ၽူႈၵွၼ်းၾၢႆႇပႃႇမႆႉ ၼႂ်းၸႄႈတွၼ်ႈလၢင်းၶိူဝ်း 4 ၵေႃႉ ၺႃးယိုဝ်းတၢႆ မိူဝ်ႈႁၢင်လိူၼ်ၻီႊသႅမ်ႊၿိူဝ်ႊၼၼ်ႉ ဢမ်ႇၵဵဝ်ႇၶွင်ႈ RCSS/SSA ၸိူင်ႉၼင်ႇၶၢဝ်ႇႁူဝ်ႇ ၶၢဝ်ႇလိုဝ်းဢွၵ်ႇဝႆႉဝႃႈ- ပဵၼ်ၼမ်ႉမိုဝ်း RCSS/SSA - ႁူဝ်ပဝ်ႈ RCSS/SSA ၸဝ်ႈယွတ်ႈသိုၵ်း လၢတ်ႈ။

မိူဝ်ႈဝၼ်းတီႈ 27/12/2014 ပူၼ်ႉမႃး ၸဝ်ႈၼႃႈတီႈၾၢႆႇပႃႇမႆႉ တင်းမူတ်း 5 ၵေႃႉ၊ လုၵ်ႉတီႈဝဵင်းလၢင်းၶိူဝ်းသေ ၵႂႃႇၵူတ်ႇထတ်းပိုၼ်ႉတီႈ ပႃႇမႆႉ ပွတ်းဝၢၼ်ႈႁၢတ်ႇ-ၼႃးၵူင်း၊ ပွတ်းဝၢၼ်ႈသလွင်းသေ ၺႃးယိုဝ်းတီႈႁိမ်းသဵၼ်ႈတၢင်း ၼမ်ႉႁူးသဵဝ်ႈ ၼႂ်းဢိူင်ႇဝၢၼ်ႈႁၢတ်ႇ ၾၢႆႇၸၢၼ်းလၢင်းၶိူဝ်း၊ ယၢၼ်ဝဵင်းလၢင်းၶိူဝ်း 20 လၵ်းပၢႆ။ ၼႂ်းၶဝ် 5 ၵေႃႉၼၼ်ႉ တၢႆၵႂႃႇ4 ၵေႃႉ၊ တႃႇၵေႃႉၼိုင်ႈ ႁဵတ်းႁဵတ်းၵႅင်ႈတၢႆသေ လွတ်ႈၽေးတၢင်းတၢႆၵႂႃႇ- ၼႆယဝ်ႉ။

ၵူၼ်းၸိူဝ်းတၢႆၵႂႃႇၼၼ်ႉ ပဵၼ်ၽူႈၵွၼ်းၾၢႆႇပႃႇမႆႉ ၸႄႈတွၼ်ႈလၢင်းၶိူဝ်း ဢူးလႃႉမိၼ်း၊ ၽူႈၵွၼ်းထိူၼ်ႇ ဢူးပူဝ်ႇမိၼ်း၊ ဢူးၸိတ်ႉထူၺ်း၊ ဢူးတၢၼ်းထၢႆႉဢွင်ႇ ၸိူဝ်းၼႆႉ။ တူဝ်တၢႆၶဝ် ဢဝ်ပွၵ်ႈမိူဝ်းလၢင်းၶိူဝ်းသေ ပူၼ်ႉၶၢပ်ႈတူဝ်ၵႂႃႇ မိူဝ်ႈဝၼ်းတီႈ 29/12/2014 ။

ၵဵဝ်ႇၵပ်းလွင်ႈၼႆႉ ၽူႈၸတ်းၵၢၼ် ႁွင်ႈၵၢၼ်ၾၢႆႇပႃႇမႆႉ ၼေႇပျီႇတေႃႇ ဢူးၸေႃႇမိၼ်း လၢတ်ႈဝႃႈ- ၸုမ်းဢမ်ႇႁူႉၾၢႆႇၸုမ်းၼိုင်ႈ မႃးယိုဝ်းၾၢႆႇပႃႇမႆႉ ၼႂ်းၸႄႈတွၼ်ႈလၢင်းၶိူဝ်း၊ ၸိူဝ်းၶဝ် ထုၵ်ႇယိုဝ်းတၢႆၵႂႃႇ ၽွင်းယၢမ်းၶဝ်တိုၵ်ႉၵႂႃႇၵူတ်ႇထတ်း ပိူဝ်ႈတႃႇဢဝ်မႆႉႁဵင်တၼ်ႊ ဢၼ်တီႉၺွပ်းဝႆႉၼၼ်ႉ ပွၵ်ႈၶိုၼ်းလၢင်းၶိူဝ်း- ဝႃႈၼႆ။

