ဝၼ်းတီႈ 30/09/2014 (မိူဝ်ႈဝႃး) တင်ႈတႄႇၶၢဝ်းယၢမ်း 09:00-12:00 မူင်း၊ မုၵ်ႉၸုမ်းၵူၼ်းၼုမ်ႇတႆး (SYO) ၸတ်းႁဵတ်း ပၢင်ပွႆးလူင်းပၢင်သွၼ် ၾိင်ႈငႄႈၾိင်ႈထုင်း လႄႈ ပူၵ်းပွင်ၼမ်ႉၵတ်ႉၵူၼ်းၼုမ်ႇ တီႈႁူင်းႁေႃ ၵေႃလိၵ်ႈလၢႆး လႄႈ ၾိင်ႈငႄႈတႆး တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ၵူၼ်းၶဝ်ႈႁူမ်ႈပၢင်ပွႆး မီးပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ၵေႃလိၵ်ႈလၢႆးလႄႈၾိင်ႈငႄႈတႆး၊ ၵူၼ်းၼုမ်ႇ ဝဵင်းလၢႆးၶႃႈ ၸိူဝ်းၼႆႉ။ သင်ၶၸဝ်ႈ တီႈဝဵင်းတူၼ်ႈတီး/ ဝဵင်းလၢႆးၶႃႈ/ ပၢင်လူင် ၸိူဝ်းၼႆႉၵေႃႈ ၶဝ်ႈႁူမ်ႈ။ မီးၽူႈၶဝ်ႈႁူမ်ႈတင်းမူတ်း 100 ပၢႆ-ယိင်းၼုမ်ႇၶဵဝ် ပွင်ႇလၢတ်ႈမႃးၼင်ႇၼႆ။

ၼႂ်းပၢင်ၵႅဝ်ႈ လုၵ်ႈႁဵၼ်း SYO ၶဝ် ၼႄတၢင်းၵႃႈ ၼူၵ်ႉ/ တူဝ်း ပိုတ်ႇပၢင်။ ဝၢႆးၼၼ်ႉ မီးတၢင်းၵႃႈ လၢႆးလႅဝ်း လၢႆးၶွၼ်ႉ ၸွမ်းၼင်ႇၾိင်ႈငႄႈၾိင်ႈထုင်းတႆး။ မီးၵၢၼ်ႁွင်ႉၽဵင်းၵႂၢမ်း တိုၼ်းသူၼ်းႁႂ်ႈၽွမ်ႉၵၼ် ၸိူဝ်းၼႆႉ။ ဝၢႆးၼၼ်ႉ မီးၵၢၼ် လဵင်ႉလူတၢင်းၵိၼ်တႆး တီႈပီႈၼွင်ႉၶႅၵ်ႇ ၽူႈၶဝ်ႈႁူမ်ႈပၢင်ပွႆးသေ ယဝ်ႉတူဝ်ႈၵႂႃႇလီငၢမ်း။

ပၢင်သွၼ် ၾိင်ႈငႄႈၾိင်ႈထုင်း လႄႈ ပူၵ်းပွင်ၼမ်ႉၵတ်ႉၵူၼ်းၼုမ်ႇ Shan Youth Organization (SYO) ၼႆႉ တေပိုတ်ႇမႃး မိူဝ်ႈဝၼ်းတီႈ 04/08/2014  (ၶၢဝ်းတၢင်း 2 လိူၼ်) တီႈဝဵင်းတူၼ်ႈတီး။ မီးလုၵ်ႈႁဵၼ်းတင်းမူတ်း 19 ၵေႃႉၶဝ်ႈႁဵၼ်း၊ ၼႂ်းၼႆႉ ပႃးလုၵ်ႈႁဵၼ်းတီႈဝဵင်းပူႇတႃႇဢူဝ်ႇ (မိူင်းၶၢင်) တႆးၶမ်းတီႈ လႄႈ တႆးလႅင် ႁူမ်ႈ 3 ၵေႃႉ။ ပိူင်လူင်မၼ်း သွၼ်ပၼ်ၵၢၼ်ပူၵ်းပွင်ၼမ်ႉၵတ်ႉၵူၼ်းၼုမ်ႇ၊ ၽႃသႃဢိင်းၵလဵတ်ႈ၊ လွင်ႈႁဵတ်းၵၢၼ်တူင်ႇဝူင်းၵူၼ်း၊ တၢင်းႁူႉတၢင်းႁၼ် ၵဵဝ်ႇၵပ်းလွင်ႈမိူင်းတႆး၊ ပိုၼ်ႉထၢၼ်ၵၢၼ်ၶၢဝ်ႇ ၸိူဝ်းၼႆႉ။

