သိုၵ်းတႆးတင်းသိုၵ်းမၢၼ်ႈ ပဵၼ်ပၢင်တိုၵ်း ၵၼ်ထႅင်ႈႁိမ်းပၢင်ႇၸေႈ
တပ်ႉသိုၵ်းၸိုင်ႈတႆး တင်း သိုၵ်းမၢၼ်ႈ သိုပ်ႇပဵၼ်ပၢင်တိုၵ်းၵၼ်ထႅင်ႈ
တီႈႁိမ်းဝၢၼ်ႈပၢင်ႇၸေႈ၊ ပွတ်းသဵၼ်ႈတၢင်း ဢၼ်သိုၵ်းမၢၼ်ႈၸႂ်ႉသိုၵ်းတႆး
ထွႆထွၼ်ဢွၵ်ႇ ယၢၼ်သဵၼ်ႈတၢင်း 3 လၵ်း၊ သိုၵ်းတႆး ဢမ်ႇယွမ်းထွၼ်
သိုပ်ႇပဵၼ်ပၢင်တိုၵ်း။
ၵူၼ်းဝၢၼ်ႈပၢႆႈၽေးသိုၵ်းတီႈၼိုင်ႈ ၼႂ်းၸိုင်ႈတႆး (Photo: Facebook) |
ဝၼ်းတီႈ 15/10/2014 တပ်ႉသိုၵ်းၸိုင်ႈတႆး
တင်း သိုၵ်းမၢၼ်ႈ (SSPP/SSA) ပဵၼ်ပၢင်တိုၵ်းၵၼ်ထႅင်ႈတီႈႁိမ်း
ဝၢၼ်ႈပၢင်ႇၸေႈ ၼႂ်းဢိူင်ႇဝၢၼ်ႈဝၢပ်ႈ ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။
လွင်ႈၼႆႉ သိုၵ်းမၢၼ်ႈမႃး ၽႃႇၺႃးမၢၵ်ႇ ဢၼ်သိုၵ်းတႆးႁၢင်ႈၵၢင်ဝႆႉသေ
လႆႈပဵၼ်ပၢင်တိုၵ်းၵၼ်၊ လွင်ႈလူႉသုမ်းတၢႆဝၢတ်ႇ တင်းသွင်ၾၢႆႇ ပႆႇလႆႈႁူႉ။
ပူၼ်ႉမႃးမိူဝ်ႈဝၼ်းတီႈ 13/10/2014
ၽူႈၵွၼ်းတိူင်းသိုၵ်း ဝၼ်းဢွၵ်ႇၵၢင် ယလၶ (ၶူဝ်လမ်) ၸွမ်ႁၢၼ် ၵူဝ်ႇၵူဝ်ႇၼၢႆႇ
လၢတ်ႈတီႈ ၽူႈၼင်ႈလုမ်း တပ်ႉသိုၵ်းၸိုင်ႈတႆး (SSPP/SSA) တီႈၶူဝ်လမ် ဝႃႈ
ႁႂ်ႈတပ်ႉသိုၵ်းၸိုင်ႈတႆး ပၵ်းယူႇႁၢင်ႇပၼ်သဵၼ်ႈတၢင်း
ပၢင်ႇၸေႈ-လွႆယွႆး-ၶူဝ်လွင်း ၼိုင်ႈၾၢႆႇ 3 လၵ်း- ၼႆယဝ်ႉ။
သဵၼ်ႈတၢင်းၼႆႉ ပဵၼ်သဵၼ်ႈတၢင်း
ဢၼ်သိုၵ်းမၢၼ်ႈၵႂႃႇမႃး သူင်ႇၶဝ်ႈၼမ်ႉတၢင်းၵိၼ် သဵၼ်ႈတၢင်းၼိုင်ႈ၊
ႁၢင်ႇယၢၼ်ဝၢၼ်ႈႁႆး ငဝ်ႈငုၼ်း SSPP/SSA မွၵ်ႈ 5-6 လၵ်းၵူၺ်း။ ၼွၵ်ႈသေၼၼ်ႉ
ပဵၼ်သဵၼ်ႈတၢင်းဢၼ် SSPP/SSA ႁဵတ်းသၢင်ႈမႃး မိူဝ်ႈပီ 1995 ၊
ၾၢႆႇသိုၵ်းမၢၼ်ႈမႃး ပၵ်းယူႇမိူဝ်ႈပီ 2005 ၵူၺ်း- ၼႆယဝ်ႉ။
ဢွၼ်ၼႃႈၼႆႉ ဝၼ်းတီႈ 09/10/2014 ၵေႃႈ
ၽွင်းလူင်ၾၢႆႇႁူမ်ႇလူမ်ႈလႄႈလႅၼ်လိၼ် လူင်ပွင်ၸိုင်ႈမိူင်းတႆး
ၸဝ်ႈသိုၵ်းလူင်ဢွင်ႇတူႇ တၢင်တူဝ်ၸွမ်ၽွင်းလူင်မိူင်းတႆး၊ လူင်းလၢႆးမိုဝ်းသေ
တႅမ်ႈလိၵ်ႈထိုင် ၽူႈၼင်ႈလုမ်း တပ်ႉသိုၵ်းၸိုင်ႈတႆး (SSPP/SSA)
ဝဵင်းလူင်တူၼ်ႈတီး၊ ႁႂ်ႈ တပ်ႉသိုၵ်းၸိုင်ႈတႆး ထွၼ်ဢွၵ်ႇတပ်ႉပၢင်သဝ်း လႄႈ
ႁႅင်းသိုၵ်းဢၼ်တူင်ႉၼိုင် ၼႂ်းပိုၼ်ႉတီႈ တွၼ်ႈၾၢႆႇဢွၵ်ႇပၢင်
ၼႂ်းၵုၼ်ပၢင်ၵုၼ်ၶူင်း။ တၢင်းပွတ်း ဢိူင်ႇမိူင်းၵၢဝ် ၸႄႈဝဵင်းတၢင်ႉယၢၼ်း
ၸိုင်ႈတႆးပွတ်းႁွင်ႇ၊ ပွတ်းတွၼ်ႈထုင်ႉလွႆလၢင်း ၼမ်ႉသီႇၸဵင်ႇၸိူဝ်းၼႆႉ
တေဢမ်ႇလႆႈတူင်ႉၼိုင်၊ ႁႂ်ႈထွၼ်ဢွၵ်ႇၵႂႃႇယူႇ ၾၢႆႇတူၵ်းပၢင်သဵင်ႈသဵင်ႈ-
ဝႃႈၼႆ။
ၵုၼ်ပၢင်ၵုၼ်ၶူင်းၼႆႉ ပဵၼ်တွၼ်ႈၾၢႆႇတူၵ်းၶူင်း၊ တေႃႇၼႃႈ-ၼႃႈလိၼ်ဝႃႉ (UWSA) ၵုမ်းၵမ် ၾၢႆႇဢွၵ်ႇၶူင်း။
Tags: Military, News