ၸၢဝ်းႁႆႈၸၢဝ်းၼႃး ၸၢဝ်းၶိူဝ်းပဢူဝ်း ၼပ်ႉႁူဝ်ပၢၵ်ႇ ၸိူဝ်းထုၵ်ႇၸုမ်းပီႇတုၸိတ်ႉပဢူဝ်း (PNO/PNA) ႁုပ်ႈယိုတ်းဢဝ်တီႈလိၼ် သူၼ်/ႁႆႈ/ၼႃး ၼႄၵၢင်ၸႂ် တုၵ်းယွၼ်းၶိုၼ်း တီႈလိၼ် တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။

ဝၼ်းတီႈ 08/01/2015 (မိူဝ်ႈဝႃး)ၼႆႉ ၸၢဝ်းႁႆႈၸၢဝ်းၼႃး ၸၢဝ်းၶိူဝ်းပဢူဝ်း ဢၼ်ထုၵ်ႇၸုမ်းပီႇတုၸိတ်ႉပဢူဝ်း ၸုမ်း/တပ်ႉသိုၵ်းၸိူဝ်ႉၸၢတ်ႈပဢူဝ်း (PNO/PNA) ယိုတ်းဢဝ်တီႈလိၼ် သူၼ်/ႁႆႈ/ ၼႃးဝႆႉၸိူဝ်းၼၼ်ႉ ႁူမ်ႈၵၼ်ၼႄၵၢင်ၸႂ် တေႃႇၸုမ်း PNO/PNA တီႈဝဵင်းတူၼ်ႈတီး။

ၸၢဝ်းႁႆႈၸၢဝ်းၼႃးပဢူဝ်း ၸိူဝ်းထုၵ်ႇယိုတ်းတီႈလိၼ်ၼႆႉ မီးမွၵ်ႈ 400 ၵေႃႉ၊ ပဵၼ်ၼႂ်းဝၢၼ်ႈၼႂ်းဢိူင်ႇ ပွတ်းဝၢၼ်ႈၽယႃးၽျူႇ၊ ၵၼၢႆႇၶျႃး၊ ပႃႇၼူၺ်း၊ ပၢင်ႇၽျၢတ်ႈ၊ ၵျွၵ်ႉၼီႇ၊ ၽယႃးၼီႇ၊ သတ်ႉတေႇ၊ ဝၢၼ်ႈထီႇပႂႃႇ၊ ဝၢၼ်ႈမွၵ်ႇၸၢမ်၊ ဝၢၼ်ႈၺူဝ်ႇၼီး၊ ဝၢၼ်ႈၼွင်ၵႃး၊ ဝၢၼ်ႈၶူဝ်ၼႃး၊ ၵုၼ်လူင်၊ သၢႆးၶၢဝ်၊ တယႅတ်ႉပိၼ်ႇ။ ဝၢၼ်ႈၵူၼ်းၸိူဝ်းၼႆႉ ပဵၼ်ၼႂ်း 5 ၸႄႈဝဵင်း မိူၼ်ၼင်ႇၸႄႈဝဵင်းလွၵ်ႈၸွၵ်ႇ/ ပၢင်လွင်း/ သီႇသႅင်ႇ/ ႁူဝ်ပူင်း/ တူၼ်ႈတီး ။

ၸၢဝ်းႁႆႈၸၢဝ်းၼႃး ပဢူဝ်းၶဝ် ဢွၼ်ၵၼ်ယိပ်းပၢႆႉလိၵ်ႈယုၵ်ႉၼႄႁႄႇပႆ ႁွင်ႉသႅၼ်ႇ ၼႄၵၢင်ၸႂ် ၼႂ်းၵၢင်ဝဵင်းဝႃႈ- ႁႂ်ႈၵိုတ်းယုတ်း လွင်ႈယိုတ်းဢဝ်တီႈလိၼ်ၵူၼ်းမိူင်းၵမ်းလဵဝ်၊ ဢၼ်ၸုမ်းပီႇတုၸိတ်ႉပဢူဝ်း PNO/PNA လႆႈယုတ်းတီႈလိၼ် သူၼ်/ႁႆႈ/ၼႃးၸိူဝ်းၼၼ်ႉ ၶႅၼ်းတေႃႈၶိုၼ်းၸႅၵ်ႇဝႅင်ႇပၼ် ၵူၼ်းဝၢၼ်ႈၵူၼ်းမိူင်း။ ႁဝ်းဢမ်ႇၶႂ်ႈလႆႈ PNO/PNA ဢၼ်မႃးယုတ်းဢဝ်တီႈလိၼ်ၵူၼ်းမိူင်း၊ တီႈလိၼ်သူၼ်ႁႆႈၼႃးၵူၼ်းမိူင်း ၵူၼ်းမိူင်းပဵၼ်ၸဝ်ႈၶွင်၊ ၵၢင်ၸႂ်ပဵၼ်ၵူၼ်းတိုၼ်းတေလႆႈပဵၼ်ၵၢၼ် (ဢွင်ႇ)- ဝႃႈၼႆ။

