ဝွၵ်ႇၸိူၼ်း
              …………………………
              ……………………………..
လွင်ႈတၢင်း    ဝွၵ်ႇၸိူၼ်းၶဝ်ႈႁူမ်ႈပၢင်ၵုမ်လႄႈ ႁူမ်ႈတုမ်ၶွၼ်ႈႁႅင်း ငိုၼ်းႁွမ်း ၸတ်းပွႆးၸဝ်ႈၶူးမေႃ ဝၢၼ်ႈမွၵ်ႇၸၢမ် ပွၵ်ႈၵမ်းတီႈ 39

ပၢင်ဢုပ်ႇဢူဝ်း ၸုမ်းပွင်ၵၢၼ် တႃႇၸတ်းပဵၼ်ပၢင်ပွႆး ၸဝ်ႈၶူးမေႃ တီႈဝၢၼ်ႈမႂ်ႇမွၵ်ႇၸၢမ် မိူဝ်ႈဝၼ်းတီႈ 13/12/2014

ၸွမ်းၼင်ႇပၢင်ၵုမ်မိူဝ်ႈဝၼ်းတီႈ 13/12/2014 ပိူဝ်ႈတႃႇၸတ်းပွႆးၸဝ်ႈၶူးမေႃ တီႈဝၢၼ်ႈမႂ်ႇမွၵ်ႇၸၢမ် ၼႂ်းဝၼ်း တီႈ 30-31/01/2015 - 01/02/2015 မႅၼ်ႈဝၼ်း (လိူၼ်သၢမ်မႂ်ႇ 11-12-13 ၶမ်ႈ ပီတႆး 2109 ၼီႈ ပီပႄႉ) ၼႆလႄႈဝၼ်းတီႈ 18/01/2015 (လိူၼ်ၵမ်လွင်ႈ 14 ၶမ်ႈ) တေထိုင်ၼႆႉ တၢင်းၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ႁဝ်းၶႃႈလႆႈႁပ်ႉမွပ်ႈမၢႆပိူဝ်ႈတႃႇဝွၵ်ႇၸိူၼ်းပီႈၼွင်ႉတႆးႁဝ်းၶဝ်ၵူႈၸုမ်းၵူႈတီႈၼႆလႄႈ ၸင်ႇလႆႈပဵၼ်တူဝ်တႅၼ်း ဝွၵ်ႇၸိူၼ်း မႃးၼင်ႇၼႆဢေႃႈ
လွင်ႈတၢင်းတေဢုပ်ႇၵုမ်ၵၼ်ၼႂ်းဝၼ်းတီႈ 18/01/2015 ၼႆႉပဵၼ်လွင်ႈၸႅၵ်ႇၼႃႈၵၢၼ်လႄႈၵၢၼ်ႁပ်ႉငိုၼ်း ၵမ်ႉၸွႆႈၸတ်းပွႆးၶူးမေႃတႆးပွၵ်ႈၵမ်းတီႈ 39 ပီ 2015 ၼႆႉဢိၵ်ႇတင်း ၵၢၼ်ဝၢင်းၽႅၼ်ၸတ်းၵၢၼ်ႁူမ်ႈမိုဝ်းၵၼ် ႁႂ်ႈဢွၵ်ႇ ၾၢင်ႁၢင်ႈၶိုၵ်ႉၶႅမ်ႉ ႁူမ်ႈတင်း လၢႆးၵၢၼ်ၵႃႈဝႅၼ်ႁွင်ႉၾဵင်းၵႂၢမ်းၸိူဝ်းၼၼ်ႉၵေႃႈ ႁႂ်ႈပဵၼ်ၵၢၼ်ပၼ်ႁႅင်းယုၵ်ႉမုၼ်း ၵၢၼ်သၢင်ႈၵူၼ်းၼုမ်ႇႁဝ်း ၵူႈဝၢၼ်ႈၵူႈၶူင်ႇ လႄႈၵူႈၸုမ်းၼႆဢေႃႈ

