ၽူႈပွင်ၵၢၼ်ငဝ်ႈငုၼ်း ပႃႊတီႊသိူဝ်ၽိူၵ်ႇ (SNDP) ၸႄႈဝဵင်းၼမ်ႉတူႈ၊ ၽွင်းတႅၼ်းသၽႃးၸႄႈမိူင်း ၼၢင်းၶမ်းဢေး ထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇ ၶဝ်ႈႁူမ်ႈပႃႊတီႊႁူဝ်သိူဝ် (SNLD) ။ လၢတ်ႈဝႃႈ ႁဵတ်းၸွမ်းၵၢင်ၸႂ်ၵူၼ်းမိူင်း တုၵ်းယွၼ်း။

ၼၢင်းၶမ်းဢေး မွပ်ႈဝႂ် ယိုၼ်ႈယွၼ်းၶဝ်ႈပဵၼ်လုၵ်ႈၸုမ်းပႃႊတီႊႁူဝ်သိူဝ် တီႈၸဝ်ႈၶုၼ်ထုၼ်းဢူး

ဝၼ်းတီႈ 27/01/2015 ၼႂ်းတိုဝ်ႉတၢင်း  ဝၼ်းဢၼ်ႁူဝ်ပဝ်ႈငဝ်ႈငုၼ်း ၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ၸဝ်ႈၶုၼ်ထုၼ်းဢူး  ၵႂႃႇပိုတ်ႇလုမ်းၵိင်ႇၽႄ SNLD တီႈဝဵင်းၼမ်ႉတူႈၼၼ်ႉ ၼၢင်းၶမ်းဢေး ၵေႃႉပဵၼ်ၽွင်းတႅၼ်းသၽႃးၸႄႈမိူင်း ၻီႊမူဝ်ႊၶရႅတ်ႊတိၵ်ႉပႃႊတီႊ ႁိုဝ် ပႃႊတီႊသိူဝ်ၽိူၵ်ႇ (SNDP)   လႆႈမွပ်ႈဝႂ် ယိုၼ်ႈယွၼ်းပဵၼ်လုၵ်ႈၸုမ်း ပႃႊတီႊႁူဝ်သိူဝ် တေႃႇၼႃႈၸဝ်ႈၶုၼ်ထုၼ်းဢူး- ၼႆယဝ်ႉ။

ၼၢင်းၶမ်းဢေး လၢတ်ႈဝႃႈ- “ဢၼ်လႆႈလႅၵ်ႈလၢႆႈၶၢႆႉပႃႊတီႊၼႆႉ ၵွပ်ႈဝႃႈၶႃႈၼၢင်းပဵၼ် ၽူႈႁပ်ႉၸႂ်ႉၵူၼ်းမိူင်း၊ တၢင်တူဝ်ၵူၼ်းမိူင်းလႄႈ ၵူၼ်းမိူင်းဝႃႈၸိူင်ႉႁိုဝ်၊ ၵၢင်ၸႂ်ၵူၼ်းမိူင်းမီးၸိူင်ႉႁိုဝ်ၵေႃႈ လႆႈႁဵတ်းၸွမ်းၵူၺ်း။ လွင်ႈၼႆႉ ၵူၼ်းမိူင်းသၢမ်ႁဵင်ၵေႃႉ လူင်းလၢႆးမိုဝ်းတိုၵ်းသူၼ်းမႃး ႁႂ်ႈထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇသေ ၶဝ်ႈႁူမ်ႈၼႂ်းပႃႊတီႊႁူဝ်သိူဝ်။ တေႃႇထိုင်ဝၼ်းတီႈ 26/01/2015 ၵၢင်ၼႂ်ၼႆႉၵေႃႈ တိုၵ်ႉသူင်ႇလိၵ်ႈလၢႆးမႃးယူႇတိၵ်းတိၵ်း။ လႆႈၸွမ်းၵၢင်ၸႂ်ၵူၼ်းမိူင်းသေ ၸင်ႇလႆႈထွၼ်တူဝ်ဢွၵ်ႇၼႂ်းပႃႊတီႊသိူဝ်ၽိူၵ်ႇ- ဝႃႈၼႆ။

ဢၼ်ၵူၼ်းမိူင်းတုၵ်းယွၼ်းၼၼ်ႉ ပိူင်လူင်မၼ်းမီး 3 ၶေႃႈ- 1.ၼင်ႇႁိုဝ်တေၵုမ်းလႆႈ ၵူၼ်းမိူင်းၸိူဝ်းမီးသုၼ်ႇလႆႈတွတ်ႈၶႅပ်းၵၢင်ၸႂ် ႁႂ်ႈပဵၼ်သဵင်ၼိုင်ႈသဵင်လဵဝ်ၵၼ်။ 2. ႁႂ်ႈလႆႈႁၢပ်ႇၵိုတ်ႉၵၢၼ်ၵူၼ်းတင်းၼမ် ၵႂၢင်ႈၶႂၢင်လိူဝ်ၵဝ်ႇ။ 3.ၼင်ႇႁိုဝ် ၵူၼ်းမိူင်းတေၸၢင်ႈၵမ်ႉထႅမ်လႆႈ ၽွင်းတႅၼ်းသၽႃးၶဝ် ပဵၼ်သဵင်ၼိုင်ႈသဵင်လဵဝ်- ၼႆယဝ်ႉ။

ၼၢင်းၶမ်းဢေး လၢတ်ႈပႃးဝႃႈ- ၵွပ်ႈပိူဝ်ႈၵူၼ်းမိူင်း တွတ်ႈၶႅပ်းၵၢင်ၸႂ်လိူၵ်ႈမၼ်းၼၢင်း ပဵၼ်ၽူႈတႅၼ်း/  ၽူႈတၢင်တူဝ်ၵူၼ်းမိူင်းလႄႈ မၼ်းၼၢင်းၵေႃႈ လႆႈၼပ်ႉယမ်ၵၢင်ၸႂ်ၵူၼ်းမိူင်း- ဝႃႈၼႆ။

