ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး လူတ်းလူင်းတုင်းၸၢတ်ႈၸိုင်ႈတႆး ၼႄလွင်ႈမွင်ၸႂ်၊ တၵ်ႉယမ်ၶုၵ်းထူပ်းထိုင် ၽူႈႁတ်းငၢၼ် ၸဝ်ႈဢုင်းပွင်ႇ ၸၼ်ႉၽူႈၼမ်း ဢၼ်လႆႈလူႇတၢၼ်း ၼိူဝ်ႉလိူတ်ႈသၢႆၸႂ်ၵႂႃႇၼႃႈသိုၵ်း မိူဝ်ႈလၢႆသိပ်းပီပူၼ်ႉမႃး။

ၸဝ်ႈဢုင်းပွင်ႇ ၸၼ်ႉၽူႈၼမ်း ဢၼ်လႆႈလူႇတၢၼ်း ၼိူဝ်ႉလိူတ်ႈသၢႆၸႂ်ၵႂႃႇၼႃႈသိုၵ်း

ၸဝ်ႈဢုင်းပွင်ႇၼႆႉ ဢဝ်ပုၼ်ႈၽွၼ်းတူင်ႉၼိုင်ပွတ်း ဝၢၼ်ႈၼႃးၽုၺ်း ဢိူင်ႇသႅင်ၵႅဝ်ႉ (ဢၼ်မီးၸဵင်ႇႁွင်ႇဝၼ်းတူၵ်းသႅင်ၵႅဝ်ႉ မွၵ်ႈ 6 လၵ်း) ၸႄႈဝဵင်းသီႇပေႃႉသေ လႆႈထုၵ်ႇသိုၵ်းမၢၼ်ႈတပ်ႉ ၶလယ 67 မိူင်းယႆ ၊ ၶလယ 41 လႃႈသဵဝ်ႈ၊ 23 သီႇပေႃႉၸိူဝ်းၼႆႉ ၶွၼ်ႈႁႅင်းသိုၵ်းၵၼ်သေ မႃးဝႅတ်ႉတိုၵ်းတပ်ႉၸုမ်းမၼ်းၸဝ်ႈ ၽွင်းတိုၵ်ႉမီး ယူႇတီႈဝၢၼ်ႈၼႃးၽုၺ်း။ မၢၵ်ႇလူင်သိုၵ်းမၢၼ်ႈ 60mm တူၵ်းသႂ်ႇတီႈမၼ်းၸဝ်ႈသေ မၼ်းၸဝ်ႈလႆႈ လူႉသုမ်းၵႂႃႇ တီႈၼႃႈသိုၵ်း။ သိုၵ်းမၢၼ်ႈတီႉလႆႈၶၢပ်ႈတူဝ်မၼ်းၸဝ်ႈသေ ဢဝ်မိူဝ်းၵႂႃႇမိူင်းယႆ၊ ၵူတ်ႇထတ်းၸွမ်း တူဝ်ၶိင်းသေ ဢဝ်ၾင်တီႈပႃႇႁဵဝ်ႈမိူင်းယႆ၊ ဢၼ်မီးၾၢႆႇတူၵ်းမိူင်းယႆ။

ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး လူတ်းလူင်းတုင်းၸၢတ်ႈၸိုင်ႈတႆး ၼႄလွင်ႈမွင်ၸႂ်

ၵဵဝ်ႇၵပ်းလွင်ႈၼႆႉ ဝၢႆးၵိုတ်းတိုၵ်း ဢဝ်လွင်ႈငမ်းယဵၼ်ယဝ်ႉ ၾၢႆႇ SSPP/SSA ၵႂႃႇၵေႃႇၵုမ်း ၶုမ်ၵုတ်းမၼ်းၸဝ်ႈ (ၸဝ်ႈဢုင်းပွင်ႇ)သေ ႁဵတ်းပၢင်ၶုၵ်းထူပ်းမႃး၊ ႁပ်ႉႁွင်း ပဵၼ်ဝၼ်းၽူႈႁတ်းငၢၼ်မႃးသေ တၵ်ႉယမ်ထိုင်ဝိၺၢၼ်ႇ ၶႂၼ်ငဝ်းမၼ်းၸဝ်ႈ မႃးၵူႈပီ။

