ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ တႅပ်းတတ်းတေ ၶဝ်ႈႁူမ်ႈ ပၢင်ပွႆး ယုၵ်ႉယွင်ႈၸဝ်ႈၶူးမေႃ တီႈဝၢၼ်ႈမႂ်ႇမွၵ်ႇၸၢမ် လႄႈ တေႁွမ်းငိုၼ်းၵမ်ႉၸွႆႈ တႃႇၸတ်းပွႆးယုၵ်ႉယွင်ႈ ၸဝ်ႈၶူးမေႃပွၵ်ႈတီႈ 39 ၵမ်းၼႆႉ 30,000 ဝတ်ႇ။

ႁေႃၸဝ်ႈၶူးမေႃ တီႈဝၢၼ်ႈမႂ်ႇမွၵ်ႇၸၢမ်

ၵေႃလိၵ်ႈလၢႆးလႄႈၾိင်ႈငႄတႆး ၵဵင်းမႆႇ ၸတ်းႁဵတ်းပၢင်ၵုမ်ၶိုၵ်ႉၶၵ်ႉ တင်ႈတႄႇၶၢဝ်းယၢမ်း 21:00 မူင်း တေႃႇထိုင် 23:00 မူင်း တီႈလုမ်း ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ ၼႂ်းဝတ်ႉၵူႇတဝ်ႈ ဢိူင်ႇသီၽုမ်း ၸႄႈဝဵင်းမိူင်း ၸႄႈတွၼ်ႈဝဵင်းၵဵင်းမႆႇ ၵဵဝ်ႇလူၺ်ႈပွႆးယုၵ်ႉယွင်ႈ ၸဝ်ႈၶူးမေႃ တီႈဝၢၼ်ႈမႂ်ႇမွၵ်ႇၸၢမ် ဢၼ်မီး ၵေႃၵမ်ၵၢၼ် ၼႂ်းဝၢၼ်ႈမႂ်ႇမွၵ်ႇၸၢမ် ၵမ်ႈၽွင်ႈလႄႈ ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ ၸုမ်းတႆးသၢမ်ၸႄႈဝဵင်း ၾၢင် ၶျႆးပၵၢၼ်း မႄႈဢၢႆး မိူဝ်ႈဝၼ်းတီႈ 18/01/2015 ပူၼ်ႉမႃႈၼၼ်ႉ ယွၼ်ႉပေႃႈလူင် (ပူႇၵၢင်ႉ) ဝၢၼ်ႈမႂ်ႇမွၵ်ႇၸၢမ်ဝႃႈ ဢမ်ႇမီးၽႂ်လၢတ်ႈ ဢမ်ႇလႆႈႁူႉၸွမ်းၼႆလႄႈ ဝႃႈဢမ်ႇ ဢဝ်ပုၼ်ႈၽွၼ်းသင်ပၼ်ၼႆသေ ထွတ်ႇၸႂ်ၵၼ်ဝႃႈ တေဢမ်ႇႁဵတ်းယဝ်ႉ ပေႃးပေႃႈလူင် ဢမ်ႇဢဝ်ပုၼ်ႈၽွၼ်းသင်ၵေႃႈ ဝႃႈၼႆ။

