ရူတ်ႉၵႃးသိုၵ်းမၢၼ်ႈ ထုၵ်ႇၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ပႂ်ႉမူၵ်းယိုဝ်းၸွမ်းတၢင်း၊ ဝူင်ႈၵၢင်ၵူတ်ႉၶၢႆ- မူႇၸေႈ၊ ၵမ်ႈၽွင်ႈဝႃႈ ပဵၼ်ၵၢၼ်တွပ်ႇတႅၼ်း ဢၼ်သိုၵ်းမၢၼ်ႈ ၵၼ်ႉၸၼ်ၶႃႈႁႅမ် မေႃသွၼ်ၼၢင်းယိင်းၶၢင်။

ဝၼ်းတီႈ 23/01/2015 ရူတ်ႉၵႃးသိုၵ်းမၢၼ်ႈ 3 လမ်း၊ တၢင်ႇၵူၼ်းသိုၵ်းမွၵ်ႈ 50-60 ၵေႃႉ၊ ဢွၵ်ႇၶၢဝ်းတၢင်း လုၵ်ႉတၢင်းၵူတ်ႉၶၢႆ ဢွၵ်ႇၵႂႃႇတၢင်းမူႇၸေႈ၊ ထုၵ်ႇၸုမ်းယိပ်းၵွင်ႈၵၢင်ႇၸုမ်းၼိုင်ႈ ပႂ်ႉမူၵ်းယိုဝ်းတီႈၼမ်ႉၵူတ်ႉ၊ ၼိူဝ်သဵၼ်ႈတၢင်းၵူတ်ႉၶၢႆ- ဝဵင်းတႃႈလိူဝ်ႇ၊ ယၢၼ်ၾၢႆႇႁွင်ႇဝဵင်းၵူတ်ႉၶၢႆမွၵ်ႈ 10 လၵ်းပၢႆ၊ ၵႅဝ်ႈ (မၢၼ်ႇ) ၼႃႈရူတ်ႉၵႃးလမ်းၼိုင်ႈ တႅၵ်ႇလူႉၵွႆမူတ်း၊ သိုၵ်းမၢၼ်ႈ တၢႆၵေႃႉၼိုင်ႈ၊ တိူဝ်ႉဝၢတ်ႇၸဵပ်းၵေႃႉၼိုင်ႈ- ၼႆယဝ်ႉ။

တီႈလွႆၼမ်ႉၽၵ်းလိူၼ်း (လွႆသျူႉၶိၼ်းတႃႇ)ၼၼ်ႉ သိုၵ်းမၢၼ်ႈၶဝ် ဢမ်ႇႁတ်းၶီႇၵႃးၶိုၼ်ႈ၊ ႁေႃႈၵႃးပဝ်ႇၶိုၼ်ႈလၢႆလၢႆၵူၺ်း၊ ၵူၼ်းသိုၵ်းၶဝ်ပႆၶိုၼ်ႈ။ ပေႃးတူၺ်း ဢၼ်ၶဝ်မႃးယိုဝ်းၼႆႉ လႅပ်ႈပဵၼ်ၵၢၼ်တွပ်ႇတႅၼ်းၶိုၼ်း ဢၼ်သိုၵ်းမၢၼ်ႈ ၵႂႃႇၵၼ်ႉၸၼ်လူလၢႆၼၢင်းယိင်း မေႃသွၼ်ၶၢင်သေ ၶႃႈႁႅမ်တၢႆၼၼ်ႉ။ တီႈ 105 (ပၢၵ်ႇႁႃႈလၵ်း)ၵေႃႈ မီးၵၢၼ်ၼႄၵၢင်ၸႂ်သၢၼ်ၶတ်း လွင်ႈသိုၵ်းမၢၼ်ႈၵၼ်ႉၸၼ်လူလၢႆၼၢင်းယိင်းၶၢင်ၼႆႉ- ၵူၼ်းပွတ်းမူႇၸေႈၵေႃႉၼိုင်ႈ လၢတ်ႈၼင်ႇၼႆ။