သင်ၶတႆးၼႂ်းမိူင်းထႆး “ၸဝ်ႈမႁႃၸေႃးတိၵ” ၸိူဝ်ႉသၢႆၵူၼ်းဝဵင်းလၢင်းၶိူဝ်း၊ ၸဝ်ႈၵွၼ်းဝတ်ႉပဵင်းလူင် တူင်ႇဝဵင်းဝဵင်းႁႅင် ၸႄႈတွၼ်ႈၵဵင်းမႆႇ၊ လႆႈႁပ်ႉ တႅင်ႇတင်ႈၸၼ်ႉ ၶိုၼ်ႈပဵၼ်ၸဝ်ႈတူၼ်ၶူး ၸၼ်ႉမၢႆ 1 မိူဝ်ႈဝၼ်းၵိူတ်ႇ ၸဝ်ႈမုၼ်ယႂ်ႇၶုၼ်ႁေႃၶမ်းထႆး ဢႃယု ၶူပ်းထူၼ်ႈ 87 ပီ။

ၸဝ်ႈမႁႃၸေႃးတိၵ (ၽရႃႉမႁႃၵရႆႊသွၼ်)

မိူဝ်ႈဝၼ်းတီႈ 05/12/2014 ပူၼ်ႉမႃး ဢၼ်ပဵၼ်ဝၼ်းၵိူတ်ႇ ၸဝ်ႈမုၼ်ယႂ်ႇၶုၼ်ႁေႃၶမ်းထႆး ဢႃယုၶူပ်းထူၼ်ႈ 87 ပီၼႆႉ မီးၸဝ်ႈသင်ၶလၢႆၸဝ်ႈၼႂ်းမိူင်းထႆး ၸိူဝ်းၶဝ်ႈၸိုဝ်ႈပဵၼ်ၽူႈပွင်သၢင်ႈ ၵၢၼ်သႃသၼႃ၊ ၵၢၼ်ၾိင်ႈငႄႈလိၵ်ႈလၢႆး၊ ၵၢၼ်ၵမ်ႉၸွႆႈၽွၼ်းလီၼႂ်းသႃသၼႃ လႄႈ တူင်ႇဝူင်းၵူၼ်း လႆႈႁပ်ႉတႅင်ႇတင်ႈ/ တၢင်ႇၸၼ်ႉၸၼ်ႉၸဝ်ႈတူၼ်ၶူး ၸွမ်းၼင်ႇပိူင်ၶွင်ၾၢႆႇၵုမ်းၵမ်ၵၢၼ်သႃသၼႃ၊ ၼႂ်းၸဝ်ႈသင်ၶၸိူဝ်းလႆႈႁပ်ႉၸၼ်ႉတူၼ်ၶူးပီၼႆႉၼၼ်ႉ မီးၸဝ်ႈသင်ၶတႆး လႆႈႁူမ်ႈႁပ်ႉပႃး 1 တူၼ်။

ၸဝ်ႈသင်ၶတႆး ဢၼ်လႆႈႁပ်ႉယုၵ်ႉတၢင်ႇၸၼ်ႉ ၸဝ်ႈတူၼ်ၶူးၼၼ်ႉ ပဵၼ်ၸဝ်ႈမႁႃၸေႃးတိၵ (ၽရႃႉမႁႃၵရႆႊသွၼ်) ဢမ်ႇၼၼ် ၸဝ်ႈၶူးၸေႃး ၸဝ်ႈၵွၼ်းဝတ်ႉပဵင်းလူင် ဢိူင်ႇပဵင်းလူင် ၸႄႈဝဵင်းဝဵင်းႁႅင် ၸႄႈတွၼ်ႈၵဵင်းမႆႇ။ ဢိင်ၼိူဝ်မၼ်းၸဝ်ႈ မီးပိုၼ်းသၢင်ႈၼမ်ႉတွၼ်းၽွၼ်းလီၼႂ်းသႃသၼႃ၊ ၵၢၼ်ၾိင်ႈငႄႈလိၵ်ႈလၢႆးလႄႈ ၵၢၼ်ပူၵ်းပွင်ႁဵတ်းသၢင်ႈၵၢၼ်ဝတ်ႉဝႃးလႄႈ မၼ်းၸဝ်ႈလႆႈႁပ်ႉဝီး (ၽတ်း) ၸၼ်ႉတူၼ်ၶူးမၢႆ 1 (ၸၼ်ႉဢဵၵ်ႇ) လႄႈ လႆႈႁပ်ႉပိၼ်ႇလၢႆႈၸိုဝ်ႈမႂ်ႇ ႁဵၵ်ႈဝႃႈ “ၽရႃႉၶူးသရီၵလယႃၼထႃတႃ” - ၼႆယဝ်ႉ။

