ပလိၵ်ႈဢၼ်ပႂ်ႉၶူဝ် တီႈၼမ်ႉလင်း သီႇပေႃႉ ထုၵ်ႇၽူႈယိပ်းၵွင်ႈၵၢင်ႇ ၶီႈလူတ်ႉၶိူင်ႈသေမႃး ယိုဝ်းတၢႆၵႂႃႇၵေႃႉၼိုင်ႈ၊ ဝၢတ်ႇၵေႃႉၼိုင်ႈ။ ဝၢႆးမႃး သိုၵ်းမၢၼ်ႈ မႃးပုတ်ႈပၵ်းတႅၼ်းသေ ၶၢၼ်းၵူၼ်းဝၢၼ်ႈ ၼႂ်းပိုၼ်ႉတီႈ ပႂ်ႉယၢမ်းၸွမ်းၶဝ် တင်းၵၢင်ဝၼ်းၵၢင်ၶိုၼ်း။

ပူၼ်ႉမႃးမိူဝ်ႈဝၼ်းတီႈ 11/12/2014 ၼၼ်ႉ မီးၵူၼ်းၶီႇလူတ်ႉၶိူင်ႈမႃးၵိုတ်းၼႃႈတပ်ႉပၢင်သဝ်း ပလိၵ်ႈ၊  တီႈဝၢၼ်ႈၶူဝ်လူင် ၶူဝ်ၼမ်ႉလင်း တီႈႁိမ်းတၢင်းၽႄလႃႈသဵဝ်ႈ၊ ၼိူဝ်သဵၼ်ႈတၢင်းသီႇပေႃႉ-ၼမ်ႉလၼ်ႈ (ယၢၼ်ဝဵင်းသီႇပေႃႉ 9 လၵ်း၊ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ)သေ လၢၵ်ႈၵွင်ႈယိုဝ်းသႂ်ႇပလိၵ်ႈ၊ ႁဵတ်းႁႂ်ႈပလိၵ်ႈ ဢၼ်ပႂ်ႉဝႆႉတီႈၼၼ်ႈဝၢတ်ႇၸဵပ်း 2 ၵေႃႉ၊ ၼႂ်း 2 ၵေႃႉၼၼ်ႉ ၵႂႃႇတၢႆတီႈႁူင်းယႃၵေႃႉၼိုင်ႈ- ၼႆယဝ်ႉ။


ဝၢႆးၼၼ်ႉ သိုၵ်းမၢၼ်ႈတပ်ႉၵႃးတႅင်ႉ 5003 တင်း တပ်ႉၶလယ 147 ႁူမ်ႈၵၼ်သေ မႃးပုတ်ႈပၵ်း တီႈတပ်ႉပၢင်သဝ်းပလိၵ်ႈ ၶူဝ်ၼမ်ႉလင်းၼႆႉ။ ၵူၺ်းၵႃႈ သိုၵ်းမၢၼ်ႈၸိူဝ်းမႃးပုတ်ႈယူႇမႂ်ႇၼႆႉ သမ်ႉၶၢၼ်းႁွင်ႉဢဝ်ၵူၼ်းဝၢၼ်ႈ ဝၢၼ်ႈၶူဝ်လူင် ၼိုင်ႈၶမ်ႈ 2 ၵေႃႉ၊ ၵၢင်ဝၼ်း 2 ၵေႃႉ မႃးယူႇၸွမ်းၶဝ်၊ မႃးပႂ်ႉယၢမ်းၸွမ်းၶဝ်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းသီႇပေႃႉ ၵေႃႉၼိုင်ႈလၢတ်ႈဝႃႈ- ပလိၵ်ႈဢၼ်ပႂ်ႉတီႈၶူဝ် ဢၼ်ထုၵ်ႇၵူၼ်းယိပ်းၵွင်ႈမႃးယိုဝ်းၵႂႃႇၼႆႉ ပဵၼ်ၸၼ်ႉၵႅမ်ၶုၼ်ႁၢၼ် ၾၢႆႇပလိၵ်ႈ၊ ဢွၼ်ႁူဝ်ၵူၼ်း 4-5 ၵေႃႉသေ ပႂ်ႉတီႈၼၼ်ႈ။ ဝၢႆးၶဝ်ၺႃးယိုဝ်းယဝ်ႉ သိုၵ်းမၢၼ်ႈမႃးပုတ်ႈပၵ်း။ ၵူၺ်းၵႃႈ တႄႇဢဝ်ဝၼ်းၼၼ်ႉမႃး သိုၵ်းမၢၼ်ႈ ၶၢၼ်းႁွင်ႉဢဝ်ၵူၼ်းဝၢၼ်ႈ ၵႂႃႇယူႇၸွမ်းၶဝ် ၵႂႃႇၸႂ်ႉပႂ်ႉယၢမ်းၸွမ်းၶဝ်။ ဝူၼ်ႉဢမ်ႇပွင်ႇ၊ ၶဝ်ပဵၼ်သိုၵ်းယိပ်းၵွင်ႈၵၢင်ႇသေ ၵွပ်ႈသင်သမ်ႉၶၢၼ်းၵူၼ်းဝၢၼ်ႈ မႃးယူႇၸွမ်းၶဝ်။ ၵူၼ်းဝၢၼ်ႈ လႆႈႁေႃႇၶဝ်ႈၸွၵ်းၽၵ်းသေ လႆႈၵႂႃႇပႂ်ႉယၢမ်းၸွမ်းၶဝ်။ ပိူင်လူင်မၼ်း ဢဝ်ၵူၼ်းဝၢၼ်ႈၵူၼ်းသူၼ်ႁဵတ်းႁူဝ်ႉ ပိူဝ်ႈတႃႇတၢႆတၢင်ၶဝ်- ႁဝ်းၶႃႈႁၼ်ထိုင်ၸိူင်ႉၼႆ။

