ၶူးသွၼ်လိၵ်ႈတႆး ၵေႃႉၼိုင်ႈ ၸႄႈဝဵင်းမိူင်းၼၢႆး ၺႃးသိုၵ်းမၢၼ်ႈ ၵၵ်းၶင် ပေႃႉထုပ်ႉ ထဵတ်ႈထၢမ် ၶၢဝ်ႇငၢဝ်းသိုၵ်းတႆး။

ၶူးသွၼ်ၸၢႆးသၢႆၶိူဝ်း ဝၢၼ်ႈၼႃးၵုၼ်

ၶူးသွၼ်ၸၢႆးသၢႆၶိူဝ်း ဝၢၼ်ႈၼႃးၵုၼ် ဢိူင်ႇၵုင်းလူမ်း ၸေႈဝဵင်း မိူင်းၼၢႆး ၺႃးသိုၵ်းမၢၼ်ႈ တပ်ႉမိူင်းၼၢႆး တိမတ်ႉ ထဵတ်ႈထၢမ်ၶၢဝ်ႇ သိုၵ်းတႆး ၽွင်းမၼ်းၸၢႆး ဢၢၼ်းၵႂႃႇႁူပ်ႉ ၶူးသွၼ်  ဝၢၼ်ႈၼႃးတေႃ၊ ၼွင်ယူၺ်ႉ၊ ၼမ်ႉယူမ်း၊ သွင်ၵေး၊ ၵုင်းလႅင်၊ ၼႃးလေႃႉ၊ ၵုင်းမူႉလေႇ၊ မႆႉၼိဝ်ႉ၊ တီႈဝတ်ႉၵျွင်းၶမ်း ။  ႁူပ်ႉၺႃးသၢႆသိုၵ်းမၢၼ်ႈသေ ၺႃးသိုၵ်းမၢၼ်ႈ တိမတ်ႉၵႂႃႇၸဵမ်မိူဝ်ႈ ဝၼ်းတီႈ 1 - 3/2/2015 ။  ၺႃးသိုၵ်းမၢၼ်ႈ မတ်ႉၵိုၵ်းတူၼ်ႈမႆႉ ပိတ်ႉႁူဝ်မၼ်းၸၢႆး ပေႃးလိုမ်းတူဝ် - ဝႃႈၼႆ။


ၶူးသွၼ်ၸၢႆးသၢႆၶိူဝ်း လၢတ်ႈဝႃႈ - “သိုၵ်းမၢၼ်ႈ ထဵတ်ႈထၢမ်ၶႃႈဝႃႈ သိုၵ်းတႆး ယူႇတီႈလႂ်၊ ၵႂႃႇတၢင်းလႂ်၊ ၶဝ်ၾိုၵ်းၵၢၼ်သိုၵ်းတီႈလႂ်၊ ႁႅင်းၵူၼ်းၶဝ်မီးၵႃႈႁိုဝ် ပေႃးဢမ်ႇလၢတ်ႈတေတႅပ်းတိၼ် တႅပ်းမိုဝ်းပႅတ်ႈ - ဝႃႈၼႆဢေႃႈ။ ၶႃႈၵေႃႈဢမ်ႇႁူႉတႄႉၶႃႈလူး။ ၶႃႈၵေႃႈတွပ်ႇ လွင်ႈၶႃႈဢမ်ႇႁူႉ၊ ၼႆတိၵ်းတိၵ်း လႄႈ တိၼ်ထိုပ်ႈႁူဝ်ၶႃႈ သၢမ်ၵမ်း ပေႃးလိုမ်းတူဝ် လပ်းသိင်ႇၵႂႃႇၶႃႈဢေႃႈ” - ဝႃႈၼႆ။


