ၵဵဝ်ႇၵပ်းလွင်ႈၼႆႉ မီးပလိၵ်ႈၵုၼ်လူင် (ႁူဝ်ပၢင်ႇ) ၵေႃႉၼိုင်ႈ၊ ၸိုဝ်ႈဝႃႈမွင်ႇယူႇမွင်ႇ လၵ်ႉပၢႆႈတပ်ႉသေ မႃးတေႃႇလွင်း ၼႂ်းဝဵင်းမူႇၸႄႈ ၸိုင်ႈတႆးပွတ်းႁွင်ႇ။ ဝၢႆးသေမၼ်းလွင်းသုမ်းယဝ်ႉ ထိုင်မႃးမိူဝ်ႈဝၼ်းတီႈ 14/09/2014 ယၢမ်း ၵၢင်ၶမ်ႈ ၵႂႃႇမိူဝ်းၸူၼ်ႁိူၼ်းၵူၼ်းမိူင်း တီႈပွၵ်ႉၵွင်းမူးလွႆ ၸႄႈဝဵင်းၼမ်ႉၶမ်း၊ မၢႆႁိူၼ်း 137 ၊ ၸဝ်ႈႁိူၼ်းၸိုဝ်ႈ ၵူဝ်ႇမွင်ႇၸဵင်ႇ+ၼၢင်းၵဵင်၊ ၵူၺ်းၵႃႈ ဢမ်ႇလႆႈငိုၼ်းတွင်းသင် ယင်းထုၵ်ႇၸဝ်ႈၼႃႈတီႈၾၢႆႇႁူမ်ႇလူမ်ႈ ၼႂ်းပွၵ်ႉ တီႉၺွပ်း လႆႈထႅင်ႈ။

ၶိူင်ႈမိုဝ်းၼႂ်းၵၢၼ်ၸူၼ်ၼၼ်ႉ မၼ်းပႃးမိူဝ်း ၶိူင်ႈလဵၵ်းပၼ်ႇသႄႈ (ၶႆၶူင်ႊ) (ၵျွၵ်ႉလႄႉ) ဢၼ်ၼိုင်ႈ တင်း ၵွင်ႈပွတ်းပွမ် လဝ်းၼိုင်ႈ ၶိုၼ်ႈၵႂႃႇၼိူဝ်ႁိူၼ်းသေ ၵႂႃႇယႃႉမၢၵ်ႇသေႃးၽၵ်းတူယဝ်ႉ ၶဝ်ႈၵႂႃႇၼႂ်းႁိူၼ်း၊ ၵမ်တင်းၶိူင်ႈလဵၵ်းပၼ်ႇသႄႈ သေ ငႃၶေႃးၸဝ်ႈႁိူၼ်း ၼၢင်းၵဵင် ႁႂ်ႈပိုတ်ႇပၼ်တိူၵ်ႈငိုၼ်း ဢၼ်ၵဵပ်းဝႆႉ။ ၼၢင်းၵဵင်ၵေႃႈ တေႃႇသူႈၶိုၼ်း ဝၵ်ႉဢဝ်လႆႈ ၶိူင်ႈပၼ်ႇသႄႈမၼ်း ၵူၺ်းၵႃႈ ထုၵ်ႇတႅင်းတိူဝ်ႉၺႃး တီႈၶေႃးဢိတ်းၼိုင်ႈ။ မၢၼ်ႈပလိၵ်ႈၵေႃႉၸူၼ်ၼၼ်ႉ သမ်ႉဢဝ် ၵွင်ႈပွတ်းငႃ၊ ၼၢင်းၵဵင်ႁူႉဝႃႈ ပဵၼ်ၵွင်ႈပွတ်းပွမ်ၵူၺ်းလႄႈလမ်းဝၵ်ႉၸၼ်၊ ၶိင်းပလိၵ်ႈမၢၼ်ႈၼၼ်ႉၵေႃႈ လႅၼ်ႈပၢႆႈဢွၵ်ႇ ႁိူၼ်းၵႂႃႇ၊ ၽွင်းၶိင်းပလိၵ်ႈမၢၼ်ႈၼၼ်ႉတေၶၢမ်ႈႁူဝ်ႉ ဝၢင်းႁိူၼ်းႁိမ်းၽၵ်းတူသမ်ႉမီးလဵၵ်းလႅမ်ႈၼိုင်ႈ၊ ၼၢင်းၵဵင်ၸင်ႇ တၢဝ်းဢဝ်လႅမ်ႈလဵၵ်းၽၢတ်ႈပေႃႉသႂ်ႇလႄႈ ႁူမ်ႈဝႃႈပလိၵ်ႈမၢၼ်ႈၼၼ်ႉပူၼ်ႉဢွၵ်ႇဝၢင်းႁိူၼ်းၵႂႃႇလႆႈသေတႃႉ ၼၢင်းၵဵင် သမ်ႉႁွင်ႉသႅၼ်ႇႁႂ်ႈပိူၼ်ႈမႃးၸွႆႈထႅင်ႈ။

