ၽွင်းတႅၼ်းသၽႃးၵူၼ်းမိူင်း (ၵုၼ်ႁဵင်) ၼၢင်းဝႃႇၼု တၢင်ႇလၢတ်ႈၼႂ်းသၽႃး ႁႂ်ႈလူတ်းယွမ်းငိုၼ်းၵႃႈၸႂ်ႉၸၢႆႇ ၾၢႆႇတပ်ႉသိုၵ်း၊ ဢဝ်မႃးၽိူမ်ႉထႅမ်သႂ်ႇတီႈ ႁူဝ်ၶေႃႈ လွင်ႈငမ်းယဵၼ်။

ၸုမ်းသိုဝ်ႇၶၢဝ်ႇ တွင်ႈထၢမ် ၼၢင်းဝႃႇၼု လွင်ႈတပ်ႉသိုၵ်းယၼ်ႇသိုၵ်း

ဢိင်ၼိူဝ်ႁွင်ႈၵၢၼ်လူင်ၾၢႆႇၵႅတ်ႇၶႄ (တပ်ႉသိုၵ်းမၢၼ်ႈ) တုၵ်းယွၼ်းငိုၼ်း ၵႃႈၸႂ်ႉၸၢႆႇ (Budget) ထႅင်ႈတႃႇ 100 လၢၼ်ႉသေ ဝၼ်းတီႈ 29/10/2014 (မိူဝ်ႈဝႃး) ၽွင်းတႅၼ်းသၽႃးၵူၼ်းမိူင်း (ၵုၼ်ႁဵင်) ၼၢင်းဝႃႇၼူႉ ၼမ်းဢဝ်လိူင်ႈၼႆႉ တၢင်ႇလၢတ်ႈတုၵ်းယွၼ်း ၼႂ်းသၽႃးမိူင်းႁူမ်ႈတုမ် ဢၼ်ၸတ်းတီႈၼေႇပျီႇတေႃႇ၊ ပိူဝ်ႈတႃႇ လူတ်းယွမ်းငိုၼ်းၵႃႈၸႂ်ႉၸၢႆႇ ၼႂ်းၵၢၼ်ယၼ်ႇသိုၵ်းသေ ဢဝ်ၽိူမ်ႉထႅမ်သႂ်ႇတီႈ ႁူဝ်ၶေႃႈလွင်ႈငမ်းယဵၼ်။

ၼၢင်းဝႃႇၼု လၢတ်ႈဝႃႈ- လွင်ႈၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်းလူင်ပွင်ၸိုင်ႈမၢၼ်ႈ ပေႃးၵေႃႇသၢင်ႈ လွင်ႈငမ်းယဵၼ်ၵၼ်ယဝ်ႉ။ ပေႃးတူၺ်းၼႂ်း လၵ်းၵၢၼ် 3 ပိူင်ၼၼ်ႉ (ဢယေးတူင်းပႃး)ၼၼ်ႉၵေႃႈ 1.ၸိုင်ႈမိူင်းႁူမ်ႈတုမ် ယႃႇႁႂ်ႈတႅၵ်ႇယၢႆႈ။ 2.လွင်ႈၽွမ်ႉႁူမ်ႈၸၢဝ်းၶိူဝ်း ယႃႇႁႂ်ႈတႅၵ်ႇယၢႆႈ။ 3. ဢႃႇၼႃႇၸိၵ်းၸွမ် ၸိုင်ႈမိူင်း ႁႂ်ႈမၼ်ႈၵိုမ်း) ၸိူဝ်းၼႆႉ။ ဢၼ်တေဢဝ်ငိုၼ်း 100 လၢၼ်ႉ ပဵၼ်ၵႃႈၸႂ်ႉၸၢႆႇၼႂ်း ၵၢၼ်ယၼ်ႇသိုၵ်းၼႆႉ မၼ်းတေတုမ်ႉတိူဝ်ႉလွင်ႈၽွမ်ႉႁူမ်ႈၸၢဝ်းၶိူဝ်း၊ ပေႃးဝႃႈ ၸၢဝ်းၶိူဝ်းဢမ်ႇၽွမ်ႉႁူမ်ႈၵၼ်ၵေႃႈ မၼ်းတုမ်ႉတိူဝ်ႉ ဢႃႇၼႃႇၸိၵ်းၸွမ်ဝၢၼ်ႈမိူင်း၊ ဢႃႇၼႃႇၸိၵ်းၸွမ်ဝၢၼ်ႈမိူင်းၵေႃႈ တေဢမ်ႇမၼ်ႈၵိုမ်း။ ၵွပ်ႈၼၼ် ငိုၼ်း 100 လၢၼ်ႉၼႆႉ ႁႂ်ႈဢဝ်ၵႂႃႇၸႂ်ႉ ၼႂ်းၵၢၼ်ပူၵ်းပွင်ၵၢၼ်ငမ်းယဵၼ်၊ ဢမ်ႇထုၵ်ႇလီၸႂ်ႉၼႂ်းၵၢၼ်ယၼ်ႇသိုၵ်း- ဝႃႈၼႆ။