ၵူၼ်းၼုမ်ႇၸိူဝ်းမႃးၶဝ်ႈႁဵၼ်း ၶၢဝ်းတၢင်း 2 လိူၼ်ၼႆႉ မီးၵူၼ်းၼုမ်ႇၼႂ်းမိူင်းတႆး မိူင်းပၼ်ႇ၊ ၵဵင်းတွင်း၊ လၢႆးၶႃႈ၊ ႁမ်းငၢႆး ၸႄႈဝဵင်းၵေးသီး၊ တူၼ်ႈတီး၊ ပၢင်လွင်း၊ ၾၢႆၶုၼ်၊ ဝၢၼ်ႈမၢၵ်ႇသူမ်ႈၶွၼ်၊ ထုင်ႉပူင်း၊ ၼႃးၵွင်းမူး ၸႄႈဝဵင်းမိူင်းတူၼ် ၸိူဝ်းၼႆႉ တီႈဢေႇသုတ်း ၼိုင်ႈဝဵင်းလႂ် 2 ၵေႃႉ၊ တင်းမူတ်း 19 ၵေႃႉ။ သွၼ်ပၼ်ပႃး လၢႆး၊ လၢႆးၶႅၼ်ႉ၊ လၢႆးလႅဝ်း၊ လၢႆးၶွၼ်ႉ၊ လၢႆးႁွၵ်ႇ ၸိူဝ်းၼႆႉ။ ပေႃးပဵၼ်ၼၢင်းယိင်းၵေႃႈ တၢင်းၵႃႈၵူႈသႅၼ်းသႅၼ်း ၵႃႈၼူၵ်ႉ၊ လၢႆးႁႆႇၵွင်၊ လၢႆးႁႆႇၵွင် ၼူၵ်ႉ ၵွင်တူဝ်း ၸိူဝ်းၼႆႉ။

ႁူဝ်ပဝ်ႈ ၸုမ်းၵူၼ်းၼုမ်ႇတႆး (SYO) ၸၢႆးၶိူဝ်းလဵဝ် လၢတ်ႈဝႃႈ- ယိၼ်းၸူမ်းၶွပ်ႈၸႂ် ၼိူဝ်ၽူႈၸိူဝ်းမႃးၸွႆႈ ၵူႈၾၢႆႇၾၢႆႇ ပႃးၸဵမ်ၸုမ်းဢွၼ်ႁူဝ်ၼမ်းၼႃႈ ပိူဝ်ႈတႃႇပဵၼ်မႃး ပၢင်သွၼ်ၸုမ်းၵူၼ်းၼုမ်ႇ။ ယိၼ်းၸူမ်း ၶွပ်ႈၸႂ်ပႃး သိုဝ်ႇႁႅင်းၼုမ်ႇ ဢၼ်သႂ်ႇၸႂ်သႂ်ႇၶေႃးသေ သၢၼ်မိုဝ်းၵၼ်ႁဵတ်းသၢင်ႈ ႁႂ်ႈပဵၼ်မႃးပၢင်သွၼ်ၼႆႉ။ ယုမ်ႇယမ်ဝႃႈ ၸုပ်ႈၼႆႉပဵၼ်ၸုပ်ႈဢွၼ် တၢင်းသုတ်း၊ ယဝ်ႉၵေႃႈ တေမီးမႃးၸုပ်ႈတီႈသွင်ဝႆးဝႆး ဢမ်ႇႁိုင်ဢမ်ႇၼၢၼ်းၼႆႉ။ ယိူင်းဢၢၼ်းတႄႉ ၶႂ်ႈပိုတ်ႇၵႂႃႇ မိူၼ်ၶိုၼ်း ပၵ်းၵဝ်ႇပိူင်ၵဝ်ႇထႅင်ႈ- ဝႃႈၼႆ။