ၼၢင်းၶမ်းဢေးၼႆႉ လႆႈထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇ မိူဝ်ႈဝၼ်းတီႈ 26/01/2015 ။ လွင်ႈၼႆႉ လႆႈသူင်ႇလိၵ်ႈၸူး ပႃႊတီႊသိူဝ်ၽိူၵ်ႇသေ ၸဝ်ႈၼၼ်ႇတီႇ  လႆႈႁပ်ႉလိၵ်ႈ ဢၼ်ယွၼ်းထွၼ်တူဝ်ဢွၵ်ႇၼၼ်ႉၵေႃႈ ပၼ်ဢၼုၺၢတ်ႈ ႁႂ်ႈထွၼ်တူဝ်ဢွၵ်ႇ။

ၽိူဝ်ႇထိုင်မႃးဝၼ်းတီႈ 27/01/2015 ၸဝ်ႈၶုၼ်ထုၼ်းဢူး ၶိုၼ်ႈမႃးတီႈဝဵင်းၼမ်ႉတူႈ၊ မႃးပိုတ်ႇလုမ်းၵိင်ႇၽႄႈၼၼ်ႉ မၼ်းၸဝ်ႈၵေႃႈ မႃးမွၵ်ႇလၢတ်ႈၶေႃႈၵႂၢမ်းဝႃႈ- “ၶႃႈႁဝ်းတႄႉ ပၢႆးယူႇလီၵေႃႈဢမ်ႇပေႃးၶႅမ်ႉ၊ ၶႃၵေႃႈၶတ်းၶိုၼ်ႈဝႆႉ၊ ၵႂႃႇၵႂႃႇမႃးမႃးယၢပ်ႇ၊ ဢႃႇယုယႂ်ႇယဝ်ႉ။ ၵူၺ်းၵႃႈ လႆႈငိၼ်းၶၢဝ်ႇဝႃႈ ၼၢင်းၶမ်းဢေး တေမႃးၸွႆႈၵၢၼ်ၼႂ်းပႃႊတီႊႁဝ်းၼႆလႄႈ ဢမ်ႇယူႇလီၵေႃႈၶတ်းၸႂ်မႃး- ဝႃႈၼႆ။

ၸွမ်းၼင်ႇ လႆႈႁၢင်ႈႁႅၼ်းဝႆႉသေ ၼၢင်းၶမ်းဢေး လႆႈမွပ်ႈဝႂ် ယိုၼ်ႈယွၼ်းၶဝ်ႈပဵၼ်လုၵ်ႈၸုမ်းပႃႊတီႊႁူဝ်သိူဝ် တီႈၸဝ်ႈၶုၼ်ထုၼ်းဢူး။ ၼွၵ်ႈသေၼၼ်ႉ မၼ်းၼၢင်းလႆႈမွပ်ႈပၼ်ပႃး ဝႂ်ယိုၼ်ႈယွၼ်းၶဝ်ႈပႃႊတီႊလုၵ်ႈၸုမ်းမႂ်ႇ တႃႇၵူၼ်းၼႂ်းဢိူင်ႇမိူင်းယဵၼ် တႃႇ 1,000 ဝႂ်၊ ၵူၼ်းၼႂ်းၸႄႈဝဵင်းၼမ်ႉတူႈ 100 ဝႂ်- ၼႆယဝ်ႉ။

ႁူဝ်ပဝ်ႈၸဝ်ႈၶုၼ်ထုၼ်းဢူးၼႆႉ တႄႇဢဝ်ၼႂ်းႁၢင်ပီ 2014 မႃးတေႃႇထိုင်ႁူဝ်ပီ 2015 ၼႆႉ လႆႈပိုတ်ႇလုမ်းၵိင်ႇၽႄလၢႆလၢႆတီႈ၊ ပိူဝ်ႈတႃႇႁၢင်ႈႁႅၼ်း ၵၢၼ်လိူၵ်ႈတင်ႈပီ 2015 ။ မိူဝ်ႈဝၼ်းတီႈ 25/01/2015 ၼၼ်ႉၵေႃႈ လႆႈၵႂႃႇႁူပ်ႉထူပ်းၵူၼ်းမိူင်း တင်း လုၵ်ႈၸုမ်း တီႈဝဵင်းသီႇပေႃႉသေ ဢုပ်ႇလၢတ်ႈၼႄ လၵ်းၵၢၼ်ပႃႊတီႊ။ မီးပီႈၼွင်ႉၵူၼ်းဝၢၼ်ႈၵူၼ်းမိူင်း မႃးႁူမ်ၸူမ်းႁပ်ႉတွၼ်ႈတင်းၼမ်။

ဢၼ်ပိုတ်ႇလုမ်းမႂ်ႇ တီႈၼမ်ႉတူႈ ဝၼ်းတီႈ 27/01/2015 ၼႆႉ ပဵၼ်လုမ်းတီႈ 44 တီႈ၊ ယိူင်းဢၢၼ်းပိုတ်ႇတင်းမူတ်း 47 တီႈ။ ၼၢင်းၶမ်းဢေးၼႆႉ ပဵၼ်ၽွင်းတႅၼ်းပႃႊတီႊသိူဝ်ၽိူၵ်ႇ ဢၼ်ထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇသေ ၶၢႆႉၶဝ်ႈပႃႊတီႊႁူဝ်သိူဝ် ပဵၼ်ၵေႃႉထူၼ်ႈတီႈ 14 - ၼႆယဝ်ႉ။