မၢၵ်ႇတႅၵ်ႇၼႂ်းဝၢင်းႁိူၼ်း ၽူႈၶဝ်ႈပႃႇတီႇ ႁူဝ်သိူဝ် ၼမ်ႉၶမ်း
ၽွင်းၾႆးၾႃႉမွတ်ႇ/ လပ်း တီႈဝဵင်းၼမ်ႉၶမ်း၊ မီးၵူၼ်း ဢဝ်မၢၵ်ႇတႅၵ်ႇ
ဝိုတ်ႉပွႆႇသႂ်ႇႁိူၼ်း ၽူႈၶဝ်ႈပႃႇတီႇႁူဝ်သိူဝ် လႄႈၽူႈၵမ်ႉၸွႆႈ
ၾၢႆႇၽွင်းငမ်းၸႄႈဝဵင်း၊ လၢမ်းၵၼ်ဝႃႈ ပဵၼ်ၵၢၼ်လွၵ်ႇငိုတ်ႈ။
ႁႆွးၸၢၵ်ႇမၢၵ်ႇတႅၵ်ႇ ၸွမ်းတူဝ်ၸၢႆးၺုၼ်ႉမွင်ႇ |
ဝၼ်းတီႈ 18/09/2014 ၵၢင်ၶမ်ႈယၢမ်း 8
မူင်းၶိုင်ႈ မီးၵူၼ်းသွင်ၵေႃႉ ၶီႇလူတ်ႉၶိူင်ႈသေ ဢဝ်မၢၵ်ႇတႅၵ်ႇ
မႃးဝိုတ်ႉပွႆႇသႂ်ႇ ၼႂ်းဝၢင်းႁိူၼ်း ၽူႈၶဝ်ႈၸုမ်းပွင်ၵၢၼ်ငဝ်ႈငုၼ်း
ပႃႇတီႇႁူဝ်သိူဝ်ဝဵင်းၼမ်ႉၶမ်း ၸၢႆးဢွင်ႇဝိၼ်း တီႈပွၵ်ႉၼွင်ၸၢင်ႉ
ဝဵင်းၼမ်ႉၶမ်း။ ႁဵတ်းႁႂ်ႈမၢၵ်ႇတႅၵ်ႇတိူဝ်ႉသႂ်ႇ ၸၢႆးၺုၼ်ႉမွင်ႇ
ၵေႃႉပဵၼ်ပီႈၼွင်ႉၾၢႆႇမေးၼၢင်း ၸၢႆးဢွင်ႇဝိၼ်း တိူဝ်ႉဝၢတ်ႇၸဵပ်း- ၼႆယဝ်ႉ။
ၸၢႆးၺုၼ်ႉမွင်ႇၼႆႉ ၸၢၵ်ႇမၢၵ်ႇတႅၵ်ႇ
တိူဝ်ႉၸွမ်းၶႃလူင် ၸွမ်းပုမ်တင်းၸွမ်းၼႃႈ၊ ၵူၺ်းၵႃႈ ဢမ်ႇႁၢဝ်ႈႁႅင်း၊
ဢမ်ႇထိုင်တီႈလႆႈမႆႈၸႂ်၊ တိူဝ်ႉဝၢတ်ႇၸဵပ်းဢိတ်းဢွတ်းၵူၺ်း၊ မိူဝ်ႈၼႆႉ
မၼ်းၸၢႆး တိုၵ်ႉယူတ်းယႃတူဝ်မီးယူႇတီႈ ႁူင်းယႃၼမ်ႉၶမ်း-
ၵူၼ်းၼမ်ႉၶမ်းၵေႃႉၼိုင်ႈလၢတ်ႈ။
မၢၵ်ႇတႅၵ်ႇတူၵ်းသႂ်ႇပၢင်ႇတၢင်းၼႃႈႁိူၼ်းၶဝ်၊
ၶဝ်ႈလိၼ်ၵႂႃႇတၢင်းလိုၵ်ႈမွၵ်ႈ 3 ၼိဝ်ႉ၊ တၢင်းၵႂၢင်ႈလုၵ်းမွၵ်ႈ 5 ၼိဝ်ႉ။
