ၸၼ်ႉၸွမ်ဝဵင်းၵဵင်းမႆႇ ၸိုင်ႈထႆး ၸတ်းပၢင်ပွႆးတႆး 5 ၸၢဝ်းၶိူဝ်း၊ ၸိူဝ်းယူႇသဝ်းၼႂ်းထုင်ႉလိၼ်လၢၼ်ႉၼႃး၊ ဝၼ်းပၢင်ပွႆးၶူပ်းမႅၼ်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 68 ပီ။

ဝၼ်းတီႈ 06-07/02/2015 ၼႆႉ ၶၢဝ်းယၢမ်း 09:00-16:30 မူင်း၊ ၾၢႆႇၶူၼ်ႉၶႂႃႉလဵပ်ႈႁဵၼ်း တူင်ႇဝူင်းၵူၼ်းၸၼ်ႉၸွမ်ၵဵင်းမႆႇ တေၸတ်းႁဵတ်းပၢင်ပွႆးၸၢဝ်းၶိူဝ်းတႆး 5 ၸၢဝ်းၶိူဝ်း ၸိူဝ်းယူႇသဝ်းၼႂ်းလိၼ်လၢၼ်ႉၼႃး တီႈႁူင်းႁေႃၾိင်ႈထုင်း (สำนักส่งเสริมศิลปวัฒนธรรม) ၸၼ်ႉၸွမ်ၵဵင်းမႆႇ။ ပၢင်ပွႆးၼႆႉ ႁွင်ႉဝႃႈ “ပွႆးၶူင်ႇၽယႃးႁႃႈတႆး” ၵဵဝ်ႇလူၺ်ႈလွင်ႈၸၢဝ်းၶိူဝ်းတႆး 5 ၶိူဝ်း 1.တႆးလူင်။ 2.တႆးယူၼ်း။ 3.တႆးလိုဝ်ႉ။ 4.တႆးၶိုၼ်။ 5.တႆးယွင်း ၸိူဝ်းၼႆႉ။

ၼႂ်းပၢင်ပွႆး တေမီးၵၢၼ်ၼႄပိုၼ်း၊ ၾိင်ႈငႄႈၾိင်ႈထုင်း ပႃးၸဵမ်လွင်ႈယူႇသဝ်းၵိၼ်သၢင်ႈ ၸၢဝ်းၶိူဝ်းတႆး 5 ၶိူဝ်း။ ၼႂ်းဝၼ်းတီႈ 07/02/2015 တေမီးၽူႈမီးပိုၼ်ႉႁူႉ (ၽူႈလူင်ႉလႅၼ်ႇ) လၢႆၸဝ်ႈ မႃးလၢတ်ႈၶႆႈၼႄလွင်ႈပိုၼ်းတႆး 5 ၸၢဝ်းၶိူဝ်း၊ ပႃးၸဵမ်လွင်ႈၶူဝ်းၼုင်ႈတၢင်းဝႆ၊ လွင်ႈၾိင်ႈငႄႈၾိင်ႈထုင်း မိူၼ်ၼင်ႇ ၵၢၼ်ၵႃႈလၢႆး၊ ၵၢၼ်ႁဵတ်းဝတ်ႉ/ၵျွင်းၽြႃး၊ ၵၢၼ်ႁဵတ်းၶဝ်ႈၽၵ်းတၢင်းၵိၼ် ၸိူဝ်းၼႆႉ။

ပၢင်ပွႆး 5 ၸၢဝ်းၶိူဝ်းတႆး “ပွႆးၶူင်ႇၽယႃးႁႃႈတႆး” ၼႆႉ ၸတ်းမႅၼ်ႈဝၼ်းလဵဝ်ၵၼ်တင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 68 ပီ၊ ၽူႈၶဝ်ႈႁူမ်ႈပၢင်ပွႆးၵေႃႈ တေဢမ်ႇလႆႈသဵင်ႈၵႃႈသဵင်ႈႁူဝ်သင်- ၼႆယဝ်ႉ။