သိုၵ်းမၢၼ်ႈ တပ်ႉဢၼ်တူင်ႉၼိုင်ၾၢႆႇၸၢၼ်း မိူင်းပၼ်ႇ ဢဝ်ႁူမ်ႇလူမ်ႈသဵၼ်ႈတၢင်း ယဵပ်ႇၺႃးမၢၵ်ႇတႅၵ်ႇ တီႈၶၢႆးၼွင်ငိုၼ်း  ၼႂ်းဢိူင်ႇၼွင်လူမ်ႇ ၸႄႈဝဵင်းမိူင်းပၼ်ႇ၊ ဝၢတ်ႇၸဵပ်းလိူဝ်ႁႅင်း 3 ၵေႃႉ။ သိုၵ်းမၢၼ်ႈၼႄးသိုၵ်းတႆး RCSS/SSA ၵၢင်မၢၵ်ႇ၊ လွင်ႈၼႆႉႁႂ်ႈသိုၵ်းတႆး ၵႄႈလိတ်ႈပၼ်။

ထုင်ႉၼႂ်းၸႄႈဝဵင်းမိူင်းပၼ်ႇတီႈၼိုင်ႈ

မိူဝ်ႈဝၼ်းတီႈ 22/12/2014 ၵၢင်ၼႂ်ယၢမ်း 08:30 မူင်း၊ သိုၵ်းမၢၼ်ႈဢၼ်ၵႂႃႇတူင်ႉၼိုင် ၾၢႆႇၸၢၼ်းမိူင်းပၼ်ႇ 16 လၵ်း၊ ယဵပ်ႇၺႃးမၢၵ်ႇတႅၵ်ႇ ပွတ်းၶၢႆးၼွင်ငိုၼ်း ဢိူင်ႇၼွင်လူမ်ႇ (ဝူင်ႈၵၢင်ၼွင်လူမ်ႇ-ၵၼ်ႉၵၼ်) ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း၊ ႁဵတ်းႁႂ်ႈသိုၵ်းမၢၼ်ႈတိူဝ်ႉဝၢတ်ႇၸဵပ်းလိူဝ်ႁႅင်း 3 ၵေႃႉ- ၼႆယဝ်ႉ။

တင်ႈတႄႇႁူဝ်လိူၼ်ၻီႊသႅမ်ႊၿိူဝ်ႊ (2014)ၼႆႉမႃး၊  ဢိင်ၼိူဝ်သိုၵ်းမၢၼ်ႈၽိူမ်ႉထႅမ်ႁႅင်းသိုၵ်း မႃးတူင်ႉၼိုင်ၼႂ်းၸႄႈဝဵင်းမိူင်းပၼ်ႇ ၼမ်လိူဝ်ၵဝ်ႇ၊ မႃးတူင်ႉၼိုင် ဢဝ်ႁူမ်ႇလူမ်ႈၵၢၼ်ႁဵတ်းသဵၼ်ႈတၢင်းမႂ်ႇ မိူၼ်ၼင်ႇတပ်ႉႁဵတ်း/ၶုတ်းတၢင်း တပ်ႉၶမယ 921 ။ လိူဝ်သေတပ်ႉ 921 ၼႆႉ ယင်းမီးထႅင်ႈတပ်ႉၶမယ 332 ၊ ၶမယ 520 ၊ ၶမယ 575 ၊ ၶမယ 577 လႄႈ ၶလယ 66 ဢၼ်လုၵ်ႉတၢင်းၼမ်ႉၸၢင်မႃး။

ယွၼ်ႉပိူဝ်ႈသိုၵ်းမၢၼ်ႈ ၽိူမ်ႉထႅမ်ႁႅင်းသိုၵ်း မႃးတူင်ႉၼိုင်ၼမ်သေ ထိုင်မႃးမိူဝ်ႈဝၼ်းတီႈ 14/12/2014 ၼၼ်ႉ လႆႈပဵၼ်ပၢင်တိုၵ်းၵၼ်တင်း ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တၢင်းပွတ်းၸဵတ်းႁၢတ်ႇ ဢိူင်ႇၼွင်ႁီး ၸႄႈဝဵင်းမိူင်းပၼ်ႇ။

