ပႃႇတီႇမႂ်ႇသုင်ၸိုင်ႈတႆး ဢွၵ်ႇၶေႃႈပိုၼ်ၽၢဝ်ႇ ထိုင်ၵူၼ်းသိုၵ်း ဢိၵ်ႇ ၵူၼ်းမိူင်း



ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး ဢွၵ်ႇၶေႃႈပိုၼ်ၽၢဝ်ႇ ထိုင် ၵူၼ်းသိုၵ်း ၵူၼ်းမိူင်း ၵူႈႁွင်ႈၵၢၼ် ႁၢမ်ႈၵဵဝ်ႇၶွင်ႈ ယႃႈမဝ်းၵမ်၊ ႁၢမ်ႈၽိတ်းမေႃး ႁဵတ်းႁၢႆႉတီႈၵၼ်၊ ႁၢမ်ႈပူၼ်ႉပႅၼ်ၶေႃႈၸီႉသင်ႇ။


ဝၼ်းတီႈ 25/09/2014  ၶွမ်ႊမတီႊငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး ဢွၵ်ႇၶေႃႈပိုၼ်ၽၢဝ်ႇထိုင် လုၵ်ႈတပ်ႉ ဢိၵ်ႇၽူႈၵွၼ်းတပ်ႉ၊ ၽူႈၵွၼ်းႁွင်ႈၵၢၼ်၊ ၾၢႆႇၽွင်းငမ်း၊ ၾၢႆႇသိုၵ်းလႄႈ ပေႃႈမႄႈၵူၼ်းမိူင်းၵူႈၸိူဝ်ႉၸၢတ်ႈ ၸၢဝ်းၶိူဝ်းတင်းသဵင်ႈ။ ႁၢမ်ႈၵဵဝ်ႇၶွင်ႈယႃႈမဝ်းၵမ်၊ ႁၢမ်ႈၸႂ်ႉၵွင်ႈၵၢင်ႇ ၶွင်မီးၶူမ်းတေႃႇၵၼ်၊ ႁၢမ်ႈပူၼ်ႉပႅၼ် ၶေႃႈပူင်သင်ႇ ၸိူဝ်းၼႆႉ။

ၼႂ်းၶေႃႈပိုၼ်ၽၢဝ်ႇလၢတ်ႈဝႃႈ - ၵူၼ်းသိုၵ်းဢိၵ်ႇၵူၼ်းမိူင်း ၼႂ်းပိုၼ်ႉတီႈၼႃႈလိၼ် ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) တင်းသဵင်ႈ တၵ်းတေဢမ်ႇလႆႈ ၵဵဝ်ႇၶွင်ႈၸွမ်းယႃႈမဝ်းၵမ် (သူႇ/သမ်း/ ၵိၼ်/ၶၢႆ) လၵ်ႉလွမ်တေႃႉသူင်ႇ ၶဝ်ႈဢွၵ်ႇ။

ၵူၼ်းသိုၵ်းဢိၵ်ႇၵူၼ်းမိူင်း ၼႂ်းပိုၼ်ႉတီႈၼႃႈလိၼ် SSPP/SSA ၵုမ်းၵမ်ၼၼ်ႉ ပေႃးမီးလွင်ႈႁၼ်ထိုင် ဢမ်ႇမိူၼ်ၵၼ်သေ ၵိူတ်ႇၵၢၼ်ၽိတ်းၽႅၵ်ႇထဵင်မေႃးၵၼ်ၸိုင် တေဢမ်ႇလႆႈၸႂ်ႉတိုဝ်းၶိူင်ႈမိုဝ်း ၵွင်ႈၵၢင်ႇ၊ ၽႃႉ/ လႅဝ်း/ မိတ်ႈ/ ႁွၵ်ႇလၢပ်ႇ ဢၼ်ၸၢင်ႈဢဝ်ၵူၼ်းတၢႆ/ ဝၢတ်ႇၸဵပ်း ႁဵတ်းတီႈၵၼ်။ တေလႆႈဢဝ်လၢႆး ဢူၼ်ႈဢွၼ်ႇ သိုဝ်ႈသႂ် ဢုပ်ႇဢူဝ်းၵႄႈလိတ်ႈၵၼ်ၵႂႃႇ ၸွမ်းၼင်ႇပိူင်မၢႆမီႈမီးဝႆႉ။

သင်ဝႃႈမီးမႃးလွင်ႈ ဢမ်ႇၸွမ်းၶေႃႈပူင်/ ၶေႃႈၸီႉသင်ႇ/ ၶေႃႈပိုၼ်ၽၢဝ်ႇ၊ လူၼ်ႉလိူဝ်ပူၼ်ႉပႅၼ်ၼႆၸိုင် ၸွမ်းၼင်ႇပိူင်ၵၢၼ် SSPP/SSA တမ်းဝၢင်းဝႆႉၼၼ်ႉ တေလႆႈထုၵ်ႇဢဝ်လိူင်ႈ တူတ်ႈ (တၢမ်ႇ) ၼၵ်းၼႃ- ၼႆယဝ်ႉ။




 
© 2012 All Rights Reserved | Asean Celebrity | Fonts @ AtFonts | Free Templates