သိုၵ်းမၢၼ်ႈမိူင်းပၼ်ႇ ၵႂႃႇသွၵ်ႈထိူၼ်ႇသေ ယဵပ်ႇၺႃး မၢၵ်ႇတႅၵ်ႇ၊  ၼႂ်းဢိူင်ႇၼွင်လူမ်ႇ ၸႄႈဝဵင်းမိူင်းပၼ်ႇ၊ ၽူႈမီးၸၼ်ႉသိုၵ်းမၢၼ်ႈ ၶႃပုတ်းၵေႃႉၼိုင်ႈ၊ ဝၢတ်ႇၸဵပ်း လိူဝ်ႁႅင်းလၢႆၵေႃႉ။

ဝၼ်းတီႈ 22/12/2014 (မိူဝ်ႈဝႃး) ပွတ်းၼႂ်ယၢမ်း 08:30 မူင်း၊ ငႃးသိုၵ်းမၢၼ်ႈ ၽႃႇၺႃးမၢၵ်ႇတီႈၶၢႆးၼွင်ငိုၼ်း ဢိူင်ႇၼွင်လူမ်ႇ (ယၢၼ်ၾၢႆႇၸၢၼ်းဝဵင်းမိူင်းပၼ်ႇမွၵ်ႈ 19 လၵ်း) ဝူင်ႈၵၢင်ၼွင်လူမ်ႇ-ၵၼ်ႉၵၼ် ၸႄႈဝဵင်းမိူင်းပၼ်ႇ  ၸိုင်ႈတႆးပွတ်းၸၢၼ်း။ လႆႈငိၼ်းဝႃႈ သိုၵ်းမၢၼ်ႈဝၢတ်ႇၸဵပ်းလိူဝ်ႁႅင်း 3 ၵေႃႉ၊ ၼႂ်းၼၼ်ႉ ၽူႈမီးၸၼ်ႉသိုၵ်းမၢၼ်ႈၵေႃႉၼိုင်ႈၶႃႈပုတ်း၊ မိူဝ်ႈဝႃးဝၢႆးဝၼ်း ႁွတ်ႈၽႅဝ်ဝႆႉတီႈ ႁူင်းယႃဝဵင်းၼမ်ႉၸၢင်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်း ၼႂ်းၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၵေႃႉၼိုင်ႈလၢတ်ႈဝႃႈ- သိုၵ်းမၢၼ်ႈ ဢၼ်ဢဝ်ႁူမ်ႇလူမ်ႈသဵၼ်ႈတၢင်းၸိူဝ်းၼႆႉ ဝၢႆးပဵၼ်ပၢင်တိုၵ်းၵၼ်တင်း RCSS/SSA မိူဝ်ႈဝၼ်းတီႈ 14 ပူၼ်ႉမႃးၼႆႉ ၶဝ်ၵူဝ်သိုၵ်းတႆးၵႂႃႇငွႆးယိုဝ်းၶဝ်သေ ၶဝ်ႁၢင်ႈၵၢင်မၢၵ်ႇတႅၵ်ႇ ႁႄႉၵင်ႈဝႆႉ၊ ထႅင်ႈၸုမ်းၼိုင်ႈသမ်ႉ မႃးယဵပ်ႇၺႃး- ဝႃႈၼႆ။

ၵူၼ်းၼႂ်းပိုၼ်ႉတီႈ ၵေႃႉၼိုင်ႈၵေႃႈလၢတ်ႈဝႃႈ- လႅပ်ႈပဵၼ်သိုၵ်းမၢၼ်ႈ တပ်ႉ 332 မိူင်းပၼ်ႇ ႁၢင်ႈၵၢင်မၢၵ်ႇဝႆႉသေ တပ်ႉမိူင်းၼၢႆး ဢၼ်မႃးထႅမ်ႁႅင်းသိုၵ်းထႅင်ႈ မႃးယဵပ်ႇၺႃး၊ မၢၵ်ႇတႅၵ်ႇမွၵ်ႈယၢမ်း 8 မူင်းၶိုင်ႈၵၢင်ၼႂ်- ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 14/12/2014 ယၢမ်း 09:00-10:00 မူင်း၊  သိုၵ်းတႆး RCSS/SSA တင်း သိုၵ်းမၢၼ်ႈ ပဵၼ်ပၢင်တိုၵ်းၵၼ် ၾၢႆႇၸၢၼ်းမိူင်းပၼ်ႇ တၢင်းပွတ်းၸဵတ်းႁၢတ်ႇ ၼႂ်းဢိူင်ႇၼွင်ႁီး ၼႂ်းၸႄႈဝဵင်းမိူင်းပၼ်ႇ၊ သိုၵ်းမၢၼ်ႈတၢႆၵေႃႉၼိုင်ႈ၊ ဝၢတ်ႇၸဵပ်းၼိုင်ႈၵေႃႉ။

