ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) သူင်ႇသၢႆမၢႆၸိုဝ်ႈသဵင် ၸူးလူင်ပွင်ၸိုင်ႈမၢၼ်ႈ၊ ပိူဝ်ႈတႃႇႁူပ်ႉထူပ်းဢုပ်ႇဢူဝ်း ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ပိူဝ်ႈတႃႇဢုပ်ႇဢူဝ်း ၵႄႈလိတ်ႈ လွင်ႈဝဵင်းလၢႆႇၸႃႇ ထုၵ်ႇသိုၵ်းမၢၼ်ႈယိုဝ်း။

MPC တင်း ၸုမ်းၸၢဝ်းၶိူဝ်း NCCT ႁူပ်ႉထူပ်းၵၼ် တီႈမိူင်းထႆး မိူဝ်ႈဝၼ်းတီႈ 27/11/2014

ဝၼ်းတီႈ 17/12/2014 ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) သူင်ႇသၢႆမၢႆၸိုဝ်ႈသဵင် ၸူးလူင်ပွင်ၸိုင်ႈမၢၼ်ႈ၊ ပိူဝ်ႈတႃႇႁူပ်ႉထူပ်းဢုပ်ႇဢူဝ်း ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ၼႂ်းဝၼ်းတီႈ 23-24/12/2014 ၼႆႉ။ ၵၢၼ်ႁူပ်ႉထူပ်းဢုပ်ႇဢူဝ်းၵၼ်ပွၵ်ႈၼႆႉ ပိူဝ်ႈတႃႇဢုပ်ႇဢူဝ်း ၵႄႈလိတ်ႈ လွင်ႈဝဵင်းလၢႆႇၸႃႇ ထုၵ်ႇသိုၵ်းမၢၼ်ႈယိုဝ်း-ၼႆယဝ်ႉ။

ၼႂ်း NCCT ဢၼ်သူင်ႇသၢႆမၢႆၸိုဝ်ႈသဵင်ၵႂႃႇၼၼ်ႉ မီး 5 ၵေႃႉ- 1.ပတူဝ်ႇၵွႆႇထူးဝိၼ်း (ႁူဝ်ၼႃႈၸုမ်း)၊ 2.ၻွၵ်ႊတိူဝ်ႊသလၢႆး လျႅင်ႇမူင်း သၶူင်း၊ 3.ၶုၼ်ႇဢူၵ်ႉၵႃႇ၊ 4.ဢူးထုၼ်းၸေႃႇ၊ 5.ၶူးတေႃးရႄႇ ၸိူဝ်းၼႆႉ။ ၼွၵ်ႈသေၼၼ်ႉ မီးၸုမ်းၾၢႆႇၵမ်ႉၸွႆႈၵၢၼ်ငၢၼ်း ထႅင်ႈ 4 ၵေႃႉ၊ ၶၢင် 3 ၵေႃႉ၊ ယၢင်း 1 ၵေႃႉ။ ၶၢင်- လႃႇဢွင်ႇ၊ သိၼ်ႇဝႃး၊ သြႃႇမၵျႃႇၼၼ်ႇ။ ယၢင်း- ၸေႃးတႃႇတူဝ်းမူဝ်း ၸိူဝ်းၼႆႉ။

ပၢင်ႁူပ်ႉထူပ်းဢုပ်ႇၵုမ် ဝူင်ႈၵၢင် ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) တင်း ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ပွၵ်ႈၼႆႉ ပဵၼ်ၵမ်းတီႈ 7 ။ ၵူၺ်းၵႃႈ ပၢင်ႁူပ်ႉၵၼ်ပွၵ်ႈၼႆႉ ဢမ်ႇလႆႈႁွင်ႉဝႃႈ NCCT  တင်း UPWC ႁူပ်ႉၵၼ် ၵမ်းတီႈ 7 ။ ၵွပ်ႈဝႃႈ ပိူင်လူင်မၼ်း ဢမ်ႇၸႂ်ႈပိူဝ်ႈတႃႇ ဢုပ်ႇဢူဝ်း ၵၢၼ်ၵိုတ်းယိုဝ်းပတ်းပိုၼ်ႉတူဝ်ႈမိူင်း (NCA) ၊ ပဵၼ်တႃႇၵႄႈလိတ်ႈပၼ်ႁႃ ဢၼ်ၵိူတ်ႇၶိုၼ်ႈယွၼ်ႉလၢႆႇၸႃႇ၊ ဢၼ်လၢႆႇၸႃႇထုၵ်ႇယိုဝ်းသေ ၵူၼ်းလႆႈတၢႆၵႂႃႇ 23 ၵေႃႉၼၼ်ႉ- ၼႆယဝ်ႉ။