ၽွင်းတႅၼ်းပႃႇတီႇသိူဝ်ၽိူၵ်ႇ ၵေးသီး 3 ၵေႃႉ လႄႈ ၽွင်းတႅၼ်းတၢင်ႉယၢၼ်း ထွၼ်တူဝ်ဢွၵ်ႇပႃႇတီႇ။ ၽွင်းတႅၼ်းသိူဝ်ၽိူၵ်ႇ ၵေးသီး ဝႃႈ ထွၼ်တူဝ်ဢွၵ်ႇ ၸွမ်းၼင်ႇၵၢင်ၸႂ် ပေႃႈမႄႈၵူၼ်းမိူင်းတုၵ်းယွၼ်း။
ပူၼ်ႉမႃးမိူဝ်ႈဝၼ်းတီႈ 06/12/2014 ၽွင်းတႅၼ်းၻီႊမူဝ်ႊၶရႅတ်ႊတိၵ်ႊပႃႇတီႇ ၸၢဝ်းၶိူဝ်းတႆး ႁိုဝ်  ပႃႇတီႇသိူဝ်ၽိူၵ်ႇ (SNDP) လုင်းသၢင်ႇလႅင်း ၽွင်းတႅၼ်းသၽႃးၸႄႈမိူင်း ၵေးသီး။ ၸၢႆးမွၼ်းလႅင်း ၽွင်းတႅၼ်းသၽႃးၸႄႈမိူင်း ၵေးသီး။ ၸၢႆးဢွမ်သႅင်မိူင်း ၵူၼ်းတႅၼ်းသၽႃးၵူၼ်းမိူင်း 3 ၵေႃႉၼႆႉ လူင်းလၢႆးမိုဝ်း ထွၼ်တူဝ်ဢွၵ်ႇပႃႇတီႇ- ၼႆယဝ်ႉ။

ၸၢႆးမွၼ်းလႅင်း ၽွင်းတႅၼ်းၵေးသီး လၢတ်ႈဝႃႈ- ဢိင်ၼိူဝ်ပေႃႈမႄႈၵူၼ်းမိူင်း တုၵ်းယွၼ်းသေ ႁဝ်းၶႃႈလႆႈထွၼ်တူဝ်ဢွၵ်ႇ။ ပေႃႈမႄႈၵူၼ်းမိူင်းၼႆႉ ၶဝ်ၶဝ်ႈပဵၼ်လုၵ်ႈၸုမ်းပႃႇတီႇႁူဝ်သိူဝ် ဝႆႉၸဵမ်လႂ်ယဝ်ႉ၊ ပၢႆႉလိၵ်ႈပႃႇတီႇသိူဝ်ၽိူၵ်ႇၵေႃႈဢမ်ႇမီးယဝ်ႉ။ ၵွပ်ႈၼၼ် ဢိင်ၼိူဝ်ပေႃႈမႄႈၵူၼ်းမိူင်း တုၵ်းယွၼ်းသေ ႁဝ်းၶႃႈသၢမ်ၵေႃႉ ၸင်ႇလႆႈထွၼ်တူဝ်ဢွၵ်ႇပႃႇတီႇ ၸွမ်းၼင်ႇၵၢင်ၸႂ်ပေႃႈမႄႈၵူၼ်းမိူင်းၵူၺ်း- ဝႃႈၼႆ။

ၾၢႆႇၼိုင်ႈတၢင်းၼိုင်ႈ၊ ဝၼ်းတီႈ 07/12/2014 (မိူဝ်ႈဝႃး)ၼႆႉ ၽွင်းတႅၼ်းၸႄႈမိူင်း တၢင်ႉယၢၼ်း ၸၢႆးထုၼ်းဝိၼ်း (ႁွင်ႉၸၢႆးထုၼ်းသႃႇ) ၵေႃႈ ထွၼ်တူဝ်ဢွၵ်ႇပႃႇတီႇသိူဝ်ၽိူၵ်ႇ။ ၸၢႆးထုၼ်းဝိၼ်းၼႆႉ မိူဝ်ႈပၢင်လိူၵ်ႈတင်ႈပီ 1990 ၼၼ်ႉၵေႃႈ လုၵ်ႉၼႂ်းပႃႇတီႇႁူင်းၶဝ်ႈ (တၸၺ) သေ ၶဝ်ႈၼႂ်းပႃႇတီႇႁူဝ်သိူဝ်- ၼႆယဝ်ႉ။