ထိုင်မႃးမိူဝ်ႈဝၼ်းတီႈ 22/12/2014 ၼႆႉ သိုၵ်းမၢၼ်ႈသမ်ႉ ယဵပ်ႇၺႃးမၢၵ်ႇထႅင်ႈ တီႈၶၢႆးၼွင်ငိုၼ်း ဢိူင်ႇၼွင်လူမ်ႇၼႆႉ။ ၾၢႆႇသိုၵ်းမၢၼ်ႈၼႄးဝႃႈ ပဵၼ်သိုၵ်းတႆးႁၢင်ႈၵၢင်ဝႆႉ။ ၵဵဝ်ႇၵပ်းလွင်ႈၼႆႉ တိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) ၵႂႃႇလၢတ်ႈတီႈ ၽူႈၼင်ႈလုမ်းၵပ်းသၢၼ် တီႈၶူဝ်လမ် ဝႃႈ- ႁႂ်ႈၵႄႈလိတ်ႈပၼ် ပၼ်ႁႃလွင်ႈၼႆႉ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၼႂ်း RCSS/SSA ၵေႃႉၼိုင်ႈလၢတ်ႈဝႃႈ- တိူင်းသိုၵ်းၶူဝ်လမ် ႁွင်ႉၽူႈၵပ်းသိုပ်ႇၵပ်းသၢၼ် တီႈလုမ်းႁဝ်းၶႃႈ တီႈၶူဝ်လမ်သေလၢတ်ႈဝႃႈ- ဢၼ်ႁၢင်ႈၵၢင်မၢၵ်ႇၼႆႉ ပဵၼ်ၸုမ်း RCSS/SSA ၊ ႁႂ်ႈႁဝ်းၶႃႈၵႄႈလိတ်ႈပၼ် ပၼ်ႁႃလွင်ႈၼႆႉ။ ၵူၺ်းၵႃႈ တီႈဢၼ်ႁဝ်းၶႃႈယူႇသဝ်းၼႆႉ ပဵၼ်ၼႂ်းထိူၼ်ႇၼႂ်းပႃႇ၊ ၶဝ်ပူၼ်ႉၶဝ်ႈမႃး ၼႂ်းၼႃႈလိၼ်ႁဝ်းလႄႈ ပေႃးဢဝ်ၶေႃႈတူၵ်းလူင်းၵၼ်ဝႃႈ ၶဝ်ထုၵ်ႇလႆႈပွင်ႇၶၢဝ်ႇတီႈႁဝ်း၊ ၵူၺ်းၵႃႈ ၶဝ်သမ်ႉဢမ်ႇပွင်ႇၶၢဝ်ႇသေၽိုတ်ႉၶဝ်ႈမႃး၊ ႁဵတ်းႁႂ်ႈမိူဝ်ႈဝၼ်းတီႈ 14 ၼၼ်ႉ လႆႈပဵၼ်ပၢင်တိုၵ်းၵၼ်။ ပေႃးဝႃႈပဵၼ်ပၢင်တိုၵ်းယဝ်ႉၼႆၵေႃႈ သိုၵ်းမၢၼ်ႈဢၼ်မႃးဢဝ်ႁူမ်ႇလူမ်ႈ ႁဵတ်းသဵၼ်ႈတၢင်းၼႆႉ ၶဝ်ဢမ်ႇဝၢင်းၸႂ်ၼိူဝ်သိုၵ်းတႆးသေ ႁၢင်ႈၵၢင်မၢၵ်ႇဝႆႉသေၼွၼ်းၵၢင်ၶမ်ႈၵၢင်ၶိုၼ်း၊ ၽိူဝ်ႇၵၢင်ၼႂ်မႃး တႃႇၸုမ်းၼိုင်ႈသမ်ႉမႃးယဵပ်ႇ၊ ၶဝ်ၼင်ႇၵၼ်ယဵပ်ႇၺႃးမၢၵ်ႇၶဝ်ၵူၺ်း၊ ဢမ်ႇၸႂ်ႈႁဝ်းၶႃႈႁၢင်ႈၵၢင်- ဝႃႈၼႆ။

