ပီႈၼွင်ႉၵူၼ်းမိူင်းၵိုင် ၸတ်းႁဵတ်းပၢင်ၵုမ် တႅပ်းတတ်း သၢၼ်ၶတ်းလွင်ႈ ၶွမ်ႊပၼီႊၶဝ်မႃးၶုတ်းထၢၼ်ႇႁိၼ် ၼႂ်းပိုၼ်ႉတီႈ။ တုၵ်းယွၼ်းႁႂ်ႈ RCSS ၶိုၼ်းထတ်းသၢင် လွင်ႈဢၼုၺၢတ်ႈပၼ် ၶွမ်ႊပၼီႊၶဝ် မႃးၶုတ်းထၢၼ်ႇႁိၼ်။

ဝၼ်းတီႈ 22/12/2014 (မိူဝ်ႈဝႃး) ၵူၼ်းဝၢၼ်ႈၵူၼ်းမိူင်း တီႈမိူင်းၵိုင် ၸတ်းႁဵတ်းပၢင်ၵုမ်။ ဢုပ်ႇဢူဝ်းတႅပ်းတတ်း ဢမ်ႇႁပ်ႉၵၢၼ်ၶုတ်းထၢၼ်ႇႁိၼ် ၼႂ်းၸႄႈဝဵင်းမိူင်းၵိုင်။ ဢၼ်ၶွမ်ႊပၼီႊၶဝ်လၢတ်ႈဝႃႈ တေႁဵတ်းပၼ်လွင်ႈပူၵ်းပွင်ၼၼ်ႉၵေႃႈ ၵၢၼ်ၶုတ်းထၢၼ်ႇႁိၼ်ၼႆႉ လႆႈၽွၼ်းၸႃႉၼမ်လိူဝ်ၽွၼ်းလီ။ ၽွၼ်းၸႃႉၼၼ်ႉ တေလႆႈၺႃးၵႂႃႇမိူဝ်းၼႃႈၶၢဝ်းယၢဝ်းၵူၺ်းပႆႇပေႃး၊ တေႃႇထိုင်ၸူဝ်ႈလုၵ်ႈပၢၼ်လၢၼ် လိၼ် လွၼ်။ တေယႃႉလူႉလႅဝ် သၽႃႇဝ/ၾိင်ႈတိုၼ်းပဵၼ်၊ ႁူဝ်ၼမ်ႉ ၼမ်ႉႁွင်ႈ ပႃႇမႆႉ ဢၼ်လႆႈႁၵ်ႉသႃပႂ်ႉပႃးမႃးႁူဝ်ပၢၵ်ႇပီ။ တီႈလိၼ်သူၼ် ႁႆႈ ၼႃးၵေႃႈတေလူႉလႅဝ်၊ တေတုမ်ႉတိူဝ်ႉပႃး ၾိင်ႈထုင်းႁိတ်ႈႁွႆးမိူင်းၵိုင်- ၼႆယဝ်ႉ။

ဢိင်ၼိူဝ်ၶွမ်ႊပၼီႊၶဝ် မႃးယွၼ်းလၢႆးမိုဝ်း တီႈၵူၼ်းမိူင်း၊ ႁႂ်ႈၵူၼ်းမိူင်းလူင်းလၢႆးမိုဝ်းပၼ် လွင်ႈထၢၼ်ႇႁိၼ်သေ ပူၼ်ႉမႃးမိူဝ်ႈဝၼ်းတီႈ 02/10/2013  ၵူၼ်းဝၢၼ်ႈ ၵုင်းၵၢင်၊ လွႆသဵဝ်ႈ၊ ၼွင်ယၢင်း၊ ၵုၼ်လူမ်း တင်းမူတ်းမီး 15 ၵေႃႉ လႆႈလူင်းလၢႆးမိုဝ်းပၼ်ၵႂႃႇ။ မိူဝ်ႈလူင်းလၢႆးမိုဝ်းၸိူဝ်းၼၼ်ႉ ထၢမ်ၸိုဝ်ႈ၊ ၸိုဝ်ႈပေႃႈမႄႈ၊ တီႈယူႇဝၢၼ်ႈၸိူဝ်းၼႆႉသေ လူင်းလၢႆးမိုဝ်းယဝ်ႉ ပၼ်ငိုၼ်းၸၢႆႇၵေႃႉမိုၼ်ႇမိုၼ်ႇ- ၼႆယဝ်ႉ။

