ပၢင်သွၼ် လၢတ်ႈၵႂၢမ်းဢိင်းၵလဵတ်ႈ ၵူၼ်းၼုမ်ႇ ၼႂ်းၸိုင်ႈတႆးပွတ်းႁွင်ႇ၊ ဢၼ်ပိုတ်ႇမႃး တင်ႈတႄႇၼႂ်းလိူၼ်ၻီႊသႅမ်ႊၿိူဝ်ႊ (2014)ၼၼ်ႉ ၸတ်းႁဵတ်းပၢင်ပွႆး လူင်းပၢင်သွၼ် မိူဝ်ႈၼႆႉ။ မီးၽူႈယႂ်ႇၵူၼ်းလူင်တႆး ၶဝ်ႈႁူမ်ႈပၼ်ႁႅင်း။

လုၵ်ႈႁဵၼ်း ပၢင်သွၼ်ၸုပ်ႈတီႈၼိုင်ႈ တီႈသီႇပေႃႉ

ဝၼ်းတီႈ 02/02/2015 (မိူဝ်ႈၼႆႉ) မီးၵၢၼ်ၸတ်း ပၢင်ပွႆးလူင်းပၢင်သွၼ် လၢတ်ႈၵႂၢမ်းဢိင်းၵလဵတ်ႈ (English speaking) ၵူၼ်းၼုမ်ႇ ၼႂ်းၸိုင်ႈတႆးပွတ်းႁွင်ႇ၊ ဢၼ်ပိုတ်ႇမႃး တင်ႇတႄႇၼႂ်းလိူၼ်ၻီႊသႅမ်ႊၿိူဝ်ႊ (2014) တီႈဝတ်ႉႁူဝ်မဵၼ် (တူၼ်ႈတီး) ၼႂ်းၸႄႈဝဵင်းသီႇပေႃႉ ၼႂ်းၸိုင်ႈတႆးပွတ်းႁွင်ႇ။

ပၢင်ပွႆးၼႆႉ  မီးမႄႈၶူးၼၢင်းၶိူဝ်းသႅၼ်၊ ၸဝ်ႈတိုၼ်းတႆး မိူင်းၶွၼ် မႃးၶဝ်ႈႁူမ်ႈပၼ်ႁႅင်းၵူၼ်းၼုမ်ႇ။ ၽူႈႁွင်ႉၽဵင်းၵႂၢမ်းတႆး ပူၵ်းတိုၼ်ႇၸႂ်ႁၵ်ႉၸိူဝ်ႉၸၢတ်ႈ ၵမ်ႈၽွင်ႈၵေႃႈ မႃးၶဝ်ႈႁူမ်ႈပၼ်ႁႅင်းလႄႈ ပဵၼ်ဢၼ်ႁၢၼ်ႉၸႂ်ယႂ်ႇလူင်။ လွင်ႈၼႃႈၵၢၼ်ၼၼ်ႉ ပႆႇလႆႈၸႅၵ်ႇပၼ်ၵၼ်သေတႃႉ မၢင်ၵေႃႉၵေႃႈ ၶိုၼ်းတူင်ႉၼိုင်ၼႂ်းပိုၼ်ႉတီႈ၊ မၢင်ၵေႃႉ တေပွၵ်ႈမိူဝ်းႁဵတ်းၶူးတီႈဝၢၼ်ႈတူဝ်ၵဝ်ႇၵေႃႈမီး၊ မၢင်ၵေႃႉဢၼ်ႁဵတ်းလၢမ်ႈ (ၽူႈပိၼ်ႇၽႃသႃ) ၵူၼ်းတွင်ႈတဵဝ်းဢႅဝ်ႇမိူင်းၵေႃႈမီး- ၸၢႆးသႅင်ၸိင်ႇမျၢတ်ႈ လၢတ်ႈ။

ပၢင်သွၼ်လိၵ်ႈ/ လၢတ်ႈၵႂၢမ်းဢိင်းၵလဵတ်ႈၼႆႉ ၽူႈဢွၼ်ႁူဝ်ပဵၼ် ၵေႃၵပ်းသၢၼ်ၵူၼ်းၼုမ်ႇတႆး (Shan Youth Network) တင်း လုင်းသၢင်ႇၸၢႆး ၼႃးၶၢႆး၊ ဢွၼ်ႁူဝ်ပိုတ်ႇပၢင်သွၼ် ၾိုၵ်းလိုမ်ႉပၼ်ၼမ်ႉၵတ်ႉၵူၼ်းၼုမ်ႇ၊ သွၼ်ပၼ်ၽႃသႃ ဢိင်းၵလဵတ်ႈ တႆး လႄႈပၢႆးပိုၼ်း။ ပိူင်လူင်မၼ်း ပဵၼ်ၽႃသႃ ဢိင်းၵလဵတ်ႈ။