ဝၢႆးသေၼၼ်ႉဝၼ်းသွင်ဝၼ်း မိူဝ်ႈပီႈၼွင်ႉဝၢၼ်ႈမႂ်ႇမွၵ်ႇၸၢမ်ၶဝ် လႆႈႁူႉၶၢဝ်ႇၼႆႉဢွၵ်ႇမႃးၵေႃႈဢမ်ႇႁၢၼ်ႉၸႂ် ၵွပ်ႈဝႃႈ ပွႆးယုၵ်ႉယွင်ႈၸဝ်ႈၶူးမေႃ တီႈဝၢၼ်ႈမႂ်ႇမွၵ်ႇၸၢမ်ၼႆႉ ႁဵတ်းမႃးထိုင်ပွၵ်ႈထူၼ်ႈ 38 ယဝ်ႉၾၢႆႇၼိုင်ႈၵေႃႈ ပဵၼ်တီႈ ၸဝ်ႈမုၼ်ယႂ်ႇႁေႃၶမ်း ၸဝ်ႈၽူႊမိၽူၼ်ႊ ဢၻုလ်ႊယၻဵတ်ႇ လႄႈၾႃႉၼၢင်းၸဝ်ႈႁေႃၶမ်း ႁူမ်ႈလူၺ်ႈၶိူဝ်းၸိူဝ်ႉသၢႆ ႁေႃၶမ်းထႆး ၵေႃႈလႆႈမႃးသူႇယဵမ်ႈၸႂ်း ပီႈၼွင်ႉတႆးႁဝ်း တီႈဝၢၼ်ႈမႂ်ႇမွၵ်ႇၸၢမ် 5 ပွၵ်ႈ ထပ်ႉၵၼ် ဢိၵ်ႇတင်း ပဵၼ်တီႈ ၽူႈယႂ်ႇၵူၼ်းလူင်တႆးႁဝ်း မႃးပိုင်ႈႁူမ်ႈပၵ်းထၢၼ်ၾင်ႁၢၵ်ႈ လႄႈသၢင်ႈႁေႃၸဝ်ႈၶူးမေႃၶိုၼ်ႈမႃး ပဵၼ်တီႈမၢႆတွင်း တႃႇမႅတ်ႇပႅင်းႁၵ်ႉသႃပႂ်ႉပႃး ၾိင်ႈငႄႈလိၵ်ႈလၢႆးတႆးႁဝ်း သိုပ်ႇတေႃႇၵႂႃႇမိူဝ်းၼႃႈၼႆလႄႈၸင်ႇၶိုၼ်းသိုပ်ႇ ပူၵ်းတိုၼ်ႇ ႁွင်ႉသႅၼ်ႇဝႃႈ ၵိုင်ႇထုၵ်ႇလီႁဵတ်းၵႂႃႇၵူႈပီပီႁႂ်ႈပဵၼ်တီႈလုၵ်ႈလၢၼ်ၸိူဝ်းတေမႃးပႃႈလင်လႆႈတိုၼ်ႇတူဝ်တိုၼ်ႇၸႂ် တေလႆႈ မီးၸႂ်ၽုၵ်ႇၾင်ႁၵ်ႉလိၵ်ႈလၢႆးၾိင်ႈငႄႈတႆးႁဝ်း ၵႂႃႇၼႆလႄႈႁွင်ႉဝွၵ်ႇၶွၼ်ႈႁႅင်းၵၼ်မႃးသေ လုၵ်ႉႁိုၼ်ႇတိုၼ်ႇသၢၼ်ႈ ၽိုတ်ႉႁဵတ်းသၢင်ႈ မီးတူဝ်မီးၸႂ်ၶိုၼ်း။

ၵဵဝ်ႇၵပ်းလွင်ႈၼႆႉ ႁူမ်ႈဝႃႈပေႃႈလူင် ဢမ်ႇဢဝ်ပုၼ်ႈၽွၼ်းသင်ၼႆၵေႃႈ ၵူၼ်းၼုမ်ႇၼႂ်းဝၢၼ်ႈၶဝ်ဢွၼ်ၵၼ် လုၵ်ႉႁဵတ်း ၵၢၼ် ၵႂႃႇယွၼ်းဢၼုၺၢတ်ႈ တီႈၸဝ်ႈၼႃႈတီႈၾၢႆႇသိုၵ်း (ၽွင်းသိုၵ်းတိုၵ်ႉယိပ်းၵမ်ဝၢၼ်ႈမိူင်း ယူႇယၢမ်းလဵဝ်) ဢိၵ်ႇတင်း တၢင်းၾၢႆႇၽွင်းငမ်းၸႄႈဝဵင်း ၸႄႈတွၼ်ႈသေ လႆႈၼုၺၢတ်ႉတႃႇၸတ်းႁဵတ်း ပွႆးယုၵ်ႉယွင်ႈၸဝ်ႈၶူးမေႃ ပွၵ်ႈတီႈ 39 ၼႆႉမႃးယဝ်ႉလႄႈသိုပ်ႇလၢတ်ႈႁွင်ႉ ဝွၵ်ႇၸိူၼ်းပီႈၼွင်ႉတႆးၵူႈတီႈတီႈပိူဝ်ႈမႃးၶဝ်ႈႁူမ်ႈၶွၼ်ႈႁႅင်း ၼႄလွင်ႈၽွမ်ႉႁူမ်ႈ ႁၵ်ႉပႅင်းၵၼ် ႁႂ်ႈတၢင်ႇၸၢတ်ႈတၢင်ႇၶိူဝ်းပေႃးဢၢမ်းယွင်ႈၸူမ်းၶွႆၼႆယဝ်ႉ။
ပွႆးယုၵ်ႉယွင်ႈၸဝ်ႈၶူးမေႃၵမ်းၼႆႉ ပဵၼ်ပွၵ်ႈထူၼ်ႈ 39 တေႁဵတ်းၸွမ်းၼင်ႇၶေႃႈလႆႈၸႂ်ၵၼ်မႃးမိူဝ်ႈဝၼ်းတီႈ 13/12/2015 ၼၼ်ႉ မၢင်တီႈမၢင်လွင်ႈၵေႃႈ တေၸၢင်ႈလႅၵ်ႈလၢႆႈပိၼ်ႇပႅင်ၽွင်ႈယူႇ ဝႃႈၼႆ။