ၵဵဝ်ႇၵပ်းၵၢၼ်ပၢႆးလဝ်ႇမူၼ်ႈတူၼ်ႈၸႂ်ၼႆႉ မိူင်းၵွၵ်ႇ ႁႂ်ႈ(မူလၼိထိၽရႃႉထမ်းသႅင်)ဢဝ်ပုၼ်ႈၽွၼ်းၵဵပ်းသၢႆမၢႆ ၵဵင်းမႆႇ ႁႂ်ႈ(ၵေႃလိၵ်ႈလၢႆးၾိင်ႈငႄႈတႆးၵဵင်းမႆႇ) ၵဵပ်းသၢႆမၢႆ ၼႂ်း 3 ၸႄႈဝဵင်းသမ်ႉ ႁႂ်ႈၸၢႆးသၢင်ႇၸၢႆး မိူင်းၾၢင် (ၸုမ်းတႆး 3 ၸႄႈဝဵင်း) ၵဵပ်းသၢႆမၢႆသေမႃးႁူမ်ႈၵၼ်ၼႂ်းပၢင်ၵုမ် ဝၼ်းတီႈ 18/01/2015 ၼႆႉၼႆယဝ်ႉ
လိူဝ်ၼၼ်ႉယင်းတေမီးပႃးတွၼ်ႈၵၢၼ်ႁူမ်ႈတုမ်ၶွၼ်ႈႁႅင်း ငိုၼ်းႁွမ်းၵၢၼ်ၸတ်းပွႆး ၸဝ်ႈၶူးမေႃ ပွၵ်ႈၵမ်းတီႈ 39 ဝၢၼ်ႈမႂ်ႇမွၵ်ႇၸၢမ် ၼႆႉၵေႃႈ ၸုမ်းတႆးၵူႈၸုမ်း ႁႂ်ႈၸွႆႈၵၼ်ႁႃငိုၼ်းၸွႆႈ 1 ၸုမ်းတေၸွႆႈႁွမ်းၵႃႈႁိုဝ်လႂ်ၸိူဝ်းၼႆႉ။ တွၼ်ႈတႃႇပီႈၼွင်ႉဝၢၼ်ႈမႂ်ႇမွၵ်ႇၸၢမ်ၶဝ်သမ်ႉ ပဵၼ်ၽူႈဢဝ်ပုၼ်ႈၽွၼ်းၵဵဝ်ႇၵပ်းၼႂ်းပိုၼ်ႉတီႈ။ လိူဝ်ၼၼ်ႉ ယင်းမၵ်း မၼ်ႈ ၸုမ်းတႆးႁဝ်းၵူႈၸုမ်းၶဝ်ႈပႃးပဵၼ်ၵေႃၵမ်ၵၢၼ်လႄႈႁႂ်ႈဢဝ်ၸႂ်သႂ်ႇႁႅင်းပၼ် ႁူမ်ႈၵၼ်ပဵၼ်ၵဝ်ႉပဵၼ်ၵၼ်းၼႆဢေႃႈ

ၸိူင်ႉႁိုဝ်ၵေႃႈလီ ပၢင်ၵုမ်တႃႇပွင်ပဵၼ်ပၢင်ပွႆးၸဝ်ႈၶူးမေႃၵမ်းၼႆႉ ယွၼ်းဢဝ်တူဝ်ဢဝ်ၸႂ် ၼွမ်းၵူမ်ႈၸိူၼ်းဝွၵ်ႇ ထိုင်ၵူႈၸုမ်း ပဵၼ်ၵၢၼ်ၶိုၵ်ႉလိုၵ်ႉယႂ်ႇလူင်ယဝ်ႉ တုၵ်းယွၼ်းႁႂ်ႈပိုၼ်ႉပွႆႇၶၢဝ်းယၢမ်းသူၼ်ႇတူဝ်သေ ယွမ်းပၼ်ၶၢဝ်းယၢမ်း မႃးၶဝ်ႈႁူမ်ႈၸွမ်းယႂ်ႇယႂ်ႇၼမ်ၼမ်ယူႇဢေႃႈ ၵွပ်ႈဝႃႈ ပၢင်ၵုမ်တေမီးထႅင်ႈ ဝၼ်းလဵဝ်ၼႆႉ ပဵၼ်ပွၵ်ႈလိုၼ်းသုတ်းယဝ်ႉ ယုမ်ႇယမ်ဝႃႈတေမႃးၶဝ်ႈႁူမ်ႈၸွမ်း ဢမ်ႇႁၢင်ႉဢမ်ႇၵၢတ်ႈယူႇၶႃႈဢေႃႈ

ၶပ်ႉမၢႆပၢင်ၵုမ်
ဝၼ်းတီႈ 18/01/2015 (ဝၼ်းတိတ်ႉ)
ၶၢဝ်းယၢမ်း 09.00 - 12.00 မူင်း
ဢွင်ႈတီႈ ဝတ်ႉဝၢၼ်ႈမႂ်ႇမွၵ်ႇၸၢမ်
                                                                                                 ၼပ်ႉထိုဝ်သေ
                                                                                   ၵေႃလိၵ်ႈလၢႆးၾိင်ႈငႄႈတႆး-ၵဵင်းမႆႇ
                                                                                               (ၾၢႆႇၵပ်းသၢၼ်)
                                                                                     
ၸုမ်းပွင်ၵၢၼ်ပွႆးၸဝ်ႈၶူးမေႃ  ဝၢၼ်ႈမႂ်ႇမွၵ်ႇၸၢမ် 
ဢိူင်ႇတႃႈတွၼ်း  ၸႄႈဝဵင်းမႄႈဢၢႆး  ၸႄႈတွၼ်ႈၵဵင်းမႆႇ