ယိူင်းဢၢၼ်း တႃႇၼမ်ႉတွၼ်းၽွၼ်းလီ ၵူၼ်းဝၢၼ်ႈ ၵူၼ်းမိူင်းသေ ယူႇတီႈ RCSS တေႁူပ်ႉထူပ်းၵူၼ်းမိူင်းၵိုင်၊ ဢုပ်ႇဢူဝ်းလွင်ႈ ၶူင်းၵၢၼ်ၶုတ်းထၢၼ်ႇႁိၼ် တီႈမိူင်းၵိုင်- ၽူႈၶၢၼ်ပၢၵ်ႇ SNLD လၢတ်ႈ။

ဝၼ်းတီႈ 12/01/2015 (မိူဝ်ႈၼႆႉ) ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸဝ်ႈႁၢၼ်သေႃးၸိင်ႇ၊ တႅမ်ႈလိၵ်ႈၸူး ၵူၼ်းမိူင်းၵိုင် လုင်းၸၢႆးလူင် ၽူႈၼမ်းၵူၼ်းမိူင်းၵိုင်။ ၼႂ်းလိၵ်ႈလၢတ်ႈဝႃႈ မိူဝ်ႈၽုၵ်ႈ ဝၼ်းတီႈ 13/01/2015 ပွတ်းၼႂ်ယၢမ်း 9 မူင်း၊ ႁႂ်ႈလႆႈႁူပ်ႉထူပ်းၵၼ် ၸွမ်းၼင်ႇလႆႈၽတ်း/ၶိၼ်း လၢတ်ႈၵၼ်ဝႆႉ။ ဢၼ်တေႁူပ်ႉၵၼ်ပွၵ်ႈၼႆႉ တေမီး 3 ၾၢႆႇ ၶွင်ႊသီႊဢဝ်ၶိုၼ်းၸိုင်ႈတႆး ၊ ၾၢႆႇၶွမ်ႊပၼီႊ တင်းၵူၼ်းမိူင်း တေႁူပ်ႉထူပ်း ၼင်ႈတေႃႇၼႃႈၵၼ်သေဢုပ်ႇဢူဝ်းၵၼ်- ၼႆယဝ်ႉ။

ၵူၼ်းၼုမ်ႇၸိူဝ်းတေၵႂႃႇၸွမ်း လုင်းၸၢႆးလူင် ၵေႃႉၼိုင်ႈလၢတ်ႈဝႃႈ- လွင်ႈၼႆႉၸႂ်ႈတႄႉ၊ လုင်းၸၢႆးလူင်၊ သင်ၶ၊ ပႃႊတီႊၵၢၼ်မိူင်းၸိူဝ်းၼႆႉ တေႁူပ်ႉၵၼ်တင်းမူတ်း။ ၶဝ်ႁွင်ႉႁူပ်ႉထူပ်းၵၼ် တီႈၼွၵ်ႈဝဵင်းမိူင်းၵိုင် တီႈၼိုင်ႈ။ ၶဝ်တေထၢမ်ပၢၵ်ႇၼႃႈၵူၼ်းတင်းၼမ်ဝႃႈ လွင်ႈၶူင်းၵၢၼ် ၶုတ်းထၢၼ်ႇႁိၼ်ၼႆႉ တေသၢၼ်ၶတ်းႁႃႉ၊ တေၵမ်ႉထႅမ်ႁႃႉ တေႁဵတ်းႁိုဝ်တႄႉတႄႉ၊ ႁႂ်ႈလုင်းၸၢႆးလူင် လၢတ်ႈတႅၵ်ႇတႅၵ်ႇလႅင်းလႅင်း။ ၵမ်ႉထႅမ်ႁႃႉ သၢၼ်ၶတ်းၵေႃႈ တေႁႂ်ႈလူင်းလၢႆးမိုဝ်းၵမ်းလဵဝ်။ ၵူၺ်းၵႃႈ ယူႇတီႈၵူၼ်းမိူင်းၵိုင်တႄႉ တႃႇတေၵမ်ႉထႅမ်ဢမ်ႇမီး၊ ပေႃးၵႂႃႇလူင်းလၢႆးမိုဝ်းၵေႃႈ တေလူင်းလၢႆးမိုဝ်းသၢၼ်ၶတ်းၵူၺ်း၊ ၶဝ်ဢုပ်ႇဢူဝ်းၵၼ် လႆႈၸႂ်ၵၼ်ဝႆႉၸိူင်ႉၼႆ- ဝႃႈၼႆ။

လွင်ႈၼႆႉ ယူႇတီႈၽူႈၶၢၼ်ပၢၵ်ႇ RCSS ၵေႃႈလၢတ်ႈဝႃႈ- ပိူဝ်ႈတႃႇပုၼ်ႈပၢင်ႈ ၼမ်ႉတွၼ်းၽွၼ်းလီ ၵူၼ်းဝၢၼ်ႈၵူၼ်းမိူင်းၼၼ်ႉ ယူႇတီႈ RCSS/SSA ၵေႃႈ တေသူင်ႇပႃးၽွင်းတႅၼ်း ၸၢႆးပၢင်ႇ မိူင်းၵိုင် (ဢွၵ်ႇပႃႊတီႊသိူဝ်ၽိူၵ်ႇ ၶဝ်ႈပႃႊတီႊႁူဝ်သိူဝ်) တင်းလုၵ်ႈၸုမ်းပႃႊတီႊႁူဝ်သိူဝ် ၵႂႃႇၸွမ်း- ၼႆယဝ်ႉ။