ၸိူင်ႉၼင်ႇ မုၵ်ႉၽုင်တႃႇ တေႁႄႇဢဝ်တီႈ ႁူဝ်ၶူဝ်မႄႈၼမ်ႉၵူၵ်း တႃႈတွၼ်းသေႁႄႇၵႂႃႇထိုင် ဝၢၼ်ႈမႂ်ႇမွၵ်ႇၸၢမ်ၼၼ်ႉ ၶိုၼ်းလၢႆႈပိၼ်ႇဢဝ်တီႈ ႁူင်းႁဵၼ်းသေႁႄႇၵႂႃႇတီႈ ဝတ်ႉဝၢၼ်ႈမႂ်ႇမွၵ်ႇၸၢမ် (တီႈၸတ်းပွႆး) ၾၢႆႇႁူမ်ႇလူမ်ႈၵေႃႈယွၼ်းၸဝ်ႈၼႃႈတီႈ ၾၢႆႇသိုၵ်းမႃး ဢဝ်ႁူမ်ႇလူမ်ႈပၼ်ၼႆႉယဝ်ႉ။

ၵူၺ်းၵႃႈၸိူင်ႉႁိုဝ်ၵေႃႈလီ ပၢင်ပွႆးယုၵ်ႉယွင်ႈၸဝ်ႈၶူးမေႃပီၼႆႉ  တေပဵၼ်ၼႂ်း ဝၼ်းတီႈ 30-31/01/2015 – 01/02/2015 ၸွမ်းၼင်ႇဢၼ်လႆႈမၵ်းမၼ်ႈဝႆႉ မိူဝ်ႈဝၼ်း တီႈ 13/12/2015 ပူၼ်ႉမႃးၼၼ်ႉဝႃႈၼႆ။

မိူဝ်ႈဝၼ်းပၢင်ၵုမ် ဝၼ်းတီႈ 18/01/2015 ၼၼ်ႉ ၵွပ်ႈဝႃႈ ပေႃႈလူင် တေဢမ်ႇဢဝ်ပုၼ်ႈၽွၼ်းသင်ၼႆလႄႈ ၵမ်ႈၼမ် ၽူႈၶိုၼ်ႈပၢင်ၵုမ် သမ်ႉပဵၼ်ၵူၼ်းၼွၵ်ႈဝၢၼ်ႈ ၵူၼ်းၼႂ်းဝၢၼ်ႈသမ်ႉမီးဢေႇလႄႈ ၽႂ်ၵေႃႈ ဢမ်ႇၸၢင်ႈလၢတ်ႈလႆႈ ဝႃႈတေ ဢဝ်ပုၼ်ႈၽွၼ်းၼႂ်းပိုၼ်ႉတီႈၼႆႉလႆႈၵူႈလွင်ႈလႄႈ ၸင်ႇယွမ်းထွၼ်ၵိုတ်းပႅတ်ႈ။ ဝၢႆးၼၼ်ႉပီႈၼွင်ႉဝၢၼ်ႈမႂ်ႇမွၵ်ႇၸၢမ် ၶဝ်ၵမ်ႈၼမ် ဢမ်ႇႁၢၼ်ႉၸ်ႂလႄႈ ၶို်ၼ်းဢုပ်ႇလႆႈၸ်ႂၵၼ်တေၸတ်းႁဵတ်းႁႂ်ႈသိုပ်ႇ ပဵၼ်ပွႆးယုၵ်ႉယွင်ႈ ၸဝ်ႈၶူးမေႃ ပွၵ်ႈ ထူၼ်ႈ 39 ၵမ်းၼႆႉ။ ၸင်ႇလႆႈၵႂႃႇယွၼ်းဢၼုၺၢတ်ႈၸတ်းပွႆးတီႈၸဝ်ႈၼႃႈတီႈၾၢႆႇသိုၵ်း ၾၢႆႇၽွင်းငမ်း ပိူဝ်ႈတႃႇ ၸတ်းႁဵတ်း ပွႆးယုၵ်ႉယွင်ႈၸဝ်ႈၶူးမေႃ ပွၵ်ႈတီႈ 39 ၼႆႉလႆႈမႃးယဝ်ႉ ၶိုၼ်းသိုပ်ႇႁွင်ႉၸိူၼ်းၵေႃၵမ်ၵၢၼ် ဢၼ်ၸတ်း တင်ႈမႃး မိူဝ်ႈဝၼ်းတီႈ 13/12/2014 ၼၼ်ႉ တၢင်းၵေႃလိၵ်ႈလၢႆးၾိင်ႈငႄႈတႆးၵဵင်းမႆႇၵေႃႈ လႆႈႁွင်ႉ ပၢင်ၵုမ်ၵၼ် ၶိုၵ်ႉၶၵ်ႉ ၶမ်ႈဝၼ်းတီႈ 22/01/2015 တင်ႈတႄႇ 2130 မူင်းတေႃႇ 23.00 မူင်း ဝၢႆးပၢင် ၻေးသၼႃးထမ်း (တြႃး) ၸဝ်ႈသုၶမ်း တီႈဝတ်ႉၵူႇတဝ်ႈယဝ်ႉတူဝ်ႈၵေႃႈ လႆႈဢုပ်ႇထတ်းသၢင်ၽွၼ်းလီၽွၼ်းၸႃႉ ဢၼ်တေတၢမ်မႃး ပႃႈလင်ယဝ်ႉၸင်ႇမီးၶေႃႈလႆႈၸႂ် တပ်းတတ်းဢွၵ်ႇမႃးဝႃႈတေၵႂႃႇၶဝ်းႁူမ်ႈ ႁဵတ်းသၢင်ႈတူင်ႉၼိုင်ၸွမ်းၼႆယဝ်ႉ။

