သိုၵ်းမၢၼ်ႈ တပ်ႉၶလယ 151 ဢၼ်ပၵ်းတီႈႁွင်ႈလိုၵ်ႉ ၸႄႈဝဵင်းၵုၼ်ႁဵင် လွၵ်ႇငိုတ်ႈၵူၼ်းဝၢၼ်ႈဝႃႈ ဝၢႆးလင် သိပ်းမူင်း ၵၢင်ၶိုၼ်း၊ ၽႂ်တၵ်းဢမ်ႇလႆႈတႆႈၾႆးၵႂႃႇမႃး၊ ပေႃးႁၼ်တေယိုဝ်း။

သဵၼ်ႈတၢင်း လုၵ်ႉၵႃလိၵႂႃႇမိူင်းၸၢင်

ပူၼ်ႉမႃးမိူဝ်ႈဝၼ်းတီႈ 28/10/2014  သိုၵ်းမၢၼ်ႈတပ်ႉၶလယ 151 ၊ ၽူႈၵွၼ်းတပ်ႉၽႄ ၶုၼ်သိုၵ်းတဵင်းၸဵင်ႇ ဢၼ်ပၵ်းတီႈဝတ်ႉ/ ၵျွင်းမုၼ်ၸဝ်ႈ ဝၢၼ်ႈႁွင်ႈလိုၵ်ႉ ၼႂ်းၵိင်ႇၸႄႈဝဵင်းၵႃလိ ၸႄႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း၊ ႁွင်ႉဢဝ်ၵူၼ်းဝၢၼ်ႈႁွင်ႉလိုၵ်ႉသေ ၸီႉသင်ႇဝႃႈ - ၵၢင်ၶိုၼ်း ဝၢႆးလင် 10 မူင်းၵႂႃႇယဝ်ႉ ၽႂ်တၵ်းတေဢမ်ႇလႆႈတႆႈၾႆး ၵႂႃႇမႃး၊ ပေႃးဝႃႈတႆးၾႆးၵႂႃႇမႃးလႄႈ ထုၵ်ႇယိုဝ်း တေဢမ်ႇဢဝ်ပုၼ်ႈၽွၼ်း- ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈၼႂ်းပိုၼ်ႉတီႈ ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ- ၶိင်းမၢၼ်ႈၵေႃႉၼႆႉ မႃးတူၵ်းပုၼ်ႈ ၽွၼ်းတီႈၼႆႈ ပႆႇပေႃးႁိုင်၊ မိူဝ်ႈၵၢင်လိူၼ်ၼၼ်ႉၵေႃႈ ယိုဝ်းၵွင်ႈ 14-15 လုၵ်ႈ၊ ႁဵတ်းႁႂ်ႈၵူၼ်းဝၢၼ်ႈတူၵ်းၸႂ်လႂ်တိုၼ်ႇ။ မိူဝ်ႈဝူင်ႈပူၼ်ႉၵေႃႈ ၸီႉသင်ႇၵူၼ်းဝၢၼ်ႈဝႃႈ ပေႃးဝႃႈသိပ်းမူင်းၵၢင်ၶိုၼ်း ၽႂ်တေဢမ်ႇလႆႈၵႂႃႇတႂ်ႈမိူဝ်းၼိူဝ်၊ မိူဝ်ႈသိုၼ်း ၼႆႉသမ်ႉ မႃးလၢတ်ႈထႅင်ႈဝႃႈ ၽႂ်တေဢမ်ႇလႆႈတႆႈၾႆး။ ႁဝ်းၶႃႈၵူၼ်းဝၢၼ်ႈၵူၼ်းသူၼ်ၼႆႉ ပဵၼ်ၵူၼ်းႁဵတ်းၵိၼ်ႁႆႈ ၵိၼ်သူၼ်၊ ပေႃးဝႃႈ သူၼ် ႁႆႈ ၼႃးႁဝ်းၵႆ မၼ်းလႆႈပွၵ်ႈႁိူၼ်းလိုၵ်း၊ လႆႈႁုင်မိုဝ်ႉၵႅင်ၵိၼ်လိုၵ်း၊ မၢင်ပွၵ်ႈ မီးလွင်ႈယူႇ ဢမ်ႇလီ၊ မီးလွင်ႈၵိၼ်လူႇလူႉတၢႆၸိူဝ်းၼႆႉ တေႁဵတ်းႁိုဝ်ၵႂႃႇမႃးႁႃၵၼ်၊ လွင်ႈၼႆႉ ႁဵတ်းႁႂ်ႈၵူၼ်းဝၢၼ်ႈယူႇယၢပ်ႇ ၵိၼ်ယၢပ်ႇ။