တင်ႈတႄႇသွင်ၾၢႆႇပဵၼ်ပၢင်တိုၵ်းၵၼ်မႃး မိူဝ်ႈဝၼ်းတီႈ 14 သေ တႄႇဝၼ်းတီႈ 15 မႃးၼႆႉ လၢၼ်ႇ/ၵဵတ်ႉ ဢၼ်မီးတီႈလႅၼ်ဝဵင်းမိူင်းပၼ်ႇၵေႃႈ ၵူတ်ႇထတ်းၵူၼ်းၶဝ်ႈၵူၼ်းဢွၵ်ႇ ၵႂႃႇတႃႈပႆတၢင်း၊ ၵူတ်ႇထတ်းဝႂ်ၵပ်းတူဝ်၊ ထၢမ်တီႈယူႇ၊ ႁႂ်ႈထႅမ်ၸိုဝ်ႈသဵင်ဝႆႉသေ ၸင်ႇပၼ်လတ်းၽၢၼ်ႇၵႂႃႇမႃး။ လွင်ႈၼႆႉ ႁဵတ်းႁႂ်ႈၵူၼ်းၼႂ်းပိုၼ်ႉတီႈ ၵႂႃႇမႃးႁဵတ်းႁႃၵိၼ်လဵင်ႉတွင်ႉယၢပ်ႇ။ ၾၢႆႇၼိုင်ႈၵေႃႈ ၵူၼ်းမိူင်းၸိူဝ်းဢမ်ႇမေႃၵႂၢမ်းမၢၼ်ႈၼၼ်ႉ ၶဝ်ပေႃးၵူဝ်သိုၵ်းမၢၼ်ႈဝႆႉယူႇယဝ်ႉ၊ ပေႃးမႃးပဵၼ်ၸိူင်ႉၼႆ ၶႅၼ်းၵူဝ်မႃးလိူဝ်ၵဝ်ႇ- ၵူၼ်းပွတ်းမိူင်းပၼ်ႇၵေႃႉၼိုင်ႈလၢတ်ႈ။

ၼႂ်းၸႄႈဝဵင်းမိူင်းပၼ်ႇၼႆႉ လူင်ပွင်ၸိုင်ႈ/ တပ်ႉသိုၵ်းမၢၼ်ႈ ႁဵတ်းသဵၼ်ႈတၢင်းမႂ်ႇ 2 သဵၼ်ႈ။ သိုၵ်းမၢၼ်ႈ ဢၼ်ပဵၼ်တပ်ႉၵေႃႇသၢင်ႈ တပ်ႉ 921 ၼႆႉ ၵေႃႇသၢင်ႈသဵၼ်ႈတၢင်းသၢႆ မိူင်းပၼ်ႇ-ၼွင်လူမ်ႇ-ပၢင်ပီႉ-ပၢင်တဝီႉ- လွႆၵုင်းမၢဝ်း- ဝၢၼ်ႈႁၢတ်ႇ- ၼႃးၵူင်း။ ထႅင်ႈသဵၼ်ႈၼိုင်ႈ ပဵၼ်ထႅင်ႈၸုမ်းၼိုင်ႈ၊ သဵၼ်ႈလုၵ်ႉမိူင်းပၼ်ႇၵႂႃႇၼွင်လူမ်ႇ-တႃႈသူပ်းပၢတ်ႈ။ ပေႃးဝႃႈ သိုၵ်းမၢၼ်ႈမႃးတႄႇႁဵတ်းသဵၼ်ႈတၢင်းယဝ်ႉၵေႃႈ ဢိင်ၼိူဝ်သိုၵ်းမၢၼ်ႈ မႃးဢဝ်ႁူမ်ႇလူမ်ႈသဵၼ်ႈတၢင်းသေ သိုၵ်းမၢၼ်ႈၽိူမ်ႉထႅမ်ဢဵၼ်ႁႅင်း ၼမ်ၶိုၼ်ႈမႃးတိၵ်းတိၵ်း- ၼႆယူႇ။