လဵၵ်းမုင်းတီႈႁိူၼ်းၵေႃႈ ပွင်ႇၵႂႃႇၽွင်ႈ၊ လႅပ်ႈတေပဵၼ်လွင်ႈလွၵ်ႇငိုတ်ႈၵၼ်၊
ၵွပ်ႈဝႃႈၸၢႆးဢွင်ႇဝိၼ်းၼႆႉ ပေႃးၵိူတ်ႇပၼ်ႁႃမႃး မၼ်းၸုၵ်းၾၢႆႇၵူၼ်းမိူင်းသေ
လၢတ်ႈ လူၺ်ႈဢမ်ႇၵူဝ်ဢမ်ႇႁႄ၊ ပေႃးပဵၼ်ၽွၼ်းလီ ပိူဝ်ႈတႃႇၵူၼ်းမိူင်းၼႆႉ
ဢမ်ႇၵဵင်ၸႂ်ၽႂ်- ၼႆယဝ်ႉ။
ၸၢႆးဢွင်ႇဝိၼ်းၼႆႉ
ၼွၵ်ႈသေပဵၼ်ၽူႈၶဝ်ႈၸုမ်းပွင်ၵၢၼ်ငဝ်ႈငုၼ်း ပႃႇတီႇႁူဝ်သိူဝ် တီႈၼမ်ႉၶမ်းယဝ်ႉ
ပဵၼ်ပႃး ၽူႈၵမ်ႉၸွႆႈၾၢႆႇၽွင်းငမ်းၸႄႈဝဵင်း ၼမ်ႉၶမ်း။
သြႃႇၸၢႆးဢွင်ႇဝိၼ်းၼႆႉ
မၼ်းပဵၼ်ၵူၼ်းၵေႃႉဢၼ် ၸုၵ်းၾၢႆႇၵူၼ်းဝၢၼ်ႈၵူၼ်းမိူင်းသေ တေႃႇသူႈမႃးတႃႇသေႇ၊
သမ်ႉတေမီးၽႂ်ၶႂ်ႈမႃးႁဵတ်းႁၢႆႉတေႃႇမၼ်း။ ၵူၼ်းၵေႃႉဢၼ်ႁဵတ်းၵႂႃႇၼႆႉ
လႅပ်ႈတေလၢမ်းႁူႉလႆႈယူႇ၊ ၵူၺ်းၵႃႈ ပႆႇႁတ်းလၢတ်ႈၸိုဝ်ႈ-
ၵူၼ်းၼမ်ႉၶမ်းသိုပ်ႇလၢတ်ႈ။
ၾၢႆႇၼိုင်ႈတၢင်းၼိုင်ႈ တီႈဝဵင်းၼမ်ႉၶမ်း
ၸိုင်ႈတႆးပွတ်းႁွင်ႇၼႆႉ မိူဝ်ႈဝႃးတင်းမိူဝ်ႈသိုၼ်း ၾႆးၾႃႉၵေႃႈမွတ်ႇ၊
ၵူၼ်းမိူင်းၵေႃႈ လႆႈၵူဝ်ႁႄလွင်ႈႁူမ်ႇလူမ်ႈၶဝ်ဝႆႉ။ လွင်ႈၼႆႉ ၶႂ်ႈတုၵ်းယွၼ်း
တီႈလူင်ပွင်ၸိုင်ႈ ယႃႇပေႁႂ်ႈၾႆးၾႃႉ ၶၢတ်ႇသေ ႁႂ်ႈပၼ်လွင်ႈႁူမ်ႇလူမ်ႈ
တီႈၵူၼ်းဝၢၼ်ႈၵူၼ်းမိူင်း- ၵူၼ်းမိူင်းတုၵ်းယွၼ်းၼင်ႇၼႆ။
Tags: General, News