ၸုမ်းႁုၼ်ႈမုၼ်းမႂ်ႇသုင်ၸႄႈတွၼ်ႈ ဝၢၼ်ႈ ဢိူင်ႇ (SSLDO) ပၼ်ပၢင်သွၼ်ၵူၼ်းမိူင်း
ယိူင်းဢၢၼ်း ပိူဝ်ႈတႃႇၼႂ်းၸႄႈတွၼ်ႈ ႁုၼ်ႈမုၼ်း မႂ်ႇသုင်သေ
ၸုမ်းႁုၼ်ႈမုၼ်းမႂ်ႇသုင် ၸႄႈတွၼ်ႈ/ဝၢၼ်ႈဢိူင်ႇ (SSLDO)
ၸတ်းႁဵတ်းပၢင်ႁူပ်ႉထူပ်း ဢုပ်ႇၵုမ် လွင်ႈႁုၼ်ႈမုၼ်းမႂ်ႇသုင်
ၼႂ်းလၢႆလၢႆၸႄႈဝဵင်း ၸိုင်ႈတႆးပွတ်းၸၢၼ်း။ ၼႄႉၼမ်း ၵၢၼ်ၽုၵ်ႇသွမ်ႈ၊
လွင်ႈပိူင်ၵူၼ်း လႄႈ ပၢႆးမၢၵ်ႈမီး။
ပၢင်သွၼ်တီႈဝၢၼ်ႈၼွင်ၶမ်း ဢိူင်ႇၼွင်မွၼ် ၸႄႈဝဵင်းသီႇသႅင်ႇလႄႈ ႁူပ်ႉထူပ်းဢုပ်ႇၵုမ် ၵူၼ်းဝၢၼ်ႈ |
တင်ႈတႄႇလိူၼ်ဢေႃႊၵတ်ႊသ် (2014) မႃးၼႆႉ
ၸုမ်းႁုၼ်ႈမုၼ်းမႂ်ႇသုင် (ပူၵ်းပွင်) ၸႄႈတွၼ်ႈ ၸိုင်ႈတႆးပွတ်းၸၢၼ်း
(SSLDO) ၊ ၽၢဝ်ႊၻေႊသျိၼ်ႊ (Foundation ၵုၼ်ႁဵင်၊ Foundation မဵတ်ႉတႃႇ
ၸိူဝ်းၼႆႉႁူမ်ႈမိုဝ်းၵၼ်သေ လူင်းပိုၼ်ႉတီႈ ၼႂ်းၸႄႈတွၼ်ႈလွႆလႅမ် လႄႈ
လၢင်းၶိူဝ်း၊ မိူၼ်ၼင်ႇ ၵိင်ႇၸႄႈဝဵင်းပၢင်လူင်၊ ၸႄႈဝဵင်းၵုၼ်ႁဵင်/ ၵႃလိ/
မိူင်းၼၢႆး/ လၢင်းၶိူဝ်း/ မိူင်းပၼ်ႇ/ ၵေးသီး ၸိူဝ်းၼႆႉသေ
ၶဝ်ႈႁႃဢုပ်ႇၵုမ်ၵၼ်တင်း ၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈ ၸိူဝ်းၼႆႉ။
လိုၼ်းသုတ်း ပူၼ်ႉမႃးမိူဝ်ႈဝၼ်းတီႈ
06/09/2014 ၼႆႉ လႆႈၵႂႃႇပိုတ်ႇပၢင်သွၼ် တီႈဝၢၼ်ႈၼွင်ၶမ်း ဢိူင်ႇၼွင်မွၼ်
ၸႄႈဝဵင်းသီႇသႅင်ႇလႄႈ ႁူပ်ႉထူပ်းဢုပ်ႇၵုမ် ၵူၼ်းဝၢၼ်ႈထႅင်ႈ။
ၼၢင်းဝႃႇၼု ၵေႃႉပဵၼ်ႁူဝ်ၼႃႈ
ၸုမ်းၵုၼ်ႁဵင် (ၵုၼ်ႁဵင် Foudation) ၵေႃႉဢၼ်ႁူမ်ႈမိုဝ်းၵၼ်တင်း ၸုမ်း
(SSLDO) သေ ၸတ်းႁဵတ်းပၢင်ႁူပ်ႉထူပ်းဢုပ်ႇၵုမ် (Work Shop) လၢတ်ႈဝႃႈ-
