ၽွင်းတႅၼ်းပႃႊတီႊသိူဝ်ၽိူၵ်ႇ (SNDP) တႃႈၶီႈလဵၵ်း ထွၼ်တူဝ်ဢွၵ်ႇပႃႊတီႊသေ ၶဝ်ႈႁူမ်ႈၼႂ်း ပႃႊတီႊႁူဝ်သိူဝ် (SNDP) ပဵၼ်တၢင်းၵၢၼ်၊ မီးၵူၼ်းၼုမ်ႇၸိူဝ်း ၵမ်ႉထႅမ်ၵမ်ႈၽွင်ႈ ထွၼ်တူဝ်ဢွၵ်ႇၸွမ်း။

ပူၼ်ႉမႃးမိူဝ်ႈဝၼ်းတီႈ 10/01/2015 ၽွင်းတႅၼ်းသၽႃးၵူၼ်းမိူင်း ၻီႊမူဝ်ႊၶရႅတ်ႊတိၵ်ႊ ပႃႊတီႊၸၢဝ်းၶိူဝ်းတႆး ႁိုဝ် ပႃႊတီႊသိူဝ်ၽိူၵ်ႇ (SNDP) တီႈတႃႈၶီႈလဵၵ်း၊ ၸၢႆးတဵင်းဢွင်ႇ ထွၼ်ဢွၵ်ႇပႃႊတီႊ ပဵၼ်တၢင်းၵၢၼ်သေ ၶဝ်ႈႁူမ်ႈ ၼႂ်းငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ပဵၼ်တၢင်းၵၢၼ်- ၼႆယဝ်ႉ။

ဝၢႆးသေမႃးပိုတ်ႇလုမ်းၵိင်ႇၽႄ တီႈပုင်ႇပႃႇၶႅမ် ၸႄႈဝဵင်းမိူင်းတူၼ် ၸိုင်ႈပွတ်းဢွၵ်ႇ၊ မိူဝ်ႈဝၼ်းတီႈ 08/01/2015 ယဝ်ႉ ဢိင်ၼိူဝ်တၢင်းၽူႈယႂ်ႇၵူၼ်းလူင် တီႈၼေႇပျီႇတေႃႇ ႁွင်ႉမႃးပိူဝ်ႈတႃႇဢုပ်ႇၵုမ်ၵၼ်သေ ႁူဝ်ပဝ်ႈၸဝ်ႈၶုၼ်ထုၼ်းဢူး လႆႈသိုပ်ႇၶၢဝ်းတၢင်းၵႂႃႇ ၼေႇပျီႇတေႃႇ။


ထိုင်မႃးဝၼ်းတီႈ 11/01/2015 ၵႅမ်ႁူဝ်ပဝ်ႈပႃႊတီႊႁူဝ်သိူဝ် ၸၢႆးၸေႃးဢွင်ႇ၊ ၽူႈမီးၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်း လႄႈ တင်းလုၵ်ႈၸုမ်း ၵႂႃႇပိုတ်ႇလုမ်းၽႄ တီႈမိူင်းယၢင်း ၸႄႈတွၼ်ႈၵဵင်းတုင်။ ၸၢႆးတဵင်းဢွင်ႇ တင်း ၵူၼ်းၼုမ်ႇၸိူဝ်းဝႃႈလႆႈပွင်ပဵၼ် တီႈတႃႈၶီႈလဵၵ်းၵမ်ႈၽွင်ႈၵေႃႈ ၸပ်းၸွမ်းႁွမ်းပႆၵႂႃႇၸွမ်း။ မီးၵေႃၵမ်ၵၢၼ်ငဝ်ႈငုၼ်း (CEC) ၸိုင်ႈတႆးပွတ်းၸၢၼ်း/ ပွတ်းႁွင်ႇ၊ ပီႈၼွင်ႉၵူၼ်းမိူင်း တႃႈၶီႈလဵၵ်း၊ မိူင်းယွင်း၊ မိူင်းၽျၢၵ်ႈ၊ ၵဵင်းတုင် လႄႈ မိူင်းယၢင်း ၸိူဝ်းၼႆႉၶဝ်ႈႁူမ်ႈႁိမ်းႁဵင်။ လႆႈႁူႉဝႃႈ ပွတ်းဢွၵ်ႇၶူင်းၼႆႉ တေပိုတ်ႇလုမ်းထႅင်ႈလၢႆတီႈ- ၼႆယဝ်ႉ။

လႆႈႁူႉထႅင်ႈဝႃႈ- တီႈတႃႈၶီႈလဵၵ်းၼႆႉ ၵူၼ်းၼုမ်ႇ လုၵ်ႈၸုမ်းပႃႊတီႊသိူဝ်ၽိူၵ်ႇ ၸိူဝ်းၵမ်ႉထႅမ် ၸၢႆးတဵင်းဢွင်ႇ ၵမ်ႈၽွင်ႈၵေႃႈ ထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇသေ ၶဝ်ႈႁူမ်ႈၼႂ်းပႃႊတီႊႁူဝ်သိူဝ်ၼင်ႇၵဝ်ႇ- ၼႆယဝ်ႉ။

ပႃႊတီႊႁူဝ်သိူဝ် (SNLD) ၼႆႉ ႁပ်ႉလွၵ်းပိူင် 8 ၸႄႈမိူင်း/တိူင်း၊ (ဢၼ်မိူင်းမၢၼ်ႈ 7 တိူင်း မႃးႁူမ်ႈၵၼ်ပဵၼ်ၸႄႈမိူင်းလဵဝ်) သေ ႁူမ်ႈၵၼ်ၵေႃႇသၢင်ႈၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ။ မီးယိူင်းဢၢၼ်း ပိူဝ်ႈတႃႇႁႂ်ႈလႆႈမႃး သုၼ်ႇလႆႈၽဵင်ႇပဵင်း၊ ၵေႃႇတင်ႈၸိုင်ႈမိူင်းႁူမ်ႈတုမ်ၾႄႊၻရိူဝ်ႊလ်/ ၸိုၼ်ႈၸၢင်ႇ၊ မီးလွင်ႈထၢင်ႇႁၢင်ႈၽွင်းငမ်းတူဝ်ၵဝ်ႇႁင်းၶေႃ ၸိူဝ်းၼႆႉ။

ပႃႊတီႊႁူဝ်သိူဝ် (SNLD) ၼႆႉ မိူဝ်ႈပၢင်လိူၵ်ႈတင်ႈပီ 1990 ၼၼ်ႉ ပေႉၵၢၼ်လိူၵ်ႈတင်ႈၼႂ်းၸိုင်ႈတႆး တီႈ 2 ။ (ပႃႊတီႊၼူၵ်ႉယုင်း NLD လႆႈတီႈၼိုင်ႈ)။