ဢၼ်တေမႃးၶုတ်းထၢၼ်ႇႁိၼ်ၼၼ်ႉ ပဵၼ်ၶွမ်ႊပၼီႊပျေႉဢွင်ႇငဵင်း လႄႈ ႁဵင်းမဵတ်ႉတႃႇ၊ တေမႃးယွၼ်းၶုတ်း တီႈဝၢၼ်ႈၵၢတ်ႇ ၸႄႈဝဵင်းမိူင်းၵိုင်၊ ၼႂ်းၼႃႈလိၼ်တၢင်းၵႂၢင်ႈ 1,219 ဢေႊၵႃႊ။

ပၢင်ၵုမ်ၵူၼ်းမိူင်းၵိုင် ႁပ်ႉႁွင်း/မၵ်းမၼ်ႈဝႃႈ- ၶူင်းၵၢၼ်ၶုတ်းထၢၼ်ႇႁိၼ်ၼႆႉ ဢမ်ႇမၼ်ႈၵႅၼ်ႇတႃႇၵူၼ်းမိူင်း- 1.ၵူၼ်းလူင်းလၢႆးမိုဝ်းၼၼ်ႉ လႆႈငိုၼ်းၼိုင်ႈၵေႃႉၼိုင်ႈမိုၼ်ႇပျႃး။ 2.ဢမ်ႇၸႂ်ႈၵူၼ်း ၵေႃႉလႆႈထူပ်းၽွၼ်းၸႃႉၵမ်းသိုဝ်ႈ။ 3.ဢမ်ႇၸႂ်ႈ ၵူၼ်းၵေႃႉတၢင်တူဝ်လႆႈၵူၼ်းမိူင်းတင်းသဵင်ႈ၊ ပဵၼ်ၵူၼ်းဢမ်ႇႁူႉသင်ၵူၺ်း။ 4.မိူဝ်ႈလူင်းလၢႆးမိုဝ်းၼၼ်ႉ လၢတ်ႈဝႃႈတေလဵပ်ႈႁဵၼ်းတူၺ်းၵွၼ်ႇ၊ တေပႆႇယႃႉပႃႇထိူၼ်ႇ။ 5.မိူဝ်ႈလူင်းလၢႆးမိုဝ်းၼၼ်ႉ သၢင်ႇတေႃႇၵေႃႉလႂ်ၵေႃႈ ႁွင်ႉၵေႃႉၼၼ်ႉသႂ်ႇ။ 6.မိူဝ်ႈလူင်းလၢႆးမိုဝ်းၼၼ်ႉ ဢမ်ႇလႆႈသပ်းလႅင်း လွင်ႈၽွၼ်းလီၽွၼ်းၸႃႉ ၵၢၼ်ၶုတ်းထၢၼ်ႇႁိၼ်ဢွၼ်တၢင်း၊ ဢမ်ႇလႆႈဢုပ်ႇၵုမ်ၵၼ်သင်။

လွင်ႈၶုတ်းထၢၼ်ႇႁိၼ်ၼႆႉ ၽွၼ်းၸႃႉတေမီးၼမ်လိူဝ်သေၽွၼ်းလီတႄႉတႄႉ။ ၵူၼ်းဝၢၼ်ႈသိပ်းပၢႆ ၸိူဝ်းလူင်းလၢႆးမိုဝ်းပၼ်ၵႂႃႇၼၼ်ႉ မၼ်းပဵၼ်ၵူၼ်းဝၢၼ်ႈပလွင်ႈ ၸိူဝ်းယူႇႁိမ်းႁွမ်းၼၼ်ႉၵူၺ်း၊ ၶဝ်ဢမ်ႇႁူႉသင်သေ ထုၵ်ႇပိူၼ်ႈမႃးလွၵ်ႇၶဝ်လႄႈ ၶဝ်ၵေႃႈၵႃႈလႆႈလူင်းလၢႆးမိုဝ်းပၼ်။ လွင်ႈၼႆႉ ယူႇတီႈၶွင်ႊသီႊဢဝ်ၶိုၼ်းၸိုင်ႈတႆး (RCSS) သေ ႁႂ်ႈထတ်းသၢင်ပၼ်ၶိုၼ်းလီလီဢိတ်းၼိုင်ႈ- ဝႃႈၼႆ။

