ယွၼ်ႉပိူဝ်ႈလူမ်းလႅင်ႉလူင် ၽတ်ႉပဝ်ႇၼႂ်း ၸိုင်ႈတႆး ပွတ်းဢွၵ်ႇ/ ႁွင်ႇသေ ႁိူၼ်းယေး ရူတ်ႉၵႃး ႁၢၼ်ႉၶၢႆၶူဝ်းၵုၼ်ႇသိၼ်ၵႃႉ ၸိူဝ်းၼႆႉ လႆႈလူႉၵွႆတင်းၼမ်၊ ၵူၼ်းၵေႃႈလႆႈတိူဝ်ႉဝၢတ်ႇၸဵပ်း လူမ်ႉတၢႆၵေႃႉၼိုင်ႈ။

တူၼ်ႈမႆႉလူမ်ႉသႂ်ႇရူတ်ႉၵႃး တီႈႁိူၼ်းၸၢႆးတုၺ်ႈ ဝၢၼ်ႈႁူၺ်ႈလိၼ်လမ်

ပူၼ်ႉမႃးမိူဝ်ႈဝၼ်းတီႈ 19/04/2015 ယၢမ်းဝၢႆးဝၼ်း 4 မူင်းပၢႆ လူမ်းလႅင်ႉၽတ်ႉပဝ်ႇ တီႈၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ဢိၵ်ႇႁိမ်းလႅၼ်လိၼ်မိူင်းထႆး-မၢၼ်ႈ (ၼႂ်းၸႄႈဝဵင်းမႄႈသၢႆ)။ ယွၼ်ႉပိူဝ်ႈလူမ်းလႅင်ႉလူင်ၽတ်ႉပဝ်ႇၼႆႉသေ တူၼ်ႈမႆႉၺွင်ႇ တူၼ်ႈမႆႉႁုင်း လူမ်ႉသႂ်ႇၼိူဝ်ႁိူၼ်းၸၢႆးတုၺ်ႈ ဝၢၼ်ႈႁူၺ်ႈလိၼ်လမ် ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း၊ တဵင်ၺႃးၵူၼ်းတၢႆၵေႃႉၼိုင်ႈ ဝၢတ်ႇၸဵပ်း 3 ၵေႃႉ၊ ရူတ်ႉၵႃးႁွၼ်ႊၻႃႊၵျႅတ်ႊသ် မၼ်းၸၢႆးလမ်းၼိုင်ႈၵေႃႈ လႆႈလူႉၵွႆ- ၼႆယဝ်ႉ။

“ႁိူၼ်းၶႃႈပိုတ်ႇဝႆႉႁၢၼ်ႉမႄးရူတ်ႉၶိူင်ႈ၊ ၽွင်းမိူဝ်ႈလူမ်းလႅင်ႉလူင် ၽတ်ႉပဝ်ႇမႃးႁႅင်းႁႅင်းၼၼ်ႉ ၵူၼ်းမႃးမႄးရူတ်ႉၶိူင်ႈမီး 7-8-9 ၵေႃႉ၊ တႃႇသွင်ၵေႃႉၼၼ်ႉ တူၼ်ႈမႆႉလူမ်ႉတဵင်သႂ်ႇသေ ဢဝ်လုပ်ႇၶီႈၶင်ႈႁၵ်းၵႂႃႇ၊ တႃႇၵေႃႉၼိုင်ႈတိူဝ်ႉဝၢတ်ႇၸဵပ်း လွၵ်ႈမၢၼ်ႉ၊ ၵေႃႉၼိုင်ႈတႄႉတၢႆထင်တီႈ။ ၵေႃႉဢၼ်တၢႆၼၼ်ႉ ၸိုဝ်ႈႁွင်ႉၸၢႆးလၢတ်ႉ၊ ဢႃႇယုတိုၵ်ႉ 16 ပၢႆၵူၺ်း၊ ၶႃႈႁဝ်းၵေႃႈပဵၼ်လွင်ႈ ၸႂ်ဢမ်ႇလီတႄႉတႄႉ။ ယၢမ်းလဵဝ် ၵူၼ်းႁိူၼ်းၶႃႈႁဝ်းၼႆႉၵေႃႈ ဢမ်ႇမီးတီႈယူႇတီႈၵိၼ်၊ လႆႈၵႂႃႇပိုင်ႈသဝ်းယူႇဝႆႉတီႈဝတ်ႉမုၼ်ၸဝ်ႈဢေႃႈ- ဝႃႈၼႆ။