ဝၢႆးမၼ်းၸဝ်ႈ လႆႈႁပ်ႉတင်ႈၸၼ်ႉၸဝ်ႈတူၼ်ၶူးယဝ်ႉ တၢင်းၾၢႆႇႁွင်ႈၵၢၼ်သႃသၼႃ ၶဝ်လႆႈမီးၽိုၼ်လိၵ်ႈ သူင်ႇဝွၵ်ႇၸႅင်ႈထိုင်မၼ်းၸဝ်ႈလႄႈ ၼိမၼ်တၼ (ၽိတ်ႈ) ႁႂ်ႈၸဝ်ႈၵႂႃႇႁပ်ႉဢဝ်ဝီး ဢိၵ်ႇဝႂ်ယွင်ႈတၢင်ႇၸၢၼ်ႉ ႁူမ်ႈၸုမ်းသင်ၶၸဝ်ႈ ၸိူဝ်းလႆႈႁပ်ႉတင်ႈၸၼ်ႉ ၼႂ်းဝၼ်းတီႈ 09/01/2015 ၼႆႉ တီႈဝတ်ႉသီၸွမ်တွင်း တူင်ႇဝဵင်းၸွမ်တွင်း ၸႄႈတွၼ်ႈၵဵင်းမႆႇ။ ၽူႈတေမႃးမွပ်ႈပၼ်ၸၼ်ႉ ပဵၼ်ၸဝ်ႈတူၼ်ၶူးလူင် ဢၼ်မီးၸၼ်ႉတၼ်းႁဵင်းယႂ်ႇ ၼႂ်းမိူင်းထႆး- ဝႃႈၼႆ။

ၸဝ်ႈမႁႃၸေႃးတိၵ မိူဝ်ႈၽွင်းႁပ်ႉယုၵ်ႉယွင်ႈ ၸဝ်ႈၵွၼ်းဝတ်ႉ မိူဝ်ႈၼႂ်းပီ 2013

ၸဝ်ႈမႁႃၸေႃးတိၵ ဢႃယု 47 ပီ၊ 27 ဝႃႇသႃ၊ ပဵၼ်ၵူၼ်းၸိူဝ်ႉသၢႆဝဵင်းလၢင်းၶိူဝ်း၊ ၵိူတ်ႇမိူဝ်ႈပီ 1968 ၊ ပဵၼ်လုၵ်ႈလုင်းၸၢင်းထုၼ်း ပႃႈၸၢင်းယူင်း၊ ယူႇဝၢၼ်ႈၼမ်ႉဢုၼ်ႇ ဝဵင်းလၢင်းၶိူဝ်း၊ ၼုင်ႈသၢင်ႇမိူဝ်ႈဢႃယုလႆႈ 9 ၶူပ်ႇ၊ ပီ 1982 ယူႇႁဵၼ်းလိၵ်ႈတီႈဝတ်ႉၾႃႉဝဵင်းဢိၼ်း ဢိူင်ႇပဵင်းလူင် ၸႄႈဝဵင်းဝဵင်းႁႅင်။ ဝၢႆးၼၼ်ႉ ၼႂ်းပီ 1983 ၶၢႆႉၵႂႃႇႁဵၼ်းလိၵ်ႈထမ်း လႄႈ ပႃလိ တီႈဝတ်ႉထႃႉၶွႆး မိူင်းၽဵတ်းၿူးရီ မိူင်းထႆးပွတ်းၵၢင် တေႃႇပေႃးလႆႈယဝ်ႉၸၼ်ႉထမ်းဢဵၵ်ႇ လႄႈ ၾၢႆႇပႃလိ လႆႈယဝ်ႉၸၼ်ႉထူၼ်ႈ 6 ပဵၼ်ၸဝ်ႈမႁႃ။ ၾၢႆႇၵၢၼ်ႁဵၼ်းတင်းလေႃးၵ (ထႆး) ႁဵၼ်းလႆႈယဝ်ႉၸၼ်ႉ 12 (မေႃး 6)။

တႄႇပီ 1983 မႃးတေႃႇထိုင်ယၢမ်းလဵဝ် ၸဝ်ႈမႁႃၸေႃးတိၵ ႁဵတ်းသၢင်ႈၵၢၼ်သႃသၼႃ၊ ၵၢၼ်လိၵ်ႈလၢႆး၊ ၵၢၼ်ၾိင်ႈငႄႈၾိင်ႈထုင်း ဢိၵ်ႇႁူမ်ႈၵမ်ႉၸွႆႈၵၢၼ်ပၢႆးမွၼ်း၊ မၼ်းၸဝ်ႈယၢမ်ႈပဵၼ်ၶူးသွၼ်လိၵ်ႈတႆး/ ထႆး လႄႈ ပႃလိလၢႆဝတ်ႉလၢႆၵျွင်း ၼႂ်းၸႄႈတွၼ်ႈၵဵင်းမႆႇ၊ ဢွၼ်ႁူမ်ႈပိုတ်ႇႁူင်းႁဵၼ်းသွၼ်လိၵ်ႈပႃလိ တီႈဝတ်ႉဢမွၼ်းၶီးရီး မိူင်းၵွၵ်ႇ၊ မိူဝ်ႈပီ 1997 ႁူမ်ႈဢွၼ်ပိုတ်ႇႁူင်းႁဵၼ်းပရိယတ်ႉတိ လႄႈ ႁူင်းႁဵၼ်းလုၵ်ႈဢွၼ်ႇလဵၵ်ႉ တီႈဝတ်ႉၾႃႉဝဵင်းဢိၼ်း ဝၢၼ်ႈလၵ်းတႅင်ႇ။

