ၸၢဝ်းပဢူဝ်း ၼႄၵၢင်ၸႂ် ဢမ်ႇဢဝ်ၸုမ်း ပီႇတုၸိတ်ႉပဢူဝ်း PNO/PNA ဢၼ်ႁုပ်ႈယိုတ်း တီႈလိၼ်ၵူၼ်းမိူင်း တီႈဝဵင်းတူၼ်ႈတီးၼၼ်ႉ လႆႈထုၵ်ႇၸဝ်ႈၼႃႈတီႈ ပလိၵ်ႈႁၢမ်ႈ၊ ဢမ်ႇလႆႈၵႂႃႇၼႄၵၢင်ၸႂ် ထိုင်ၼႃႈလုမ်း PNO/PNA ။

ၸၢဝ်းၶိူဝ်းပဢူဝ်းၼႂ်းပိုၼ်ႉတီႈ လၢႆၸႄႈဝဵင်း ဢၼ်ၼႄၵၢင်ၸႂ်ၵႂႃႇ မိူဝ်ႈဝၼ်းတီႈ 08/01/2015 ၼႆႉ လႆႈဢၼုၺၢတ်ႈ ၼႄၵၢင်ၸႂ်မိူဝ်ႈဝၼ်းတီႈ 06/01/2015 ။ ၵူၺ်းၵႃႈ ၽိူဝ်ႇမႃးၼႄၵၢင်ၸႂ် မိူဝ်ႈဝၼ်းတီႈ 8 ၼၼ်ႉ လႆႈထုၵ်ႇၸဝ်ႈၼႃႈတီႈ ပလိၵ်ႈၶဝ်ႁႄႉႁၢမ်ႈ၊ ဢမ်ႇပၼ်ၵႂႃႇၼႄၵၢင်ၸႂ် ထိုင်ၼႃႈလုမ်းပီႇတုၸိတ်ႉပဢူဝ်း PNO/PNA ။ ပၢင်ၼႄၵၢင်ၸႂ် ဢၼ်တႄႇပႆတၢင်း တီႈသူၼ်မွၵ်ႇၸွမ်သိုၵ်းဢွင်ႇသၢၼ်း ဢၢၼ်းၵႂႃႇထိုင်တီႈလုမ်း PNO/PNA ၼၼ်ႉ လႆႈၵႂႃႇထိုင်ပွတ်းတၢင်းသေ ပွၵ်ႈမိူဝ်းၶိုၼ်းၵူၺ်း - ၼႆယဝ်ႉ။

ၵဵဝ်ႇၵပ်းလွင်ႈၼႆႉ ပီႈၼွင်ႉၸၢဝ်းပဢူဝ်းၶဝ် ဢွၼ်ၵၼ်ထၢင်ႇထိူမ်ဝႃႈ ယွၼ်ႉၸုမ်း PNO ၶဝ်ၸီႉသင်ႇလႄႈ ပလိၵ်ႈၶဝ်မႃးႁႄႉႁၢမ်ႈ- ၼႆၵၼ်ယူႇ။

ၵဵဝ်ႇၵပ်းလွင်ႈၼႆႉ ၾၢႆႇၸဝ်ႈၼႃႈတီႈပလိၵ်ႈၶဝ်လၢတ်ႈဝႃႈ- ဢမ်ႇလႆႈၶေႃႈၸီႉသင်ႇ တီႈၸုမ်း PNO သင်။ ၾၢႆႇပလိၵ်ႈလႆႈထတ်းသၢင် ၵၢၼ်ၼႄၵၢင်ၸႂ်သေ ႁဝ်းလႆႈမႃးႁၢမ်ႈႁႄႉၵူၺ်း- ၼႆယဝ်ႉ။

ၼွၵ်ႈၼိူဝ်သေဢမ်ႇပၼ်ၵႂႃႇတီႈလုမ်း PNO/PNA ယဝ်ႉ ပလိၵ်ႈၶဝ်ဢဝ်ၸႄႈၶၢဝ်ၸိူဝ်းၼႆႉ တိတ်းပႃႉသႂ်ႇတီႈတူဝ်လိၵ်ႈ ဢၼ်တေၼႄၵၢင်ၸႂ်ၸိူဝ်းၼၼ်ႉ- ၼႆယဝ်ႉ။


ၵပ်းၵၢႆႇလွင်ႈၼႆႉ ၾၢႆႇၵူၼ်းလူင်ၼႂ်း PNO ၵေႃႈဝႃႈ- ၵူၼ်းမိူင်းၶႂ်ႈၼႄၵၢင်ၸႂ်ၵေႃႈ ပၼ်ၶဝ်ၼႄၵၢင်ၸႂ်လွတ်ႈလွတ်ႈလႅဝ်းလႅဝ်း၊ ႁဝ်းၵေႃႈဢမ်ႇလႆႈ ယွၼ်းတၢင်းၸွႆႈထႅမ်တီႈပလိၵ်ႈ ႁႂ်ႈၸွႆႈႁႄႉႁၢမ်ႈပၼ်- ဝႃႈၼႆ။

ဢူးတိၼ်ႇမွင်ႇတူဝ်း ႁူဝ်ပဝ်ႈပႃႊတီႊၼူၵ်ႉယုင်း (NLD) ၸႄႈတွၼ်ႈတူၼ်ႈတီး လၢတ်ႈဝႃႈ- ၵူၼ်းၼႄၵၢင်ၸႂ်ၸိူဝ်းၼႆႉ ၶဝ်ၵေႃႈပဵၼ်ၸၢဝ်းၶိူဝ်း ၼႂ်းၸိုင်ႈမိူင်းႁူမ်ႈတုမ်မၢၼ်ႈၵူၺ်း၊ ယွၼ်ႉၶဝ်ဢမ်ႇလႆႈ သုၼ်ႇလႆႈသုၼ်ႇပဵၼ်၊ ပၵ်းပိူင်မၢႆမီႈဝၢၼ်ႈမိူင်း ဢမ်ႇႁူမ်ႇငမ်းထိုင်ၶဝ်လႆႈလႄႈ ၶဝ်ၵေႃႈလႆႈသုမ်း တီႈလိၼ်သုၼ်/ႁႆႈ/ ၼႃးၶဝ်ၵႂႃႇ။ ယွၼ်ႉၼၼ် ၼင်ႇႁိုဝ်တေမီးမၢႆမီႈ မႃးႁူမ်ႇငမ်းၼိူဝ်ၶဝ်ၼၼ်ႉ ၶဝ်ၵေႃႈတုၵ်းယွၼ်း။ လွင်ႈၼႆႉ ထုၵ်ႇလီပၼ်သုၼ်ႇလႆႈသုၼ်ႇပဵၼ်ၶဝ်ယူႇ၊ ဢမ်ႇထုၵ်ႇလီလႆႈမႃး ႁႄႉႁၢမ်ႈ- ဝႃႈၼႆ။