ဢွၼ်ၼႃႈၼႆႉ ယူႇတီႈၵူၼ်းဝၢၼ်ႈၵူၼ်းမိူင်း မိူင်းၵိုင် လႆႈႁဵတ်းလိၵ်ႈထိုင် RCSS ႁႂ်ႈၵႄႈလိတ်ႈပၼ် ပၼ်ႁႃလွင်ႈၼႆႉ။ ယူႇတီႈ RCSS ႁဵတ်းလိၵ်ႈ သႂ်ႇဝၼ်းတီႈ 01/12/2014 သူင်ႇလိၵ်ႈၸူးၶိုၼ်း တီႈပီႈၼွင်ႉၵူၼ်းမိူင်းၵိုင်ဝႃႈ- ထၢၼ်ႇႁိၼ် ဢၼ်ၶွမ်ႊပၼီႊၶဝ်တေၶုတ်းၼၼ်ႉ ၶဝ်လႆႈဢၼုၺၢတ်ႈ တီႈၵူၼ်းဝၢၼ်ႈသေ မႃးတၢင်ႇတီႈႁဝ်း၊ ႁဝ်းၵေႃႈဢၼုၺၢတ်ႈပၼ်ယဝ်ႉသေ ၶဝ်ၵေႃႈၵႂႃႇတၢင်ႇထႅင်ႈတီႈၼေႇပျီႇတေႃႇ။ တီႈၼေႇပျီႇတေႃႇ ၵေႃႈဢၼုၺၢတ်ႈပၼ်ၶဝ်ယဝ်ႉ။ ၵူၺ်းၵႃႈ ၽိူဝ်ႇၶဝ်တေတႄႇၶုတ်းယဝ်ႉ ၵူၼ်းဝၢၼ်ႈသမ်ႉၶိုၼ်းမႃးသၢၼ်ၶတ်းၸိူင်ႉၼႆတႄႉ မၼ်းတေဢမ်ႇၸႂ်ႈၵၢင်ၸႂ်ၵူၼ်းဝၢၼ်ႈတႄႉတႄႉ၊ မၼ်းၸၢင်ႈပဵၼ်ၵူၼ်းယူႇတၢင်းလင်ယိပ်းၵမ်ၸိူၵ်ႈသေ ႁႂ်ႈၵူၼ်းဝၢၼ်ႈလုၵ်ႉၽိုၼ်ႉ သၢၼ်ၶတ်း။ ၵွပ်ႈၼႆ လွင်ႈၼႆႉ ပေႃးဢမ်ႇၸႂ်ႈၵၢင်ၸႂ်တႄႉတႄႉသေ မႃးႁူၺ်းသူၼ်းၸိူင်ႉၼႆ တၢင်းၽိတ်းမၼ်းၼၵ်းၼႃ။ လိၵ်ႈၼႆႉ တူဝ်ၸဝ်ႈယွတ်ႈသိုၵ်း ၵေႃႉလူင်းလၢႆးမိုဝ်းသေ သူင်ႇထိုင်ၵူၼ်းဝၢၼ်ႈၶိုၼ်း- ၼႆယဝ်ႉ။

မိူဝ်ႈယွၼ်းဢၼုၺၢတ်ႈ ၶုတ်းထၢၼ်ႇႁိၼ်ၼၼ်ႉ  RCSS ဝႃႈ-ပေႃးဢမ်ႇယႃႉပႃႇထိူၼ်ႇ၊ ပေႃးဢမ်ႇပဵၼ်ၽွၼ်းၸႃႉ တႃႇၵူၼ်းမိူင်းတႄႉႁဵတ်းလႆႈယူႇ- ၼႆယဝ်ႉ။

ပၢင်ၵုမ်ဝၼ်းတီႈ 22/12/2014 ၵူၼ်းမိူင်းၵိုင် ယင်းတိုၵ်းသူၼ်းပႃးဝႃႈ- လွင်ႈႁၵ်ႉသႃပႂ်ႉပႃးၽႅၼ်ႇလိၼ်ႁဝ်းလႄႈ လွင်ႈပႂ်ႉပႃးသိင်ႇဝႅတ်ႉလွမ်ႉ/ သၽႃႇဝႁိမ်းႁွမ်းၼႆႉ ပဵၼ်ပုၼ်ႈၽွၼ်းႁဝ်းၵူႈၵေႃႉ။ ၵွပ်ႈၼၼ် ႁဝ်းလႆႈတႅပ်းတတ်းသၢၼ်ၶတ်း လွင်ႈၶုတ်းထၢၼ်ႇႁိၼ်- ၼႆယဝ်ႉ။