ၸဝ်ႈမႁႃၸေႃးတိၵ မိူဝ်ႈၽွင်းႁပ်ႉယုၵ်ႉယွင်ႈ ၸဝ်ႈၵွၼ်းဝတ်ႉ မိူဝ်ႈၼႂ်းပီ 2013

မိူဝ်ႈပီ 1998 ဢွၼ်ၵူၼ်းၼုမ်ႇဝၢၼ်ႈလၵ်းတႅင်ႇ-ပဵင်းလူင် ၵေႃႇတင်ႈၸုမ်းတွႆႇတိုင်ႈပၢႆးမွၼ်း ပၢၼ်မႂ်ႇတႆးဝဵင်းဢိၼ်းသေ ဢွၼ်ၸတ်းပွႆးပီမႂ်ႇတႆးထုင်ႉဝဵင်းႁႅင် ပွၵ်ႈဢွၼ်တၢင်းသုတ်း။ ပီ 1999 ႁူမ်ႈဢွၼ်တႄႇပိုတ်ႇပၢင်သွၼ်ၾိင်ႈငႄႈပုတ်ႉထလႄႈ လိၵ်ႈလၢႆးတႆးၶၢဝ်းမႆႈ ၼႂ်းထုင်ႉဝဵင်းႁႅင်။ ပီ 2000 ၸဝ်ႈသြႃႇၸီးၼ ၸဝ်ႈၵွၼ်းဝတ်ႉပဵင်းလူင်လူႉလွၼ်ႇသေ မၼ်းၸဝ်ႈလႆႈႁပ်ႉၼိမၼ်တၼ ၶိုၼ်ႈပဵၼ်ၸဝ်ႈၵွၼ်းဝတ်ႉပဵင်းလူင်၊ ဝၢႆးၼၼ်ႉ ဢွၼ်ႁူဝ်ၼမ်းၼႃႈႁဵတ်းသၢင်ႈၵၢၼ်သႃသၼႃ ၸတ်းပွႆးသၢင်ႇလွင်း၊ ၸွႆႈၵၢၼ်ၾိင်ႈငႄႈလိၵ်ႈလၢႆးလႄႈ ၵၢၼ်ပူၵ်းပွင်ၼႂ်းဝတ်ႉဝႃးမႃးတေႃႇယၢမ်းလဵဝ်။

ၼႂ်းဝၼ်းတီႈ 14-15/01/2015 ၼႆႉ တၢင်းတၵ်ႉၵႃႇသတ်ႉထႃး တေမီးၵၢၼ်ၸတ်းပၢင်ပွႆးမင်ၵလ လူႇတၢၼ်း ၼႂ်းတိုဝ်ႉတၢင်းၸဝ်ႈၶူး (မႁႃၸေႃးတိၵ) လႆႈႁပ်ႉတႅင်ႇတင်ႈၸၼ်ႉ ပဵၼ်ၸဝ်ႈတူၼ်ၶူး တီႈဝတ်ႉပဵင်းလူင် တူင်ႇဝဵင်းဝဵင်းႁႅင် ၸႄႈတွၼ်ႈၵဵင်းမႆႇ။ လွင်ႈၼႆႉ တၵ်ႉၵႃႇသတ်ႉထႃး ဢိၵ်ႇ လုၵ်ႈႁဵၼ်းလုၵ်ႈဝတ်ႉၸဝ်ႈၶူးၶဝ် ယွၼ်းၾၢၵ်ႇဝွၵ်ႇၸိူၼ်း (ၽိတ်ႈမွၵ်ႇ) ထိုင်တၵ်ႉၵႃႇသတ်ႉထႃး ႁူမ်ႈပႃးၽူႈၸိူဝ်းယၢမ်ႈပဵၼ်လုၵ်ႈႁဵၼ်း လုၵ်ႈၼွင်ႉလုၵ်ႈသိတ်းၸဝ်ႈၶူး ႁႂ်ႈလႆႈဢွၼ်ၵၼ်မႃးႁူမ်ႈပၢင်ပွႆးမင်ၵလယုၵ်ႉယွင်ႈ ၸဝ်ႈတူၼ်ၶူးမႂ်ႇၼႆႉသေၵမ်း- ဝႃႈၼႆ။

ၸဝ်ႈၶူးၸေႃးတိၵ ၊ ၸဝ်ႈၶူးထမ်မသႃမိ လႄႈ ၸဝ်ႈၶူးပၺ်ၺႃ တီႈၸေႇတီႇဝတ်ႉၾႃႉဝဵင်းဢိၼ်း ဝၢၼ်ႈလၵ်းတႅင်ႇ ဢိူင်ႇပဵင်းလူင် ၸႄႈဝဵင်းဝဵင်းႁႅင် ၸိုင်ႈထႆး