ယွၼ်ႉမီးၵၢၼ်လၵ်ႉၵႃႉၶၢႆဝူဝ်း သူင်ႇၶဝ်ႈမိူင်းၶႄႇ ၼိုင်ႈဝၼ်းၼပ်ႉႁူဝ်ပၢၵ်ႇတူဝ် လတ်းၽၢၼ်ႇ ၼႂ်းၼႃႈလိၼ်ထုင်ႉလွႆႁူဝ်သိူဝ်  ၸႄႈဝဵင်းမၢၼ်ႈၸႄႈ ၸႄႈမိူင်းၶၢင်၊ ႁဵတ်းႁႂ်ႈသဵၼ်ႈတၢင်းလူႉၵွႆ။

တင်ႈတႄႇၼႂ်းၵၢင်ပီ 2014 မႃးၼႆႉ မီးၵၢၼ်လၵ်ႉလွမ်ၵႃႉၶၢႆဝူဝ်း သူင်ႇၶဝ်ႈမိူင်းၶႄႇ လတ်းၽၢၼ်ႇၼႂ်းၼႃႈလိၼ်ထုင်ႉလွႆႁူဝ်သိူဝ် ဢိူင်ႇဝၢၼ်ႈဝဵင်း ၸႄႈဝဵင်းမၢၼ်ႈၸႄႈ ၸႄႈမိူင်းၶၢင် လႅၼ်လိၼ် တႆး - ၶၢင် တိူဝ်းၼမ်မႃး- ၵူၼ်းၼႂ်းထုင်ႉလွႆႁူဝ်သိူဝ်လၢတ်ႈ။

ယွၼ်ႉပိူဝ်ႈၾုင်ဝူဝ်းလတ်းၵူႈဝၼ်းလႄႈ ၵူၼ်းဝၢၼ်ႈထုင်ႉၼၼ်ႉ ၶၢင်းပွင်ႉဝႃႈ သဵၼ်ႈတၢင်းၼႂ်းဝၢၼ်ႈၵေႃႈၵွႆ။
ၵူၼ်းၵႃႉဝူဝ်းၸိူဝ်းၼႆႉ ဢဝ်ဝူဝ်းတၢင်းပွတ်းၸႄႈၵႅင်း လႄႈ မိူင်းမၢၼ်ႈပွတ်းၵၢင် မႃးၶၢႆ ၼိုင်ႈဝၼ်းဢမ်ႇ ယွမ်း  400 – 500 တူဝ်။ ၸဝ်ႈၼႃႈတီႈလူင်ပွင်ၸိုင်ႈ ဢမ်ႇဢဝ်လိူင်ႈလႆႈထိုင်တီႈ- ဝႃႈၼႆ။

ပေႃႈလဵင်ႉၵႃႉဝူဝ်း လႆႈသႂ်ႇၶွၼ်ႇတီႈၸုမ်းယိပ်းၵွင်ႈၵၢင်ႇၼႂ်းထုင်ႉၼၼ်ႉ ဝူဝ်းၼိုင်ႈတူဝ် 70,000 ပျႃး။
လုၵ်ႉဢဝ်မၢၼ်ႈဝဵင်းသေ တႃႇသူင်ႇၶဝ်ႈမိူင်းၶႄႇၼၼ်ႉ လႆႈပၼ်ၵူၼ်းၵိၼ်ၸၢင်ႈႁေႃႈဝူဝ်း ၼိုင်ႈၶွၵ်ႈ 1 မိုၼ်ႇ ထိုင်မိုၼ်ႇႁႃႈႁဵင်ပျႃး တႃႇၼႂ်းၶၢဝ်းတၢင်း  2 လၵ်းပၢႆ၊ ၾုင်ဝူဝ်းၸိူဝ်းၼႆႉ ဢဝ်ၶၢမ်ႈတႃႈႁိူဝ်း တီႈဝၢၼ်ႈပၢင်ႇၶမ်းထိုင်ဝၢၼ်ႈၶမ်းပၼ်း ဢိူင်ႇၼွင်တဝ်း  မိူင်းၶႄႇ- ၼႆယဝ်ႉ။