ၵႅမ်ႁူဝ်ပဝ်ႈၸုမ်းၶၢင် (KIO) ၊ ႁူဝ်ပဝ်ႈၶွင်ႊသီႊႁူမ်ႈတုမ် ၵူႈၸၢဝ်းၶိူဝ်း (UNFC) ႁူပ်ႉထူပ်းဢုပ်ႇဢူဝ်း ၸွမ်သိုၵ်းယွတ်ႈသိုၵ်း တီႈငဝ်ႈငုၼ်းလွႆတႆးလႅင်း။ ပၢင်ႁူပ်ႉထူပ်းပွၵ်ႈၼႆႉ ၼႄၵၢၼ်လွင်ႈ ၸမ်ၸႂ်ၵၼ်။

ဢႅၼ်ႊပၢၼ်းလႃႉ

မိူဝ်ႈဝၼ်းတီႈ 19/01/2015 ၵႅမ်ႁူဝ်ပဝ်ႈၸုမ်းၶၢင်လွတ်ႈလႅဝ်း (KIO) တင်း ႁူဝ်ပဝ်ႈၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ဢႅၼ်ႊပၢၼ်းလႃႉ လႆႈႁူပ်ႉထူပ်းၵၼ်တင်း ႁူဝ်ပဝ်ႈလူင်ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸဝ်ႈယွတ်ႈသိုၵ်း တီႈငဝ်ႈၸိုင်ႈလွႆတႆးလႅင်း ၶွင် RCSS/SSA ။ ၵူၺ်းၵႃႈ ပၢင်ႁူပ်ႉထူပ်းပွၵ်ႈၼႆႉ ဢမ်ႇလႆႈႁူႉႁူဝ်ယွႆႈတႅတ်းတေႃးဝႃႈ ဢုပ်ႇၵၼ်လွင်ႈသင်လၢႆလၢႆ။

ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၼႂ်း RCSS/SSA ဢၼ်ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈလၢတ်ႈဝႃႈ- ဢုပ်ႇၵၼ်လွင်ႈသင် ႁူဝ်ယွႆႈမၼ်းၶဝ်ဢမ်ႇလၢတ်ႈ။ ၶဝ်လၢတ်ႈဝႃႈၵၢၼ်ဢုပ်ႇဢူဝ်းၵၼ်ပွၵ်ႈၼႆႉ မီးလွင်ႈလႆႈၸႂ်ၵၼ်လၢႆၶေႃႈယူႇ။ ဢၼ်ၶဝ်ၸဝ်ႈႁူပ်ႉထူပ်းဢုပ်ႇဢူဝ်းၵၼ်ၼႆႉ ပဵၼ်လွင်ႈလီ၊ ၼႄဝႃႈ ႁဝ်းမီးလွင်ႈတိတ်းတေႃႇၵပ်းသၢၼ်၊ မီးလွင်ႈၸမ်ၸႂ်ၵၼ်ယူႇ- ဝႃႈၼႆ။

ၸဝ်ႈယွတ်ႈသိုၵ်း

မိူဝ်ႈၸုမ်းၶၢဝ်ႇၽူႈတွႆႇႁွၵ်ႈ ၵႂႃႇႁွတ်ႈထိုင်လွႆတႆးလႅင်း ပူၼ်ႉမႃးမိူဝ်ႈဝၼ်းတီႈ 11/01/2015 ၼၼ်ႉ ႁူဝ်ပဝ်ႈ ၸဝ်ႈယွတ်ႈသိုၵ်းလၢတ်ႈဝႃႈ ၵဵဝ်ႇၵပ်းလွင်ႈ ၵၢၼ်တူၵ်းလူင်း ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCA) ၼႆႉ ႁဝ်းဢမ်ႇဝႆႉၼၵ်း၊ ၵွပ်ႈဝႃႈႁဝ်းလႆႈလူင်းလၢႆးမိုဝ်းဝႆႉ ၸၼ်ႉၸႄႈမိူင်း၊ ၸၼ်ႉၸိုင်ႈမိူင်းႁူမ်ႈတုမ်ဝႆႉယဝ်ႉ။ NCA ၼႆႉ တေလႆႈလူင်းလၢႆးမိုဝ်း ဢမ်ႇလႆႈလူင်းလၢႆးမိုဝ်း ဢမ်ႇၸႂ်ႈပိူင်လူင်။ ၵူၺ်းၵႃႈ ပေႃးဝႃႈ NCA မီးၶေႃႈတူၵ်းလူင်းလွင်ႈၵၢၼ်သိုၵ်းလၢႆလၢႆၵူၺ်းတႄႉ ႁဝ်းၵေႃႈၽွမ်ႉ/တူဝ်ႈတၼ်း ၵႂႃႇလူင်းလၢႆးမိုဝ်းယူႇ။

ၵဵဝ်ႇၵပ်းလူၺ်ႈလွင်ႈၵၢၼ်မိူင်းၼႆႉတႄႉ ႁႂ်ႈမီးဝႆႉၶေႃႈႁပ်ႉႁွင်း (ဢမၶၢမ်ႇ) ဝႃႈ- တၵ်းတေဢုပ်ႇဢူဝ်းၵၢၼ်မိူင်း ၵႂႃႇၵမ်းလဵဝ်။ ပေႃးမီးၶေႃႈႁပ်ႉႁွင်းၸိူင်ႉၼႆၵေႃႈ ႁဝ်းပေႃးၸႂ်ယဝ်ႉ။ ၵူၺ်းၵႃႈ NCA ၼႆႉ ပေႃးပႃးလွင်ႈပၼ်ႁႃၵၢၼ်မိူင်းၼမ်ၼႆတႄႉ ႁဝ်းၵေႃႈတေလႆႈဢဝ်ၶၢဝ်းယၢမ်းသေ လဵပ်ႈႁဵၼ်းထႅင်ႈ- ၸဝ်ႈယွတ်ႈသိုၵ်းလၢတ်ႈၼင်ႇၼႆ။

ဢႅၼ်ႇပၢၼ်းလႃႉ ၶိုၼ်ႈၵႂႃႇလွႆးတႆးလႅင်းဝၼ်းၼၼ်ႉသေ ၶိုၼ်းလူင်းမႃးဝၼ်းၼၼ်ႉၵမ်းလဵဝ်၊ ၵွပ်ႈဝႃႈ မႅၼ်ႈၽွင်း ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) ႁဵတ်းပၢင်ၵုမ်ၵၼ်တီႈၵဵင်းမႆႇ ၼႂ်းဝၼ်းတီႈ 19-20/01/2015 ။ ထိုင်မႃးဝၼ်းတီႈ 21/01/2015 ဢႅၼ်ႇပၢၼ်းလႃႉ ၵေႃႈ ႁူပ်ႉထူပ်း NCCT တီႈၼႂ်းၵဵင်းမႆႇ- လႆႈႁူႉၼင်ႇၼႆ။