ဝၢၼ်ႈႁႆး ၵႂႃႇၼေႇပျီႇတေႃႇ ဢုပ်ႇလွင်ႈ ငမ်းယဵၼ် ဢၼ်မၢၼ်ႈၼႄႉၼမ်းဝႆႉ



ပႃႇတီႇမႂ်ႇသုင်ၸိုင်ႈတႆး (SSPP/SSA) ၸဝ်ႈၶုၼ်သႅင် ဢွၼ်ႁူဝ် ၵႂႃႇၼေႇပျီႇတေႃႇ၊ ဢုပ်ႇဢူဝ်း လွင်ႈၶွတ်ႇၽွတ်ႈ ၶွမ်ႊမတီႊပူၵ်းပွင်ပိုၼ်ႉတီႈ ႁုၼ်ႈမုၼ်းၵတ်းယဵၼ် ၼိမ်သဝ်း ပိူဝ်ႈတႃႇလူတ်းယွမ်း ပၢင်တိုၵ်း။


ၸုမ်းၶိုင်ပွင်လွင်ႈငမ်းယဵၼ် (UPWC) တင်း တပ်ႉသိုၵ်းၸိုင်ႈတႆး (SSPP/SSA) ႁူပ်ႉဢုပ်ႇၵၼ် တီႈလႃႈသဵဝ်ႈ
ဝၼ်းတီႈ 29/10/2014 (မိူဝ်ႈၼႆႉ) ပႃႇတီႇမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၽူႈၼမ်းၼႂ်းၵူႈလွင်ႈလွင်ႈ ၸဝ်ႈၶုၼ်သႅင် ဢွၼ်ႁူဝ်ၼမ်းၼႃႈ ၽူႈယႂ်ႇၵူၼ်းလူင် 6-7 ၵေႃႉ လုၵ်ႉတီႈဝဵင်း လႃႈသဵဝ်ႈ ဢွၵ်ႇၶၢဝ်းတၢင်း ၵႂႃႇဝဵင်းလူင် ၼေႇပျီႇတေႃႇ၊ ပိူဝ်ႈဢုပ်ႇဢူဝ်း ၸွမ်းၼင်ႇဢူးတဵင်းၸေႃႇ ၵႅမ်ႁူဝ်ပဝ်ႈ 2 ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) တၢင်ႇယိုၼ်ႈၼႄႉၼမ်း ဝႆႉ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 18/10/2014 ၵႅမ်ႁူဝ်ပဝ်ႈ 2 (UPWC) ဢူးတဵင်းၸေႃႇ ဢွၼ်ႁူဝ် ႁပ်ႉႁူပ်ႉထူပ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA တီႈဝဵင်းလႃႈသဵဝ်ႈ။ တီႈပၢင်ႁူပ်ႉထူပ်းၼၼ်ႉ ၾၢႆႇမၢၼ်ႈမီး ဢူးတဵင်းၸေႃႇဢွၼ်ႁူဝ်၊ မီးၽူႈၵွၼ်းတိူင်းၸဵင်ႇႁွင်ႇဝၼ်းဢွၵ်ႇ ယမၶ (လႃႈသဵဝ်ႈ) ၸွမ်ႁၢၼ်ဢွင်ႇၸူဝ်း၊ ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင် ယလၶ (ၶူဝ်လမ်) ၸွမ်ႁၢၼ်ၵူဝ်ႇၵူဝ်ႇၼၢႆႇ၊ ၸွမ်ၽွင်းလူင်ၸိုင်ႈတႆး ၸဝ်ႈဢွင်ႇမျၢတ်ႈ ဢိၵ်ႇလၢႆလၢႆၵေႃႉ၊ ပႃးၸဵမ်ၽွင်းလူင် ၾၢႆႇႁူမ်ႇလူမ်ႈလႄႈလႅၼ်လိၼ် ၸဝ်ႈသိုၵ်းလူင်ဢွင်ႇတူႇ၊ ၾၢႆႇတပ်ႉသိုၵ်းၸိုင်ႈတႆး (SSPP/SSA) ၽူႈၼမ်းၼႂ်းၵူႈလွင်ႈလွင်ႈ ၸဝ်ႈၶုၼ်သႅင် ဢွၼ်ႁူဝ်။

တီႈပၢင်ဢုပ်ႇဢူဝ်းၼၼ်ႉ ၾၢႆႇဢူးတဵင်းၸေႃႇ တၢင်ႇလၢတ်ႈဝႃႈ- ပိူဝ်ႈတႃႇၵႄႈလိတ်ႈပၼ်ႁႃ ပၢင်တိုၵ်းလႆႈၼၼ်ႉ သွင်ၾၢႆႇလီႁူမ်ႈၵၼ်ၶွတ်ႇၽွတ်ႈၶွမ်ႊမတီႊပူၵ်းပွင်ပိုၼ်ႉတီႈ ႁုၼ်ႈမုၼ်းၵတ်းယဵၼ်ၼိမ်သဝ်း- ဝႃႈၼႆ။ ၵပ်းၵၢႆႇလွင်ႈၼႆႉ ၾၢႆႇမၢၼ်ႈႁၼ်ထိုင်ဝႃႈ တေၸၢင်ႈလူတ်းလႆႈပၢင်တိုၵ်း။ ၼွၵ်ႈသေၼၼ်ႉ ၾၢႆႇဢူးတဵင်းၸေႃႇ ယင်းထၢမ်ဝႃႈ တေၶႂ်ႈပၵ်းလုမ်းတီႈလႂ်ထႅင်ႈ- ၸိူဝ်းၼႆႉ။

ၶၢဝ်းတၢင်း (SSPP/SSA) ၵႂႃႇၼေႇပျီႇတေႃႇပွၵ်ႈၼႆႉ ဝၼ်းတီႈ 28/10/2014 လုၵ်ႉဝၢၼ်ႈႁႆး ၵႂႃႇလိုဝ်ႈယင်ႉ ၼွၼ်းတီႈ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ဝၼ်းတီႈ 29 မိူဝ်ႈၼႆႉၵေႃႈ လုၵ်ႉတီႈလႃႈသဵဝ်ႈ သိုပ်ႇၵႂႃႇ ၼေႇပျီႇတေႃႇ။

တပ်ႉသိုၵ်းၸိုင်ႈတႆး (SSPP/SSA)ၼႆႉ တူၵ်းလူင်းၵိုတ်းယိုဝ်း ၵေႃႇသၢင်ႈလွင်ႈငမ်းယဵၼ်ၵၼ်ဝႆႉ တင်း လူင်ပွင်ၸိုင်ႈမၢၼ်ႈ ၸၼ်ႉၸိုင်ႈမိူင်းႁူမ်ႈတုမ် မိူဝ်ႈဝၼ်းတီႈ 28/01/2012  ။ မိူဝ်ႈလဵဝ် လႆႈမႃးၸမ်ထိုင် 3 ပီယဝ်ႉ။ ၵူၺ်းၵႃႈ ၵိုတ်းယိုဝ်း ၵေႃႇသၢင်ႈလွင်ႈငမ်းယဵၼ်ၵၼ်မႃးယဝ်ႉၵေႃႈ သိုပ်ႇပဵၼ်ပၢင်တိုၵ်းၵၼ်မႃး ၼပ်ႉႁူဝ်ပၢၵ်ႇပွၵ်ႈ။




 
© 2012 All Rights Reserved | Asean Celebrity | Fonts @ AtFonts | Free Templates