သိုၵ်းမၢၼ်ႈလႆႈၶၢဝ်ႇ သိုၵ်းတဢၢင်းသေ ထႅမ်ႁႅင်းသိုၵ်းၸူး သိုၵ်းတဢၢင်း။ သိုၵ်းတဢၢင်းၵေႃႈ လႆႈၶၢဝ်ႇသိုၵ်းမၢၼ်ႈ သေ ပႂ်ႉယိုဝ်းၸွမ်းတၢင်း၊ သိုၵ်းမၢၼ်ႈတၢႆ 3 ဝၢတ်ႇ 5 ။

TNLA-photo-TSYO

ဝၼ်းတီႈ 01/02/2015 ၵၢင်ၼႂ်ယၢမ်း 08:00 မူင်း၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) တပ်ႉၵွင် 773 ၊ ပႃႈတႂ်ႈတပ်ႉၸုမ်း 3 တင်း သိုၵ်းမၢၼ်ႈ ပႃႈတႂ်ႈတပ်ႉၸုမ်းလူင် (တပ်ႉမ) 77 ပဵၼ်ပၢင်တိုၵ်းၵၼ် တီႈဝၢၼ်ႈၼႃးလိူဝ်ႇ၊ ဝူင်ႈၵၢင်ဝၢၼ်ႈလီႈလူႉ လႄႈ ဝၢၼ်ႈၶျွင်းသႃႇ၊ ဢိူင်ႇပၢင်လူင်၊ ၾၢႆႇတူၵ်းပၢင်လူင်၊ ၾၢႆႇၸၢၼ်းဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။

ၵဵဝ်ႇၵပ်းလွင်ႈၼႆႉ ၾၢႆႇသိုၵ်းမၢၼ်ႈလႆႈၶၢဝ်ႇဝႃႈ တပ်ႉသိုၵ်းတဢၢင်း မႃးတူင်ႉၼိုင်တၢင်းဝၢၼ်ႈၶျွင်းသႃႇသေ ထႅမ်ႁႅင်းသိုၵ်း လုၵ်ႉၼမ်ႉတူႈ ၶိုၼ်ႈၵႂႃႇတၢင်းဝၢၼ်ႈၶျွင်းသႃႇ။  ၾၢႆႇသိုၵ်းတဢၢင်း လႆႈၶၢဝ်ႇသိုၵ်းမၢၼ်ႈသေပႂ်ႉမူၵ်းယိုဝ်းၵၢင်တၢင်း၊ သိုၵ်းမၢၼ်ႈတၢႆ 3 ၵေႃႉ၊ ဝၢတ်ႇၸဵပ်း 5 ၵေႃႉ။ ၾၢႆႇတပ်ႉသိုၵ်းတဢၢင်း ဢမ်ႇမီးလွင်ႈဝၢတ်ႇၸဵပ်းလူႉတၢႆ- ၼႆယဝ်ႉ။

ဢၼ်ပႂ်ႉမူၵ်းယိုဝ်းသိုၵ်းမၢၼ်ႈၼႆႉ ၾၢႆႇသိုၵ်းတဢၢင်း မီးၵူၼ်း 3 ၵေႃႉၵူၺ်း၊ သိုၵ်းတဢၢင်းၼႆႉ ပေႃးယိုဝ်းယဝ်ႉၵေႃႈၵႂႃႇယဝ်ႉ၊ ၵူၺ်းၵႃႈ သိုၵ်းမၢၼ်ႈတပ်ႉၸုမ်းလူင် 77 တႄႉ တိုၵ်ႉထႅမ်ႁႅင်းသိုၵ်းၶိုၼ်ႈၸူး တၢင်းဝၢၼ်ႈၶျွင်းသႃႇယူႇ- ၵူၼ်းပွတ်းၼမ်ႉတူႈ ၵေႃႉၼိုင်ႈလၢတ်ႈ။

ၾၢႆႇၼိုင်ႈတၢင်းၼိုင်ႈ၊ ဢွၼ်ၼႃႈၼႆႉ ဝၼ်းတီႈ 25-26/01/2015 တပ်ႉသိုၵ်းတဢၢင်း (TNLA)  တပ်ႉၵွင် 478 လူင်းပိုၼ်ႉတီႈ တူင်ႉၼိုင် ၵၢၼ်ၽဵဝ်ႈမူၺ်ႉယႃမဝ်းၵမ် ၼႂ်းဢိူင်ႇပၢၼ်းသေး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ ထုၵ်ႇသိုၵ်းမၢၼ်ႈ တပ်ႉၸုမ်းလူင် (တပ်ႉမ) 88 ဢဝ်ၵွင်ႈလူင်ယိုဝ်းသႂ်ႇ၊ ႁဵတ်းႁႂ်ႈသွင်ၾၢႆႇ လႆႈပဵၼ်ပၢင်တိုၵ်းၵၼ်- ၼႆယဝ်ႉ။