သိုၵ်းမၢၼ်ႈတပ်ႉၶလယ 151 မႃးပၵ်းတီႈဝတ်ႉ/ ၵျွင်းမုၼ်ၸဝ်ႈ ဝၢၼ်ႈႁွင်ႈလိုၵ်ႉၼႆႉ မိူဝ်ႈလဵဝ် မီးႁိမ်း 2 ပီ၊ ပူၼ်ႉမႃး မိူဝ်ႈပီၵၢႆၼၼ်ႉ ဢိင်ၼိူဝ်ၵူၼ်းဝၢၼ်ႈ ၵႂႃႇတၢင်ႇလၢတ်ႈတီႈၼၢင်းဝႃႇၼု ၽွင်းတႅၼ်းသၽႃးၵူၼ်းမိူင်း (ၵုၼ်ႁဵင်)သေ ထွၼ်ဢွၵ်ႇၵႂႃႇ၊ ၵူၺ်းၵႃႈထွၼ်ဢွၵ်ႇၵႂႃႇ 5-6 ဝၼ်းၵူၺ်း မႃးယူႇၶိုၼ်း။

ၵူၼ်းဝၢၼ်ႈၵေႃႉၼိုင်ႈၵေႃႈ လၢတ်ႈထႅင်ႈဝႃႈ-  ၼႂ်းဝႃႇၼႂ်းၵမ်ဝၼ်းသိလ်ၸိူဝ်းၼႆႉၵေႃႈ ၶဝ်ယူႇႁဵတ်းၼႆယဝ်ႉ၊ တၢၵ်ႇသိူဝ်ႈ ၶူဝ်းသိုၵ်းၸွမ်းဝတ်ႉဝႃး၊ ပိုတ်ႇၽဵင်းၵႂၢမ်းမေႃးပၼ်း၊ မၼ်းဢမ်ႇၵိုင်ႇလႅပ်ႈၼႂ်းလိၼ်သႃသၼႃ၊ ၵွပ်ႈၼၼ် ၸိူဝ်းမီးပုၼ်ႈ ၽွၼ်းၶဝ် ၶႅၼ်းတေႃႈလၢတ်ႈပၼ်လွင်ႈၼႆႉၽွင်ႈ- ဝႃႈၼႆ။

ပွတ်းတွၼ်ႈၼႆႉ ၸမ်ၼႃႈလိၼ်ၸုမ်းပီႇတုၸိတ်ႉ ၵႃလိ (ဢၼ်လုၵ်ႉတီႈ တပ်ႉၸုမ်း 7 တပ်ႉသိုၵ်းၸိုင်ႈတႆး SSPP/SSA လႅၵ်ႈလၢႆႈပဵၼ်မႃး) ။ ဢမ်ႇၵွမ်ႉၵႃႈ ၵူၼ်းဝၢၼ်ႈၵူၼ်းမိူင်းၵူၺ်း၊ ပိူဝ်ႈတႃႇၸုမ်းပီႇတုၸိတ်ႉ ၵႃလိ တူင်ႉၼိုင်ၵႂႃႇမႃး ယၢမ်းၵၢင်ၶမ်ႈၵၢင်ၶိုၼ်းၵေႃႈ တေယၢပ်ႇ၊ ၸၢင်ႈတုမ်ႉလေႃႇၺႃးၵၼ်- ၼႆယူႇ။

ၾၢႆႇၼိုင်ႈတၢင်းၼိုင်ႈ တင်ႈတႄႇၵၢင်လိူၼ်ဢွၵ်ႊထူဝ်ႊၿိူဝ်ႊ (2014)မႃးၼႆႉ သိုၵ်းမၢၼ်ႈတပ်ႉၶမယ 524 တင်း ၶလယ 246  တူင်ႉၼိုင်ၵႂႃႇမႃးၸွမ်းၵေးၼမ်ႉပၢင်၊ မီးၶၢဝ်ႇဝႃႈ ၶဝ်တေႁဵတ်းသဵၼ်ႈတၢင်းမႂ်ႇ ၸွမ်းသၢပ်ႇၶၢင်ႈၵေးၼမ်ႉပၢင် ပိူဝ်ႈတႃႇၵႂႃႇပွင်ႇတၢင်း မိူင်းၸၢင် မိူင်းသူႈ တႃႈသၢမ်ပူး ၸိူဝ်းၼႆႉ- ၼႆယဝ်ႉ။