ႁူမ်ႈဝႃႈတေဢမ်ႇပဵင်းပေႃးႁၢၼ်ႉၸ်ႂၶႅမ်ႉလႅပ်ႈတဵမ်ထူၼ်ႈမိူၼ်တၢင်းတင်ႈၸ်ႂၵမ်းဢွၼ်တၢင်းၼႆၵေႃႈ ၵွပ်ႈမုင်ႈႁၼ်ထိုင် ၵၢၼ်ၽွမ်ႉႁူမ်ႈလႄႈၵၢၼ်ပူတ်းၽႃႈပွႆႇပၼ်ၵၼ် ပိူဝ်ႈၵႂၢမ်းၶဝ်ႈၸႂ်လႄႈယွမ်းႁပ်ႉၼပ်ႉထိုဝ်ၵၼ် ႁႂ်ႈပဵၼ်ၼမ်ႉၼိုင်ႈ ၸိုင်ႈလဵဝ်ၵၼ်လႆႈၼၼ်ႉ တွၼ်ႈတႃႇတႆးႁဝ်းပဵၼ်ဢၼ်ႁႃတိုဝ်ႉတၢင်းယၢပ်ႇယဵၼ်းၶဵၼ်ၸႂ်တႄႉတႄႉ။ ဢဝ်ၸႂ်ႁဝ်း ၽွမ်ႉပိူၼ်ႈဢွၼ်တၢင်းၵွၼ်ႇ ၸႂ်ပိူၼ်ႈၸင်ႇတေၽွမ်ႉၸွမ်းႁဝ်းၼႆၼၼ်ႉ ဝႆႉပဵၼ်လၵ်းလူင်သိူဝ်ႉပိုၼ်ႉၼမ်းတၢင်း။  ပိူဝ်ႈတႃႇလႆႈလွင်ႈၽွမ်ႉႁူမ်ႈၵၼ်ၼႆႉ ပဵၼ်ၵၢၼ်ၶိုၵ်ႉၶမ်ႇလမ်ႇလွင်ႈလူင် လိူဝ်တၢင်ႇၸိူဝ်ႉတၢင်ႇပိူင်ယဝ်ႉဝႃႈၼႆ။

ၸွမ်းၼင်ႇပွင်ပဵၼ်လႆႈၵေႃလိၵ်ႈလၢႆးၾိင်ႈငႄႈတႆးၵဵင်းမႆႇ တေႁပ်ႉပုၼ်ႈၽွၼ်းဢၼ်လႆႈႁပ်ႉပုၼ်ႉၽွၼ်းဝႆႉ ဢွၼ်ၼႃႈ ၼႆႉဢိၵ်ႇတင်း ငိုၼ်းတေၵမ်ႉၸွႆႈပွႆးယုၵ်ႉယွင်ႈၸဝ်ႈၶူးမေႃၵမ်းၼႆႉ  30000 ဝၢတ်ႇ တူၵ်းလူင်း လႆႈၸ်ႂၵၼ်တႅပ်းတတ်း ၼင်ႇၼႆ။