ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 17/09/2014 (တဵင်ႈၶိုၼ်းၸၢႆႉ) ၵၢင်ၼႂ်မွၵ်ႈယၢမ်း 2 မူင်း၊ ၼမ်ႉတႄႇလုပ်ႇၼွင်းထူမ်ႈ ၼႂ်းပိုၼ်ႉတီႈလၢႆတီႈ လၢႆပွၵ်ႉ ၼႂ်းၸႄႈဝဵင်းတႃႈၶီႈလဵၵ်း၊ တေႃႇထိုင်ဝၼ်းတီႈ 18 ၵေႃႈ ၼမ်ႉပႆႇယွမ်းလူင်း။ မိူဝ်ႈၼႆႉၵၢင်ၼႂ် ဝၼ်းတီႈ 19 ၼမ်ႉယူပ်ႈလူင်း/ ယွမ်းလူင်းၵႂႃႇသေတႃႉ မၢင်တီႈၸိူဝ်းပဵၼ်တီႈၶူင်ႈတီႈယၢၼ်းၼၼ်ႉ ၼမ်ႉတိုၵ်ႉၶင်/ထူမ်ႈဝႆႉယူႇ။

ၼႂ်းဝဵင်းတႃႈၶီႈလဵၵ်းၼႆႉ ပိုၼ်ႉတီႈဢၼ်ၼမ်ႉထူမ်ႈၼမ် ပဵၼ်ပွၵ်ႉသၼ်သၢႆးတႆး၊ ပုင်းထုၼ်၊ ၵၢတ်ႇတႃႈလေႃႉ။ ၶူဝ်းၶွင်ဢၼ်လႆႈလူႉသုမ်းၵႂႃႇ ပဵၼ်လူတ်ႉၵႃး လႄႈ လူတ်ႉၶိူင်ႈ။ ၼႂ်းၵၢတ်ႇတႃႈလေႃႉ ဢၼ်လူႉသုမ်းၼမ် ပဵၼ်ထူင်ပႃးၼၢင်းယိင်း တင်း သွၵ်းတိၼ်ၶႅပ်းတိၼ် ဢိၵ်ႇ ၶူဝ်းၼုင်ႈတၢင်းမႆၸိူဝ်းၼႆႉ- ၼႆယဝ်ႉ။

ၼမ်ႉထူမ်ႈ တီႈတႃႈၶီႈလဵၵ်းပွၵ်ႈၼႆႉ ႁႅင်းလိူဝ်ပူၼ်ႉမႃးမိူဝ်ႈဝၼ်းတီႈ 06/09/2014 ။ ၵူၺ်းၵႃႈ ၼမ်ႉထူမ်ႈၵမ်းၼႆႉ ဢမ်ႇလႆႈငိၼ်း လွင်ႈၵူၼ်းဝၢတ်ႇၸဵပ်း လူႉတၢႆ။ ၾၢႆႇၼိုင်ႈတၢင်းၼိုင်ႈ ၼႂ်းၾင်ႇထႆးတၢင်းဝဵင်းမႄႈသၢႆၵေႃႈ ၼမ်ႉထူမ်ႈၼင်ႇၵဝ်ႇ။