ပႃႊတီႊႁူဝ်သိူဝ်ပိုတ်ႇလုမ်းမႂ်ႇ တီႈပုင်ႇပႃႇၶႅမ် ၸႄႈဝဵင်းမိူင်းတူၼ်၊ ႁူဝ်ပဝ်ႈ ၸဝ်ႈၶုၼ်ထုၼ်းဢူး မႃးၶဝ်ႈႁူမ်ႈပိုတ်ႇပၢင်၊ ပီႈၼွင်ႉပုင်ႇပႃႇၶႅမ် ၶဝ်ႈႁူမ်ႈ ၼပ်ႉႁူဝ်ႁဵင်။

ဝၼ်းတီႈ 08/01/2015 (မိူဝ်ႈဝႃး) ယၢမ်း 09:30 မူင်း၊ ငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ပိုတ်ႇလုမ်းၵိင်ႇၽႄ တီႈဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် (ၸႄႈတွၼ်ႈမိူင်းသၢတ်ႇ) ၸိုင်ႈပွတ်းဢွၵ်ႇ။

ႁူဝ်ပဝ်ႈ ပႃႊတီႊႁူဝ်သိူဝ် ၸဝ်ႈၶုၼ်ထုၼ်းဢူး ၶဝ်ႈႁူမ်ႈပိုတ်ႇပၢင် ပိုတ်ႇပၢႆႉပၼ် တီႈႁိူၼ်းၽွင်းတႅၼ်းသၽႃးၸႄႈမိူင်း ၸၢႆးဝိၼ်းမျၢတ်ႉဢူး။ မီးပီႈၼွင်ႉၵူၼ်းမိူင်း ပွတ်းပုင်ႇပႃႇၶႅမ် ၶဝ်ႈႁူမ်ႈၼပ်ႉႁူဝ်ႁဵင်။


လႆႈႁူႉဝႃႈ ပိူဝ်ႈတႃႇမႃးပိုတ်ႇလုမ်းမႂ်ႇ တီႈပုင်ႇပႃႇၶႅမ်ပွၵ်ႈၵမ်းၼႆႉ ၸဝ်ႈၶုၼ်ထုၼ်းဢူး မႃးႁွတ်ႈၽႅဝ် တီႈဝဵင်းတႃႈၶီႈလဵၵ်း ၸဵမ်မိူဝ်ႈဝၼ်းတီႈ 06/01/2015 ။

ပႃႊတီႊႁူဝ်သိူဝ် (SNLD) ၼႆႉ ႁပ်ႉလွၵ်းပိူင် 8 ၸႄႈမိူင်း/တိူင်း၊ (ဢၼ်မိူင်းမၢၼ်ႈ 7 တိူင်း မႃးႁူမ်ႈၵၼ်ပဵၼ်ၸႄႈမိူင်းလဵဝ်) သေ ႁူမ်ႈၵၼ်ၵေႃႇသၢင်ႈၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ။ မီးယိူင်းဢၢၼ်း ပိူဝ်ႈတႃႇႁႂ်ႈလႆႈမႃး သုၼ်ႇလႆႈၽဵင်ႇပဵင်း၊ ၵေႃႇတင်ႈၸိုင်ႈမိူင်းႁူမ်ႈတုမ်ၾႄႊၻရိူဝ်ႊလ်/ ၸိုၼ်ႈၸၢင်ႇ၊ မီးလွင်ႈထၢင်ႇႁၢင်ႈၽွင်းငမ်းတူဝ်ၵဝ်ႇႁင်းၶေႃ ၸိူဝ်းၼႆႉ။

ဢွၼ်ၼႃႈၼႆႉ ပေႃးဝႃႈဢမ်ႇမူၼ်ႉမႄးၵႄႈလိတ်ႈလႆႈ ပိူင်ငဝ်ႈပိုင်းမိူင်း ပီ 2008 ၸိုင် တေပႆႇၶဝ်ႈႁူမ်ႈ ပၢင်လိူၵ်ႈတင်ႈပီ 2015 ။ ၵူၺ်းၵႃႈ ဢိင်ၼိူဝ်ငဝ်းလၢႆးသူၼ်းဢီးသေ ပႃႊတီႊႁူဝ်သိူဝ် တေၶဝ်ႈလိူၵ်ႈတင်ႈ ၼႂ်းမိူင်းတႆးပတ်းပိုၼ်ႉၵူၺ်းပႆႇပေႃး၊ တေၶဝ်ႈလိူၵ်ႈတင်ႈပႃး ၼႂ်းၸႄႈမိူင်းၶၢင်၊ ၸႄႈမိူင်းယၢင်းလႅင်၊ တိူင်းမၼ်းတလေး (တိူင်းဝဵင်းတႃႈလိူဝ်ႇ) လႄႈ တိူင်းၸၵႅင်းပႃးထႅင်ႈ။

ၼင်ႇႁိုဝ်တေပဵၼ်မႃးလွင်ႈၽဵင်ႇပဵင်း ဢၼ်ယိူင်းမၢႆႁဝ်းၶႃႈမီးဝႆႉၼၼ်ႉ။ ၵွပ်ႈၼၼ် ႁဝ်းၶႃႈလႆႈဝူၼ်ႉၶိုၼ်း ဢၼ်ထုၵ်ႇလီပဵၼ်/လီႁဵတ်းသေ ၸင်ႇတေၶဝ်ႈလိူၵ်ႈတင်ႈ- ၽူႈၶၢၼ်ပၢၵ်ႇ ပႃႇတီႇႁူဝ်သိူဝ် (SNLD) ၸၢႆးလဵၵ်ႉ ယၢမ်ႈလၢတ်ႈၼင်ႇၼႆ။
ပႃႊတီႊႁူဝ်သိူဝ် (SNLD) ၼႆႉ မိူဝ်ႈပၢင်လိူၵ်ႈတင်ႈပီ 1990 ၼၼ်ႉ ပေႉၵၢၼ်လိူၵ်ႈတင်ႈၼႂ်းၸိုင်ႈတႆး တီႈ 2 ။ (ပႃႊတီႊၼူၵ်ႉယုင်း NLD လႆႈတီႈၼိုင်ႈ)။