ပႃႊတီႊႁူဝ်သိူဝ် တေၵႂႃႇၸွႆႈထႅမ်ၶူဝ်းၶွင် တီႈၵူၼ်း ပၢႆႈၽေးသိုၵ်း ဢၼ်တိုၵ်ႉမီး ယူႇတီႈ ဝတ်ႉ/ၵျွင်းဝၢၼ်ႈဝၢပ်ႈ ၸႄႈဝဵင်းၵေးသီး ၼပ်ႉႁူဝ်ပၢၵ်ႇ။

ၵူၼ်းပၢႆႈၽေး တီႈဝၢၼ်ႈဝၢပ်ႈ

ဝၼ်းတီႈ 14/01/2015 ၼႆႉ ယူႇတီႈ ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) တင်းၵူၼ်းၼုမ်ႇ ၽူႈၶဝ်ႈပႃႊတီႊႁူဝ်သိူဝ် တေၵႂႃႇၸွႆႈထႅမ်ၵူၼ်းပၢႆႈၽေးသိုၵ်း ဢၼ်မီးယူႇတီႈ ဝတ်ႉ/ၵျွင်းဝၢၼ်ႈဝၢပ်ႈ ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။ တေဢဝ်တင်းၶူဝ်းၶွင် ဢၼ်ၸၢတ်ႈၸိုင်ႈၽွမ်ႉႁူမ်ႈ (UN) သူင်ႇမႃး တႃႇလူတ်ႉၵႃးလူင်လမ်းၼိုင်ႈ တႃႇၸွႆႈထႅမ်ၵူၼ်းပၢႆႈၽေး ၵႂႃႇၸွႆႈထႅမ်ပၼ်ၸွမ်း- ၼႆယဝ်ႉ။

မိူဝ်ႈလဵဝ် တီႈဝၢၼ်ႈဝၢပ်ႈၼႆႉ တိုၵ်ႉမီးၵူၼ်းပၢႆႈၽေးသိုၵ်းယူႇ မွၵ်ႈၵူၼ်း 200 ပၢႆ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈၼႂ်းလိူၼ်ၵျူႊလႆႊ (2014) ဢိင်ၼိူဝ်သိုၵ်းမၢၼ်ႈ မႃးထႅမ်ႁႅင်းသိုၵ်း ၼႂ်းၸႄႈဝဵင်းၵေးသီး ၼႂ်းထုင်ႉၵေးၼမ်ႉႁႅၼ် ၼႂ်းဢိူင်ႇ ဝၢၼ်ႈဝၢပ်ႈ၊ မႃးၶုတ်းလုၵ်းထႅၼ်ႉ လုၵ်းပဵမ်ႇ ပၵ်းယူႇၼႂ်းသူၼ် ႁႆႈ ၼႃး၊ ၼႂ်းဝၢင်းႁိူၼ်း ၵူၼ်းဝၢၼ်ႈ ၸိူဝ်းၼႆႉသေ ထတ်းထၢမ်ၵူၼ်းဝၢၼ်ႈၵႂႃႇမႃး။ ၾၢႆႇၼိုင်ႈၵေႃႈ ၵူၼ်းဝၢၼ်ႈၵူဝ်ပဵၼ်ပၢင်တိုၵ်းလႄႈ လႆႈငိူင်ႉဝႄႈ သိုၵ်းမၢၼ်ႈ ဢွၼ်ၵၼ်ပၢႆႈၵႂႃႇပိုင်ႈဢိင်တီႈဝတ်ႉဝၢၼ်ႈဝၢပ်ႈ ႁၢၼ်ႉတေႃႇမိူဝ်ႈလဵဝ်။
ၵူၼ်းဝၢၼ်ႈၸိူဝ်းပၢႆႈၵႂႃႇတီႈ ဝတ်ႉ/ၵျွင်းဝၢၼ်ႈဝၢပ်ႈၼၼ်ႉ ၵမ်ႈၼမ်ပဵၼ်ၵူၼ်းၶၢဝ်ႉၵူၼ်းၵႄႇ၊ ၼၢင်းယိင်း လႄႈ လုၵ်ႈဢွၼ်ႇ။ ပိူဝ်ႈတႃႇ ပေႃးမီးၶူဝ်းၶွင်ၶိူင်ႈၵိၼ်တၢင်းယႅမ်ႉၼၼ်ႉ ၵႃႈပူၼ်ႉမႃး မီးပႃႇတီႇသၢင်ႈသီႈ/ သိူဝ်ၽိူၵ်ႇ/ ႁူဝ်သိူဝ် လႄႈ ၵေႃလိၵ်ႈလၢႆးလႄႈၾိင်ႈငႄႈတႆး ၸွႆႈထႅမ်ပၼ်မိူၼ်ၼင်ႇ ၶွင်ၸႂ်ႉၶွင်သွႆ၊ ၶွင်ၵိၼ်ၶွင်ယႅမ်ႉ၊ ၼမ်ႉမီႇၼမ်ႉမၼ်း ၸိူဝ်းၼႆႉ။