လူတ်ႉၵႃးသင်ၶၸဝ်ႈ ၶဝ်ႈႁူမ်ႈပၢင်ပွႆး ၸဝ်ႈသြႃႇတႃသႅင် ပိၼ်ႈတူၵ်းလွႆ၊ သင်ၶၸိုဝ်ႈယႂ်ႇ လူႉလွၼ်ႇသဵင်ႈမုၼ်
ၸဝ်ႈသင်ၶမိူင်းတႆး ဝဵင်းၵုၼ်ႁဵင် ယေႃးတူဝ်ၶဝ်ႈႁူမ်ႈ
ပၢင်ပွႆးလုမ်းလႃးၶၢပ်ႈတူဝ် (သၢင်းၵျဵဝ်ႇ) ၸဝ်ႈသြႃႇတႃသႅင် ၼႂ်းမိူင်းထႆး၊
ပွၵ်ႈၶိုၼ်းလူတ်ႉၵႃးၵိူတ်ႇၽေးဢုပၢတ်ႈ ပွတ်းတၢင်း။
သင်ၶၸဝ်ႈၸိုဝ်ႈယႂ်ႇဝဵင်းၵုၼ်ႁဵင် လူႉလွၼ်ႇသဵင်ႈမုၼ် တူၼ်ၼိုင်ႈ၊
ဝၢတ်ႇၸဵပ်းသွင်တူၼ်၊ ၵူၼ်းႁိူၼ်းဝၢတ်ႇၸဵပ်းသွင်ၵေႃႉ။
လူတ်ႉၵႃးလမ်းဢၼ်ပိၼ်ႈလူင်းလွႆ |
တူၼ်ၸဝ်ႈဢၼ်လူႉလွၼ်ႇ သဵင်ႈမုၼ် ယွၼ်ႉၽေးဢုပၢတ်ႈၼႆႉ ပဵၼ်ၸဝ်ႈတူၼ်ၶူး (ၸဝ်ႈသြႃႇ) သုၸႃတ ဢႃႇယု 61 ပီ၊ ၸဝ်ႈၵွၼ်းဝတ်ႉသုၶိတႃရူင်ႇ ပွၵ်ႉ 3 ဝဵင်းၵုၼ်ႁဵင်။ ၵူၼ်းႁေႃႈလူတ်ႉၵႃးၵေႃႈ ပဵၼ်တူၼ်ၸဝ်ႈသြႃႇသုၸႃတ ဢၼ်လူႉလွၼ်ႇၵႂႃႇၼႆႉၼင်ႇၵဝ်ႇ။ မၼ်းၸဝ်ႈၼႆႉ ပဵၼ်ၽူႈမၢႆသင်ၶ ၼႂ်းဝဵင်းၵုၼ်ႁဵင်၊ ပဵၼ်ၽူႈမၢႆသင်ၶမႃးလႆႈ 2-3 ပၢၼ်ယဝ်ႉ၊ ၶၢပ်ႈတူဝ်မၼ်းၸဝ်ႈၼႆႉ မိူဝ်းၽႅဝ်ၶိုၼ်းတီႈဝဵင်းၵုၼ်ႁဵင် ယၢမ်း 5 မူင်းၵၢင်ၼႂ် ၶွင်ဝၼ်းတီႈ 29/01/2015 ၼႆႉ။ ဝၼ်းလိူၼ် 3 မူၼ်း (ဝၼ်းတီႈ 03/02/2015)ၼႆႉ တၢင်းတၵ်ႉၵႃႇသတ်ႉထႃး ၸႄႈဝဵင်းၵုၼ်ႁဵင် တေၸတ်းပၢင်ၵုမ်လူင် ပိူဝ်ႈတႃႇဢုပ်ႇဢူဝ်း လွင်ႈလုမ်းလႃး ၶၢပ်ႈတူဝ် ၸဝ်ႈတူၼ်ၶူး သုၸႃတ ၼႆႉ- သင်ၶၸဝ်ႈ တူၼ်ဢၼ်ၸမ်ၸႂ် ၸဝ်ႈသုၸႃတ ဢၼ်လူႉလွၼ်ႇၵႂႃႇ လၢတ်ႈ။
သင်ၶၸဝ်ႈ 2 တူၼ် ဢၼ်ဝၢတ်ႇၸဵပ်းၼႆႉ တၢင်းတၵ်ႉၵႃႇသတ်ႉထႃး ဝဵင်းၵုၼ်ႁဵင်-ၵႃလိ ၶဝ်တိတ်းတေႃႇတၢင်းၾူၼ်ႊမႃးဝႃႈ ႁႂ်ႈဢဝ်လူင်းယူတ်းယႃ တီႈဝဵင်းၵဵင်းမႆႇ။ ၾၢႆႇၼိုင်ႈၵေႃႈ သင်ၶၸဝ်ႈ တူၼ်ဢၼ်ၵႂႃႇယဵမ်ႈတီႈႁူင်းယႃၵေႃႈ ႁၼ်ဝႃႈတၢင်းႁူင်းယႃမႄႈႁွင်ႈသွၼ်ၼၼ်ႉ ၶိူင်ႈမႆႉၶိူင်ႈမိုဝ်းတၢင်းမေႃယႃ ဢမ်ႇပေႃးတဵမ်ထူၼ်ႈၼႆသေ တိုၵ်ႉၶတ်းၸႂ် ႁႂ်ႈလႆႈသိုပ်ႇဢဝ်လူင်းယူတ်းယႃ တီႈၵဵင်းမႆႇယူႇ။ ၵူၺ်းၵႃႈ ႁၢၼ်ႉတေႃႇယၢမ်းၵၢင်ဝၼ်းတဵင်ႈမိူဝ်ႈၼႆႉ (ဝၼ်းတီႈ 30/01/2015) ယင်းပႆႇလႆႈဢၼုၺၢတ်ႈ တီႈမေႃလူင်ၶဝ်- ၼႆယဝ်ႉ။