ၸၢႆးလၢတ်ႉ ၵေႃႉဢၼ်တူၼ်ႈမႆႉလူမ်ႉတဵင်တၢႆၼၼ်ႉ ပဵၼ်လုၵ်ႈၸၢႆးဢေး-ၼၢင်းဢုင်ႇ ယူႇဝၢၼ်ႈႁူၺ်ႈလိၼ်လမ်၊ မီးၼွင်ႉယိင်းၵေႃႉၼိုင်ႈ။ မိူဝ်ႈလဵဝ် ၵူၼ်းၼႂ်းဝၢၼ်ႈၼႂ်းသူၼ်ႁူမ်ႈၵၼ်ႁၢင်ႈႁႅၼ်း ၶိုင်ပွင်ပၼ် ပၢင်ၸႃပၼၸၢႆးလၢတ်ႉဝႆႉ။ ဢၼ်ဝၢတ်ႇၸဵပ်း 2 ၵေႃႉၼၼ်ႉ ဢဝ်သူင်ႇၶဝ်ႈႁူင်းယႃဝႆႉၼႂ်းမိူင်းထႆး တၢင်းမႄႈသၢႆ- ၼႆယဝ်ႉ။

ယွၼ်ႉပိူဝ်ႈလူမ်းလႅင်ႉလူင်ၽတ်ႉပဝ်ႇသေ တီႈဝၢၼ်ႈႁူၺ်ႈလိၼ်လမ် ႁိူၼ်းယေးၵူၼ်းဝၢၼ်ႈလူႉၵွႆ 20 လင်ပၢႆ၊ လင်ၶႃးႁိူၼ်းၸိူဝ်းၼႆႉ ပိဝ်ၸွမ်းလူမ်း။ ၼွၵ်ႈသေၼၼ်ႉ ၾၢႆႇမိူင်းထႆး တၢင်းမႄႈသၢႆၵေႃႈ မီးလွင်ႈထူပ်းၽေးလူမ်းလႅင်ႉလူင်ၽတ်ႉပဝ်ႇ ၶူဝ်းၶွင်ၵူၼ်းမိူင်းလူႉသုမ်းၼမ်ဝႆႉ- ၸၢႆးဢၢႆႈသူၺ်ႇ ၵူၼ်းဝၢၼ်ႈႁူၺ်ႈလိၼ်လမ်လၢတ်ႈ။

လိူဝ်သေတီႈတႃႈၶီႈလဵၵ်း မိူဝ်ႈဝႃးၵၢင်ၼႂ် တီႈတၢင်းဝဵင်းလႃႈသဵဝ်ႈ/ ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၸိူဝ်းၼႆႉၵေႃႈ ၾူၼ်တူၵ်းႁႅင်း၊ လူမ်းလႅင်ႉလူင်ၽတ်ႉပဝ်ႇလႄႈ မီးလွင်ႈလူႉသုမ်းတင်းၼမ်။ လင်ၶႃးမုင်းႁိူၼ်းပိဝ်၊ လင်ၶႃးမုင်း ႁၢၼ်ႉတၢင်းၶၢႆၸွမ်းၸိူဝ်းၶၢင်ႈတၢင်းၸိူဝ်းၼႆႉၵေႃႈ ပိဝ်ၸွမ်းလူမ်း- ၼႆယဝ်ႉ။

ၼၢင်းယိင်းၵေႃႉၼိုင်ႈ ၵူၼ်းဝၢၼ်ႈႁၢတ်ႇၵႃ ဢိူင်ႇႁူးမူၼ်ႈ ၸႄႈဝဵင်းလႃႈသဵဝ်ႈလၢတ်ႈဝႃႈ- တိုၵ်ႉႁႃသိုဝ်ႉၶိူင်ႈပၼ်ႇၵုၺ်/ ပိုတ်းၵုၺ်မႃးဢမ်ႇပေႃးႁိုင်၊ လူမ်းလႅင်ႉမႃးၽတ်းပဝ်ႇသေ ပႃးၵႂႃႇၸွမ်းလူမ်းမူတ်း၊ လွင်ႈလူႉသုမ်းတေမီးႁိမ်းၸမ် သွင်လၢၼ်ႉငိုၼ်းမၢၼ်ႈ (20 သႅၼ်)- ဝႃႈၼႆ။

ၼႂ်းၶၢဝ်းတၢင်းပီၼႆႉ ၵူၼ်းဝၢၼ်ႈၵူၼ်းမိူင်းၼႂ်းၸိုင်ႈတႆး ထူပ်းၽေးသၽႃဝၵမ်းတီႈ 2 ။ ၵမ်းတီႈ 1 ပဵၼ်မိူဝ်ႈၼႂ်းႁူဝ်လိူၼ်ဢေႊပရိူဝ်ႊလ်၊ ၾူၼ်လူမ်းႁႅင်းလႄႈ မၢၵ်ႇႁဵပ်းတူၵ်းႁႅင်းပွတ်းဝဵင်းပၢင်လူင် ၸိုင်ႈတႆးပွတ်းၸၢၼ်း၊ မိူဝ်ႈၼၼ်ႉ မၢၵ်ႇၶဝ်ႈတဝ်ႈၼမ်ႉၵူၼ်းဝၢၼ်ႈ ဢၼ်ၽုၵ်ႇဝႆႉၼႂ်းႁႆႈၼႂ်းသူၼ် လူႉသုမ်းတင်းၼမ်။