ပႃႊတီႊႁူဝ်သိူဝ် လုၵ်ႉၵဵင်းတုင်ၵႂႃႇယဵမ်ႈၸႂ်း မိူင်းလႃး၊ မႃးပိုတ်ႇလုမ်းတီႈမိူင်းယၢင်း ၸႄႈဝဵင်းၵဵင်းတုင် မီးၵူၼ်းၶဝ်ႈႁူမ်ႈၼပ်ႉႁဵင်။ ၸၢႆးၼုတ်း မွၵ်ႇလၢတ်ႈဝႃႈ တေႁူမ်ႈၵေႃႇတင်ႈ ၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ။

ပႃႊတီႊႁူဝ်သိူဝ်ပိုတ်ႇလုမ်းမႂ်ႇ ၼႂ်းၸိုင်ႈတႆးပွတ်းဢွၵ်ႇ

ဝၼ်းတီႈ 12/01/2015 ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ၵႂႃႇပိုတ်ႇလုမ်းၽႄ တီႈမိူင်းယၢင်း ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇ။ ဢၼ်ၵႂႃႇပိုတ်ႇလုမ်းၼႆႉ မီးၵႅမ်ႁူဝ်ပဝ်ႈပႃႊတီႊႁူဝ်သိူဝ် ၸၢႆးၸေႃးဢွင်ႇ၊ ၽူႈမီးၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်း လႄႈ တင်းလုၵ်ႈၸုမ်း။ ၸၢႆးတဵင်းဢွင်ႇ တင်း ၵူၼ်းၼုမ်ႇ တီႈတႃႈၶီႈလဵၵ်းၵမ်ႈၽွင်ႈၵေႃႈ ၸပ်းၸွမ်းႁွမ်းပႆၵႂႃႇ။ မီးၵေႃၵမ်ၵၢၼ်ငဝ်ႈငုၼ်း (CEC) ၸိုင်ႈတႆးပွတ်းၸၢၼ်း/ ပွတ်းႁွင်ႇ၊ ပီႈၼွင်ႉၵူၼ်းမိူင်း တႃႈၶီႈလဵၵ်း၊ မိူင်းယွင်း၊ မိူင်းၽျၢၵ်ႈ၊ ၵဵင်းတုင် လႄႈ မိူင်းယၢင်း ၸိူဝ်းၼႆႉၶဝ်ႈႁူမ်ႈႁိမ်းႁဵင်- ၼႆယဝ်ႉ။

ဝၢႆးသေပိုတ်ႇလုမ်းၽႄတီႈပုင်ႇပႃႇၶႅမ်ၵႂႃႇယဝ်ႉ ဝၼ်းတီႈ 11/01/2015 ၸုမ်းၸိူဝ်းပႃႊတီႊႁူဝ်သိူဝ် လုၵ်ႉတီႈဝဵင်းတႃႈၶီႈလဵၵ်း ဢွၵ်ႇၶၢဝ်းတၢင်းၵႂႃႇမိူင်းလႃး၊ ႁူပ်ႉထူပ်းပီႈၼွင်ႉမိူင်းလႃး။ တီႈမိူင်းလႃးၼၼ်ႉ ၽူႈယႂ်ႇၵူၼ်းလူင် ၼႂ်းၸုမ်းမိူင်းလႃးလႄႈသင်၊ ပီႈၼွင်ႉၵူၼ်းမိူင်းလႃးလႄႈသင်၊ ႁူမ်ၸူမ်းႁပ်ႉတွၼ်ႈတႄႉတႄႉဝႃႈဝႃႈ- ၼႆယဝ်ႉ။

ဝၼ်းတီႈ 12/01/2015 မႃးပိုတ်ႇလုမ်းၽႄ တီႈမိူင်းယၢင်း၊ ႁူပ်ႉထူပ်းၵူၼ်းမိူင်း တီႈမိူင်းယၢင်း။ ဝၢႆးၼၼ်ႉ မႃးႁူပ်ႉထူပ်းၵူၼ်းမိူင်း တီႈဝဵင်းၵဵင်းတုင် တီႈႁူင်းႁေႃၾိင်ႈငႄႈတႆးလိုဝ်ႉ၊ မီးပီႈၼွင်ႉၵူၼ်းမိူင်း 400 ပၢႆမႃးၶဝ်ႈႁူမ်ႈ။ ဝၢႆးၼၼ်ႉ မႃးႁူပ်ႉထူပ်းဢုပ်ႇၵုမ်ၵူၼ်းမိူင်း တီႈမိူင်းၽျၢၵ်ႈ။ သိုပ်ႇၼၼ်ႉ မႃးထႅင်ႈတီႈမိူင်းၵူဝ်း၊ မႃးႁူပ်ႉထူပ်းပီႈၼွင်ႉၵူၼ်းမိူင်း တီႈမိူင်းၵူဝ်းသေ သိုပ်ႇၶၢဝ်းတၢင်း  ပွၵ်ႈၶိုၼ်းထိုင်တီႈတႃႈၶီႈလဵၵ်း- ၼႆယဝ်ႉ။

