ၸဝ်ႈသုၶမ်း တၢင်ႉယၢၼ်း၊ မႃးပၼ်ပၢင်သွၼ် Wikipedia လႄႈ လွင်ႈၾွၼ်ႊ Tai Unicode တီႈဝတ်ႉၵူႇတဝ်ႈ ၵဵင်းမႆႇ၊ မီးၵူၼ်းၶဝ်ႈႁူမ်ႈထွမ်ႇငိၼ်း လဵပ်ႈႁဵၼ်းတင်းၼမ်။

ၵူၼ်းၼုမ်ႇလၢႆလၢႆၸုမ်းၸိူဝ်းမႃးၶဝ်ႈႁူမ်ႈၼၼ်ႉ မိူၼ်ၼင်ႇ 1.ၸုမ်းၵပ်းသၢၼ်လွင်ႈၼၢင်းယိင်းတႆး။ 2.ၸုမ်းသိုဝ်ႇၶၢဝ်ႇလွတ်ႈလႅဝ်း။ 3.ႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈ ၸိုင်ႈတႆး။ 4.ၸုမ်းၶၢဝ်ႇၽူႈတွႆႇႁွၵ်ႈ။ 5.ၸုမ်းႁူမ်ႈတုမ်ႁႅင်းၵၢၼ်။ 6.ၸုမ်းႁႅင်းၵၢၼ်ၽွမ်ႉႁူမ်ႈ။ 7.ၸုမ်းၼုမ်ႇတႆးၵတ်းယဵၼ်။ 8.ၸုမ်းလၢႆးတႆး- ပၢႆးႁူႉၵႅမ်တူဝ်။ 9.ၸုမ်းလုၵ်ႈႁဵၼ်းၸၼ်ႉၸွမ်။ 10.ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၸိူဝ်းၼႆႉ။ ၼွၵ်ႈသေၼၼ်ႉ ၸိူဝ်းမႃးၶဝ်ႈႁူမ်ႈလဵပ်ႈႁဵၼ်း ပဵၼ်သုၼ်ႇတူဝ်ၵေႃႈမီးတင်းၼမ်။

တီႈပၢင်သွၼ်ၼႆႉ ၸဝ်ႈသုၶမ်း ၼႄႉၼမ်းလၢတ်ႈၼႄပိူင်လူင်မၼ်း ၵဵဝ်ႇၵပ်းတၢင်းႁူႉလွင်ႈၾွၼ်ႊယူႊၼီႊၶူတ်ႉတႆး (Tai Unicode) ။  လွင်ႈပိုၼ်ႉႁူႉဝိၵိၽီႊၻီႊယိူဝ်ႊ (Wikipedia) ။ လွင်ႈၾွၼ်ႊယူႊၼီႊၶူတ်ႉတႆးၼၼ်ႉ မၼ်းၸဝ်ႈလၢတ်ႈဝႃႈ ပိူဝ်ႈတႃႇတႆးႁဝ်း တေလႆႈၸႂ်ႉၾွၼ်ႊယူႊၼီႊၶူတ်ႉ ဢၼ်ၼိုင်ႈဢၼ်လဵဝ်ၼၼ်ႉ ပဵၼ်ၽွင်းတိုၵ်ႉၶတ်းၸႂ်ယူႇ။ လွင်ႈဝိၵိၽီႊၻီႊယိူဝ်ႊၼၼ်ႉ လၢတ်ႈၼႄလၢႆးႁဵတ်း Account ၽႂ်မၼ်းလႄႈ လၢႆးတႅမ်ႈပွင်ႈၵႂၢမ်းတၢင်ႇၼိူဝ် ဝိၵိၽီႊၻီႊယိူဝ်ႊ၊ လၢႆးသွၵ်ႈႁႃၶေႃႈမုလ်း ဢိၵ်ႇလၢႆးတၢင်ႇၶႅပ်းႁၢင်ႈ လႄႈ မၢႆမီႈၶႅပ်းႁၢင်ႈၸိူဝ်းၼႆႉ။ မၼ်းၸဝ်ႈသပ်းလႅင်းၼႄဝႃႈ- ဝိၵိၽီႊၻီႊယိူဝ်ႊၼႆႉ ၵႂၢမ်းတႆးႁွင်ႉဝႃႈ ပပ်ႉသႅၼ်သမ်ႇ၊ တႅၵ်ႈလႆႈမိူၼ်ၼင်ႇႁူင်းတူၺ်းလိၵ်ႈယႂ်ႇလူင်။ ၶႂ်ႈႁူႉၶေႃႈမုလ်းသင်ၵေႃႈ ၶဝ်ႈတူၺ်း။ တေႃႈၼင်ႇၽူႈၵၢၼ်ႁဵၼ်းသုင်ၶဝ် ပိူဝ်ႈတႃႇဢဝ်ၸုမ်းၶူး (Ph.D) ၶဝ်ၵေႃႈ ၵမ်ႈၼမ်သွၵ်ႈႁႃၶေႃႈမုလ်း ၼႂ်းဝိၵိၽီႊၻီႊယိူဝ်ႊၼႆႉ။

ၼွၵ်ႈသေၼၼ်ႉ မၼ်းၸဝ်ႈလႆႈတိုၵ်းသူၼ်း ႁႂ်ႈၵူၼ်းၶိူဝ်းတႆးၵူႈၵေႃႉ ဢွၼ်ၵၼ်သူင်တႅမ်ႈလိၵ်ႈလၢႆး ၶိုၼ်ႈၼိူဝ်ဝိၵိၽီႊၻီႊယိူဝ်ႊ၊ ၵွပ်ႈဝႃႈ ပဵၼ်တီႈဢၼ်လႆႈတၢင်းႁူႉယႂ်ႇၼမ်လႄႈ ပဵၼ်ၵၢၼ်ၸႅၵ်ႇၽႄတၢင်းႁူႉႁဝ်းတီႈပိူၼ်ႈ- ဝႃႈၼႆ။

ပိူဝ်ႈတႃႇပဵၼ်မႃး ပၢင်သွၼ်ပၼ်တၢင်းႁူႉ လွင်ႈၾွၼ်ႊယူႊၼီႊၶူတ်ႉတႆး (Tai Unicode) လႄႈ ပိုၼ်ႉႁူႉဝိၵိၽီႊၻီႊယိူဝ်ႊ (Wikipedia) ၼႆႉဢိင်ၼိူဝ်ၸဝ်ႈသုၶမ်း မဵတ်ႉတႃႇမႃးပၼ်ပၢင်သွၼ်သေ ယူႇတီႈၸုမ်း ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ လႆႈဢွၼ်ႁူဝ်ၼမ်းၼႃႈ ဝွၵ်ႇၸိူၼ်းထိုင်လၢႆလၢႆၸုမ်းၶဝ်ႈႁူမ်ႈသေ ၶိုင်ပွင်ပဵၼ်မႃး။