ၽူႈမီးပုၼ်ႈၽွၼ်း RCSS/SSA ၸဝ်ႈၼိုင်ႈၵေႃႈ လၢတ်ႈဝႃႈ- သိုၵ်းမၢၼ်ႈၼႆႉ ၶဝ်မႃးႁဵတ်းသဵၼ်ႈတႃႈသၢႆတၢင်း တီႈဝၢၼ်ႈႁဝ်းမိူင်းႁဝ်းၵေႃႈ ႁၼ်လီၸွမ်းယူႇ၊ ၵူၺ်းၵႃႈ ၾၢႆႇၼိုင်ႈၵေႃႈ ဝၵ်ႉဢဝ်တိုဝ်ႉတၢင်း ၽွင်းၵေႃႇသၢင်ႈလွင်ႈငမ်းယဵၼ်ၼႆႉသေ မႃးႁဵတ်းတၢင်း၊ မႃးၽိုတ်ႉဢဝ်တီႈယူႇ။ ၵၢၼ်ထႅမ်ႁႅင်းသိုၵ်းမႃးၸိူင်ႉၼႆ ဢမ်ႇထုၵ်ႇလီႁႂ်ႈမၼ်းပဵၼ်။ ၾၢႆႇၼိုင်ႈၵေႃႈ ၵွၼ်ႇၼႃႈပႆႇပဵၼ်ပၢင်တိုၵ်းဝၼ်းတီႈ 14 ၼၼ်ႉ သိုၵ်းမၢၼ်ႈ ၵႂႃႇဝႅတ်ႉဝၢၼ်ႈၼမ်ႉတွင်းသေ ယိုဝ်းၵွင်ႈလွၵ်ႇၵူၼ်းဝၢၼ်ႈ။ ထႅင်ႈဝၼ်းၼိုင်ႈ သမ်ႉၵႂႃႇဝႅတ်ႉဝၢၼ်ႈၵၼ်ႉၵၼ်သေ သွၵ်ႈဝၢၼ်ႈၶိုၼ်ႈႁိူၼ်းလူင်းႁိူၼ်း၊ သွၵ်ႈတဝ်သိုၵ်းတႆးၼႂ်းပိုၼ်ႉတီႈ။ ထၢမ်ႁႃသိုၵ်းတႆး၊ ထၢမ်ၵူၼ်းဝၢၼ်ႈဝႃႈ ၵူၼ်းႁိူၼ်းသူမီးသိုၵ်းတႆးႁႃႉ၊ မူၵ်းသိူင်ႇဝႆႉႁႃႉ ၸိူဝ်းၼႆႉ ႁဵတ်းႁႂ်ႈၵူၼ်းဝၢၼ်ႈၵူဝ်ႁႄသိုၵ်းမၢၼ်ႈ။ လွင်ႈၼႆႉ ႁဝ်းၶႃႈပေႃးၵိုတ်းယိုဝ်းၵၼ်ဝႆႉယဝ်ႉ၊ မၼ်းဢမ်ႇထုၵ်ႇလီပဵၼ်။ ၵွပ်ႈၼၼ် ဢမ်ႇထုၵ်ႇလီဝၵ်ႉဢဝ်တိုဝ်ႉတၢင်းလွင်ႈငမ်းယဵၼ်သေ မႄႇၶႂၢၵ်ႈၼႃႈလိၼ် ၸိူင်ႉၼႆ။ ပေႃးႁဵတ်းၼႆ ၸၢင်ႈပဵၼ်ပၢင်တိုၵ်းၵၼ်ၵႂႃႇထႅင်ႈ၊ မိူဝ်ႈလဵဝ်ၵေႃႈ တိုၵ်ႉၶဵင်ႈၶႅင်ၵၼ်ဝႆႉယူႇ- ဝႃႈၼႆ။