သိုၵ်းမၢၼ်ႈ ဢဝ်ၵွင်ႈၸမ်ႈမၼ်းၸၢႆး၊ မတ်ႉမိုဝ်းမၼ်းၸၢႆး၊ ။ ၸၵ်ႉဢဝ်ၵၢၵ်ႇသေႃး လူတ်ႉၶိူင်ႈ မၼ်းၸၢႆးသေ သွၵ်ႈ ထူင်။ ဢီးလူတ်ႉၶိူင်ႈမၼ်းၸၢႆးလူမ်ႉပႅတ်ႈ။ ပွႆႇၼမ်ႉမၼ်းႁႄႈ ပႅတ်ႈမူတ်း တေမီးမွၵ်ႈ 4 တဝ်ႈ၊ ၵူၼ်းဝၢၼ်ႈမႃးႁၼ် သေ ဢဝ်မိူဝ်းပၼ်မၼ်းၸၢႆး တီႈဝၢၼ်ႈၶိုၼ်း။ ငိုၼ်းမၼ်းၸၢႆး 9000 တႄႉ သိုၵ်းမၢၼ်ႈဢမ်ႇဢဝ်ၵႂႃႇၼင်ႇၵဝ်ႇ - ဝႃႈၼႆ။


ၽွင်းသိုၵ်းမၢၼ်ႈတိဢဝ်တူဝ်ၶူးသွၼ်သၢႆၶိူဝ်းဝႆႉၼၼ်ႉ သိုၵ်းမၢၼ်ႈယင်းတိမႃးထႅင်ႈၵူၼ်းဝၢၼ်ႈသၢမ်ၵေႃႉ။ ပဵၼ် ၸၢႆးလိုၼ်း ၼၢင်းယွမ်း လုင်းၵႅင်း ၽွင်းၵႂႃႇၽၼ်းမႆႉ တႃႇႁဵတ်းႁိူၼ်း။ ၸၢႆးလိုၼ်း ၺႃးသၼ်ၽႃႉ တုၵ်းႁူဝ် သၢမ်ၵမ်း၊  ၼၢင်းယွမ်း ၺႃးဢဝ်မိတ်ႈၸမ်ႈၶေႃးသေထဵတ်ႈထၢမ်။ လုင်းၵႅင်းၺႃးသမ်ႉၺႃးလွၵ်ႇငိုတ်ႈဝႃႈ ပေႃးဢမ်ႇလၢတ်ႈၶၢဝ်ႇသိုၵ်းတႆး တေတႅပ်းတိၼ်တႅပ်းမိုဝ်းပႅတ်ႈ ဝႃႈၼႆ။


ၼႂ်းၶဝ်ၼၼ်ႉယင်းလၢတ်ႈဝႃႈ သိုၵ်းမၢၼ်ႈပဵၼ်တပ်ႉတီႈမိူင်းၼၢႆး တပ်ႉလႂ်ဢမ်ႇႁူႉ။ ၵူၺ်းၵႃႈတီႈၵွင်ႈၶဝ်တႄႉ တႅမ်ႈဝႆႉ 248 ၊ ၵွင်ႈမၢင်ၵေႃႉ/လဝ်း သမ်ႉတႅမ်ႈ 518 ဝႃႈၼႆ။


ၸႄႈဝဵင်းမိူင်းၼၢႆး မီးတပ်ႉၵွင်သိုၵ်းမၢၼ်ႈ တပ်ႉ ၶလယ 248 ၊ ၶမယ 518 ။ ဝၢၼ်ႈၼႃးၵုၼ် ဢိူင်ႇၵုင်းလူမ်းသမ်ႉ မီးၼႂ်းၵႄႈ မိူင်းၼၢႆး တင်း မွၵ်ႇမႆႇ - ၶဝ်ႈပႃးၼႂ်းၸႄႈတွၼ်ႈလၢင်းၶိူဝ်း။ ပွတ်းတွၼ်ႈၼၼ်ႉ မီးတပ်ႉသိုၵ်းၸိုင်ႈတႆး RCSS/SSA ဢၼ်လူင်းလၢႆးမိုဝ်းသၢင်ႈလွင်ႈငမ်းယဵၼ် ၸၼ်ႉမိူင်းႁူမ်ႈတုမ် သေ ဢမ်ႇၵႃး ပဵၼ်တပ်ႉသိုၵ်းဢၼ်လဵဝ် ၼႂ်းမိူင်းတႆး ဢၼ်လူင်းလၢႆးမိုဝ်း တင်းလူင်ပွင်ၸိုင်ႈမၢၼ်ႈ / သိုၵ်းမၢၼ်ႈ မိူဝ်ႈဝၼ်းမိူင်းႁူမ်ႈတုမ် 12/3/2015 ပူၼ်ႉမႃးၼႆ။