ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ ပႃႊတီႊႁူဝ်သိူဝ် တင်း ပႃႊတီႊသိူဝ်ၽိူၵ်ႇ တေႁူမ်ႈၵၼ်ၸတ်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 68 ပီ၊ ၼႂ်းဝၼ်းတီႈ 07/02/2015 ။

ဢိင်ၼိူဝ်ပၢင်ၵုမ် ပႃႊတီႊႁူဝ်သိူဝ် (SNLD) တင်း ပႃႊတီႊသိူဝ်ၽိူၵ်ႇ ႁူမ်ႈၵၼ်ၸတ်းႁဵတ်း မိူဝ်ႈ 2-3 ဝၼ်းပူၼ်ႉမႃးသေ တႅပ်းတတ်းလႆႈၸႂ်ၵၼ်ဝႃႈ တေႁူမ်ႈၵၼ်ၸတ်းပၢင်ပွႆးၶုၵ်းထူပ်းယုၵ်ႉယွင်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 68 ပီ၊ တီႈၶူင်ႇပၢင်ပွႆးၵၢင်ဝဵင်းၼမ်ႉၶမ်း၊ ဢၼ်မီးတီႈႁိမ်းဝၢင်းၽြႃးလူင်ၵၢင်ဝဵင်း၊ ၼႂ်းဝၼ်းတီႈ 6-7/02/2015 ၶၢဝ်းတၢင်း သွင်ဝၼ်း။

ၽူႈၶဝ်ႈၸုမ်း ပႃႊတီႊသိူဝ်ၽိူၵ်ႇ ၸၢႆးပီးလၢတ်ႈဝႃႈ- ၸွမ်းၼင်ႇႁဝ်းၶႃႈ ႁဵတ်းပၢင်ၵုမ်ၵၼ်ဝႆႉတႄႉ လွင်ႈႁူမ်ႈလူမ်ႈၼႆႉ တေဢဝ်ႁူမ်ႇလူမ်ႈတွၼ်ႈတၢင်းၼွၵ်ႈ တင်း တွၼ်ႈတၢင်းၼႂ်း၊ တေမီးလၢႆၶၵ်ႉတွၼ်ႈ၊ ပႃးၸဵမ်ၼႂ်းပွၵ်ႉၼႂ်းယွမ်ႇ ၼႂ်းၸႄႈဝဵင်းၼမ်ႉၶမ်း။ ပိူဝ်ႈတႃႇတေဢဝ်ႁူမ်ႇလူမ်ႈၼၼ်ႉ လႆႈၶပ်းၶိုင်ႁၢင်ႈႁႅၼ်းဝႆႉယဝ်ႉ - ဝႃႈၼႆ။

ၽူႈၼမ်းၼႂ်းပႃႊတီႊႁူဝ်သိူဝ် ၸၢႆးထုၼ်းလၢႆႇ ၵေႃႈလၢတ်ႈဝႃႈ- ပိူဝ်ႈတႃႇမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၼၼ်ႉ ပႃႊတီႊသိူဝ်ၽိူၵ်ႇ တင်းပႃႊတီႊႁူဝ်သိူဝ်ႁဝ်းၶႃႈ ႁူမ်ႈၵၼ်ႁဵတ်းသၢင်ႈမႃး၊ ပႃးတင်းပီၼႆႉ မီးသၢမ်ပီယဝ်ႉ။ ပီၼႆႉၵေႃႈ တေႁူမ်ႈၵၼ်ႁဵတ်းသၢင်ႈၵႂႃႇထႅင်ႈ။ ဢၼ်ႁဝ်းၶႃႈ လႆႈႁဵတ်းသၢင်ႈပၢင်ပွႆး ဝၼ်းၸိူဝ်ႉၸၢတ်ႈၸိုင်ႈတႆး ႁူမ်ႈၵၼ်ၼႆႉ ၼင်ႇႁိုဝ်ပႃႊတီႊသွင်ဢၼ် ၼႂ်းၸႄႈဝဵင်းႁဝ်းၶႃႈ  မီးလွင်ႈၽွမ်ႉသဵင်ပဵင်းပၢၵ်ႇၵၼ်။ ၼင်ႇႁိုဝ်လွင်ႈၽွမ်ႉႁူမ်ႈပႃႊတီႊ လွင်ႈၽွမ်ႉႁူမ်ႈၵူၼ်းမိူင်း ပေႃးတေပၼ်ႈၵႅၼ်ႇၼႅၼ်ႈၼႃၵႂႃႇတၢင်းၼႃႈထႅင်ႈလိူဝ်ၵဝ်ႇ၊ ဢမ်ႇဢဝ်ပႃႊတီႊပဵၼ်လၵ်း၊ ဢဝ်ၸိူဝ်ႉၸၢတ်ႈပဵၼ်လၵ်း။ ၵွပ်ႈၼၼ် ႁဝ်းၶႃႈၸင်ႇလႆႈႁူမ်ႈၵၼ်ၶတ်းသၢင်ႈႁၢင်ႈပွင်မႃး- ဝႃႈၼႆ။

ငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD)  တင်း ၻီႊမူဝ်ႊၶရႅတ်ႊတိၵ်ႊပႃႊတီႊ ၸၢဝ်းၶိူဝ်းတႆး ႁိုဝ်  ပႃႊတီႊသိူဝ်ၽိူၵ်ႇ (SNDP) ၸႄႈဝဵင်းၼမ်ႉၶမ်းၼႆႉ ယၢမ်ႈႁူမ်ႈၵၼ် ႁဵတ်းၵၢၼ်တူင်ႉၼိုင်မႃးတႃႇ သေႇ။ ၼိုင်ႈလိူၼ်ၼိုင်ႈပွၵ်ႈလႄႈသင်၊ သၢမ်လိူၼ်ၼိုင်ႈပွၵ်ႈလႄႈသင်၊ မီးပၢင်ႁူပ်ႉထူပ်းဢုပ်ႇဢူဝ်းၵၼ် ၸိူဝ်းၼႆႉ။

မီးယိူင်းဢၢၼ်းပိူင်လူင် ပိူဝ်ႈတႃႇၵႅတ်ႇၵင်ႈသုၼ်ႇလႆႈ ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းၼမ်ႉၶမ်း။ ၾၢႆႇၼိုင်ႈၵေႃႈ ယၢမ်ႈၸွႆႈထႅမ် ဢၼ်ၵူၼ်းဝၢၼ်ႈၵူၼ်းမိူင်း တုၵ်းယွၼ်း/သၢၼ်ၶတ်း လွင်ႈဢၼ်မိူင်းၶႄႇပူၼ်ႉပႅၼ် ၶႂၢၵ်ႈႁူဝ်ႉ (လၵ်းၶႅၼ်ႈလႅၼ်လိၼ်) မိူင်းၶႄႇ မႃးဢဝ်သူၼ်/ႁႆႈ/ၼႃး ပီႈၼွင်ႉတႆး ၼႂ်းၸႄႈဝဵင်းၼမ်ႉၶမ်း၊  ၸိူဝ်းၼႆႉၵေႃႈ သွင်ပႃႊတီႊ ယၢမ်ႈႁူမ်ႈၵၼ် တိုၵ်းတေႃးတေႃႇသူႈမႃး။