ယွၼ်ႉၾူၼ်တူၵ်းႁႃႇယႂ်ႇ မၢၵ်ႇႁဵပ်းတူၵ်းႁႅင်းလႄႈ သူၼ်ယႃႈလႅင် ပွတ်းထုင်ႉမၢဝ်း လူႉၵွႆၼမ်။ မိူဝ်ႈဝႃးဝၼ်းလဵဝ် ၵႃႈၶၼ်လူႉသုမ်းမွၵ်ႈ ႁဵင်သႅၼ်။

ဝၼ်းတီႈ 08/01/2015 (မိူဝ်ႈဝႃး) ပွတ်းထုင်ႉမၢဝ်း မူႇၸေႈ-ၼမ်ႉၶမ်း၊ ၾူၼ်တူၵ်းႁႃႇယႂ်ႇ မၢၵ်ႇႁဵပ်းတူၵ်းႁႅင်းသေ သူၼ်ယႃႈၶၼ်းဝၢၼ် ၶွင်ၵူၼ်းမိူင်းလူႉၵွႆၼမ်။ မိူဝ်ႈဝႃးၵၢင်ၶမ်ႈ ယၢမ်း 9 မူင်း တူၵ်းတီႈၼမ်ႉၶမ်း တၢင်းႁိုင်မွၵ်ႈ 10 မိၼိတ်ႉ။ မိူဝ်ႈ7 မူင်း တူၵ်းတီႈမူႇၸေႈ တင်းႁိုင်မွၵ်ႈ 15 မိၼိတ်ႉ၊ ႁဵတ်းႁႂ်ႈသူၼ်ယႃႈလူႉလႅဝ်ၼမ်- ၼႆယဝ်ႉ။

တီႈၼွင်မႃႉလႄႈ ၼွင်ၵွင်းၼႆႉ ၼိုင်ႈဝၢၼ်ႈလူႉၵွႆၵႂႃႇ ဢမ်ႇယွမ်း 80 ဢေႊၵႃႊ။ တီႈဝၢၼ်ႈႁွင်း လူႉၵွႆၵႂႃႇမွၵ်ႈ 10 ဢေႊၵႃႊ၊ ၼိုင်ႈဢေႊၵ တူၵ်းၵႃႈၶၼ်ငိုၼ်းမွၵ်ႈ 416,000 ပျႃး- ၸၢႆးဢၢႆႈ ၵူၼ်းမၢၼ်ႈႁွင်းလၢတ်ႈ။

ယွၼ်ႉပိူဝ်ႈမၢၵ်ႇႁဵပ်း ယႂ်ႇလိူဝ်မၢၵ်ႇၵႅဝ်ႈ (မၢၵ်ႇၵေႃႇလီႇ) လႄႈ ၶူဝ်းႁႆႈၶူဝ်းသူၼ်လူႉၵွႆၼမ်၊ မၢင်ႁိူၼ်း ႁိူၼ်းမုင်းတွင်ၸိူဝ်းၼႆႉ လင်ၶႃးပွင်ႇ။ ယွၼ်ႉပိူဝ်ႈမၢၵ်ႇႁဵပ်းတူၵ်းသေ ဢၼ်လႆႈလူႉသုမ်းၼႂ်းပွတ်းတွၼ်ႈၸႄႈတွၼ်ႈၼၼ်ႉ မိူဝ်ႈဝႃးၵူၺ်း တင်းၼမ်သႅၼ်မၼ်းမွၵ်ႈ 1,000 သႅၼ်- ၽူႈၶဝ်ႈပႃႊတီႊၵၢၼ်မိူင်းၵေႃႉၼိုင်ႈ လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈ။

ယွၼ်ႉၶူဝ်းႁႆႈၶူဝ်းသူၼ်လူႉၵွႆ ယွၼ်ႉမၢၵ်ႇႁဵပ်းတူၵ်းၼႆႉသေ မိူဝ်ႈၼႆႉၵၢင်ၼႂ် ၵူၼ်းဝၢၼ်ႈ ဢၼ်ၺႃးမၢၵ်ႇႁဵပ်းတူၵ်းၸိူဝ်းၼႆႉ ႁူမ်ႈၵၼ်လူင်းလၢႆးမိုဝ်း/ တၢင်ႇလိၵ်ႈထိုင် ၽူႈၵွၼ်းၸႄႈဝဵင်းၼမ်ႉၶမ်း ဝႆႉယဝ်ႉ- ၵူၼ်းလူင်ၼႂ်းဢိူင်ႇ ဝၢၼ်ႈႁွင်း ၸၢႆးထုၼ်းလႅင်း လၢတ်ႈ။