ပၢင်သွၼ်ၼႆႉ ၸတ်းပဵၼ်ပွၵ်ႈၵမ်း 1 ။ ႁပ်ႉဢဝ်ၵူၼ်းၼုမ်ႇၼႂ်းၸိုင်ႈတႆး ပွတ်းႁွင်ႇ ၵူႈၸႄႈဝဵင်း ၸိူဝ်းသူၼ်ၸႂ် မႃးၶဝ်ႈႁူမ်ႈ။ ၼိုင်ႈၸုပ်ႈ ဢၢၼ်းပိုတ်ႇသွၼ်ပၼ်ၵႂႃႇၶၢဝ်းတၢင်း 45 ဝၼ်း။ လုၵ်ႈႁဵၼ်းၼိုင်ႈၵေႃႉ ၸိူဝ်းမႃးၶဝ်ႈႁူမ်ႈပၢင်သွၼ်ၼၼ်ႉ လႆႈၸွႆႈပၼ်ငိုၼ်းၵမ်ႉထႅမ်တီႈ ပၢင်သွၼ် 50,000 ပျႃး။ ၾၢႆႇၶွမ်ႊမတီႊႁူင်းႁဵၼ်းၶဝ် ၸွႆႈထႅမ်ပၼ် တီႈယူႇတီႈၼွၼ်း၊ ပပ်ႉႁဵၼ်း လႄႈပၢႆးယူႇလီ၊ ၾၢႆႇလဵင်ႉလူ ၸိူဝ်းၼႆႉ။ ႁပ်ႉဢဝ်လုၵ်ႈႁဵၼ်းၸိူဝ်းယဝ်ႉ ၸၼ်ႉ 8 - ၼႆယဝ်ႉ။

ဢွင်ႈတီႈပိုတ်ႇႁူင်းႁဵၼ်း ပဵၼ်တီႈဝတ်ႉႁူဝ်မဵၼ် (တူၼ်ႈတီး)၊ တီႈႁိမ်းၼမ်ႉတူၵ်း ၼမ်ႉႁူးၼွႆႉ၊ မီးၾၢႆႇတူၵ်းဝဵင်းသီႇပေႃႉမွၵ်ႈ 2 လၵ်း။ ပိုၼ်ႉတီႈၼႆႈ ပဵၼ်တီႈၵူၼ်းၼွၵ်ႈမိူင်းၶဝ်မႃးဢႅဝ်ႇယဵမ်ႈတူၺ်း ၼမ်ႉႁူးၼွႆႉ။ ပေႃးၵူၼ်းဢႅဝ်ႇမိူင်း ၶဝ်မႃးဢႅဝ်ႇၵေႃႈ လႆႈလတ်းတၢင်းၼႃႈႁူင်းႁဵၼ်းၼႆႉ။ တီႈႁူင်းႁဵၼ်း တႅမ်ႈလိၵ်ႈဝႆႉဝႃႈ English speaking ၼႆလႄႈ ၶႅၵ်ႇၼွၵ်ႈမိူင်း ၸိူဝ်းမႃးဢႅဝ်ႇၼမ်ႉတူၵ်းၸိူဝ်းၼႆႉၵေႃႈ ၶဝ်ႈၵႂႃႇလဵပ်ႈႁဵၼ်း၊ တီႈပၢင်သွၼ်သေ ၸိူဝ်းပဵၼ်ၶူးသွၼ်မႃးၼၼ်ႉ ယင်းၸူမ်းၸူမ်းသိူဝ်းသိူဝ်းသေ ၵႂႃႇလၢတ်ႈပၼ် သွၼ်ပၼ် ၵဵဝ်ႇၵပ်းလွင်ႈတူဝ်ထူပ်းတႃႁၼ်ၶဝ် ၸိူဝ်းၼႆႉ။ လုၵ်ႈႁဵၼ်းၸုပ်ႈတီႈၼိုင်ႈၼႆႉၵေႃႈ လႆႈၵႂႃႇႁဵတ်းလၢမ်ႈ/ ၵူၼ်းပိၼ်ႇၽႃသႃ (Tourist guide) မီးယူႇ 3-4 ၵေႃႉယဝ်ႉ- ဝႃႈၼႆ။

ပၢင်သွၼ်ၼႆႉ မီးၵူၼ်းၼုမ်ႇၼႂ်းမိူင်းတႆးပွတ်းႁွင်ႇ လၢႆလၢႆတီႈမႃးၶဝ်ႈႁူမ်ႈ။ ပၢင်သွၼ်ၸုပ်ႈတီႈ 1 ၼိုင်ႈၼႆႉ တႄႇမႃးၼႂ်းလိူၼ်ၻီႊသႅမ်ႊၿိူဝ်ႊ (2014) ယဝ်ႉၼႂ်းလိူၼ်ၵျႅၼ်ႊၼိဝ်ႊရီႊ 2015 ၼႆႉ။ ၸုပ်ႈတီႈ 2 ၵေႃႈ တေတႄႇၵႂႃႇၵမ်းလဵဝ်။ ပေႃးထိုင်မႃးၼႂ်းလိူၼ်ထူၼ်ႈ 7 (ၵျူႊလၢႆႊ) သမ်ႉတေတႄႇၵႂႃႇ ၸုပ်ႈတီႈ 3 ။ ၸုပ်ႈတီႈ 2 ဢၼ်တေသိုပ်ႇသွၼ်ႁဵၼ်းၵႂႃႇၼႆႉ မီးလုၵ်ႈႁဵၼ်းမႃးပၼ်သၢႆမၢႆတႃႇၶဝ်ႈႁဵၼ်း 300 ပၢႆယဝ်ႉ၊ မေႃသွၼ်တင်းမူတ်းမီး 5 ၵေႃႉ၊ မေႃသွၼ်ၼွၵ်ႈမိူင်း ဢၼ်တေမႃးပၼ်တၢင်းႁူႉတၢင်းႁၼ် မီး 2 ၵေႃႉ- ၼႆယဝ်ႉ။