ၵဵဝ်ႇၵပ်းလွင်ႈၼႆႉ ၼၢင်းဝႃႇၼု လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ငိုၼ်းတွင်းၼႆႉ ထုၵ်ႇလီၸႂ်ႉၼႂ်းၵၢၼ် ၵေႃႇသၢင်ႈလွင်ႈငမ်းယဵၼ်၊ ပေႃးမီးငိုၼ်းၸႂ်ႉၸၢႆႇ တႃႇသၢင်ႈလွင်ႈငမ်းယဵၼ်ၵွၼ်ႇ လွင်ႈငမ်းယဵၼ်ၼႆႉ ၸုမ်းၸၢဝ်းၶိူဝ်းႁဝ်းၶဝ် ထုၵ်ႇလီၸွႆႈလူင်ပွင်ၸိုင်ႈၸိူင်ႉႁိုဝ်၊ ၸွႆႈတပ်ႉသိုၵ်းၸိူင်ႉႁိုဝ်ၼၼ်ႉ ၾၢႆႇၸၢဝ်းၶိူဝ်း တေဝူၼ်ႉသေ ၸၢင်ႈၸွႆႈမႃး။ လွင်ႈဢၼ်တပ်ႉသိုၵ်း ယွၼ်းမႃးငိုၼ်းၵႃႈၸႂ်ႉၸၢႆႇၼမ်လူင်လၢင်ၸိူင်ႉၼႆၼႆႉ ႁဝ်းၶႃႈၵေႃႈၸႂ်လဵၵ်ႉၸႂ်ၼွႆႉ၊ ငိုၼ်းၼႆႉ ႁႂ်ႈလႆႈၽႄမႅင်ႇၾၢႆႇ ႁူဝ်ၶေႃႈၵေႃႇသၢင်ႈလွင်ႈငမ်းယဵၼ်- ဝႃႈၼႆ။

ၼွၵ်ႈသေၼၼ်ႉ ၼၢင်းဝႃႇၼု ယင်းလၢတ်ႈထႅင်ႈဝႃႈ- ငိုၼ်းၵႃႈၸႂ်ႉၸၢႆႇတႃႇတပ်ႉသိုၵ်းၵႃႈပူၼ်ႉမႃး ၼႂ်းၶၢဝ်းတၢင်း ၸဵတ်းလိူၼ်ၼၼ်ႉ 4 ပုၼ်ႈ တိုၵ်ႉၸႂ်ႉၸၢႆႇၵႂႃႇ 1 ပုၼ်ႈၵူၺ်း၊ ယင်းတိုၵ်ႉၵိုတ်းယူႇ 3 ပုၼ်ႈ။ ၵမ်းၼႆႉသမ်ႉ မႃးယွၼ်းထႅင်ႈ 100 လၢၼ်ႉၼႆႉ ယူႇတီႈၽွင်းတႅၼ်းၵေႃႉၼိုင်ႈသေ လၢမ်းလႆႈဝႃႈ ၾၢႆႇတပ်ႉသိုၵ်းမၢၼ်ႈ တိုၼ်းတေႁၢင်ႈ/ယၼ်ႇသိုၵ်း တေႃႇၸုမ်းယိပ်းၵွင်ႈၵၢင်ႇၸၢဝ်းၶိူဝ်းႁၢဝ်ႈႁႅင်း- ဝႃႈၼႆ။