ၵပ်းၵၢႆႇလွင်ႈၼႆႉ ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸဝ်ႈယွတ်ႈသိုၵ်း လၢတ်ႈဝႃႈ- ၵူၼ်းဢၼ်မႃးႁဵတ်းၸိူင်ႉၼႆၼႆႉ မၼ်းပဵၼ်ၵူၼ်းဢၼ်ၶဝ်ႁူႉၵၼ်ၵူၺ်း၊ ၶဝ်ႁူႉသၢႆငၢႆ/ သဵၼ်ႈတၢင်း/  ငဝ်းလၢႆးၵၼ်လီလီ။ ဢၼ်ၶႃႈႁႅမ်ၵၼ်တၢႆၸိူင်ႉၼႆၼႆႉ ၵူၼ်းၼႂ်းပိုၼ်ႉတီႈၶဝ်ၼင်ႇၵၼ် ဢမ်ႇႁၢၼ်ႉၸႂ်ၼိူဝ်ၵၢၼ်ငၢၼ်းၵၼ်လႄႈ ပဵၼ်ၵူၺ်း၊ ပေႃးဝႃႈ ၵူတ်ႇထတ်းတူၺ်းၶိုၼ်း ၵူၼ်းၼႂ်းပိုၼ်ႉတီႈလီလီၵေႃႈ တေၸၢင်ႈႁူႉယူႇ၊ ၸၢင်ႈပဵၼ်ၸုမ်းယိပ်းၵွင်ႈၵၢင်ႇ ပီႇတုၸိတ်ႉ ၼႂ်းပိုၼ်ႉတီႈၵူၺ်း၊ ဢမ်ႇၵဵဝ်ႇၶွင်ႈတင်း RCSS/SSA - ဝႃႈၼႆ။

ၸဝ်ႈႁၢၼ်လၢဝ်သႅင် ၵေႃႈလၢတ်ႈဝႃႈ- ဢၼ်သျႅၼ်းၼိဝ်ႊသ် (SHAN news) ဢွၵ်ႇၶၢဝ်ႇဝႃႈ ပဵၼ်ၼမ်ႉမိုဝ်း RCSS/SSA ဢၼ်ဝႃႈၼၼ်ႉ SHAN news ၼၼ်ႉပဵၼ်ၽႂ်၊ ပဵၼ်ၶၢဝ်ႇၸုမ်းလႂ် ၼႆၵေႃႈယူႇတီႈ RCSS ဢမ်ႇလႆႈႁူႉၸွမ်း။ ၾၢႆႇၼိုင်ႈၵေႃႈ ဢၼ်ၼႄးဝႃႈပဵၼ် RCSS ၼႆၼၼ်ႉ ဢမ်ႇမီးလၵ်းထၢၼ် ၶေႃႈမုလ်းသင်ႁႂ်ႈၵုမ်ႇထူၼ်ႈ၊ ဢၼ်ၼႄးဝႃႈ ပဵၼ်ၼမ်ႉမိုဝ်း RCSS ၼႆၼၼ်ႉ ပဵၼ်ၵၢၼ်ၶႂ်ႈယႃႉၸိုဝ်ႈသဵင် RCSS/SSA ၵူၺ်း- ဝႃႈၼႆ။

ၼႂ်းပိုၼ်ႉတီႈ ဢၼ်ၸဝ်ႈၼႃႈတီႈၾၢႆႇပႃႇမႆႉ ၶဝ်ၺႃးယိုဝ်းတၢႆၼႆႉ မီးပလိၵ်ႈ၊ တပ်ႉသိုၵ်းလူင်ပွင်ၸိုင်ႈမၢၼ်ႈ၊ သိုၵ်းပီႇတုၸိတ်ႉၼႂ်းပိုၼ်ႉတီႈ၊ ၸုမ်းပီႇတုၸိတ်ႉမႁႃႇၵျႃႇ ႁူဝ်မိူင်း ၸိူဝ်းၼႆႉတူင်ႉၼိုင်ဝႆႉ။ တပ်ႉသိုၵ်းၸိုင်ႈတႆး RCSS/SSA တင်းသိုၵ်းပဢူဝ်း PNLA ၵေႃႈ ၵႆႉတူင်ႉၼိုင်ၵႂႃႇမႃးပဵၼ်ပွၵ်ႈ- ၼႆယဝ်ႉ။