ဢူးၵျေႃႇ ၵူၼ်းၼႂ်းဢိူင်ႇမွၵ်ႇၸၢမ် လၢတ်ႈဝႃႈ- ယွၼ်ႉပိူဝ်ႈတေမီးၵၢၼ်ၼႄၵၢင်ၸႂ်လႄႈၵူၼ်းလူင် PNO မႃးလၢတ်ႈဝႃႈ- တီႈလိၼ်သူၼ်ႁႆႈၼႃး ဢၼ်ႁဝ်းယိုတ်းဢဝ်ၸိူဝ်းၼၼ်ႉ သူဝႆႉၸႂ်ဝႃႈ သူလူႇတၢၼ်းၸုမ်း PNO ႁဝ်း၊ သူလမ်ႁူဝ် (ၵၼ်ႇတေႃး) ၵူၼ်းထဝ်ႈၵူၼ်းလူင် PNO ႁဝ်း ဝႃႈၼႆလႄႈ။ ယႃႇပေၵႂႃႇၼႄၵၢင်ၸႂ်၊ ယႃႇပေၵႂႃႇႁဵတ်းႁႂ်ႈၵူၼ်းလူင် PNO လႆႈၸိုဝ်ႈလူႉ- ဝႃႈၼႆ။

တီႈလိၼ်သူၼ်ႁႆႈၼႃးၵဝ်ၶႃႈ ပႃးၵႂႃႇၸွမ်း ၸုမ်းပီႇတုၸိတ်ႉပဢူဝ်းယိုတ်းဢဝ် တင်းမူတ်း 20 ဢေႊၵ၊ ဢမ်ႇၸၢင်ႈႁဵတ်းၵိၼ်ၵၢၼ်သင်၊ ဢမ်ႇယိူၼ်ႉၵၼ်ႈလႆႈယဝ်ႉလႄႈ လႆႈမႃးၼႄၵၢင်ၸႂ်- ဢူးၵျေႃႇ သိုပ်ႇလၢတ်ႈ။

ၼၢင်းမေႇၸူဝ်းဢူး ၵူၼ်းဝၢၼ်ႈၼွင်ၵႃး ၵေႃႈလၢတ်ႈဝႃႈ- ပိူၼ်ႈဢွၼ်ၵၼ်ဝႃႈ ပဢူဝ်းၼင်ႇၵၼ်ၼႄၵၢင်ၸႂ်တေႃႇၵၼ်/ သၢၼ်ၶတ်းၵၼ် ဝႃႈၼႆႁင်းႁဝ်းၶႃႈ။ ၵူၺ်းၵႃႈ ပိူၼ်ႈဢမ်ႇႁၼ် လွင်ႈၽူႈၼမ်းပဢူဝ်း ၶိုၼ်းပေႉၵိၼ်ၵူၼ်းမိူင်းၸၢဝ်းပဢူဝ်း။ ထုၵ်ႇလီလႆႈၵႂႃႇထၢမ်ၶဝ်ဝႃႈ ၵွပ်ႈသင်လႄႈပဢူဝ်းၼင်ႇၵၼ် ပေႉၵိၼ်ၵၼ်။ ယွၼ်ႉၼၼ်လႄႈ ဢေးလူးႁဝ်းၶႃႈသေၵမ်း၊ ဢၼ်ယိုတ်းတီႈလိၼ်ဝႆႉၸိူဝ်းၼၼ်ႉ ဢမ်ႇပၼ်ၶိုၼ်းတင်းမူတ်းၵေႃႈ သၢမ်ပုၼ်ႈပၼ်ၶိုၼ်းၼိုင်ႈပုၼ်ႈၵေႃႈ (3/1) ၵေႃႈ ႁဝ်းၶႃႈႁၢၼ်ႉၸႂ်ယဝ်ႉ။ မိူဝ်ႈလဵဝ်ၼႆႉ ၵွပ်ႈဢမ်ႇပၼ်ၶိုၼ်းသေဢိတ်းလႄႈ ႁဝ်းၶႃႈၵေႃႈလႆႈတႅမ်ႈလိၵ်ႈတၢင်ႇထိုင် ၸွမ်ၽွင်းလူင်မိူင်းတႆး လၢႆပွၵ်ႈယဝ်ႉ၊ မၼ်းၸဝ်ႈၵေႃႈ ဢမ်ႇၸၢင်ႈၸွႆႈပၼ်သင်ႁဝ်း- ဝႃႈၼႆ။