လွင်ႈတၢင်း လႆႈပဵၼ်မႃးပၢင်တိုၵ်းၼႆႉ လႆႈႁူႉဝႃႈ ဢွၼ်ၼႃႈၼၼ်ႉ မွၵ်ႈဝၼ်းတီႈ 10-11/12/2014 မီးၵူၼ်းဝၢၼ်ႈၼမ်ႉတွင်း ၵႂႃႇႁႃပႅၵ်ႇ၊ ၵႂႃႇၺႃးသိုၵ်းမၢၼ်ႈ ဢၼ်ဢဝ်ႁူမ်ႇလူမ်ႈသဵၼ်ႈတၢင်း ယိုဝ်းၵွင်ႈ လွၵ်ႇငိုတ်ႈၵူၼ်းဝၢၼ်ႈ၊ ၼႄးၵူၼ်းဝၢၼ်ႈပဵၼ်ၵူၼ်းထိူၼ်ႇ၊ ထၢမ်ၵူၼ်းဝၢၼ်ႈဝႃႈ သိုၵ်းတႆးမီးလႂ် ၸိူဝ်းၼႆႉ။ ၼွၵ်ႈသေၼၼ်ႉ  ဢဝ်ၶူဝ်းၶွင်ၵူၼ်းဝၢၼ်ႈ၊ ၶၢၼ်းၸႂ်ႉၵူၼ်းဝၢၼ်ႈဢဝ်ၵႆႇပၼ်ၶဝ် ၸိူဝ်းၼႆႉ။

ယွၼ်ႉလွင်ႈၼႆႉသေ ႁဵတ်းႁႂ်ႈၼႂ်းဝူင်ႈၵၢင် သိုၵ်းမၢၼ်ႈတင်းသိုၵ်းတႆး မီးပၼ်ႁႃၵၼ်မႃး၊ ထိုင်မႃးဝၼ်းတီႈ 14 ၽွင်းသိုၵ်းမၢၼ်ႈ ၵႂႃႇတူင်ႉၼိုင်တၢင်းၸဵတ်းႁၢတ်ႇၼၼ်ႉ ထိုင်တီႈလႆႈ ပဵၼ်ပၢင်တိုၵ်းၵၼ်တင်း တပ်ႉသိုၵ်းၸိုင်ႈတႆး (RCSS/SSA) ။ ဝၢႆးပၢင်တိုၵ်းယဝ်ႉ ထိုင်မႃးဝၼ်းတီႈ 15  သိုၵ်းမၢၼ်ႈမႃးၽိူမ်ႉထႅမ်ႁႅင်းသိုၵ်း ထႅင်ႈတင်းၼမ်- ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ။

ဝၢႆးပဵၼ်ပၢင်တိုၵ်းမႃးၼႆႉ ၵူၼ်းဝၢၼ်ႈၵူၼ်းမိူင်း ၸိူဝ်းဢွၵ်ႇတၢင်းၵႂႃႇမႃးၶဝ်ႈဢွၵ်ႇဝဵင်းမိူင်းပၼ်ႇ ထုၵ်ႇၸဝ်ႈၼႃႈတီႈမၢၼ်ႈ ၵူတ်ႇထတ်းထဵတ်ႈထၢမ်ႁၢဝ်ႈႁႅင်း၊  မိူၼ်ၼင်ႇၵူတ်ႇထတ်းဝႂ်ၵပ်းတူဝ်၊ ထူၵ်းၶူဝ်းၸိူဝ်းၼႆႉ ႁဵတ်းႁႂ်ႈၵူၼ်းမိူင်းၵႂႃႇမႃးဢွၵ်ႇတၢင်းယၢပ်ႇၽိုတ်ႇ- ၼႆယဝ်ႉ။

သိုၵ်းမၢၼ်ႈ ဢၼ်ဢဝ်ႁူမ်ႇလူမ်ႈသဵၼ်ႈတၢင်း ၼႂ်းၸႄႈဝဵင်းမိူင်းပၼ်ႇ မီး 2 သဵၼ်ႈ။ သဵၼ်ႈၼိုင်ႈ လုၵ်ႉၼမ်ႉတွင်း ႁဵတ်း/ၽွၵ်ႈၵႂႃႇၸူးတႃႈသူပ်းပၢတ်ႈ၊ (သဵၼ်ႈတၢင်းမိူင်းပၼ်ႇ-ၼမ်ႉတွင်း- တႃႈသူပ်းပၢတ်ႈ)။ ထႅင်ႈသဵၼ်ႈၼိုင်ႈ လုၵ်ႉၼမ်ႉတွင်း ၽွၵ်ႈၵႂႃႇၸူးတႃႈသူပ်းတဵင်း (သဵၼ်ႈတၢင်းမိူင်းပၼ်ႇ- ၼမ်ႉတွင်း- တႃႈသူပ်းတဵင်း)။