မိူဝ်ႈဝၼ်းတီႈ 05/12/2014 ၼႆႉ ယူႇတီႈတပ်ႉ SSPP/SSA  လႆႈၸီႉသင်ႇလူင်းတီႈ ၵူႈတပ်ႉၵွင် ၵူႈတပ်ႉၸုမ်း/ တပ်ႉမုၵ်ႉသေ ႁဵတ်းပၢင်ၶုၵ်းထူပ်း/ လူတ်းတုင်းၸၢတ်ႈလူင်းသေ ၼႄလွင်ႈမွင်ၸႂ်ၸွမ်း။ တီႈငဝ်ႈငုၼ်း SSPP/SSA ဝၢၼ်ႈႁႆးၵေႃႈ ႁဵတ်းပၢင်ႁႅၼ်းတၢၼ်း ႁဵတ်းတၢင်းလီ တီႈဝတ်ႉဝိႁၢရ်ၵၢင်ဝဵင်း ဝဵင်းမႂ်ႇဝၢၼ်ႈႁႆး- ၼႆယဝ်ႉ။

ၸဝ်ႈဢုင်းပွင်ႇၼႆႉ ၸႃႇတိတီႈၵိူတ်ႇ ဝဵင်းသီႇပေႃႉ။ မိူဝ်ႈပီ 1959 ဢွၼ်ႁူဝ်လုၵ်ႈႁဵၼ်းၸၼ်ႉၸွမ်သေ ၶဝ်ႈသိုၵ်းတီႈ ၸဝ်ႈၼွႆႉ သေႃးယၼ်ႇတ။ ဝၢႆးမႃးလႆႈၶဝ်ႈႁူမ်ႈပႃးၼႂ်းတပ်ႉ ဢၼ်ၸဝ်ႈၵွၼ်းၸိူင်းဢွၼ်ႁူဝ်။ မိူဝ်ႈၸဝ်ႈၵွၼ်းၸိူင်း ထုၵ်ႇသိုၵ်းမၢၼ်ႈယိုဝ်းၺႃး ၶႅၼ်ပုတ်းၵႂႃႇၶွၼ်ၼိုင်ႈ တီႈႁူၺ်ႈဢေႃႈၼၼ်ႉ ပႃးတူဝ်မၼ်းၸဝ်ႈ ဢၼ်ႁၢမ်ၸဝ်ႈၵွၼ်းၸိူင်း ၶဝ်ႈယူတ်းယႃတၢင်းမိူင်းၾၢင် (မိူင်းထႆး)။ မိူဝ်ႈၽွင်းပီ 1971 မိူဝ်ႈၵေႃႇတင်ႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၼၼ်ႉ ၸဝ်ႈမႄႈၼၢင်းႁိူၼ်းၶမ်း ဢွၼ်ႁူဝ်ပႃႇတီႇ၊ ၸဝ်ႈဢုင်းပွင်ႇ ႁပ်ႉပုၼ်ႈၽွၼ်း ယိပ်းၾၢႆႇတပ်ႉသိုၵ်း။

ၼႂ်းပိုၼ်းတႆးၼႆႉ ဢၼ်ပဵၼ်ၽူႈၵွၼ်းသိုၵ်း၊ ပဵၼ်ၸၼ်ႉၽူႈၼမ်းသေတူၵ်းသုမ်းၼႃႈသိုၵ်းၼႆႉ မီးမၼ်းၸဝ်ႈ ၵေႃႉလဵဝ်။ ၵွပ်ႈၼၼ် ၼင်ႇႁိုဝ်ၵူၼ်းၼုမ်ႇၸုပ်ႈသႅၼ်းလင် တေလႆႈႁူႉႁၼ်ၸွမ်း၊ လႆႈႁူႉၸွမ်းပိုၼ်းဢၼ်ၼႆႉ မိူဝ်ႈဝၼ်းတီႈ 05/12/2014 ၼၼ်ႉ တီႈငဝ်ႈငုၼ်းဝၢၼ်ႈႁႆးၵေႃႈ လႆႈႁဵတ်းပၢင်တၢၼ်ႈၶႆႈ ၵဵဝ်ႇၵပ်းပိုၼ်း မၼ်းၸဝ်ႈ- ၽူႈမီးၸၼ်ႉၼႂ်း SSPP/SSA ၵေႃႉၼိုင်ႈ လၢတ်ႈၼင်ႇၼႆ။