ၽွင်းယၢမ်းၼႆႉ တီႈဝဵင်းမူႇၸႄႈ ၾႆးၾႃႉမွတ်ႇ (လပ်း) တင်ႈတႄႇဝၼ်းတီႈ 13 တေႃႇထိုင်ဝၼ်းတီႈ 19/09/2014 ။ ၵွပ်ႈဢမ်ႇမီးၾႆးလႄႈ ပေႃးထိုင်ၵၢင်ၶမ်ႈမႃး မီးၸဝ်ႈၼႃႈတီႈၾၢႆႇႁူမ်ႇလူမ်ႈၼႂ်းပွၵ်ႉၼႂ်းယွမ်ႇ ၶီႇလူတ်ႉၵႃးပၼ်လဵပ်ႈ လူလွမ်ထတ်းတူၺ်း ပွၵ်ႉၼိုင်ႈယဝ်ႉပွၵ်ႉၼိုင်ႈ၊ ၵိဝ်ႇၼိုင်ႈယဝ်ႉၵိဝ်ႇၼိုင်ႈ။  သမ်ႉမႅၼ်ႈမိူဝ်ႈ ၾၢႆႇႁူမ်ႇလူမ်ႈၶဝ်ႈမႃးၼႂ်းပွၵ်ႉ ဝၢၼ်ႈၵွင်းမူးလွႆလႄႈ ဢွၼ်ၵၼ်တီႉၺွပ်းလႆႈပလိၵ်ႈမၢၼ်ႈၵေႃႉၼၼ်ႉ။

လွင်ႈဢၼ်ပလိၵ်ႈမၢၼ်ႈပၢႆႈတပ်ႉၵေႃႉၼႆႉ မႃးယႃႉမၢၵ်ႇသေႃးတၢင်းၼွၵ်ႈသေ ၶဝ်ႈႁိူၼ်းလႆႈၼၼ်ႉ ၵွပ်ႈဝႃႈၶမ်ႈၼၼ်ႉ ၽူဝ်ၼၢင်းၵဵင် (ၵူဝ်ႇမွင်ႇၸဵင်ႇ) ဢွၵ်ႇၵႂႃႇတၢင်းၼွၵ်ႈ။ ၼၢင်းၵဵင်သမ်ႉဝႃႈ ပေႃးမႃးၶိုၼ်း ၶၢၼ်ႉၵႂႃႇပိုတ်ႇပၼ်ၽၵ်းတူ၊ ႁႂ်ႈၶတ်းသေႃးတၢင်းၼွၵ်ႈသေၵႂႃႇ၊ ပေႃးပွၵ်ႈမႃးၵေႃႈပိုတ်ႇဢဝ် ႁင်းၵူၺ်း- လႆႈႁူႉၼင်ႇၼႆ။

ၽူႈႁၢႆႉ ပလိၵ်ႈမၢၼ်ႈ မွင်ႇယူႇမွင်ႇၼႆႉ ထုၵ်ႇၼမ်းတူဝ်ဢဝ်ၵႂႃႇထတ်းထၢမ် တီႈႁူင်းပလိၵ်ႈ၊ ၵူၺ်းၵႃႈ ၸဝ်ႈၼႃႈတီႈ ပလိၵ်ႈၶဝ် ဢမ်ႇဢဝ်လိူင်ႈလွင်ႈမၼ်းယိပ်းၵွင်ႈပွမ် ၵႂႃႇၸူၼ်ႁိူၼ်းပိူၼ်ႈ ပႃးၸဵမ်လွင်ႈတေႃႇလွင်း ၸိူဝ်းၼႆႉ။ ၵူၺ်းပၼ် တၢင်းၽိတ်း တူတ်ႈ(တၢမ်ႇ)ၶွၵ်ႈ လွင်ႈမၼ်းပဵၼ်ပလိၵ်ႈၵေႃႉၼိုင်ႈသေ လၵ်ႉပၢႆႈဢွၵ်ႇတပ်ႉၼၼ်ႉၵူၺ်း။