ႁဝ်းၶႃႈလႆႈလူင်း ၼႂ်းပိုၼ်ႉတီႈလၢႆလၢႆၸႄႈဝဵင်း လႄႈလႆႈလဵပ်ႈႁဵၼ်းတူၺ်းဝႃႈ
ၶူင်းၵၢၼ်ႁုၼ်ႈမုၼ်းမႂ်ႇသုင် (ၵၢၼ်ပူၵ်းပွင်) ဢၼ်လူင်ပွင်ၸိုင်ႈ
ႁဵတ်းပၼ်ၼၼ်ႉ ၵွပ်ႈသင် ဢမ်ႇပႃးၼႂ်းၸႄႈဝဵင်းၸိူဝ်းၼႆႉ။
ၵွပ်ႈၼႆလႆႈလူင်းၵႂႃႇလဵပ်ႈႁဵၼ်းလႄႈႁူပ်ႉထူပ်းဢုပ်ႇၵုမ်
ၵူၼ်းၼႂ်းပိုၼ်ႉတီႈၶဝ်- ဝႃႈၼႆ။
မသၢၼ်းဝေႇ ၽူႈၶဝ်ႈပႃးၼႂ်းမဵတ်ႉတႃႇ
Foundation လၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - ႁဝ်းၶႃႈပိုတ်ႇဝႆႉ
ပၢင်သွၼ် ၵဵဝ်ႇၵပ်းလွင်ႈႁုၼ်ႈမုၼ်းမႂ်ႇသုင်ၼႆႉ မီး 3 တီႈ၊
တီႈဝဵင်းမျိတ်ႉၵျီးၼႃး ၸႄႈမိူင်းၶၢင်၊ ဝဵင်းပႃႇၵိူဝ် (မိူင်းမၢၼ်ႈ)
လႄႈဝၢၼ်ႈၼွင်ၶမ်း တီႈၼွင်မွၼ်ၼႆႉ။ ႁဝ်းၶႃႈ လႆႈလူင်းတွင်ႈထၢမ်တူၺ်း
ၵၢင်ၸႂ်ၵူၼ်းဝၢၼ်ႈၵူၼ်းသူၼ် ၸဝ်ႈႁႆႈ ၸဝ်ႈၼႃးၶဝ်ဝႃႈ ၶဝ်ၶႂ်ႈလႆႈသင်၊
ပဵၼ်ႁိုဝ်မီးႁိုဝ်ဝႆႉယူႇ၊ မီးတၢင်းယၢပ်ႇၽိုတ်ႇသင်။ ထၢမ်တူၺ်းၶဝ်သေ
လဵပ်ႈႁဵၼ်းၸွမ်း ၽွင်ႈသေ ပၼ်တၢင်းၶႆႈၸႂ်ၶဝ်ပႃးၸိူဝ်းၼႆႉ - ဝႃႈၼႆ။
ယိူင်းဢၢၼ်း ဢၼ်လႆႈပိုတ်ႇပၢင်သွၼ်ၼႆႉ
ပိူဝ်ႈတႃႇၼႂ်းၸႄႈတွၼ်ႈ ၼႂ်းတူင်ႇဝူင်းၵူၼ်း တေႁုၼ်ႈမုၼ်းမႂ်ႇသုင်မႃး။
လႆႈတွင်ႈထၢမ်လႄႈ ပၼ်တၢင်းႁူႉတၢင်းႁၼ် တီႈၵူၼ်းဝၢၼ်ႈၵူၼ်းသူၼ်ၶဝ်
ၵဵဝ်ႇၵပ်းပၢႆးပၺ်ၺႃ၊ ပၢႆးယူႇလီ၊ ပၢႆးပိူင် ၵူၼ်း၊ ပၢႆးမၢၵ်ႈမီး၊
လွင်ႈၵၢၼ်တိတ်းတေႃႇ/ တေႃႉသူင်ႇ၊ လွင်ႈၶူဝ်းၵုၼ်ႇသိၼ်ၵႃႉ
ဢွၵ်ႇၼႂ်းပိုၼ်ႉတီႈ/ ၸႄႈတွၼ်ႈ ဢိၵ်ႇ လွင်ႈၶူင်းၵၢၼ်
တႃႇၽုၵ်ႇတႅၼ်းတၢင်တူၼ်ႈယႃႈ ၸိူဝ်းၼႆႉၵေႃႈပႃး။
တွင်ႈထၢမ်တူၺ်းတီႈၵူၼ်းမိူင်းသေ တီႈလႂ် ယူပ်ႈယွမ်းဝႆႉ၊
တီႈလႂ်ၶႂ်ႈလႆႈတၢင်းၸွႆႈထႅမ်ၵေႃႈ ၼင်ႇၵႃႈၸွႆႈထႅမ်လႆႈၼၼ်ႉ