ႁူဝ်ပဝ်ႈပႃႊတီႊ NLD ဝဵင်းတူၼ်ႈတီး ဢူးတိၼ်ႇမွင်ႇတူဝ်း လၢတ်ႈဝႃႈ- ပၢင်ပွႆးၼႄၵၢင်ၸႂ်ၼႆႉ ႁဝ်းၶႃႈဢမ်ႇလႆႈဢွၼ်ႁူဝ်။ ဢမ်ႇဝႃႈၸၢဝ်းၶိူဝ်းပဢူဝ်းဢၼ်လဵဝ်ၵူၺ်း၊ ပီႈၼွင်ႉၸၢဝ်းၶိူဝ်းၸိူဝ်းယူႇသဝ်းၼႂ်း ၸိုင်ႈတႆး တင်းမူတ်းတင်းသဵင်ႈ၊ သင်ၸိူဝ်ႉဝႃႈတုၵ်းယွၼ်းမႃးတီႈႁဝ်းၶႃႈ လွင်ႈလႆႈထုၵ်ႇတဵၵ်းတဵင်၊ လွင်ႈဢမ်ႇမီးလွင်ႈၽဵင်ႇပဵင်းၸိူဝ်းၼၼ်ႉ ႁဝ်းၶႃႈၵေႃႈလႆႈၸွႆႈထႅမ်ပၼ်၊ ႁဝ်းၶႃႈၸုၵ်းၾၢႆႇၵူၼ်းမိူင်းသေ ၸွႆႈထႅမ်ပၼ်ၵူၼ်းမိူင်းတႃႇသေႇ။ ၵွပ်ႈၼႆလႄႈ ၵူၼ်းပဢူဝ်းၶဝ်မႃးၼႄၵၢင်ၸႂ် ၼႂ်းဝၼ်းမိူဝ်ႈၼႆႉၵေႃႈ ယူႇၼႂ်းပၵ်းပိူင်သေၼႄၵၢင်ၸႂ်ၵူၺ်း၊ ၵွပ်ႈၼၼ် ႁဝ်းၶႃႈၵေႃႈၸွႆႈထႅမ်ပၼ်- ဝႃႈၼႆ။

ၼႂ်းပီ 2014-15 ၼႆႉ ပီႈၼွင်ႉၸၢဝ်းၶိူဝ်း ၸိူဝ်းထုၵ်ႇယိုတ်းတီႈလိၼ်သူၼ်/ႁႆႈ/ၼႃးသေ ဢၼ်မႃးၼႄၵၢင်ၸႂ် တီႈဝဵင်းတူၼ်ႈတီးၼႆႉ မီး 3 ပွၵ်ႈယဝ်ႉ။ ၼႂ်းမိူင်းတႆးၼႆႉ ၼႂ်းၸႄႈတွၼ်ႈတူၼ်ႈတီး/ တႃႈၶီႈလဵၵ်း/ ၵျွၵ်ႉမႄးၸိူဝ်းၼႆႉ ယူႇတီႈလူင်ပွင်ၸိုင်ႈမိူင်းတႆး လႆႈႁူပ်ႉထူပ်းပၼ်ႁႃၼမ်သုတ်း။

ဢၼ်ၵူၼ်းဝၢၼ်ႈၵူၼ်းမိူင်း မႃးတၢင်ႇလၢတ်ႈၼႄ လွင်ႈထုၵ်ႇယိုတ်းတီႈလိၼ်ၼႆႉ ၼႂ်းမိူင်းတႆးၼႆႉ ၶၻီးမီးထိုင်ႁဵင်ပၢႆ၊ ပၼ်ႁႃလွင်ႈယိုတ်းတီႈလိၼ်ၼႆႉ မီးၼမ်တႄႉတႄႉ- ၸွမ်ၽွင်းလူင်မိူင်းတႆး ၸဝ်ႈဢွင်ႇမျၢတ်ႈ လၢတ်ႈမိူဝ်ႈဝၼ်းတီႈ 24/12/2014 ၼင်ႇၼႆ။

ယူႇတီႈၽူႈယႂ်ႇၵူၼ်းလူင် ၼႂ်းၸုမ်းပီႇတုၸိတ်ႉပဢူဝ်း PNA ၵေႃႈလၢတ်ႈဝႃႈ- ဢၼ်ၵူၼ်းဝၢၼ်ႈၵူၼ်းမိူင်း မႃးတုၵ်းယွၼ်း ၼႄၵၢင်ၸႂ်ဝႃႈ ႁဝ်းၶႃႈယိုတ်းတီႈလိၼ်ဢၼ်ဝႃႈၼၼ်ႉ ႁဝ်းၶႃႈလႆႈယိုတ်းတီႈလိၼ် ပိူဝ်ႈတႃႇပူၵ်းပွင်ဝၢၼ်ႈဢိူင်ႇလႄႈ သိင်ႇဝႅတ်ႉလွမ်ႉႁိမ်းႁွမ်းဝၢၼ်ႈဢိူင်ႇ ၵူၼ်းၸၢဝ်းၶိူဝ်းပဢူဝ်းႁဝ်း ႁႂ်ႈၶိုၼ်ႈယႂ်ႇမႂ်ႇသုင်ၵူၺ်း၊ ဢမ်ႇၸႂ်ႈတွၼ်ႈၼမ်ႉတွၼ်းၽွၼ်းလီသုၼ်ႇတူဝ် PNO/PNA သင်- လၢတ်ႈၼႄတီႈၽူႈသိုဝ်ႇၶၢဝ်ႇၶဝ်ၼင်ႇၼႆ။