သိုၵ်းလူင်ပွင်ၸိုင်ႈတင်းသိုၵ်းရၶႅင်ႇ တိုၵ်းၵၼ် ၼႂ်းၸႄႈမိူင်းရၶႅင်ႇ ပွၵ်ႈဢွၼ်တၢင်းသုတ်း



တပ်ႉသိုၵ်းလူင်ပွင်ၸိုင်ႈမၢၼ်ႈ လႄႈတပ်ႉသိုၵ်းရၶႅင်ႇ (AA) ပဵၼ်ပၢင်တိုၵ်းၵၼ်ၶိုၼ်း ၼႂ်းၸႄႈမိူင်းရၶႅင်ႇ  ပွၵ်ႈဢွၼ်တၢင်းသုတ်း သေ တီႉလႆႈသိုၵ်းမၢၼ်ႈ တူဝ်လိပ်း 3 ၵေႃႉ၊ တူဝ်တၢႆ ၵေႃႉၼိုင်ႈ ဝႃႈၼႆ။

ဝၼ်းတီႈ 29.03.2015 ဝၼ်းဢႃးတိတ်ႉ ယၢမ်းၵၢင်ၼႂ် 12 မူင်းပၢႆၼၼ်ႉ သိုၵ်းမၢၼ်ႈ တပ်ႉၵွင် 289 လႄႈ တပ်ႉသိုၵ်းရၶႅင်ႇ ပဵၼ်ပၢင်တိုၵ်းၵၼ် ၽၢႆႇတူၵ်း "ပလႅတ်ႉဝ" တင်းၾၢႆႇႁွင်ႇ "ၵျွၵ်ႉတေႃႇ" ပိုၼ်ႉ တီႈတိတ်းဢိူမ်ႈ မိူင်းပင်းၵလႃးတိၸ်ႉ။


တီႈပၢင်တိုၵ်းၼၼ်ႉ ၾၢႆႇသိုၵ်းရၶႅင်ႇပိုၼ်ၽၢဝ်ႇဝႃႈ - တီႉလႆႈၵူၼ်းသိုၵ်းမၢၼ်ႈ 3 ၵေႃႉ ပႃးၸၼ်ႉၶုၼ်သိုၵ်းၵေႃႉၼိုင်ႈ။ တူဝ်တၢႆ ၵေႃႈ 1 ၵေႃႉ။ ၾၢႆႇသိုၵ်းရၶႅင်ႇတႄႉ ဢမ်ႇတုမ်ႉသင်ၼႆ ၸဝ်ႈသိုၵ်းလူင် Dr.ၺူဝ်ႇထုၼ်းဢွင်ႇ ၵႅမ်ၽူႈၵွၼ်းသိုၵ်းသုင်သုတ်း AA (Arakan Army) လၢတ်ႈၼင်ႇၼႆ။


"ယွၼ်ႉၽူႈၶဵၼ်ပွႆႇၽႃႈပႅတ်ႈတပ်ႉၵႂႃႇလႄႈ ႁဝ်းၸင်ႇၶဝ်ႈသိမ်းဢဝ်လႆႈ ၶူဝ်းၶွင်ဢၼ်မီးတီႈၶဝ်ၼၼ်ႉ၊ မိူဝ်ႈလဵဝ်ၼႆႉတေႉၵေႃႈ ၽၢႆႇသိုၵ်းမၢၼ်ႈၶဝ် ထႅမ်ႁႅင်းသိုၵ်းမႃးလႄႈ ၸၢင်ႈတေသိုပ်ႇ မီးပၢင်တိုၵ်းထႅင်ႈယူႇ" - ဝႃႈၼႆ။


တပ်ႉသိုၵ်းရၶႅင်ႇၼႆႉ ၶွတ်ႇၽွတ်ႈမိူဝ်ႈပီ 2008 ၼႂ်းၼႃႈတီႈ KIA ၵုမ်းၵမ်သေ တူင်ႉၼိုင်ၵၢၼ်သိုၵ်းၸွမ်းၵၼ် ၼႂ်းၸႄႈမိူင်းၶၢင်၊ ငဝ်ႈငုၼ်းသိုၵ်းၵေႃႈပၵ်းသဝ်းဝႆႉၼႂ်းမိူင်းၶၢင်။ ယၢမ်းလဵဝ်ၶဝ်ႈပႃးဝႆႉၼႂ်း ၸုမ်းႁူမ်ႈသၢင် ၵၢၼ် ၵိုတ်းတိုၵ်းတူဝ်ႈမိူင်း (NCCT) ။ ၼႂ်းမိူင်းရၶႅင်ႇတႄႉတူင်ႉၼိုင်ၸွမ်း ပႃႊတီႊပူတ်းပွႆႇ မိူင်းရၶႅင်ႇ (ALP) ပွတ်းလႅၼ်လိၼ် ၸႄႈမိူင်းရၶႅင်ႇ တင်း မိူင်းပင်းၵလႃးတိၸ်ႉ။


ၽိုၼ်ႁၢႆးငၢၼ်း ၶၢဝ်ႇ BNI (Burma News International) ႁၢႆးငိုၼ်းမိူဝ်ႈပီ 2014 (ပပ်ႉႁၢႆးငၢၼ်း ၽိုၼ်ဢိင်လွင်ႈငမ်းယဵၼ် ပီ 2014) ၼႆႉ တႅမ်ႈဝႆႉဝႃႈ ႁႅင်းသိုၵ်း AA မီး 1200 ပၢႆ ဝႃႈၼႆ။

ၶေႃႈမုလ်းၶၢဝ်ႇၵမ်ႈၼမ် ပိၼ်ႇဢဝ်မႃးတီႈ ( http://www.narinjara.com/burmese/ )




 
© 2012 All Rights Reserved | Asean Celebrity | Fonts @ AtFonts | Free Templates