ယၢမ်းတဵင်ႈၶိုၼ်းၸၢႆႉၶွင်ၶိုၼ်းဝၼ်းတီႈ 16 ၊ ၼႂ်ၸဝ်ႉၶွင်ဝၼ်းတီႈ 17/09/2014 မွၵ်ႈယၢမ်း 1 မူင်း၊ မီးၸုမ်းယိပ်းၵွင်ႈၵၢင်ႇၸုမ်းၼိုင်ႈ၊ ဢမ်ႇႁူႉၸၵ်းၸုမ်းၸၵ်းၾၢႆႇ၊ လၢတ်ႈၵႂၢမ်းမၢၼ်ႈၵႂၢမ်းတႆးၼင်ႇၵၼ် ၵႂႃႇၽဵဝ်ႈမူၺ်ႉ ၵူၼ်းၶၢႆယႃႈ/ၵိၼ်ယႃႈ ၼႂ်းတူင်ႈၼႃး ဢၼ်မီးၼႂ်းၵႄႈပွၵ်ႉၸွၼ်ၸေႃႇ တင်း ပွၵ်ႉဝဵင်းၼၢင်း ၸႄႈဝဵင်းမူႇၸႄႈ ၸိုင်ႈတႆးပွတ်းႁွင်ႇ။ ႁဵတ်းႁႂ်ႈမီးၵူၼ်းတၢႆ 3 ၵေႃႉ- ၼႆယဝ်ႉ။

ၸၢႆးလိုၼ်း ၵူၼ်းပွၵ်ႉၸွၼ်ၸေႃႇလၢတ်ႈဝႃႈ- မိူဝ်ႈၶဝ်ၶဝ်ႈမႃးၽဵဝ်ႈမူၺ်ႉယႃႈမဝ်းၵမ်ၼၼ်ႉ လႆႈၽိတ်းမေႃး ၵၼ်သေ မီးၵူၼ်းတၢႆ 3 ၵေႃႉ။ မိူင်းလႅင်းယဝ်ႉ ၸဝ်ႈၼႃႈတီႈၾၢႆႇၽွင်းငမ်းၶဝ် ၶဝ်ႈၵႂႃႇထတ်းတူၺ်း ၼႂ်းတူင်ႈၼႃးၼၼ်ႉ ႁၼ်တူဝ်တၢႆၵူၼ်း 2 ၵေႃႉ၊ တူဝ်တၢႆတႃႇၵေႃႉၼိုင်ႈ လွင်ႈၸွမ်းၼမ်ႉပေႃႈၵႂႃႇ။ ၵူၼ်းတၢႆၼႂ်း တူင်ႈၼႃး 2 ၵေႃႉၼၼ်ႉ တႃႇၵေႃႉၼိုင်ႈပဵၼ်ၶၢင်၊ တႃႇၵေႃႉၼိုင်ႈပဵၼ်မၢၼ်ႈ၊ ပဵၼ်ၵူၼ်းၵုမ်းၵၢတ်ႇၶၢႆယႃႈ တီႈၼၼ်ႈ- ဝႃႈၼႆ။

ၵူၼ်းၼႂ်းပိုၼ်ႉတီႈၶဝ်ၵေႃႈဝႃႈ- ယွၼ်ႉပိူဝ်ႈၾၢႆႇၽွင်းငမ်း ၸဝ်ႈဢႃႇၼႃႇၶဝ်၊ လူင်ပွင်ၸိုင်ႈၶဝ် ဢမ်ႇမႃး ၽဵဝ်ႈမူၺ်ႉ ၵူၼ်းသူႇ သမ်း သိုဝ်ႉၶၢႆယႃႈလႄႈ ၸုမ်းယိပ်းၵွင်ႈၵၢင်ႇတူင်ႉၼိုင် ၼႂ်းပိုၼ်ႉတီႈၵေႃႈ လႆႈမႃးၽဵဝ်ႈမူၺ်ႉၵႂႃႈ- ဝႃႈၼႆ။

ပွတ်းထုင်ႉၼႆႉ ယွၼ်ႉပိူဝ်ႈယႃႈမဝ်းၵမ်လိူင်ႇၼမ်သေ ၵူၼ်းၼုမ်ႇတင်းၼမ်တင်းလၢႆၵေႃႈလႆႈ တၢင်းယၢမ်ႈလူႉ။ ပၼ်ႁႃယႃႈမဝ်းၵမ်ၼႆႉ ဝၼ်းၼိုင်ႈယဝ်ႉဝၼ်းၼိုင်ႈ ယႂ်ႇမႃးတိၵ်းတိၵ်း၊ လီမႆႈၸႂ်တႄႉတႄႉ- ၵူၼ်းမူႇၸႄႈ လုင်းသွႆႈၶမ်းလၢတ်ႈ။