ၽွင်းတႅၼ်းသၽႃးၸႄႈမိူင်း ၸႄႈဝဵင်းၼမ်ႉၸၢင် ၶဵတ်ႇလိူၵ်ႈတင်ႈမၢႆ 2 ၸၢႆးသူႇရိၼ်ႇဢူး

ဢွၼ်ၼႃႈၼႆႉ ပူၼ်ႉမႃးမိူဝ်ႈဝၼ်းတီႈ 02/12/2014 ၵေႃႈ ၽွင်းတႅၼ်းသၽႃးၸႄႈမိူင်း ၸႄႈဝဵင်းၼမ်ႉၸၢင် (ၶဵတ်ႇလိူၵ်ႈတင်ႈမၢႆ 2) ၸၢႆးသူႇရိၼ်ႇဢူး (တူႇရဵင်ႇဢူး)၊ ၽွင်းတႅၼ်းသၽႃးၸႄႈမိူင်း ၸႄႈဝဵင်းလၢႆးၶႃႈ ၸၢႆးၵျေႃႇၸေႇယ 2 ၵေႃႉၼႆႉ ထွၼ်တူဝ်ဢွၵ်ႇ ပႃႇတီႇသိူဝ်ၽိူၵ်ႇ (SNDP) သေ ၶဝ်ႈႁူမ်ႈၼႂ်း ငဝ်ႈငုၼ်းၻီႊမူဝ်ႊၶရေႊသီႊၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) ၼင်ႇၵဝ်ႇ။

ၸၢႆးသူႇရိၼ်ႇဢူး လၢတ်ႈဝႃႈ- ၽူႈၶဝ်ႈၶွမ်ႊမတီႊၸႄႈဝဵင်းၼမ်ႉၸၢင်၊ ၽူႈၶဝ်ႈၸုမ်း/ပႃႇတီႇၸိူဝ်းၼႆႉ တုၵ်းယွၼ်းလႄႈၶႃႈႁဝ်းၵေႃႈ လႆႈတႅမ်ႈလိၵ်ႈသေထွၼ်တူဝ်ဢွၵ်ႇ။ လုၵ်ႈၸုမ်းတင်းၸႄႈဝဵင်းၵေႃႈ ဢွၼ်ၵၼ်ၵႂႃႇၶဝ်ႈပႃႇတီႇႁူဝ်သိူဝ်ယဝ်ႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ႁူဝ်ပဝ်ႈပႃႇတီႇသိူဝ်ၽိူၵ်ႇ လုင်းၸၢႆးဢၢႆႈပဝ်း လၢတ်ႈဝႃႈ- ၶဝ်ၸိူဝ်းၼႆႉ ထွၼ်တူဝ်ဢွၵ်ႇၵေႃႈ ဢမ်ႇတုမ်ႉတိူဝ်ႉသင် ပႃႇတီႇသိူဝ်ၽိူၵ်ႇ၊ ၵွပ်ႈဝႃႈပၢင်လိူၵ်ႈတင်ႈပီ 2015 ၵေႃႈ ၸမ်ထိုင်မႃးယဝ်ႉ၊ ပေႃးတေလိူၵ်ႈတင်ႈမႂ်ႇထႅင်ႈယဝ်ႉ။ လွင်ႈတၢင်းၶဝ်ဢွၵ်ႇၼႆႉ တႃႇတေၶဝ်ႈၶေႉလိူၵ်ႈတင်ႈလႄႈ ၸႂ်ႉတၢင်ႇ သဵၼ်ႈမၢႆၸိုဝ်ႈသဵင် ၼေႃႇၽွင်းတႅၼ်း ၼိုင်ႈၸႄႈဝဵင်း 5 ၵေႃႉ၊ ဢၼ်တၢင်ႇၶိုၼ်ႈမႃးၸိူဝ်းၼၼ်ႉ ဢမ်ႇပႃးၸိုဝ်ႈၶဝ်ၸိူဝ်းၼႆႉ။ ယွၼ်ႉၼၼ် ၶဝ်ဢမ်ႇႁၢၼ်ႉၸႂ်သေၶဝ်ဢွၵ်ႇၵူၺ်း၊ ဢမ်ႇတုမ်ႉတိူဝ်ႉသင်။ ဢၼ်ပႃႇတီႇႁူဝ်သိူဝ်ၶဝ်ႈမႃးၼႂ်းပႃႇတီႇသိူဝ်ၽိူၵ်ႇ ၵေႃႈမီးတင်းၼမ်၊ လုၵ်ႈၸုမ်းပႃႇတီႇသိူဝ်ၽိူၵ်ႇၵေႃႈ မီးသၢမ်သႅၼ်ပၢႆ- ဝႃႈၼႆ။