တေႁူမ်ႈမိုဝ်းၵၼ်တင်းမူႇၸုမ်း ဢၼ်မီး ယိူင်းဢၢၼ်းမိူၼ်ၵၼ် မိူၼ်ၼင်ႇ SSLDO
ၸွႆႈထႅမ်ၵူၼ်းဝၢၼ်ႈၵူၼ်းမိူင်း ႁႂ်ႈႁၼ်ၼမ်ႉႁၼ်တူဝ်ၵႂႃႇ- ၸီႉၸႅင်ႈပွင်ႇလႅင်း
ၼႄၼင်ႇၼႆ။
လုင်းယွတ်ႈတႆး ၽူႈၵွၼ်းပွၵ်ႉ 4
ဝဵင်းပၢင်လူင် လၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈ ဝႃႈ-
ႁဝ်းၶႃႈၵူၼ်းပၢင်လူင်ၵေႃႈ ၼင်ႇႁိုဝ်မဵတ်ႉတႃႇၽၢဝ်ႊၻေႊသျိၼ်ႊ (Foundation)
ႁဝ်းၶႃႈ တေၸၢင်ႈလူင်းမိုဝ်း ၸွႆႈထႅမ်ၵူၼ်းဝၢၼ်ႈၵူၼ်းမိူင်းၵႂႃႇ
လႆႈထႅင်ႈမိူဝ်းၼႃႈၶၢဝ်းႁိုင်ၼၼ်ႉလႄႈသင်၊ ပိူဝ်ႈတႃႇၽႅၼ်ၵၢၼ်မိူဝ်းၼႃႈ
ၸိူဝ်းၼႆႉလႄႈသင်၊ ၽွင်းၼၢင်းဝႃႇၼု ၵေႃႉပဵၼ်ၽွင်းတႅၼ်းၵူၼ်းမိူင်း
ၸႄႈဝဵင်းၵုၼ်ႁဵင် လႄႈ ပဵၼ်ႁူဝ်ၼႃႈ ၸုမ်းၽၢဝ်ႊၻေႊသျိၼ်ႊၵုၼ်ႁဵင် မႃးပၼ်ပၢင်
သွၼ်၊ မႃးဢုပ်ႇၵုမ်ၵူၼ်းဝၢၼ်ႈၵူၼ်းမိူင်း တီႈဝၢၼ်ႈၼွင်ၶမ်း ၼွင်မွၼ်
ၸႄႈဝဵင်းသီႇသႅင်ႇၼၼ်ႉ ႁဝ်းၶႃႈၵေႃႈ လႆႈၵႂႃႇ ႁူပ်ႉထူပ်းဢုပ်ႇၵုမ်
မၼ်းၼၢင်းမႃးယဝ်ႉ- ဝႃႈၼႆ။
ၵူၼ်းပၢင်လူင်
ၵေႃႉဢၼ်ၵႂႃႇၶဝ်ႈႁူမ်ႈပၢင်ႁူပ်ႉထူပ်းဢုပ်ႇၵုမ် တီႈၼွင်မွၼ် ၵေႃႈလၢတ်ႈၼႄဝႃႈ-
ႁဝ်းၶႃႈ လႆႈၵႂႃႇၶဝ်ႈႁူမ်ႈ ပၢင်ၵုမ် တီႈၼွင်မွၼ်သေ
လႆႈမႃးတၢင်းႁူႉတၢင်းႁၼ်ၼမ်တႄႉၶႃႈ။ လႆႈၵႂႃႇလဵပ်ႈႁဵၼ်း
ၵဵဝ်ႇၵပ်းၵၢၼ်ၽုၵ်ႇသွမ်ႈၼႆႉ လႆႈႁူႉမႃးဝႃႈ
ပေႃးၸႂ်ႉငႂ်ႈၾုၼ်ႇထၢတ်ႈ(မျေႇဢေႃးၸႃႇ၊ ၶေႊမီႊၶိူဝ်ႊလ်)ၼႆႉ
မၼ်းတေမီးၽေးၸိူင်ႉႁိုဝ်၊ ပေႃးၸႂ်ႉ ငႂ်ႈၾုၼ်ႇသၽႃဝ(ထမ်းမၸၢတ်ႈ)ၼႆႉ
တေပဵၼ်ၸိူင်ႉႁိုဝ် ၸိူဝ်းၼႆႉလႆႈႁူႉမႃးလီငၢမ်း။ ဝၢႆးၼႆႉမႃးၵေႃႈ
လႆႈႁၼ်ပိူၼ်ႈၸႂ်ႉ ငႂ်ႈၾုၼ်ႇသၽႃဝ (ထမ်းမၸၢတ်ႈ)ၼမ်မႃး- ဝႃႈၼႆ။
Tags: economic, News