သင်ၶၸဝ်ႈ ဢၼ်ၶဝ်ႈယူတ်းယႃတူဝ်ဝႆႉတီႈ ႁူင်းယႃမႄႈႁွင်ႈသွၼ် |
မိူဝ်ႈဢၼ်တၢင်းတၵ်ႉၵႃႇ တီႈမိူင်းထႆး ၼိမၼ်တၼမိူဝ်းၼၼ်ႉ တင်ႈတႄႇဢဝ် ၼႃးၵူင်းႁွတ်ႈထိုင်လႅၼ်လိၼ်ထႆး လႄႈၼႂ်းမိူင်းထႆး တေမီးတၢင်းတၵ်ႉၵႃႇသတ်ႉထႃးမႃးႁပ်ႉ၊ မီးၵူၼ်းၶပ်းလူတ်ႉႁပ်ႉသူင်ႇပၼ်။ ၵူၺ်းၵႃႈ ၽိူဝ်ႇမႃးသမ်ႉဢမ်ႇၸႂ်ႈ၊ ဢမ်ႇမီးၵူၼ်းႁပ်ႉသူင်ႇ။ ၵွပ်ႈၼၼ် ဢမ်ႇလႅၼ်ႇသဵၼ်ႈတၢင်းၵေႃႈ တူၼ်ၸဝ်ႈၶဝ် ၵႃႈလႆႈႁေႃႈဢဝ်ႁင်းၵူၺ်း- သင်ၶၸဝ်ႈ တူၼ်ဢၼ်ၸမ်ၸႂ် ၸဝ်ႈသုၸႃတ ဢၼ်သဵင်ႈမုၼ်ၵႂႃႇ သိုပ်ႇလၢတ်ႈၼႄၼင်ႇၼႆ။
တူၼ်ၸဝ်ႈၵွၼ်းဝတ်ႉ သၼ်ပႅၵ်ႇ ဢိူင်ႇပဵင်းလူင် ယဵမ်ႈၸႂ်းသင်ၶၸဝ်ႈ ဢၼ်ၶဝ်ႈယူတ်းယႃတူဝ်ဝႆႉတီႈ ႁူင်းယႃမႄႈႁွင်ႈသွၼ် |
ၵူၼ်းၵႃႉ ယၢမ်ႈဢွၵ်ႇတၢင်း ၼိူဝ်သဵၼ်ႈတၢင်းလူင် ႁူဝ်မိူင်း-ၼႃးၵူင်း ၵေႃႉၼိုင်ႈၵေႃႈလၢတ်ႈဝႃႈ- သဵၼ်ႈတၢင်းလႅၼ်လိၼ် ႁူဝ်မိူင်း-ၾင်ႇၶူင်းၼႆႉ ယၢပ်ႇတႄႉတႄႉ။ ပဵၼ်သဵၼ်ႈတၢင်းၸၼ်း တၢင်းၵူတ်ႉ ၶိုၼ်ႈလွႆလူင်းလွႆး၊ ပေႃးပဵၼ်ၵူၼ်းဢမ်ႇယၢမ်ႈၵႂႃႇမႃးလႄႈသင်၊ ဢမ်ႇလႅၼ်ႇၵၢၼ်ႁေႃႈလူတ်ႉၵႃးၸိူဝ်းၼႆႉလႄႈသင်၊ ဢမ်ႇထုၵ်ႇလီႁေႃႈလူတ်ႉၵႃး- တိုၵ်းသူၼ်းၼင်ႇၼႆ။
လႆႈႁူႉထႅင်ႈဝႃႈ ၸဝ်ႈသြႃႇတူၼ်ဢၼ်လူႉလွၼ်ႇ သဵင်ႈၵႂႃႇၼႆႉ မိူဝ်ႈပီၵၢႆၵေႃႈ ၾႆးမႆႈဝတ်ႉ/ၵျွင်းမၼ်းၸဝ်ႈ၊ မိူဝ်ႈမႃးမိူင်းထႆး ၼႂ်းတိုဝ်ႉတၢင်းပၢင်ပွႆးလုမ်းလႃးၽဝ်ၶၢပ်ႈတူဝ် ၸဝ်ႈသြႃႇတႃသႅင်ပွၵ်ႈၼႆႉ ပိူဝ်ႈတႃႇသၢင်ႈၶိုၼ်းဝတ်ႉဝႃးမႂ်ႇၼႆသေ မၼ်းၸဝ်ႈယင်းမႃးႁႃ ၸဝ်ႈၽူႈၵူၼ်းလီ ၸိူဝ်းတေႁပ်ႉႁဵတ်းၸဝ်ႈတႃႇၼ ၼၼ်ႉယူႇ- ၼႆယဝ်ႉ။
Tags: News, Religion