ၵူၼ်းၼုမ်ႇ ဝဵင်းတႃႈၶီႈလဵၵ်းႁၼ်ဝႃႈ ပေႃးတႆးမီး ပႃႊတီႊသွင်ဢၼ် ၶဝ်ႈလိူၵ်ႈတင်ႈ ၸၢင်ႈၵၢၼ်ႉပိူၼ်ႈ။ ထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇသေ ၶဝ်ႈႁူမ်ႈ ပႃႊတီႊႁူဝ်သိူဝ် ၸွမ်းၽွင်းတႅၼ်းသၽႃး ၵူၼ်းမိူင်း ၸၢႆးတဵင်းဢွင်ႇ ၼပ်ႉသိပ်း။

ၵဵဝ်ႇၵပ်းလွင်ႈၼႆႉ ဢိင်ၼိူဝ် ပူၼ်ႉမႃးမိူဝ်ႈဝၼ်းတီႈ 10/01/2015 ၽွင်းတႅၼ်းသၽႃးၵူၼ်းမိူင်း ၻီႊမူဝ်ႊၶရႅတ်ႊတိၵ်ႊ ပႃႊတီႊၸၢဝ်းၶိူဝ်းတႆး ႁိုဝ် ပႃႊတီႊသိူဝ်ၽိူၵ်ႇ (SNDP) တီႈတႃႈၶီႈလဵၵ်း၊ ၸၢႆးတဵင်းဢွင်ႇ ထွၼ်ဢွၵ်ႇပႃႊတီႊသေ ၶဝ်ႈႁူမ်ႈ ၼႂ်းငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ။ ၼွၵ်ႈသေၼၼ်ႉ ၵူၼ်းၼုမ်ႇၸိူဝ်းၵမ်ႉထႅမ် ၸၢႆးတဵင်းဢွင်ႇ ၵေႃႈထွၼ်တူဝ်ဢွၵ်ႇသေ ၶဝ်ႈပႃႊတီႊႁူဝ်သိူဝ်ၸွမ်း ၸၢႆးတဵင်းဢွင်ႇ ဢမ်ႇယွမ်းမွၵ်ႈ 20-30 ၵေႃႉ- ၼႆယဝ်ႉ။

ၵူၼ်းၼုမ်ႇၵမ်ႈၽွင်ႈဝႃႈ- ဢၼ်လႆႈ ထွၼ်တူဝ်ဢွၵ်ႇၼႂ်းပႃႊတီႊသိူဝ်ၽိူၵ်ႇသေ ၶဝ်ႈႁူမ်ႈပႃႊတီႊႁူဝ်သိူဝ်ၼႆႉ မီးလၢႆလွင်ႈ။ ပိူင်လူင်မၼ်း ၵဵဝ်ႇၵပ်းလွင်ႈငိုၼ်းတွင်း၊ လွင်ႈသုၼ်ႇတူဝ်ၸိူဝ်းၼႆႉ။ ဢၼ်လမ်ႇလွင်ႈသုတ်း ပေႃးလိူၵ်ႈတင်ႈပီ 2015 ၼႆႉ ယွၼ်ႉပိူဝ်ႈပႃႊတီႊသွင်ဢၼ် ဢမ်ႇႁူမ်ႈႁွမ်းၵၼ်လႆႈသေ ပေႃးတေယူႇၼႂ်းပႃႊတီႊ 2 ဢၼ်သေၶေႉၶႅင်ႇလိူၵ်ႈတင်ႈ ႁဝ်းတေၵၢၼ်ႉပိူၼ်ႈ။ ၵွပ်ႈၼၼ် ထိုင်ၶၢဝ်းယၢမ်းၶၢႆႉပႃႊတီႊယဝ်ႉလႄႈ လႆႈၶၢႆႉ၊ ပေႃးဢမ်ႇၶၢႆႉၵေႃႈၸၢင်ႈၵၢၼ်ႉပိူၼ်ႈ- ဝႃႈၼႆ။

မိူဝ်ႈၵေႃႇတင်ႈပႃႊတီႊသိူဝ်ၽိူၵ်ႇၼၼ်ႉ ၸဝ်ႈၶုၼ်ထုၼ်းဢူး ၶဝ်တိုၵ်ႉမီးယူႇၼႂ်းၶွၵ်ႈ။ ၽွင်းၼၼ်ႉ လႆႈဢုပ်ႇဢူဝ်းၵၼ်သေ ၶဝ်ႈၼႂ်းပႃႊတီႊသိူဝ်ၽိူၵ်ႇမႃး၊ ယွၼ်ႉပိူဝ်ႈပႃႊတီႊတႆး မီးပႃႊတီႊသိူဝ်ၽိူၵ်ႇဢၼ်လဵဝ်။ ပေႃးၸဝ်ႈၶုၼ်ထုၼ်းဢူးၶဝ် ဢွၵ်ႇၶွၵ်ႈမႃးၵေႃႈ တေဢုပ်ႇၵၼ်ပိူဝ်ႈတႃႇႁူမ်ႈႁွမ်းၵၼ် ပဵၼ်ပႃႊတီႊတႆးဢၼ်လဵဝ်ၵၼ်။ ၵူၺ်းၵႃႈ တေႃႇထိုင်မိူဝ်ႈလဵဝ်ၼႆႉ ပႃႊတီႊတႆးဢမ်ႇႁူမ်ႈႁွမ်းၵၼ်လႆႈ။ ၵွပ်ႈၼၼ်လႄႈ ၸင်ႇလႆႈထွၼ်တူဝ်ဢွၵ်ႇ- ၵူၼ်းၼုမ်ႇတႃႈၶီႈလဵၵ်း ၽူႈထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇ ၶဝ်ႈႁူမ်ႈပႃႊတီႊသိူဝ်ၽိူၵ်ႇ ၵေႃႉၼိုင်ႈလၢတ်ႈၼင်ႇၼႆ။

ၵူၼ်းမိူင်း ၵူၼ်းၼုမ်ႇၸိူဝ်းဢၼ်ၶဝ်ႈၸႂ်ဝႃႈ ပေႃးမီးပႃႊတီႊတႆးသွင်ဢၼ်၊ ပေႃးလိူၵ်ႈတင်ႈမႃး တေၸၢင်ႈၵၢၼ်ႉပိူၼ်ႈၸိူဝ်းၼႆႉၵေႃႈ ဢွၼ်ၵၼ်ၵမ်ႉထႅမ်ပၼ်ႁႅင်း ၸၢႆးတဵင်းဢွင်ႇ ဢၼ်ၶဝ်ႈႁူမ်ႈပႃႊတီႊႁူဝ်သိူဝ်- ၼႆယူႇ။