သိုၵ်းမၢၼ်ႈတပ်ႉ ၵႃးတႅင်ႉ 5003 ၼႆႉ မိူဝ်ႈၵွၼ်ႇပဵၼ်တပ်ႉၵႃးၵၢပ်ႇလဵၵ်း မၢႆတပ်ႉ 7014 ။ ဝၢႆးမႃးလႅၵ်ႈလၢႆႈပဵၼ် တပ်ႉတိုၵ်းသေ ပဵၼ်မႃးတပ်ႉၵႃးတႅင်ႉ 5003 ။ တပ်ႉၶလယ 147 ပဵၼ်တပ်ႉဢၼ် လုၵ်ႉတၢင်းၼမ်ႉတူႈမႃး။

ပလိၵ်ႈဢၼ်ပႂ်ႉတီႈႁူဝ်ၶူဝ်ၼႆႉ ၵႃႈၵွၼ်ႇပူၼ်ႉမႃးၶဝ်လိူင်းတႄႉတႄႉ။ ပၢၵ်ႇၸႃႉသဵင်ၸၢင် ႁိုတ်းႁၢတ်ႇၸၢတ်ႇသႂ်ႇ လႃႇၵူၼ်းၵႂႃႇမႃးလတ်းပႆ တၢင်းထုင်ႉၼၼ်ႉ။ ၵႃႈပူၼ်ႉမႃးၵေႃႈ ၺႃးၵူၼ်းၸုမ်းဢၼ်ဢမ်ႇႁၢၼ်ႉၸႂ်ၼိူဝ်ၶဝ် မႃးမူၵ်းႁႅမ်ၶဝ်ၵေႃႈမီး- လႆႈႁူႉၼင်ႇၼႆ။

ၵပ်းၵၢႆႇလွင်ႈၼႆႉ ၽူႈၵွၼ်းတပ်ႉပလိၵ်ႈ တီႈသီႇပေႃႉ လၢတ်ႈတီႈၸုမ်းသိုဝ်ႇ (Media) ဝႃႈ- ၵဵဝ်ႇၵပ်းလွင်ႈပၼ်ႁႃဢၼ်ပလိၵ်ႈတၢႆၵႂႃႇၼႆႉ မၼ်းပဵၼ်ၼႃႈလိၼ်တပ်ႉသိုၵ်းၸိုင်ႈတႆး (SSPP/SSA) ၶဝ်ၵႂႃႇမႃး တူင်ႉၼိုင်လႄႈ မၼ်းၵဵဝ်ႇၶွင်ႈၶဝ် ဢမ်ႇၵဵဝ်ႇၶွင်ႈၶဝ်ၼၼ်ႉ တေၵူတ်ႇထတ်းၵႂႃႇ- ဝႃႈၼႆ။