလႆႈၶိုၼ်းတပ်ႉပၢင်သဝ်း 44 တီႈ။ ၾၢႆႇသိုၵ်းမၢၼ်ႈတၢႆဝၢတ်ႇ တင်းၼမ်။

သိုၵ်းမၢၼ်ႈဢွၵ်ႇၶၢဝ်းတၢင်း Photo: Facebook

သိုဝ်ႇၶၢဝ်ႇထႆး ASTV ၽူႈၸတ်းၵၢၼ်ဢွၼ်ႊလၢႆႊ ဢွၵ်ႇၶၢဝ်ႇမိူဝ်ႈဝၼ်းတီႈ 19/04/2015 ဝႃႈ- မီးႁၢႆးငၢၼ်းၶၢဝ်ႇ လုၵ်ႉတီႈလႅၼ်လိၼ်ထႆး-မၢၼ်ႈမႃးဝႃႈ တၢင်းတပ်ႉသိုၵ်းမၢၼ်ႈ လႆႈဢွၵ်ႇလိၵ်ႈပိုၼ်ၽၢဝ်ႇဝႃႈ ၼႂ်းၸူဝ်ႈၸႃႈၵႄႈၵၢင်ဝၼ်းတီႈ 05-14/04/2015 ၾၢႆႇတပ်ႉသိုၵ်းမၢၼ်ႈ တပ်ႉပႆလိၼ်၊ တပ်ႉၶိုၵ်ႉတွၼ်း၊ တပ်ႉၸုမ်းလူင် (တပ်ႉမ) 11, 33, 66, 77, 88 ၸိူဝ်းၼႆႉ ဢိၵ်ႇတပ်ႉၵၢင်ႁၢဝ် (ႁိူဝ်းဝိၼ်)သေ ႁူမ်ႈၵၼ်လေႃႇတိုၵ်းယိုဝ်း တပ်ႉသိုၵ်းၵူဝ်းၵၢင်ႉ (MNDAA) ပွတ်းၸႄႈဝဵင်းလၢဝ်ႇၵၢႆး ၼႃႈလိၼ်ၽွင်းငမ်းတူဝ်ၵဝ်ႇၵူဝ်းၵၢင်ႉ ၸိုင်ႈတႆးပွတ်းႁွင်ႇ။

ဢိင်ၼိူဝ်တပ်ႉသိုၵ်းမၢၼ်ႈ လေႃႇတိုၵ်းတၢင်းလိၼ် တင်းတၢင်းၵၢင်ႁၢဝ်ၼင်ႇၵၼ်သေ ၾၢႆႇတပ်ႉသိုၵ်းမၢၼ်ႈ ႁုပ်ႈယိုတ်းလႆႈတပ်ႉပၢင်သဝ်း တီႈတပ်ႉသိုၵ်းၵူဝ်းၵၢင်ႉၶိုၼ်းတင်းမူတ်း 44 တပ်ႉ၊ သိုၵ်းမၢၼ်ႈလူႉသုမ်း ၸီဝိတ်ႉသၢႆၸႂ် 16 ၵေႃႉ၊ တိူဝ်ႉဝၢတ်ႇၸဵပ်းတင်းမူတ်း 110 ၵေႃႉ။ ၼွၵ်ႈသေၼၼ်ႉ ၾၢႆႇတပ်ႉသိုၵ်းမၢၼ်ႈ ယိုတ်းလႆႈပႃးၶိူင်ႈၵွင်ႇၵၢင်ႇ မၢၵ်ႇမိုဝ်ႈၸိုၼ်းယၢမ်းၶွင်ၸုမ်းၵူဝ်းၵၢင်ႉတင်းၼမ်- ၼႆယဝ်ႉ။

တပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းဢူၺ်းလီၻီႊမူဝ်ႊၶရႅတ်ႊတိၵ်ႊ ၵူႈၸၢဝ်းၶိူဝ်းမိူင်းမၢၼ်ႈ (MNDAA) ၵူဝ်းၵၢင်ႉၼႆႉ တႄႇပဵၼ်ပၢင်တိုၵ်းၵၼ်မႃး ၽွင်းႁူဝ်လိူၼ်ၾႅပ်ႊၿိဝ်ႊရီႊ (2015) ၼႂ်းၼႃႈလိၼ်ၽွင်းငမ်းတူဝ်ၵဝ်ႇ ၵူဝ်းၵၢင်ႉ ၸိုင်ႈတႆးပွတ်းႁွင်ႇ။ မီးၵူၼ်းမိူင်းထူပ်းၽေးယွၼ်ႉပၢင်တိုၵ်း လူႉတၢႆၼပ်ႉႁူဝ်ပၢၵ်ႇ၊ ပၢႆႈဢွၵ်ႇၼွၵ်ႈပိုၼ်ႉတီႈ ၵႂႃႇပိုင်ႈယူႇသဝ်းတၢင်ႇဝၢၼ်ႈတၢင်ႇမိူင်း ၼပ်ႉႁူဝ်မိုၼ်ႇ။