တီႈမိူင်းၽျၢၵ်ႈၼၼ်ႉ မီးၵူၼ်းမိူင်းတွင်ႈထၢမ်ဝႃႈ- လွင်ႈသွင်ပႃႊတီႊတႆး တေႁူမ်ႈၵၼ်ၼႆႉ မီးၸိူင်ႉႁိုဝ်ၽွင်ႈ။ ၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်း လႆႈတွပ်ႇလၢတ်ႈၵႂႃႇဝႃႈ- တႃႇတေႁူမ်ႈၵၼ်ၼႆႉ တေမီးၵၢၼ်ဢုပ်ႇဢူဝ်းၵၼ်ထႅင်ႈယူႇ၊ ၵူၺ်းၵႃႈ တေပဵၼ်မိူဝ်ႈလႂ်ၼၼ်ႉ ပႆႇႁူႉဝၼ်း/ၶၢဝ်းယၢမ်းမၼ်း။ မိူဝ်ႈလဵဝ်တႄႉ တေႁၢင်ႈႁႅၼ်းပိူဝ်ႈတႃႇ ၶဝ်ႈလိူၵ်ႈတင်ႈၵွၼ်ႇ- ဝႃႈၼႆ။

ဢၼ်ႁူပ်ႉထူပ်းပီႈၼွင်ႉၵူၼ်းမိူင်း တီႈမိူင်းလႃးလႄႈသင်၊ ႁူပ်ႉထူပ်းၵူၼ်းမိူင်း ပိုတ်ႇလုမ်းမႂ်ႇတီႈမိူင်းယၢင်းလႄႈသင်၊ တီႈၵဵင်းတုင်၊ တီႈမိူင်းၽျၢၵ်ႈ လႄႈ တီႈမိူင်းၵူဝ်းၸိူဝ်းၼႆႉ ၸၢႆးၼုတ်း မွၵ်ႇလၢတ်ႈၵႂၢမ်းပိူင်လူင် 3 ၶေႃႈ- 1.ပႃႊတီႊႁူဝ်သိူဝ် တေႁဵတ်းသၢင်ႈလွင်ႈငမ်းယဵၼ် ႁႂ်ႈႁၼ်ၼမ်ႉႁၼ်တူဝ်မႃး။ ၸုမ်းယိပ်းၵွင်ႈၵၢင်ႇတင်းသဵင်ႈၵေႃႈ တေႁူၺ်းသူၼ်းမွၵ်ႇလၢတ်ႈ ႁႂ်ႈၵိုတ်းယိုဝ်းပတ်းပိုၼ်ႉၸိုင်ႈမိူင်း ႁႂ်ႈလႆႈ။ 2.တေၶဝ်ႈလိူၵ်ႈတင်ႈသေ တေၶတ်းၸႂ်ႁႂ်ႈပေႉၵၢၼ်လိူၵ်ႈတင်ႈ၊ ပေႉလႆႈၵႃႈႁိုဝ် ၶဝ်ႈၼႂ်းသၽႃးလႆႈၵႃႈႁိုဝ်ၵေႃႈ တေၶဝ်ႈ။ တေယူႇၼႂ်းသၽႃးသေ မူၼ်ႉမႄးပိူင်ငဝ်ႈပိုင်းမိူင်းၵႂႃႇ။ 3.ပႃႊတီႊႁူဝ်သိူဝ် (SNLD) ႁပ်ႉလွၵ်းပိူင် 8 ၸႄႈမိူင်း/တိူင်း၊ (ဢၼ်မိူင်းမၢၼ်ႈ 7 တိူင်း မႃးႁူမ်ႈၵၼ်ပဵၼ်ၸႄႈမိူင်းလဵဝ်) သေ မီးယိူင်းဢၢၼ်းပိူဝ်ႈတႃႇ ႁူမ်ႈၵၼ်ၵေႃႇသၢင်ႈၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ။ ပိူင်လူင်မၼ်း ဢမ်ႇၸႂ်ႈပိူဝ်ႈတႃႇၽၢတ်ႇဢွၵ်ႇ ၼႂ်းၸိုင်ႈမိူင်းႁူမ်ႈတုမ်၊ တေၵေႃႇတင်ႈၸိုင်ႈမိူင်းႁူမ်ႈတုမ်ၾႅတ်ႊၻရႄႊလ် ဢၼ်ၸိုၼ်ႈၸၢင်ႇၵူၺ်း- ဝႃႈၼႆ။

မိူဝ်ႈလဵဝ် ပႃႊတီႊႁူဝ်သိူဝ်ပိုတ်ႇလုမ်းၵႂႃႇယဝ်ႉ 40 တီႈပၢႆ၊ လုမ်းၽႄပႃႊတီႊႁူဝ်သိူဝ်ၼႆႉ ဢၢၼ်းတေပိုတ်ႇ 46 တီႈ (46 ၸႄႈဝဵင်း)။ ၼႂ်းၶၢဝ်းတၢင်း 1-2 လိူၼ် (လိူၼ်ၵျႅၼ်ႊၼိဝ်ႊရီႊ- ၾႅပ်ႊၿိဝ်ႊရီႊ 2015) ၼႆႉ တေပိုတ်ႇလုမ်းႁႂ်ႈယဝ်ႉတူဝ်ႈလီငၢမ်း။ ဢၼ်ပႆႇလႆႈပိုတ်ႇ ၵိုတ်းထႅင်ႈၼႂ်းၸႄႈမိူင်းၶၢင် တင်းတိူင်းတႃႈလိူဝ်ႇ (မၼ်းတလေး) ။ ၸွမ်းၼင်ႇ ဢၼ်လႆႈတမ်းဝၢင်းၼႃႈၵၢၼ်ဝႆႉၼၼ်ႉ ၼႂ်းၸိုင်ႈတႆးၼႆႉ ၶႂ်ႈၸွတ်ႇတူဝ်ႈမူတ်းယဝ်ႉ- ၼႆယဝ်ႉ။