ၾၢႆႇၼိုင်ႈတၢင်းၼိုင်ႈ၊ မိူဝ်ႈဝၼ်းတီႈ 19/12/2014 သိုၵ်းမၢၼ်ႈ ၸုမ်းဢၼ်ၵႂႃႇတူင်ႉၼိုင်ပွတ်းၼႆႉၼင်ႇၵဝ်ႇ၊ ၵႂႃႇလၢတ်ႈတီႈၵူၼ်းဝၢၼ်ႈၼွင်လိူဝ်ႇ ႁႂ်ႈၶိုၼ်ႈမႃးဝဵင်းမိူင်းပၼ်ႇ။ ႁႂ်ႈမႃးလၢတ်ႈတီႈ လုမ်းၵပ်းသၢၼ် RCSS/SSA တီႈဝဵင်းမိူင်းပၼ်ႇဝႃႈ- တုၵ်းယွၼ်းႁႂ်ႈသိုၵ်းတႆး ထွၼ်ဢွၵ်ႇၾၢႆႇၸၢၼ်းဝဵင်းမိူင်းပၼ်ႇတင်းသဵင်ႈ။ လွင်ႈၼႆႉ ၵူၼ်းဝၢၼ်ႈၵေႃႈဢမ်ႇလိူဝ်လႆႈသေ လႆႈမႃးလၢတ်ႈ- ၵူၼ်းၸမ်ၸႂ် ၽူႈၼင်ႈလုမ်းမိူင်းပၼ်ႇ လၢတ်ႈ။

တပ်ႉသိုၵ်းၸိုင်ႈတႆး RCSS/SSA ၼႆႉ ၵေႃႇသၢင်ႈလွင်ႈငမ်းယဵၼ်ၵၼ်ဝႆႉ တင်းလူင်ပွင်ၸိုင်ႈမၢၼ်ႈ/ တပ်ႉသိုၵ်းမၢၼ်ႈသေတႃႉ ႁၢၼ်ႉတေႃႇမိူဝ်ႈလဵဝ် ပႆႇပဵၼ်မႃးလွင်ႈငမ်းယဵၼ်ဢၼ်ၸိုၼ်ႈၸၢင်ႇ၊ ယင်းတိုၵ်ႉမီးလွင်ႈၶဵင်ႈၶႅင်တေႃႇၼႃႈၵၼ်ၽွင်ႈယူႇ။ မိူဝ်ႈလဵဝ် ၼႂ်းၸႄႈတွၼ်ႈလၢင်းၶိူဝ်း မိူင်းပၼ်ႇၸိူဝ်းၼႆႉ မီးသိုၵ်းမၢၼ်ႈလၢႆတပ်ႉၵွင်တူင်ႉၼိုင်ဝႆႉ  ႁႅင်းသိုၵ်းဢမ်ႇယွမ်း 500 ၊ ႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်းၵၼ်ယူႇ။

တင်ႈတႄႇဝၼ်းတီႈ 14 မႃးၼႆႉ သိုၵ်းမၢၼ်ႈတင်းသိုၵ်းတႆး ပဵၼ်ပၢင်တိုၵ်းၵၼ်လၢႆၵမ်း။ ၶၢဝ်ႇဢမ်ႇယိုၼ်ယၼ် လၢတ်ႈဝႃႈ ၾၢႆႇသိုၵ်းမၢၼ်ႈလူႉတၢႆ 6 ၵေႃႉ၊ ၼႂ်းၼၼ်ႉ ပႃးၽူႈၵွၼ်းငႃးသိုၵ်း ၶႃပုတ်းၵေႃႉၼိုင်ႈ- ဝႃႈၼႆ။