ၵပ်းၵၢႆႇလွင်ႈၼႆႉ ၸဝ်ႈၼႃႈတီႈပလိၵ်ႈၶဝ်ဝႃႈ- လွင်ႈလၵ်ႉၶဝ်ႈၼႂ်းႁိူၼ်းပိူၼ်ႈ ၸူၼ်ပိူၼ်ႈ ၸိူဝ်းၼႆႉ ယႃႇပေဢဝ်သႂ်ႇ (ၼႂ်းၶၻီး-ဢမု) ယဝ်ႉ၊ ပေႃးသူဢဝ်သႂ်ႇၵေႃႈ မၼ်းဢမ်ႇတုမ်ႉတိူဝ်ႉသင်၊ မၼ်းတူၵ်းၶွၵ်ႈ 4-5 ပီၵူၺ်း၊ ႁႂ်ႈဢဝ်လိူင်ႈ လွင်ႈမၼ်းလၵ်ႉပၢႆႈတပ်ႉ တီႈၵုၼ်လူင်ၼၼ်ႉၵူၺ်း- ဝႃႈၼႆ။ လွင်ႈၼႆႉ ၾၢႆႇၽွင်းငမ်းၶဝ်ၵေႃႈ ဢမ်ႇလၢတ်ႈ သင်ၸွမ်း၊ ႁဵတ်းႁႂ်ႈၵူၼ်းမိူင်းမူႇၸႄႈ ဢမ်ႇႁၢၼ်ႉၸႂ်။

ၵူၼ်းမိူင်းတီႈဝဵင်းမူႇၸႄႈၶဝ် လၢတ်ႈဝႃႈ- ၸဝ်ႈၼႃႈတီႈပလိၵ်ႈၶဝ်၊ ၾၢႆႇၽွင်းငမ်းၸႄႈဝဵင်း ၸႄႈတွၼ်ႈၶဝ် ၸိူဝ်းၼႆႉ ဢမ်ႇႁဵတ်းၵၢၼ်သင်။ ပဵၼ်မႃးလိူင်ႈၸိူင်ႉၼႆၵေႃႈ ဢမ်ႇၵႅတ်ႇၶႄႁႄႉၵင်ႈပၼ်ၵူၼ်းမိူင်း၊ ဢမ်ႇဢဝ်လိူင်ႈသင်ပၼ်။ ယႃႇဝႃႈၵူၼ်းမိူင်း တေႃႈၸဝ်ႈၼႃႈတီႈပလိၵ်ႈၶဝ်ၵေႃႈ ၼမ်ႉၼမ်းတၢင်းယၢမ်ႈ(ၸႃရိတ်ႉတ)လူႉ၊ ပေႃးၸိူင်ႉၼႆ ၵူၼ်းမိူင်း သမ်ႉတေႁဵတ်းႁိုဝ် ယုမ်ႇယမ်ဝၢင်းၸႂ်လႆႈ ၼိူဝ်ၸဝ်ႈၼႃႈတီႈၶဝ်။ ပေႃးပဵၼ်ၸိူင်ႉၼႆၵႂႃႇတိၵ်းတိၵ်း မိူင်းမူႇၸႄႈၵေႃႈ တိုၼ်းဢမ်ႇၶိုၼ်ႈယႂ်ႇမႃးလႆႈ- ဝႃႈၼႆ။

ၵူၼ်းမိူင်းမူႇၸႄႈၶဝ်ယင်းလၢတ်ႈထႅင်ႈဝႃႈ- ယွၼ်ႉၵၢၼ်တေႃႇလွင်းလႄႈ ၸင်ႇပဵၼ်မႃးလွင်ႈႁဵတ်းႁုၵ်းႁၢႆႉ၊ ၵူၺ်းၵႃႈ သမ်ႉဢမ်ႇထတ်း ဢမ်ႇဢဝ်တၢင်းၽိတ်း လွင်ႈတေႃႇလွင်း။ ပေႃးႁဵတ်းၸိူင်ႉၼႆ လွင်ႈၵေႃႇၵၢၼ်ႁၢႆႉၸိူဝ်းၼႆႉ တေမီးမႃး ထႅင်ႈတင်းၼမ်။ တေႃႈၼင်ႇပဵၼ်ပလိၵ်ႈၵေႃႉၼိုင်ႈ တေႃႇလွင်းၵွတ်းယဝ်ႉ ၵႂႃႇႁဵတ်းႁၢႆႉတီႈၵူၼ်းမိူင်းၸိူင်ႉၼႆ ၵူၼ်းမိူင်း တေႁဵတ်းႁိုဝ်ဝၢင်းၸႂ်လႆႈ လွင်ႈႁူမ်ႇလူမ်ႈ- ဝႃႈၼႆ။